مجرد سؤال

هو ليه كل لما المجلس العسكرى يطلع بيان بيحذر فيه من الفتنة الطائفية بتحصل فعلا مواجهات طائفية بعدها بيومين او تلاتة بالكتير ؟؟؟



حد فاهم حاجة ؟ لو حد فاهم يكسب فيا ثواب ويفهمنى لأنها مش أول مرة


ثورة الشك

ثورة الشك مش أغنية كوكب الشرق الراحلة أم كلثوم .. ده الاسم الجديد اللى قررت أسميه لثورة 25 يناير وعندى أسبابى اللى ممكن تتفقوا معايا فيها واللى برضه باينة انها منطقية ولو بعضها مش كلها

أولا : حد عرف الشهداء خدوا حقهم ولا لأ ؟؟
ثانيا : حد عرف المصابين اللى متبهدلين بين المستشفيات مش عارفين يتعالجوا خدوا حقهم ولا لأ ؟؟
ثالثا : حد من رؤوس النظام الفاسد السابق اتحكم عليه بأى حكم حتى لو تنضيف حمامات السجن ؟؟
رابعا : حد يصدق ان الضباط اللى ضربوا المتظاهرين بالنار ياخدوا اخلاء سبيل ومن المحكمة ؟؟
خامسا : حد يصدق ان (قاضى محترم ) يأجل قضية محاكمة الضباط اللى ضربوا المتظاهرين فى الاسكندرية باللفظ (تؤجل القضية لليوم الثالث من الأسبوع الثالث من شهر أكتوبر القادم) مكسل حتى يحدد يوم للمحاكمة ؟؟
سادسا : حد برضه يصدق ان فى نفس جلسة المحاكمة وبعد النطق بالحكم يتم الاعتداء على أهالى الشهداء ومحامين أهالى الشهداء بألفاظ خارجة وعبارات واشارات جنسية بذيئة (الفيديو منشور ع اليوتيوب للى عاوز يتفرج) وكل ده جوة قاعة المحكمة ؟؟
سابعا : حديعرف مصير مبارك ايه بعد المحاولات الخايبة المستفزة من المحامى بتاعه اللى اسمه الديب ده واللى بيحاول يمهد اعلان خبر وفاته كحل نهائى لاغلاق المكلمة المفتوحة حوالين ثروته وجرايمه ؟؟
ثامنا : حد يعرف أخبار ماما سوزان ايه ؟؟ الفلوس اللى بيقولوا اتنازلت عنها راحت فين ؟؟ والحق المدنى سقط كدة ومفيش محاكمة ولا تحقيق خلاص ؟؟؟
تاسعا : حد يعرف اى حاجة عن طرة وسكان طرة ؟؟؟ مع العلم ان مفيش حظر نشر لأخبار المحاكمات والقضايا المتعلقة بيهم
عاشرا ودى الكبيرة بأة : حد يقدر ينتقد المجلس العسكرى ؟؟ حد يقدر يقول انه حصل تعذيب وتجاوزات ؟؟ هتقولولى دول ملايكة م السما ؟ هقولكم منظمة حقوق الانسان الدولية ومنظمة العفو الدولية طلبوا فتح تحقيق فى شكاوى تعذيب واجراء اختبارات عذرية للناشطات اللى اتقبض عليهم فى احداث ابريل ومارس اللى فاتوا ؟؟؟

اقدر اقول انها ثورة الشك مش ثورة التغيير .. بقينا بنشك ف كل حاجة .. النظام القديم بنفس الأساليب لسه موجودين والدليل : الناس المغفلة اللى ملهية فى ماتش الأهلى والزمالك ومين اللى هيمسك المنتخب

سكوووووت

ماذا يحدث اذا صمتت الأفواه ولو لمدة دقيقة واحدة ؟؟ يصمت جميع الخلائق على مستوى الكون بامتداده الجغرافى الهائل لمدة دقيقة واحدة .. يستمع الجميع خلال هذه الدقيقة لصوت الطبيعة فقط سواء كانت تلاطم أمواج أو خرير جدول مائى أو حتى حفيف أوراق الشجر

أتمنى السكوت ولكنى لا أناله .. أرغب فى الكلام ولكنه ممنوع .. حقا الممنوع مرغوب والصمت أحيانا أفضل كثيرا من الكلام

انا لله وانا اليه راجعون

توفيت أمى اليوم .. سبقها أبى بخمس وتسعين يوما .. دفنا سويا بنفس المقبرة .. رحمهما الله برحمته الواسعة .. انا لله وانا اليه راجعون