الشاب تامر والبونه الجديد

كما قلت سابقا ان البوست دى للحديث الغير هام عن فلتة هذا العصر والزمان الشاب الحبسجى تامر حسنى ملك الجيل الواقع الجيل التافه الجيل اللى بنطلوناته واقعة لحد ركبه وجيباته الجينز لحد تحت الركبة من تحت ومن فوق الأيشارب والتحجيبة التمام ولا اجدعها داعية اسلامية فى مجلس نساء محترم

اعذرونى مرارتى اتفقعت من الجيل التافه وملكه الأتفه ومن الدعاية الفارغة الكذابة اللى كل همها انها تلهى الناس وتغرقهم اكتر واكتر فى بحور التفاهة والهبل بعيد عن اى حاجة مهمة فى الحياة

الشاب تامر اتحفنا بألبون جديد نازل السوق بتقله مع الفيلم العبقرى اللى اكيد هياخد جائزة اوسكار السنة الجاية الكابتن هيما اللى الفه العبقرى رجل الأعمال نصر محروس واللى الف الفيلم ليس حبا فى سواد عيون الشاب تامر لكن اكيد الناس الفاهمة فى السينما عارفة هو الف واخرج ومش بعيد هيغنى كمان حبا فى عيون الأيرادات الجامدة اللى هيحققها مجرد ظهور الشاب تامر فى الفيلم ده وراجعو ايرادات الفيلم الفلتة التحفة النادرة عمر و سلمى

الألبون ده 14 اغنية ايوة يا سادة يا كرام 14 اغنية مرة واحدة لكن المستوى العام صفر الحمد لله ولا صفر مونديال 2010 الشهير اللى ادى مصر كلها على قفاها لا مؤاخذة نفر نفر عيل عيل وخلانا فرجة قدام العالم

الأستاذ تامر الف ولحن وغنى كمان حقه امال ايه ؟ مش ملك الجيل يا جدعان ؟؟ يبقى يعمل اللى هو عاوزه طالما وراه ترسانة اعلامية وجيل تافه بيسانده وآدى الغلاف بتاع الألبون

شوفتو ملحن كام اغنية ؟؟ شوفتو مالف كام اغنية ؟؟ وطبعا مغنى كل الأغانى براحته بأة ملك الجيل بأة ... استك منه فيه بأة

اى واحد بيسمع ومتابع مزيكا يعرف ان المطرب لما يغنى من تأليف نفسه والحان نفسه بيبقى فى نغمة التكرار والتشابه فى اغانيه وبيجرب مرة وخلاص لو نجح وعنده جديد الناس بيعجبها الوضع وبتقول الله يا استاذ وطبعا عندنا امثلة كتيرة على رأسها موسيقار الأجيال (مش موسيقار ولا ملك الجيل ) الأستاذ محمد عبد الوهاب الله يرحمه لكن اللى حاصل هنا ان الشاب تامر ملوش دعوة بالكلام ده نازل تأليف وتلحين وغنا كأن مفيش حد بيألف ولا يلحن فى البلد حاجة تفقع مش كدة ؟ لو بيقول جديد ومش بيكرر نفسه اوكى لكن لما نقعد نسمع تلاقى كله شبه بعضه زى العيش البايت كدة ابو نص جنيه بيبقى عامل زى ابو ربع جنيه كله واحد

المشكلة بأة ان الشاب تامر لما تسمع الأغانى بتاعة الألبوم التحفة ده تحس انك سمعت الألحان دى قبل كدة !!! على سبيل المثال اغنية -متوصينيش- الأغنية دى جملها اللحنية كلها متاخدة من اغنية اجنبية بتتسمع فى كل الديجيهات اللى فيكى يا مصر !!

اغنية كمان اسمها -افتكرلى- تقريبا نسخة طبق الأصل من اغنية تامر ذات نفسه اللى اسمها -ارجعلى- فى الألبوم اللى فات

اغنية - بعيد عن عينى - وبالرغم من انها من كويسة نوعا ما الا انها متشابهة فى اغنية رامى صبرى -حبيبى الأولانى- من ناحيةالأسلوب والجو العام للأغنية مش فاهم هو تامر كان بايت برة لما رامى عمل الأغنية دى ولا ايه ؟

الأغنية المتخلفة اللى اسمها - هى دى - اللى هى اساس دعاية الفيلم التحفة اول مطلع فيها نفس مطلع اغنية شيرين - مش بتاعة الكلام ده - مع تعديل بسيط جدا فى التوزيع !!

