المطرب الأبكم!

كنت أراقبه يعمل فى صمت .. يتلقى الأوامر الرسمية من مدرائه .. والطلبات الودية منى ومن أقرانى .. وينفذها دون أن ينبس ببنت شفة
كان لا يكل ولا يمل من العمل بالرغم من المجهود الكبير المحمول على عاتقه وحيدا
لمدة اسبوعين متواصلين .. كنت انتظر اللحظة التى ينطلق فيها صوته .. يقولون فى الغرب أن الأنسان الصامت هو الغامض
وكذلك كان هو .. غامضا بمعنى الكلمة

كنا جميعا نعامله بلطف وود .. تقتضى وظيفته كعامل بالمطعم بأن يقوم بخدمة الكل حتى لو كانو أقل سنا منه أو حتى مقاما .. كان يقابل المعاملة اللطيفة والود بلا تعبير .. لا رد فعل

مرت الأيام .. نسيت انى أرغب فى سماع صوته .. رؤيته يتكلم .. حتى خيل الى انه أبكم

لكن فى تلك الليلة .. بينما كنت اتهيأ للرحيل .. المكان شبه خالى الا منى انا ومن بعض أقرانى وصديقنا الصامت وفجأة سمعت صوت غناء يتردد فى فراغ المكان

لقد كان صديقنا الأبكم .. يغنى ! يردد بعض أغانى شعبية
لقد كان مطربا أبكما
ولكنه مازال صامت فى حضرتنا

ادينى فى الهايف

طبعا كلنا عارفين الجملة الشهيرة ... ادينى فى الهايف وانا احبك يا افننس ... الجملة الشهيرة اللى قالها الفنان محمود عبد العزيز او مزاجنجى فى الفيلم الأشهر فى تاريخ السينما المصرية .. الكيف .. للقاص والروائى المتميز .. محمود أبو زيد

الجملة دى انا لاحظت انها تعبير حقيقى لماضينا وواقعنا كمان وهقول شوية ادلة

ليلة النكسة .. التلفزيون اذاع مسرحية مدرسة المشاغبين تقريبا وفى ناس بتقول لالا ده اذاع فيلم .. شنبو فى المصيدة حيث السيناريو الملئ بالأفيهات الفاضية الهايفة مثل الرنجة فى السرنجة والعملية فى النملية الخ

فى عز ازمة غزة خرجت علينا القنوات المتخصصة وغير المتخصصة بكمية افلام هايفة مستمرة حتى الآن فى حملة شبه منظمة وشبه متفق عليها مثل افلام السبعينات التافهة وافلام التسعينات التجارية وغيرها وغيرها

المثال الأول كان يعتبر من ماضينا .. المثال التانى يعتبر حاضرنا وواقعنا .. الهيافة هى الحل .. هو ده شعار الشعب دلوقتى .. وتعالو نبص للشباب واللى عاملينه فى نفسهم .. من مطرب الجير على رأى موجة كوميدى للجروبات على الفيس بوك اللى بتطالب بعودة القرد بتاع موبينيل من جمهورية شموبنوجو ولا معرفش اسمها ايه للأغانى الشعبية التافهة اللى بنسمعها ليل ونهار فى المحلات والمكروباصات وعلى مستوى الجمهورية مش منطقة معينة بيئة

