حاجات كتيرة

كنت ناوى اكتب عن حاجة معينة بخصوص العشر الأواخر من رمضان كل سنة وانتم طيبين لكن لقيت ان الموضوع هيبقى مكرر لكن اللى احب اقوله هو التجربة الشخصية فى الحب الألهى بمعنى انك لما تسجد لله فى قلب الليل وفى سجودك تدعى من قلبك بجد وتحس انك بتدعى لأول مرة ولأول مرة صلاتك ليها طعم تحس ان روحك قربت تلمس السما وعيونك مش شايفة غير الجنة وحاسة بيها ايوة العين بتحس هى تجربة نادرة وغريبة لكن هى احساس قبل اى شئ ... ربنا يتقبل مننا جميعا ويحسن ختامنا
--------
كل الناس صحابى اللى دخلو الجيش تعبانين .. مؤهلات عليا اتجندو وبدل ما يتدرب على سلاح آلى ولا بندقية بورسعيد حتى لا ماسك مقشة ومقطف وبيلم الزبالة واللى احسن منه شوية بيبقى عامل تموين بنزين فى اى محطة بنزين تابعة لجهاز الخدمة الوطنية وللأسف دول مؤهلات عليا يعنى هندسة وطب وعلوم ... عرفتو ليه محدش بيحب يتجند فى الزمن ده ؟
--------
ايه اخبار الدويقة ؟؟؟
--------
هو الدبة اللى قتلت صاحبها من خوفها عليه وحبها ليه .. ياترى هى حست بندم بعد لما مات ؟
--------
احسن حاجة بعملها اليومين دول وبتخلينى فى مود كويس الى حد ما هو فنجان القهوة المظبوطة بن محوج من الغورية مخصوص مع تراك موسيقى صوفية تركية او اغنية لست الكل فيروز
كل سنة وانتوة طيبين بمناسبة العيد ومظنش انى هكتب حاجة عنه النوم افيد فى الوقت ده لأن الناس كلها نفسها تنام محدش بينام كويس من اول رمضان

حقن البنج الميرى

اتعودنا على حقن البنج الميرى اللى بنتحقن بيها كل لما تحصل مصيبة ولا كارثة علشان مناخدش بالنا من اللى بيحصل وطبعا معظمنا عارف الموضوع ده وبأة بيشيل ايده أو دماغه على الأصح قبل ما تدب الحقنة فيهم
فضيحة الدويقة .. مش بحب اسميها كارثة لأنها فضيحة وجرسة كمان قدام العالم كشفت فسادنا وخيبتنا وجهلنا وعجزنا عن اى حاجة ... وقتها طلعت حقنة البنج المعتادة اللى هى ماتش الأهلى والزمالك وبقت حدوتة على كل لسان مين اللى هيفوز ؟ انا وكتير من الناس العاقلة اللى بطلت تسيب دماغها لحقن البنج الميرى دى توقعت التعادل وكنت متأكد منه كمان علشان الناس تتلهى وتقولك شوف الأهلى كان سايب الماتش ازاى ومش عاوز يكسب ولا شوف الزمالك الخايب اللى مقدرش يستغل الفرصة ويكسب الأهلى ولو لمرة واحدة ... احنا اللى خايبين مش الزمالك بس على فكرة
كمية المسلسلات التلفزيونية والأذاعية طول شهر رمضان ... دى بعتبرها مستودع بنج بحاله مش حقنة واحدة بس حاجة كدة بتخلى الواحد مش عارف راسه من رجليه ... مفيش وقت حتى تنام علشان لو نمت هيفوتك المسلسل الفلانى او المسلسل العلانى او البرنامج اللى معرفش ايه ولو نمت وحملت الحلقة من على النت تانى يوم هتقعد برضه تتفرج عليها وتسيب شغلك او دراستك ده بفرض ان فيه دراسة فى ايام رمضان من الأساس ومش قصدى السنة دى انا بتكلم عموما وبكدة تبقى قضيت رمضان كله فى الفرجة على الناس وسايب الشياطين تتفرج على خيبتك وانت بتضيع فرصة سنوية للرحمة والمغفرة
اتفرج كمان وكمان وسيبك من الحاجة اللى غليت مرة واتنين من اول شهر رمضان من اول السلع الغذائية لمواد التنظيف والصابون للملابس للأجهزة الكهربائية وسلملى على حديد عز اللى بيعمل مسابقة اللى يفوز بيها يكسب شقة والله اعلم مكانها فين بس اعتقد انها على حدودنا مع السودان او ليبيا واحتمال تكون لسه بتتبنى اصلا
اه يابلد السكن فيكى بمسابقة