اغنية كمان اسمها - ايام زمان- تعتبر افضل اغنية فى اللبوم من ناحية اللحن والكلمات لكن للأسف هى تقريبا نفس لحن وفكرة اغنية الفنان مدحت صالح - يانا- اللى غناها من حوالى شهرين فى احد الأفلام المعروضة فى السينما

اما الأغانى العبقرية بأة اللى كلها الفاظ عجيبة وغريبة لم ترد على صناع الأغانى قط فهى كتيرة الحمد لله من اول اغنية - هى دى - اللى وردت فيها جملة كوميدية للغاية بتقول ( حبك يتاخد قفش) وكانى داخل خناقة مع البنت اللى بحبها وهدب صوابعى فيها اخرج قلبها واقولها حبك يتاخد قفش بالذمة ده كلام ؟

واغنية كمان اسمها - روح قلبى - فيها حتة عجيبة برضه تامر بالغ فيها اوى لما قال طب خللى الدنيا تضايقك يوم شوف انا هعمل ايه ف الدنيا ... يا سلام ؟؟؟ طب كنت اتشطر على نفسك الأول وادى الخدمة العسكرية لما انت جامد اوى كدة وتستحمل اى حاجة ولا ايه ؟؟؟؟

انا طولت عليكو بس الموضوع زاد عن حده اوى ... روابط المعجبين بتوع الشاب تامر فى المنتديات والمواقع المختلفة الطابع الأغلب انهم مش راضيين عن الألبوم التعبان ده لكن بيكابرو برضه على اساس انه تامر يا جدعان ملك الجيل التافه او بنطلونات واقعة للركب

الله يرحمك يا حليم

طـارق الــبــوّ و عم سـعـيـد المـصــرى

انا ربنا رزقنى بمواقف قمة فى الهرتلة كل لما اركب مواصلات مش عارف ليه ... الناس اللى متابعة البلوج ده تعرف حكايتى مع ميكروباص الأشتغالات كنت عملتها بوست قبل كدة فى البلوج هنا قبل ما الغيه وارجعه تانى ... حاجة زى كدة حصلت معايا يوم

الخميس اللى هو اول امبارح بليل متأخر والحكاية كالتالى

يوم الخميس كنت مع جماعة صحابى فى التحرير وانا مروح بأة حاولت اركب ميكروباص لبيتنا من ميدان عبد المنعم رياض لكن الدنيا كانت زحمة جدا ومكنش فى مكروباصات من اللى انا عاوزها فاضطريت انى اركب ميكروباص تانى يوصلنى قريب من بيتنا وبعد كدة انزل منه اركب تاكسى لحد بيتنا

ركبت ميكروباص خط امبابة وركبت جمب شاب ماشاء الله لا قوة الا بالله عضلات ومجانص ولبس نضيف لكن اول ما فتح بقه كأن جبل يتحدث طريقته فى الكلام تحس انه هياكلك او يلطشك قلمين لو قلتله مساء الخير المهم كان الشاب ده قاعد قدامه اتنين زمايله برضه وبنفس الهيئة اللبس الشيك والصوت الجهورى المفزع عاااادى مش مشكلة ، انطلق بينا الميكروباص وكان التلاتة بيتكلمو عن واحد صاحبهم بطل يشرب مخدرات وانهم مستغربين منه اوى قلت عادى وهوب الشاب المفتول العضلات اللى جمبى قال لواحد من الأتنين صحابه اللى قاعدين قدامنا ... ايه يا جدعان هو النهاردة مش هنشرب خابور ولا حاجة ؟؟؟ طبعا كان يقصد سيجارة بانجو أو حشيش واحد من صحابه قاله ايه يا عم عينى عينك كدة قدام الناس ؟ قاله بالصوت الجهورى اياه وايه يعنى يا عم هو حد له عندنا حاجة ؟؟؟؟ انا سمعت الكلمة دى وبرج من دماغى طار كنت همسك فيه واهزقه بالذوق لكن الناس دى مينفعش معاها الذوق ... سكتو لمدة ثوانى بعدها نفس الشاب قال فجأة ... انا مش عارف ليه ربنا مزنقها كدة عليا ... مفيش شغل ومفيش فلوس !!! ساعتها كنت هرد عليه اقوله ربنا بيفتحها على اللى عنده دم وبيخاف منه بس قلت يا واد طنش خااااالص سيبه هو ودماغه وبعدها الموبايل بتاع الشاب ده رن راح ماسكه وفاتح الشباك وبص للسما وقال ... يارب يكون شغل والنبى يارب بحق جاه النبى شغل والنبى يارب !!!! ورد على الموبايل .. ايوة مين ؟ ايوة يا طارق يا بــوّ ايه ؟ اه انا رايح له دلوقتى هجيبه بكرة الصبح واجيلك نقف معاك ع الفرشة !!! وبعدعا قفل معاه ووجه الكلام للأتنين اللى قدامه ان طارق باشا البـوّ احد اباطرة فرش الهدوم الجديدة فى منطقة وسط البلد عاوز اتنين يقفو على الفرشة بكرة علشان مفيش حد شغال معاه ... وبعد كدة طلع الكلام عن ان منطقة وسط البلد والشباب اللى بيفرشو على الرصيف بالتى شيرتات والبنطلونات ومعرفش ايه كلهم صحاب بعض وتقريبا امبراطورية واحدة ماسكها واحد اسمه شعبان النمرسى اللى بدا زيهم بفرشة قدام قهوة ريش فى طلعت حرب ودلوقتى بأة عنده مصنع فى اكتوبر بيضرب البنطلونات والهدوم الأصلية وينزلها تانى وسط البلد للعيال اللى بيفرشو