ادينى فى الهايف ... الجملة التى اصبحت دستور الشعب

هو فى ايه ؟؟؟؟

نظيف يتحدى الصيادلة: لن نتراجع.. والحكومة تفشل فى فض إضراب المقطورات

١٦/ ٢/ ٢٠٠٩

احد السائقين يقف أمام المقطورات خلال الإضراب تصاعدت أزمتا الصيادلة وأصحاب وسائقى مقطورات النقل الثقيل، حيث أعلن الدكتور أحمد نظيف، رئيس الوزراء، تحدى الصيادلة، وأكد خلال اجتماع حضره الدكتور حاتم الجبلى، وزير الصحة، والدكتور حمدى السيد، نقيب الأطباء، عدم تراجع الحكومة عن موقفها فيما يتعلق بإلزام الصيادلة بإمساك دفاتر وسجلات تثبت حقيقة أرباحهم ومحاسبتهم ضريبياً عن السنوات الثلاث الماضية، فيما فشلت الحكومة فى التوصل إلى حل لأزمة أصحاب وسائقى مقطورات النقل الثقيل، وفض إضرابهم الذى يدخل يومه الرابع اليوم. على صعيد أزمة الصيادلة، يبدأ الآلاف منهم اليوم اعتصاماً شاملاً، ويغلقون صيدلياتهم، تنفيذاً لقرار الجمعية العمومية الطارئة للنقابة التى عقدت يوم الجمعة الماضى، كما تعقد النقابة اليوم أيضاً جمعية عمومية طارئة. وتقوم اللجان الفرعية، التى تشكلت بقرار الجمعية العمومية، بإدارة عملية الإغلاق خلال هذه الفترة لتوفير الأدوية لأصحاب الأمراض المزمنة والحالات الطارئة، وتختلف طريقة الإغلاق من محافظة لأخرى، حيث تغلق صيدليات بنى سويف تماماً، بينما تتوقف فى دمياط وبورسعيد وكفر الشيخ والقليوبية والغربية، باستثناء واحدة فى كل حى لمواجهة احتياجات الحالات الحرجة، وتتوقف فى الإسكندرية والدقهلية عن العمل حتى الثانية ظهراً. وعلمت «المصرى اليوم» أن نظيف طلب خلال اجتماع أمس، الذى كان مخصصاً لمناقشة مشروع قانون نقل الأعضاء فى صورته النهائية، تمهيداً لإقراره فى مجلس الشعب فى الدورة الحالية من الوزير والنقيب إبلاغ الصيادلة ونقيبهم بأن الحكومة ـ ممثلة فى وزارة المالية ـ لن تتراجع عن موقفها فيما يتعلق بالأزمة الدائرة مع مصلحة الضرائب. وعلى صعيد إضراب أصحاب وسائقى مقطورات النقل الثقيل، فشل اجتماع نظمته الغرفة التجارية بالقاهرة بين ممثلين عن الحكومة، ممثلة فى وزارتى النقل والتجارة، وممثلين عن شركات وأصحاب السيارات، فى التوصل إلى حلول وسط، فيما شهد اليوم الثالث للإضراب أحداثاً مثيرة، انتهت بالقبض على ١١ سائقاً فى الغربية، بتهمة تحطيم سيارات خرقت قرار الإضراب. وتواصلت توابع الإضراب، لتوقف حركة نقل السكر والأسمدة بنسبة ٩٠٪، حسب تقرير وزعته، أمس، جمعية نقل الشاحنات، وتكدس إنتاج مصنع سماد طلخا فى المخازن، وأصيبت حركة نقل مواد البناء بالشلل، وتكدست البضائع والحاويات فى ميناء دمياط، واختفى الأسمنت من أسوان، وتوقفت حركة النقل على كوبرى القنطرة العلوى والفردان الحديدى، وعلى طول المجرى الملاحى لقناة السويس، وحدد ١٠٠٠ سائق فى الشرقية ٣ أيام لاستمرار إضرابهم، ثم الانتقال الأربعاء المقبل لتنظيم اعتصام أمام مقر وزارة الداخلية بالقاهرة، وتكررت مشاهد الإضراب فى الفيوم والمنيا وقنا. الخبر من المصرى اليوم بتاريخ 16 فبراير 2009 وربنا يستر

شئ من الخوف

كلنا طبعا او معظمنا عارف الفيلم المصرى الجميل ... شئ من الخوف
الفيلم كانت احداثه بتدور حوالين (عتريس) الراجل الجبار المفترى الظالم اللى هو ورجالته عاملين عصابة كل هدفها بث الرعب ومص دم الغلابة اهالى القرية المسماة بالدهاشنة .. عتريس ده كان له حفيد ورث عنه القسوة والجبروت بالرغم من قلب الطفل اللى كان جواه .. وبالرغم من حبه لـــ فؤادة ... كانت بنت بميت راجل وقفت وهى صغيرة قدام عتريس الكبير ومخافتش منه

القرية استحملت وسكتت كتير وعلشان كدة خدت فوق دماغها اكتر واكتر ... لكن النهاية كانت ايه ؟؟؟
اتجمعو كلهم مرة واحدة ووقفو وقفة واحدة ف وش عتريس الحفيد اللى اتحرق جوة قصره بنار القرية اللى كانت بتردد فى نفس واحد فى التيمة الأشهر فى السينما المصرية ... جواز عتريس من فؤادة باطل

الفيلم كان له وقت انتاجه وعرضه اهداف خفية كانت واضحة من كلمات الأغانى اللى كتبها الشاعر الكبير الأبنودى ... مش عارف ليه الفيلم ده اتعرض النهاردة وقت ما كانت اهالى السفينة المصرية بلو ستار المختطفة من قراصنة الصومال عاملين مظاهرة فى وسط القاهرة وبيبوسو رجل الحكومة انها تتدخل علشان ينقذو ولادهم اللى مع السفينة

ومش عارف ليه برضه الفيلم ده حاسس انه سيناريو ممكن يحصل فى يوم من الأيام

تفتكرو ممكن يحصل ؟؟؟

خيال .. قمر .. فيروز ومنير

قاعد على الكنبة البلدى فى ضهر بيت زينب خاتون
بتشم انقى هوا ممكن تشمه فى قلب القاهرة الفاطمية
هدوء وصفاء جو
سما حاضنة القمر اللى لسه مبقاش مكتمل
فيروز ومنير طيور محلقة فوق راسك بأصواتهم اللى جاية من بعيد من نظام الصوت الخاص بالمكان وكأنهم بيغنو من بلد تانية

