غيبوبة

أفضل وصف لليومين دول ... غيبوبة ... دولة كاملة بشعبها عايشة فى غيبوبة .. فى ناس قصدها ان الدولة دى تعيش فى غيبوبة .. فى شعوب كل أهدافها ان شعب الدولة دى يعيش فى غيبوبة

أول القصيدة كفر زى ما بيتقال .. ده طبعا عن ما يسمى ( الحوار الوطنى ) اللى المفروض انه جلسان نقاش موسعة بتضم كل أصحاب الرأى واتخاذ القرار فى البلد علشان ننور النفق اللى دخلناه ونتفق على خطوات الخروج من النفق المظلم والنهوض بالبلد بعد كبوة 30 سنة فقر وجهل وتخلف ... النتيجة طبعا وكالعادة .. اتفقنا على ألاّ نتفق .. خناقات واعتراضات بالجملة من الكل ضد الكل .. اكيد فى ناس عندها حق فى اعتراضها زى مثلا اعتراض شباب الثورة على وجود أعضاء الحزب المنحل المسؤول عن تخلف شعب كامل وتغييبه لمدة 30 سنة وأكتر .. لكن المشهد العام بيقول ان الناس اللى قالت اننا غير مؤهلين للديموقراطية يبدو ان كان عندهم حق للأسف .. معندناش حاجة اسمها ثقافة الاختلاف وثقافة قبول الرأى الآخر حتى لو كان خطأ وعلى غير هوانا

البطء الشديد فى التعامل مع الفاسدين من رموز النظام السابق واللى كمان زود الطينة بلّة موضوع الافراج عن ماما سوزان والحاج زكريا عزمى بحجة انه عضمة كبيرة وحالته الصحية مش ولا بد يعنى وفى الطريق صفوت الشريف بحجة انه عنده سرطان ( وايه يعنى ماهو نص مصر عندها سرطان ) وغيره وغيره وغيره ... حد فهم حاجة ؟؟؟ باينة اوى زى الشمس مش كدة ولا ايه ؟؟؟ وخلونا نتعجن فى موضوع السولار وشيكابالا اللى بيحرق جمهور الأهلى والحكم اللى شتم جمهور الأهلى وعبدالحفيظ اللى أنقذه من مجزرة بالاستاد وسيبونا بأة من المليارات اللى اتنهبت واللى نهبوها خدولهم كام يوم اجازة فى بورتو طرة وهيخرجو منها مخرجين لنا لسانهم

الجماعات الاسلامية بدأت تشتغل بجد .. عملوا انتخاباتهم وانتخبوا أميرهم وهيأسسوا حزب وجريدة وقناة فضائية وكمان داخلين انتخابات مجلس الشعب اللى قالوا قبل كدة انهم مش هيدخلوها ( بيفكرونى بالناس اياها ) وربنا حليم ستار بأة على اللى بيحصل فى الكواليس اللى أكيد اكبر بكتير من اللى احنا بنخمنه ونتوقعه

اسوأ حاجة حصلت من ساعة الثورة عودة هالة سرحان لمصر بعد الفضائح المتكررة واللى كانت هى بطلتها .. عودة غير حميدة الحقيقة .. عودة مستفزة .. عودة باحتفال كبير فى المطار وكأنها كانت لاجئة سياسية تم تطفيشها من النظام السابق وراجعة بأة كأحد مكتسبات الثورة .. عودة بقناة فضائية جديدة المفروض انها مصرية والمفروض انها تبع الأمير الهبّاش واللى اتقال انها قناة مختصة بالشعب المصرى الثورى اللى لحد دلوقتى كل برامجها عبارة عن ستار أكاديمى وافلام عربى قديمة موضة السبعينيات حيث الهرتلة والاغراء الخ الخ الخ

هنفضل كدة لحد امتى ؟؟؟؟

النشيد الوطنى المصرى

مجرد أسئلة

أسئلة بتلف وتدور فى دماغى اليومين دول وخصوصا من يوم الجمعة بعد أنباء عن احتشاد الآلاف من السلفيين فى مسيرة من مسجد النور بعد ما استولوا على المنبر ومنعوا خطيب الأوقاف للمرة السابعة ( أيوة السابعة ) من انه يقوم بمهام عمله ويلقى خطبة الجمعة بحجة ان الشيخ حافظ سلامة معاه حكم محكمة بالتمكين من ادارة المسجد وبالتبعية المنبر وخطبة الجمعة والامامة ... المسيرة انطلقت حتى الكاتدرائية بالعباسية وكان طبعا هناك تواجد أمنى مكثف من الشرطة والجيش تحسبا لأى تصعيد مهو الحالة الأمنية مش ناقصة الحقيقة

من ضمن الأسئلة اللى نفسى أسألها للسلفيين أيا كان المتحدث الرسمى عنهم أو أيا كانت الجماعة الاسلامية المكلفة بالتوجيه ... هو اشمعنى بالذات موضوع كاميليا شحاتة معلق معاكم ؟؟؟ اشمعنى محدش فينا سمع لكم حس ولا صوت لما سيد بلال رحمه الله مات من كتر التعذيب واهو كان واحد منكم ؟؟؟؟

سؤال كمان ... هو لا مؤاخذة يعنى اسلام كاميليا شحاتة هيحرر القدس ويرجع كرامة المسلمين وينصر المسلمين المستضعفين فى مشارق الأرض ومغاربها من كمبوديا وكشمير لحد ليبيا وجبل طارق ؟؟؟؟

وكمان سؤال .. هتعملوا ايه بأة بعد لما أصدرت الكنيسة بيان رسمى بأنها متعرفش فين مكان كاميليا شحاتة واللى عاوزها يطلب من النيابة انها تستدعيها من محل اقامتها ؟؟؟؟؟

السؤال الأخطر ... هتعملوا ايه لو حكمت المحكمة لصالحكم وفرضت على البابا انه يظهر كاميليا شحاتة وفعلا ظهرت وقالت انا مسيحية ؟؟؟؟

أيها السلفيون ... أليس هناك قاعدة فقهية شهيرة تقول : درء المفاسد مقدم على جلب المصالح ؟؟ بمعنى ازالة أسباب الفساد أفضل كثيرا من فعل الصالحات ؟؟؟؟ أليس من الأولى أن تنزلوا الى الشوارع والحارات والأزقة وتنصحوا الناس ( بالرفق والحسنى ) أن يكفوا عن شرب المخدرات ؟؟ أن يكفوا عن سب الدين ؟؟ أن يكفوا عن الشهوات ؟؟ أن يتقى كل رب أسرة ربه فى نساء بيته وملابسهن ؟؟؟؟؟؟

مجرد أسئلة من شخص مسلم يعمل عقله محاولا أن يصيب