اللى طلعت بيه من الميكروباص ده ان الشعب المصرى عنده حالة ازدواجية متقدمة بيتكلم عن الحشيش والمخدرات وبعدها بثوانى بيدعى ربنا انه يرزقه بشغل !!! واللى طلعت بيه برضه ان الناس اللى بتفرش ع الرصيف فى منطقة وسط البلد بهدوم كلها هدوم مضروبة من مصانع شعبان النمرسى بمدينة 6 اكتوبر والسيد شعبان هو المسؤل عن الناس دى وعن شغلها وانه ماسك السوق ده من حديد

نزلت من الميكروباص شاورت لتاكسى عاوز اروح انام بأة كفاية كدة ربنا كرمنى واول تاكسى وقف قاللى اوكى واول ما ركبت وطلع بينا قاللى معلش يابنى رجاء خاص انا المشوار ده هاخد 5 جنيه علشان العربية شغالة بنزين مش سولار قلتله ليه يعنى ؟؟ المشوار ده كبيره اوى 4 جنيه قاللى معلش ده رجاء خاص قلتله ما علينا مع ان البنزين مغليش من اخر مرة وانا عارف التكسيات يا شغالة غاز طبيعى يا بنزين السولار دى اول مرة اعرفها قاللى انت عارف بأة العيشة ومش العيشة ولقيته لسه هيرغى وانا مفياش دماغ قلتله العيشة غالية على الكل يا اسطى قام ساكت، فجأة قاللى هو حضرتك شغال ايه ؟ قلتله ليه ؟؟ قاللى لا ابدا ادينا بنتكلم قلتله شغال مهندس حاسبات فى الجامعة الفلانية قاللى والله كويس الكومبيوتر هو دلوقتى اللى واكل السوق بالك انت لو خدتللك محل تحت البيت ولا قريب منك واخر النهار لما ترجع من الشغل تقعد فيه تصلح اجهزة وبتاع هتعدى وهتعرف تكون نفسك وتتجوز ومش بعيد تبقى جامد اوى والشركات تطلبك كمان قلتله انا مش بشتغل مهندس صيانة وماليش فى الحدوتة بتاعة المحلات دى مينفعش بعد ما طلعت عينى 5 سنين فى كلية الهندسة اقعد فى الآخر ف محل وابقى بياع قام قاللى مشى حالك ومعرفش ايه ولو عاوز تتجوز اجوزك كمان قلتله لالا شكرا انا خاطب والحمد لله كويس الحال مش وحش قاللى ربنا يكرمك وانا حمدت ربنا اننا وصلنا قام قاللى انا سعيد المصرى افتكرنى كويس وسلم على الدكتور اسماعيل شبايك انا بصتله باستغراب قاللى مش ده نائب رئيس الجامعة اللى انت شغال فيها ؟ قلتله اه ... قاللى لو شفته سلم عليه انا اعرفه معرفة شخصية وتصبح على خير

اه يا دماغى انا مش فاهم حاجة ... بجد نزلت من التاكسى وانا متلخبط هو الناس كدة طبيعية ولا انا اللى غلط علشان مستغربهم ؟؟؟؟

البوست القادم هتكلم عن الفلتة الفنية والطفرة العبقرية الشاب تامر حسنى اللى قرفنا بألبون جديد من افتكاساته مع انى مش بحبه ولا البلوج هنا يستحمل التفاهات دى بس احب اوصل صوتى ورأيى فى العك اللى بيعمله الأخ للناس كلها مبحبش اسكت