تــــــــــــاج

وصلنى تاج واجب التنفيذ من العزيزة ايــنــو وهو كالتالى
بدأت تدون امتي ودخلت العالم ده ازاي ؟؟
بدأت التدوين من حوالى سنتين وكان ليا مدونة على احد المواقع العربية لكن الحمد لله كانت فاشلة تماما محدش كان بيعجبه اللى بكتبه لأنى كنت بكتب حاجة شبه الخواطر كدة اى حاجة تيجى على بالى وبعدين قفلتها بالضبة والمفتاح ونسيتها تماما
جيت بأة فتحت مدونة الكيت كات فى شهر مارس السنة اللى فاتت وكنت بكتب وبكتب وكان ليا زوار كتير الحقيقة اولهم طبعا اينو اللى دخلت عالم التدوين عن طريقى لكن جت فترة قفلت المدونة وبعد شوية فتحتها تانى واهى قدامكو لكن دخلت العالم ده من حوالى سنتين لما سمعت عن موضوع المدونات عملت بحث وقريت كتير وعلقت كتير الى يومنا هذا
كان انطباعك ايه في البدايه ؟؟
كان عالم جديد بالنسبة لى حاجة كدة فيها مساحة حرية مش متعود عليها مجتمع جديد ليه مقومات جديدة لكن اتعودت عليه بسرعة وخصوصا وانى طول عمرى نفسى اكتب اللى جوايا والناس تقراه وتقولى رأيها ايه
مين اكتر واحد بتهتم بتعليقه علي بوستك الجديد ؟؟
اكيد طبعا زوجتى العزيزة اينو يهمنى اعرف رأيها خصوصا وانى بكتب من غير ما اقول انى هكتب واسيبها تقرا براحتها وتعلق براحتها
ايه اهم حاجه اتعلمتها من عالم التدوين ؟؟
اهم حاجة اتعملتها انى اقول اللى جوايا زى ماهو من غير مونتاج وانى مخافش من كلامى ولا من تعليقى فى مدونة تانية
ايه اكتر حاجه كرهتها ؟؟
اكتر حاجة كرهتها هو الأقنعة اللى ساعات بنلبسها واحنا على الأنترنت ليه مش عارف
حاسس انه التدوين له تأثير ؟؟
اكيد طبعا كفاية ان الواحد بيلاقى مكان يقول فيه اللى هو عاوزه وبيلاقى ناس ترد عليه وتقول رأيها
تهدي التاج ده لمين ؟؟
اهديه للناس اللى بحبهم وبيحبو يزورو الكيت كات اى حد يحب ياخد التاج حلال عليه

