كلنا طبعا او معظمنا عارف الفيلم المصرى الجميل ... شئ من الخوف
الفيلم كانت احداثه بتدور حوالين (عتريس) الراجل الجبار المفترى الظالم اللى هو ورجالته عاملين عصابة كل هدفها بث الرعب ومص دم الغلابة اهالى القرية المسماة بالدهاشنة .. عتريس ده كان له حفيد ورث عنه القسوة والجبروت بالرغم من قلب الطفل اللى كان جواه .. وبالرغم من حبه لـــ فؤادة ... كانت بنت بميت راجل وقفت وهى صغيرة قدام عتريس الكبير ومخافتش منه
القرية استحملت وسكتت كتير وعلشان كدة خدت فوق دماغها اكتر واكتر ... لكن النهاية كانت ايه ؟؟؟
اتجمعو كلهم مرة واحدة ووقفو وقفة واحدة ف وش عتريس الحفيد اللى اتحرق جوة قصره بنار القرية اللى كانت بتردد فى نفس واحد فى التيمة الأشهر فى السينما المصرية ... جواز عتريس من فؤادة باطل
الفيلم كان له وقت انتاجه وعرضه اهداف خفية كانت واضحة من كلمات الأغانى اللى كتبها الشاعر الكبير الأبنودى ... مش عارف ليه الفيلم ده اتعرض النهاردة وقت ما كانت اهالى السفينة المصرية بلو ستار المختطفة من قراصنة الصومال عاملين مظاهرة فى وسط القاهرة وبيبوسو رجل الحكومة انها تتدخل علشان ينقذو ولادهم اللى مع السفينة
ومش عارف ليه برضه الفيلم ده حاسس انه سيناريو ممكن يحصل فى يوم من الأيام
تفتكرو ممكن يحصل ؟؟؟
20 comments:
بحب الفيلم ده يافوكس لكن عمري مافكرت عن اسباب ليه !!
مش عارفه ليه !
مرسي لانك فكرتنا بفيلم من الروائع زي ده :)
تحياتي :)
Eno
كل حاجة وليها سبب طبعا يا اينو :)
العفو وانتظرونا فى الفيلم القادم
العرض القادم :))
تحياتى وشكرا لمرورك وتعليقك :)
الفيلم ده من اجمل الافلام المصريه
بس معتقدش ان ده هايحصل خلاص الشعب اتربط في ساقية اكل العيش و اللامبالاه و يالا نفسي
تحياتي
ممكن طبعا يحصل
لان الغضب هوا الهوا
واحنا البلونه
الهوا بينفخ في البلونه لحد اما توصل لقدره معينه للتحمل وبتفرقع
واحنا كدا الغضب هينخ فينا لحد امانوصل لحد معين
وهنفررررقع هنفرقع في مين
وازاي
ده في علم الغيب
EmY
هو لازم هيحصل لأن التاريخ بيعيد نفسه والأيام دول زى ما بنقول :)
الناس فعلا مربوطة فى الساقية بس على رأى عمنا جاهين لما قال :
اقلع غماك يا تور وارفض تلف
واكسر تروس الساقية واشتم وتف
هانت اوى على فكرة :)
شكرا لمرورك وتعليقك :)
كيارا
عارفة يا كيارا المشكلة فعلا اننا لما نفرقع هنفرقع فى مين وازاى هى دى المشكلة وعلى رأى واحد صاحبى الناس دى لو انفجرت من كبتها محدش هيعرف يلمها تانى ولا حتى مدافع الجيش ووقتها الدنيا هتبوظ بجد
ربنا يستر
شكرا لمرورك وتعليقك :)
فوكس
اول مرور لى فى مدونتك الجميله ..وخاصه انك من المنايرة زيي ..انا كنت كاتب قصيده على الفيلم :
عتريس عايز يتجوز فؤاده وابوها بيماطل اصل عتريس قاعد فى بيتهم ..جنب امه عاطل
عشان كدا ..جواز عتريس من فؤاده باطل
البقيه هاتلاقيها فى بوست عندنا فى مدونه البلكونه ..
منتظرينك تشرب شاى معانا ..البلكونه طراوة وهاتعجبك
ميجووووووو
Migo Mishmish
القصيدة حلوة .. والبلكونة شكلها طراوة
يمكن يسقينا الشاى .. يمكن يعطينا الناى
انا جاااااى :)
نورتنى فى اول مرور يا مشمش :)
مش هايحصل يا استاذ
عشان تحصل نهاية الفيلم لازم تفكير جماعي
واحنا يا عيني العمليه عندنا تعبانه خالص
تعالى عندي في الشغل
نزلنا الشغل يوم الاجازه الرسمية للدوله بالعافيه
ومحدش قدر يقول -لا- لصاحب الشركه
قلت ادخل اقوله كده ماينفعش
قالوا لي ماشي ادخل
قلت لهم طيب وانتم؟
قالوا لي لا يا عم احنا هانيجي الشغل- اهو يوم وخلاص!!!!!