لا مكنش حفلة موسيقية ولا عرض اوبرا ... دى كانت قعدة بلدى فى قهوة شعبية سياحية فى منطقة بيت زينب خاتون

تجربة تستحق التسجيل

مترو مصر الجديدة .. أزمة امانة

العنوان غريب انا عارف .. بس لما تقرو ه
تعرفو قصدى

النهاردة ركبت مترو مصر الجديدة من اشارة روكسى لحد ميدان رمسيس ... مترو مصر الجديدة زى ما معظمنا عارف انه وسيلة المواصلات الأقدم للربط بين وسط المدينة ومنطقة مصر الجديدة ومدينة نصر
المترو كان مفخرة بمعنى الكلمة من ناحية النظافة والنظام والحاجات الحلوة دى لكن طبعا دلوقتى شكرا كل عام وانتم بخير ... ابواب مبتقفلش ولو قفلت تلاقيها من غير ازاز ... شبابيك مفتوحة ليل ونهار صيف وشتا لا بتفتح ولا بتقفل ... ده غير بأة النظافة اللى مش موجودة اساسا وكله كوم بأة وأعطاله كوم تانى ... ممكن تبقى متعلق بين المحطات قاعد فى المترو اللى عطل بيك ومستنى فرج ربنا بأة سواء اتصلح او مترو تانى جاى من ورا بيزق المترو العطلان لأقرب محطة

من كام سنة قريت فى الأهرام ان المهندس فلان الفلانى المسؤل عن مترو مصر الجديدة قال انه بيتم تطويره وهيرجع زى زمان ... قول للزمان ارجع يا زمان .. طب فين يا باشمهندس ؟؟؟ المشاكل هى هى مفيش تغيير .. ولا يمكن التطوير هو دهان المحطات والكراسى ؟؟؟ يمكن برضه

اكتر حاجة لفتت نظرى ان المترو ده يا جماعة ماشاء الله على طول زحمة .. لأنه بيوصل مسافات بعيدة بسرعة -مقارنة بالميكروباص والأتوبيس- مع رخص تمن التذكرة اللى مبتزيدش عن ربع جنيه او نص جنيه فى نوادر الخطوط
لكن المهم ... مع الزحمة دى والفلوس اللى داخلة دى .. المترو بيكسب ؟؟؟؟ الأجابة ... لا وألف لأ ... علشان يا سادة يا محترمين المترو بيبقى عربيتين بس وكل واحدة فيها كمسرى واحد وساعات كمان يبقى العربيتين فيهم كمسرى واحد بس !!! يعنى فرصة هايلة للركوب بالمجان !!!

العربية الواحدة فيها 3 ابواب ... لو كل باب وقف عنده كمسرى هنبقى ضربنا عصفورين بحجر واحد ... عملنا فرص عمل لناس قاعدة ع القهوة ... محدش هيركب المترو مجانا ومحدش هيبقى فى ازمة ضمير وأمانة انه يدفع تمن التذكرة الرخيص ده حتى لو الكمسرى مقالش .. تذاكر ... وبالتالى المترو هيدخل فلوس ويطور نفسه ويجدد شبابه من غير منحة الحكومة

بس مين يقول ومين يعمل ومين قبل ده يفهم ؟؟؟

معرض القاهرة الدولى للكتاب - 2

اكمل كلامى واقول ان المعرض السنة دى كان كويس مش وحش من ناحية التنظيم

اهم حاجة بأة حصلت السنة دى هى حفلتين توقيع حضرتهم مع زوجتى العزيزة ايــنـــو

الحفلة الأولى كانت لكتاب : حماتى ملاك تأليف الأستاذة سحر غريب صاحبة مدونة حماتى ملاك والحفلة كانت رائعة الحقيقة وكنا مبسوطين وفرحانين بالكتاب والأقبال كأنه الكتاب بتاعنا بالظبط

الف مبروك يا مدام سحر ويارب من نجاح لنجاح دايما


الحفلة التانية كانت لديوان شعر تأليف صاحبى اللذيذ : عادل سلامة .. الديوان اسمه : كليك شمال ... وده الديوان التالت لعادل بعد ديوان :شحتفة وديوان : الحب فى الجامعة اللى كان طفرة كدة فى الشعر العامى

الف مبروك يا أبو ليلى وعقبال الديوان المليون يا صاحبى

احب اقول حاجة اخيرة ... الناس اللى بتروح المعرض تلت ارباعهم على الأقل رايحين فسحة فقط لا غير محدش بيشترى حاجة ولا بيسمع حاجة والناس معذورة لأن يا اما الكتب غالية بشكل مبالغ فيه يا اما الناس معادش عندها دماغ اساسا للقراءة والثقافة