هل قام أبانا آدم بغزو الفضاء ؟

العنوان يخض مش كدة ؟
العنوان ده جه ف بالى دلوقتى وانا بفكر فى خطبة الجمعة الجميلة اللى حضرتها النهاردة
النهاردة روحت اصلى فى المسجد اللى متعود اصلى فيه لكن الأمام محضرش النهاردة والناس كانت قاعدة تبص لبعضها مفيش امام ومفيش خطبة !!! لكن سبحان الله ربنا أراد ان واحد من المصلين فى منتصف العمر كدة بلحية خفيفة شبه بيضاء ووجه ابيض منير مريح للناظرين يتطوع ويصعد المنبر ويلقى الخطبة
بدأ بحمد الله والثناء عليه كما فى سائر خطب الجمعة فى اى مسجد فى العالم وفجأة تخلى عن اللغة الفصحى اللى المفروض يتكلم بيها كل امام على المنبر وتكلم بالعامية البسيطة السهلة انا استغربت فى الأول لكن فهمت هو عمل كدة ليه فى الآخر ... دى اول حاجة المفروض الأئمة يعملوها ... ينزلو لمستوى الناس وتفكيرهم يكلموهم بلغة سهلة تتفهم مش لغة فصحة صعبة كلها استعارات وكنايات والفاظ مجازية والناس تقعد طول الخطبة تتصعب وتمصمص شفايفها وتقول الله الله وبعد الصلاة ولا كأنهم سمعو حاجة مش كدة ولا ايه ؟
الحقيقة الراجل كان مبدع فى اسلوب الكلام وخصوصا وانه بدأ الخطبة بسؤال ... هو احنا ليه لما بنيجى نقرأ القرءان بنستعيذ بالله من الشيطان الرجيم وبنستعيذ باسم الله اللى هو الرحمن الرحيم ؟؟؟ ولمدة نص ساعة كان بيشرح السؤال ده ويجاوب عليه وانا هحاول الخص اللى قاله
قال الأمام ان اجاية السؤال هى قصة خلق آدم وعصيان ابليس لأمر الله بالسجود لآدم ... ربنا سبحانه وتعالى خلق آدم من طين وعلمه الأسماء كلها ... علمه يعنى رزقه واعطاه العلم ... المقصود بالعلم هنا .. العلم الكامل الشامل اللى احنا نعرفه دلوقتى ... ايوة يعنى ابونا آدم عليه السلام كان عنده كل العلوم الهندسية والطبية والكيميائية والفيزيائية يعنى لو ربنا امر كان ممكن ابانا آدم يغزو الفضاء ويصعد للقمر ويبنى الأهرامات ويصنع القنابل النووية كمان !!!! شايف ناس بتقول شكلك الصيام عامل عمايله معاك ودى تخاريف صيام ... اقولكم لالالا انا صاحى وفايق وبقصد كل كلمة مكتوبة ....
الأمام قال .. امال ده محصلش ليه من ابونا آدم ؟؟؟ الأجابة بكل بساطة مذكورة فى القرءان الكريم فى قوله تعالى ... ( ولقد عهدنا لآدم من قبل فنسى ولم نجد له عزما) صدق الله العظيم .. يعنى الله سبحانه وتعالى بيقول انه سبحانه وتعالى اعطى مفاتيح العلم لآدم ولكنه انسان .. نسى .. اغلق على عقله ونسى ولم تكن له عزيمة على التذكر والأستفادة من العلم ده ودى طبيعتنا مش كدة ؟؟؟؟
وفجأة انتقل الأمام فى الحديث عن ان ربنا سبحانه وتعالى اعطى آدم اخطر سلاح فى الكون ... العلم ... ولما ابليس رفض انه يسجد لأدم رفض لأنه كان فاكر ان النار اللى هو مخلوق منها افضل من الطين اللى مخلوق منه آدم مش رفض امر ربنا سبحانه وتعالى ... ولما ابليس تعهد لربنا بأنه يوسوس للآدم وذريته ويتحكم فيهم ربنا كان عادل اوى حتى مع ابليس ... آدم معاه سلاح العلم وعدوه ابليس مش معاه اسلحة ايه الحل ؟ ربنا سبحانه وتعالى اعطى آدم 6 اسلحة تكافئ سلاح آدم الوحيد اللى هو العلم لكن ايه هى اسلحة ابليس ؟؟؟
قال تعالى ... ( فاستفزز من استطعت منهم بصوتك واجلب عليهم بخيلك ورجلك وشاركهم فى الأموال والأولاد وعدهم وما يعدهم الشيطان الا غرورا ) صدق الله العظيم
الأسلحة هى ... الأستفزاز والوسوسة بالصوت يعنى بالتفكير العقلى والوسوسة وتسليط الخيل والأعوان اللى هما والله اعلم شياطين الأنس والمشاركة فى الأموال والأولاد والوعد والتمنى بالفوز والتمكن والسيطرة والنفوذ
كل الأسلحة دى متجيش حاجة جمب سلاح العلم مش كدة ولا ايه ؟؟؟ اه احنا متعلمين بس العلم ده عملنا ايه ؟؟؟ ولا حاجة خراب ودمار وحروب واستهلاك موارد بشرية واقتصادية مش كدة ؟؟
واخر حاجة قالها الأمام ان اللى بيقدر يقاوم ابليس بأسلحته دى هما عباد الله اللى دايما بيستعيذو بالله من الشيطان الرجيم وعلشان كدة لما نيجى نقرأ القرءان بنستعيذ بالله من الشيطان الرجيم فى كل صلاة وفى كل وقت وفى كل حين
يا جماعة بجد كانت افضل خطبة جمعة احضرها من زمن طويل ... موضوع مهم وشيق ومش روتينى وأسلوب الكلام سهل بسيط يوصل لكل الناس ... الأمام قال ان اسمه الدكتور محمد يوسف وانا معرفش عنه اكتر من كدة لكن هو مش من المنطقة عندنا لأنى دى اول مرة اشوفه الحقيقة والله اعلم بحاله لكن بجد ربنا يكرمه ويجزيه خير على الخطبة النهاردة