فـيلـم هـنـدى

احنا عندنا دش ... بكسر الباء وتشديدها ... والقنوات كتيييرة الحمد لله ربنا يزيد ويبارك ... قناة جديدة موجودة على القمر المصرى العظيم النايل سات اسمها (زى افلام) وزى افلام ياسادة يا كرام قناة مش مشفرة مجانية كل مهمتها فى الحياة انها تعرض الأفلام الهندى المترجمة الى اللغة العربية طوال الـ 24 ساعة يعنى صباح الغنا والرقص والألوان والضرب كمان وطبعا اوعو تنسو الحدوتة الهندية اميتاب تشان اللى بيتعرضله كل يوم خميس فيلم مخصوص ليه

القناة فكرتها حلوة اوى وهى ان الشرق الأوسط كان ولازال مولع بحاجة اسمها الفيلم الهندى لأنه من وجهة نظرى الشخصية المتواضعة فيلم كوكتيل هتلاقى فيها الكوميديا والأكشن والرومانسية والدراما وكله كله فى نفس الفيلم .. زمان كان الفيلم ممكن يوصل لأربع ساعات لو تفتكرو فيلم الشعلة والتوأمان والحاجات التحف دى اللى كانت تشتغل اول يوم العيد واول يوم العيد بس مش اى يوم فى السنة لكن دلوقتى احنا فى عصر السرعة يعنى لازم ينجزو ويقدمو كل حاجة فى نفس الفيلم بس فى وقت اقل فبقى الفيلم بالكتير ساعتين او ساعتين ونص وصعبان عليهم طبعا ازاى الفيلم يبقى اقل من اربع ساعات ؟؟

كل المقدمة دى علشان اقول حاجة واحدة بس ... مازالت الفلام الهندية كما هى نفس النمط لم تتغير منذ بدء السينما الهندية فى غزو الشرق الأوسط وخصوصا المنطقة العربية من الخليج الى النيل فقط والدليل على كدة النهاردة الصبح وانا بفطر طلعت ف دماغى اتفرج على القناة دى اسلى وقتى لحد ما انزل شغلى بحتة من فيلم هندى كله الوان زاهية وناس بتغنى ومبسوطة علشان احس ان الدنيا ربيع والجو بديع ولكن هيهاااااااات .. كان فيلم كالعادة كوكتيل كل الفكرة انه واحد مليونير متجوز واحدة جميلة جدا لكن افعالها خليته يشك فيها انها بتخونه لحد لما قتلها فى الآخر وفى المحكمة بدأت ابداعات السينما الهندية بأة اللى بتأكدلك انه فيلم هندى صرف .. المحامى بتاع الدفاع بيقول لالالا مقتلهاش بدليل ان مكالمة التليفون اللى البوليس بتاع النجدة سجلها لما القتيلة اتصلت تستنجد بيهم مجاش فيها كلمة ان جوزى هيقتلنى الحقونى وهوب ظهر واحد عجيب اشيب الرأس وقال .. جوزها هو اللى قتلها انا جوز امها الله يرحمها وانا اللى كانت بتكلمنى وتقابلنى من ورا جوزها وانا السبب ف انه يشك فيها ويقتلها ... ان ان آآآآآآآن... وطلع بأة ايه ؟؟؟ انه كان بـيـبـتـزها علشان ميروحش يقول لجوزها الراجل الغنى اللى من عيلة بأة وكدة ان امها الله يرحمها كانت سورى رقاصة !!!!! اه يا مرارتى ... وهوب قال كمان جوز ام القتيلة انا شوفته وهو بيقتلها ... وشوفته لما دفن جثتها الجبان الندل وقعد يعيط ... القاضى اتنحنح وقال نروح نعاين مسرح الجريمة هو الفيصل وهيقول اذا كان جوزها هو اللى قتلها ولا لأ ولما راحو مسرح الجريمة حفرو ولقو ايه ؟؟ ايون جثة القتيلة !!!! يا صلاة النبى ... هو فى قضية قتل من غير وجود جثة ؟؟؟؟؟؟ امال القضية شغالة على اساس ايه ان شاء الله ؟؟؟؟؟؟ اظن ان دى حاجة مش محتاجة انى اكون دارس قانون علشان اسالها لنفسى وابقى عارف انه مينفعش يكون فى قضية قتل شغالة فى المحكمة من غير وجود جثة وقاتل وعلى اساسهم بتشتغل القضية

مش بقولكم فيلم هندى ؟؟؟؟

الـــواجــــب

استاذنا .. الأستاذ طارق ادانى يا جماعة واجب ولازم احله علنى كدة على عينك يا تاجر يلا استحملو بأة الغلطات الأملائية وغير الأملائية اصلى بقالى سنين معملتش الواجب

