معرض القاهرة الدولى للكتاب -1

من يوم الأربعاء الماضى 21 يناير 2009 م ويقام معرض القاهرة الدولى للكتاب الدورة رقم 41 وضيف شرف المملكة المتحدة
المعرض السنة دى والحق يقال شيك جدا وواضح الموضوع ده من الديكورات والتنظيم والدعاية وحتى الخدمات اللى بتتقدم للزوار من اول التذكرة الشيك صاحبة التصميم المحترم اللى بيليق بحدث ثقافى هام بالحجم ده .. للناس اللى متعرفش ان معرض القاهرة الدولى للكتاب هو ثانى اهم معرض دولى للكتاب على مستوى العالم بعد معرض فرانكفورت الدولى ... نرجع للتنظيم والخدمات اللى بتتقدم للزوار وبعد موضوع التذكرة موضوع الخرائط التوضيحية للمعرض فيها كل حاجة من قاعات العرض لقاعات البيع لأماكن العبادة لدورات المياة لأماكن الطعام كمان اللى السنة دى تعتبر محترمة بحكم استئجار مطاعم شهيرة لأماكن الطعام دى وتقديم الوجبات الساخنة طول اليوم للزوار

الحضور العالمى كثيف وكفاية ان ضيف شرف المعرض هى المملكة المتحدة واحنا عارفين يعنى ايه المملكة المتحدة .. ثقافة .. باع طويل فى فنون الأدب والفن

الحضور الوطنى كثيف برضه وبالرغم من ان لسه فى امتحانات لكن الزحام كبير كعادة معرض الكتاب ... حاجة تفرح ان الناس لسه بتشترى كتب وتقرأ

فى البوستات الجاية هحاول اجيب صور من جوة المعرض ونتكلم عن قاعات العرض والندوات الفنية والثقافية

وده رابط لموقع المعرض على الأنترنت

http://www.cairoibf.org/

لما نشوف

امبارح كان يوم تنصيب السيد باراك حسين اوباما كرئيس للولايات المتحدة الأمريكية خلفا لأغبى وأبغض رئيس امريكى من وجهة نظرى الشخصية الغير مأسوف على كرامته المهدرة بواسطة الحذاء العراقى الشهير .. جورج بوش الأبن

اوباما اقسم الولاء وأقسم اليمين بصفته رئيس الولايات المتحدة الأمريكية رقم 44 وبصفته اول رئيس امريكى اسود

وبعد كدة ودع الرئيس الأمريكى السابق اللى ركب الناقة .. قصدى الهليكوبتر وطار على تكساس موطنه الأصلى

واخر حاجة عملها انه وجه خطاب لأمريكا بأن الفترة الحالية فترة صعبة نظرا للظروف الأقتصادية المهببة اللى بتعيشها امريكا وزيادة اعداد البطالة ووعد بتخطى الأزمة بمجهود الكل والصبر والأمل .. كلام جميل

وبالنسبة للعالم الخارجى قال امريكا هتسيب العراق لشعبه وكفاية كدة .. ايوة بعد ما خربت طبعا بس الراجل ملوش ذنب ... وقال بالنسبة للعالم الأسلامى هنفتح صفحة جديدة مبنية على الأحترام المتبادل والحوار والمودة .. كويس لما نشوف

اول قرار خده اوباما وبصراحة عجبنى ... تعليق الأجراءات القضائية لمدة 4 شهور فى معتقل جوانتانامو احد العلامات السوداء فى تاريخ امريكا ... الراجل كان قال انه هيقفله لما يبقى رئيس .. دلوقتى علق الأجراءات يعنى توقف مؤقت .. لما نشوف

الغباء وسياسة الفوضى

سياسة الفوضى هى السياسة السائدة والصوت الأعلى فى كل الأجهزة الأدارية والهيئات فى دولتنا المهروسة
سياسة الفوضى هى اللى على طوول مخليانا دولة متخلفة ومتأخرة
سياسة الفوضى هى الناتجة عن الامبالاة بأهمية الشغل اللى بنعمله
سياسة الفوضى هى اللى بتخلينى مش طايق الشغل ولا المسؤلين عن الشغل لأنهم مش عارفين هما عاوزين ايه وبالتالى انا كمان مش عارف هما عاوزين ايه وبالتالى ايضا مفيش شغل صح بيطلع

الغباء ناتج عن سياسة الفوضى أو العكس .. الغباء هو الأصرار على سياسة الفوضى اللى واضح انها سبب كل مشكلة بتظهر فى شغلنا وحياتنا العملية

وفى النهاية احب اقول ... حسبى الله ونعم الوكيل

الطفرة الحيوانية والريادة المصرية

امبارح كنت مع جماعة صحابى فى نادى نقابة المهندسين بالزمالك وطبعا مكان فيه اكل وشرب اكيد فيه قطط
اللى لفت نظرى هو الطفرة الحيوانية فى السلسلة الغذائية واللى انفردت بيها مصر واكدت بيها ريادتها
الطفرة دى عبارة عن ان القطط تحولت بقدرة قادر من آكلات لحوم الى آكلات اى حاجة غير اللحوم !!! بعد ما القطط كانت بتاكل فضلات اللحوم والفراخ بقت بتاكل بواقى العيش الفينو وبواقى الفطير اللى بيترمى ليهم فى اى مكان زى نادى النقابة زى منا شوفت كدة.

الموضوع ممكن يكون غريب لكنه ناقوس خطر زى ما بيقول الكبار لأنه كدة يعتبر خلل فى السلسلة الغذائية وتحول بيولوجى خطير لكنه فى الأول والآخر نوع من انواع التغير المتوقع خصوصا مع المجاعات اللى بتطارد القطط والكلاب فى الشارع اللى مبقوش لاقيين حاجة ياكلوها مهو محدش بيرمى الأكل دلوقتى او على الأصح مبقاش حد يرمى الأكل الا اذا كان بايظ وده طبعا السواد الأعظم.

مصر اكدت الريادة بتاعتها فى انها خلت القطط تبطل تاكل لحمة وتاكل عيش حاف او عيش متلحوس اى حاجة .. بيتزا يعنى

العام الجديد

كل عام وانتم بخير

عام قديم انتهى بكل ما فيه من فرح وحزن وعام جديد يأتى نسأل الله ان يكون خاليا من الأحزان