فإذا كان ده رد الفعل على موضوع بسيط زي عندي في الشركه
فما بالك بالراجل الكبير اللي في البلد
أما عن الفيلم نفسه فممتاز وتعتبر قصه أبديه ومناجمل افلام السينما المصريه
محمود مرسي عمل 25 فيلم بس
لكن كلهم معجزات الحقيقه
كل شئ ممكن لو احنا عاوزين بجد
وفية ارادة قوية
تحياتى ليك
لورنس العرب
ايوة هو ده >>> التفكير الجماعى والأجماع على قرار واحد معين
هو ده اخطر عيوبنا ... هو ده مربط الفرس
محمود مرسى كان فنان عبقرى بجد الله يرحمه
شكرا لمرورك وتعليقك :)
دعاء مواجهات
لو عاوزين حاجة هنعملها بس زى ما قلنا التفكير الجماعى والأجماع على اتخاذ قرار والعمل به .. من غير ده مفيش حاجة هتحصل ولو بعد مليون سنة
شكرا لمرورك وتعليقك :)
اول زيارة لمدونتك الاقيك بتتكلم عن شى من الخوف ده من احب الافلام لقلبى كل ابطاله كانوا مبدعين شادية كان شكلها بيدى على فرعونى شوية تحس فيها انها مصرية اصيلة --محمود مرسى عملاق --مشاهده فى منتهى الروعة ولا لما اتحاصر فى الاخر وبيواجه الموت لوحده وفؤاده عقلها مع الثوار وقلبها وكيانها معاه --وكله كوم واغانى الفيلم والموسيقى التصويرية كوم تانى والتركيز دايما على نغمة ياعينى ياعينى ياعينى على الولد ولما فؤاده فتحت الهويس ---الناس دى كان احساسهم راقى جدا ---الاجمل انى قريت انهم قالوا لعبد الناصر الفيلم ده عليك فلما شافه قال لو انا عتريس يبقى فعلا استاهل الحرق ---بس اكيد كان هو المقصود طبعا -- اما المخرج فده عبقرى اللى يخليك تكره عتريس وتدوب فيه تتمنى له الموت ويبقى نفسك تفديه لانه مظلوم زيك-----------------لكن مصر دلوقت صحيح لسه فاضلها كتير بس بتتغير والله بسرعة انا كل مافقد الامل افتكر اضراب الضرائب العقارية ناس كان عندها وعى كبير بمشكلتها وباهدافها واداروا الاضراب صح وبيفكرونى بعرابى وزمايله كانوا فى الاول بيطلبوا حاجات تخص الجيش بس لكن بعد فترة اتحولت الدفة معاهم بسهولة ووعيهم زاد وقادوا ثورة للبلد كلها يارب تعيد الايام دى تانى انا اسفة على الاطالة
لقد خلقنا الله احرارا
الفيلم فعلا علامة من علامات السينما المصرية
انا فاكر موضوع عبد الناصر ده واعتقد انها واقعة حقيقية
موضوع الأضراب بيطرح سؤال مهم >> وبعدين ؟؟؟
اخر اضراب كان بتاع السكة الحديد وكانت ايه النتيجة ؟؟ تدخل جهاز أمن الدولة وتهديد بالأعتقال ثم انتهاء الموضوع كأن لم يكن
اتمنى بجد اننا نتحرك ونعمل بالعقل والتفكير السليم ولو لمرة واحدة
شكرا لمرورك وتعليقك اول مرة بالكيت كات
احداث الفيلم المأسوية تتكرر يوميا
لكن المشهد الختامي مش باين انه هييجي قريب
Che_wildwing
الفيلم مأساوى فعلا بس النهاية اكيد هتيجى بس بعد حين
تحياتى
تفتكر لسه فيه رجاله تعرف تمسك النار بايديها و تعرف تحرق عتريس و ابنه و مراته و بقيه عيلته
تفتكر لسه فيه
اشك
ادعوا يا جماعه للصيادله ربنا ينصرهم فى وقفتهم ضد عتريس و رفاقه
صيدلانية طالعة نازلة
والله يا دكتورة مش عارف فى رجالة ولا لأ يعملو الموضوع ده بس الأمل موجود ومش بعيد وانا حاسس انها هانت مش عراف ليه
موضوع الصيادلة انا مش فاهمه بالظبط وبحاول ادول على مصدر موثوق منه اعرف الحكاية بالظبط ايه
شكرا لمرورك وتعليقك :)
السلام عليكم ورحمة الله وبركاته
اللي حقيقي بجد باتمنى انه يحصل هو الوقفه الاخيره اللي حصلت من اهل القريه كلهم كراجل واحد، بنفس قوتها وتاثيرها وفاعليتها... داخليا وخارجيا!!!ه
احلى حياة
عليكم السلام ورحمة الله وبركاته
مهو الفكرة ف كدة ان الكل يبقى واحد بس مين يعمل ؟؟
شكرا لمرورك وتعليقك
Post a Comment