السؤال الأول : اذكر اسم من طلب منك حل الواجب

الأجابة : الأستاذ طارق طبعا

السؤال الثانى :اذكر القوانين المتعلقة بهذا الواجب .. جارى الكتابة والتدوين

السؤال الثالث :تحدث عن ستة اسرار قد لايكتشفها من يقابلك للمرة الأولي

الأجابة : اوباااااا كدة الناس هتعرفنى على حقيقتى .. هاهاها

1-مرح جدا بالرغم من الملامح الجادة جدا جدا اللى توحى ساعات احم احم بالرخامة والدم الواقف

2-قليل النوم

3-غيور جدا واسألو اينو

4-بتضايق وبكتم ف نفسى

5-مبحبش ازعل حد مهما عمل معايا لكن بتجنبه

6-قليل الأصدقاء القريبين جدا جدا جدا

السؤال الرابع : حول هذا الواجب الي ستة مدونين واذكر اسماءهم مع روابط مدوناتهم في موضوعك

الأجابة :

1- رقـة الأحـساس

2- فضفضة

3-حـمـاتـى مــلاك

4-مـواجـهـات

وسبت تعليقات عند الناس دى اقولهم تعالو خدو الواجب بتاعكم وحلوه

بس خلاص

اقلع غماك يا تور وارفض تلف

القاهرة (ا ف ب) - قال مصدر في مديرية وزارة التعليم في مدينة الاقصر (صعيد مصر) الاثنين ان طالبا مصريا احتجز عدة ساعات وحرم من تكملة بقية امتحانات نهاية المرحلة الثانوية بعد ان وجه في ورقة اجابة امتحان الرياضيات انتقادات "للحاكم الظالم".
واوضح المصدر الذي طلب عدم ذكر اسمه ان "الطالب صفوت احمد محمد الذي يدرس في مدرسة التعليم الفني الثانوي الصناعي قسم اصلاح وصيانة المعدات الكهربائية كان يؤدي في التاسع من حزيران/يونيو الجاري امتحان الرياضيات في اللجنة 19 في الاقصر وكتب في ورقة الاجابة انتقادات ل(الحاكم الظالم) و(الشعب الجبان)".
واضاف المصدر انه "صدر القرار رقم 265 من مديرية التعليم بالاقصر في 15 حزيران/يونيو (امس) بحرمان الطالب من اداء بقية الامتحانات هذا العام".
واكد انه تم احتجاز الطالب من قبل اجهزة الامن في الاقصر عدة ساعات واستجوابه بعد ان كتب هذه العبارات في ورقة الاجابة.
وقال المصدر ان "الطالب وهو من اسرة فقيرة تصور ان المراقبين لن يسمحوا له بالغش في الامتحان وسيسمحون لزملائه الاخرين لان اهاليهم يقومون بمجاملات للمراقبين في حين ان والديه ليس لديهم الامكانيات المالية لذلك".
لكن المصدر لم يوضح السبب الذي استند اليه قرار حرمان الطالب من استكمال الامتحانات.

المصدر ... موقع مصراوى بتاريخ 16/6/2008

ايام من المزيكا

اليومين دول بعيش حالة انتشاء بقالى كتير مش عيشتها وسبب الأنتشاء ده هما سببين الحقيقة

السبب الأول : صدور البوم نجمى المفضل محمد منير بعد سلسلة طويلة معقدة من التأجيلات والألبوم بجد تحفة فنية منير ابدع الحقيقة فيه وخرج حاجات حلوة اوى اوى ويستاهل فعلا ان الواحد يستنى ويصبر على نزول الألبوم سنتين تلاتة كمان طالما هيخرج بالشكل الرائع ده وانا من مكانى هنا بقول لمـنـيــر .... شـــــــــكــــــــــرا

تحميل الألبوم من هــنـــا

السبب التانى : افتتاح واطلاق مدونة موسيقية تهتم بالموسيقى العصرية الراقية لأصحاب الذوق الرفيع والراقى فى محاولة لـتنضيف اذن المستمعين من اشباه الألحان واشباه المطربين ، المدونة دى اسسها صديقى العزيز محمد صبحى وسماها أوتـربـى ومحدش يسألنى يعنى ايه علشان انا لحد دلوقتى معرفش اسألو محمد

ياريت الحالة دى تفضل لأنها حلوة اوى الحقيقة وعلى فكرة البوست ده انا كنت عاوز اكتبه من يوم الجمعة لكن كنت مكسل اكتب واسيب البوم منير وموسيقى اوتربى ومش عاوز حاجة تشغلنى عن انى اسمع وبس