وداعــا أبى وداعــا

انا لله وانا اليه راجعون

توفى والدى الثلاثاء الماضى .. ادعوا له وﻷموات المسلمين بالرحمة والمغفرة

أتذكر يا أبى سؤالك لى منذ أسبوعين تقريبا : هل ستحزن علىّ عندما أموت ؟ .. لم أجب وقتها ﻷن الطبيعى أن نحزن عند موت آبائنا ولكنى لم أدرك كم الحزن والألم الذى تسبب به رحيلك

اللهم اغفر لأبى وارحمه واغسله بالثلج والماء والبرد ووسع مدخله ووسع عليه قبره واجعله مدّ بصره وآنسه بالقرءان واجمعنا به وبأموات المسلمين على الايمان

فرحنا ؟ طيب يلا نبدأ


الحمد لله انتهت الثورة بتنحى الرئيس مبارك وسقوط نظام ديكتاتورى استمر لمدة 30 سنة بيتغذى بالكذب والتزوير ودماء الشعب المقهور .. مليون تحية وتقدير لأرواح الشهداء الورد اللى فتح فى الجناين وفجر الثورة .. مليون تحية وتقدير للقوات المسلحة اللى وقفت مع الشعب وحمت الثورة زى ما الشعب وقف معاها وحمى انقلاب سنة 1952 .. فرحنا الحمد لله بس دلوقتى بدأت مرحلة اعادة البناء والصورة اللى فوق الكلام ده ابسط دليل نمشى عليه علشان تبقى بلدنا زى ما احنا عاوزين .. ياريت تنشرو الصورة دى على قد ما تقدرو

حمد الله على سلامة مصر

النهاردة بعد تنحى مبارك عن رئاسة مصر وتولى القوات المسلحة لزمام الأمور وأصبحت مصر تعيش ثورة اللوتس البيضاء بكل معانى الثورة .. انتهاء فترة كئيبة سوداء من حكم ديكتاتورى متعفن .. نستطيع أن نقول بكل ثقة : حمد الله على سلامة مصر

من حقنا نفرح .. من حقنا نرتاح شوية .. من حق أهالى الشهداء انهم يرتاحوا ولو قليل .. بس مننساش اننا مطلوب مننا من اول النهاردة مش من بكرة .. مطلوب مننا اننا نصلح اللى اتكسر .. نعيد مصر لحالتها الطبيعية .. والاهم اننا نصبر على الجيش فى تدبير امور البلد .. دلوقتى مفيش لا مجلس شعب ولا مجلس شورى ولا حتى دستور .. مفيش أى حاجة روتينية من اللى كنا متعودين عليها ... الخطوات اللى هتتعمل كتيرة جداااا ومحتاجة وقت طويل .. مش مجرد انتخابات رئاسية مبكرة وخلاص لا فى انتخابات مجلس شعب وشورى ومن قبلهم اعداد دستور جديد فى حالة التخلى عن الدستور الحالى

اهم مكسب ... المصريين حسو انهم اصحاب البلد دى بجد ولا عزاء للأجندات

بحب مصر البلد والناس

بحب مصر .. مصر البلد والارض والناس الطيبة .. الناس اللى وقفت فى الشوارع بالليل تحمى بيوتها واموالها واعراضها .. الناس اللى كان فيهم محمد ومينا وعم احمد والمقدس بطرس واقفين كلهم زنهار مستنيين اى حد يفكر ييجى ناحية شارعنا بس .. بحب الناس الحرة اللى بايتين ليل ونهار فى التحرير .. بحبهم اوى لانهم السبب الوحيد اللى يخلينا نقول بفخر .. انا مصرى .. الناس اللى رجعولنا كرامتنا جوة بلدنا قبل برة بلدنا .. الناس اللى بيتقال عليهم بياكلو كنتاكى وهما فى الحقيقة واقفين طوابير قدام كشرى التحرير ومطعم البرنس .. بحبك البلد دى اوى اكتر من اى وقت تانى وقد ايه كانت مظلومة معانا بس قدرنا نقولها اننا بنحبك وهندافع عنك بدمنا وده بجد مش كلام والدليل 305 مصرى مبخلوش بأرواحهم عشان انتى تعيشى

بحبك يا بلدى بالرغم من المتسلقين اللى عاوزين يسرقو فرحك .. بالرغم من الجهلة اللى بيقولو علينا عملاء وخونة .. بالرغم من اى حاجة حصلت وخسرتنا شغلنا وامور حياتنا .. مش مهم .. المهم اننا رجعنا لنفسنا بنفسنا كرامتنا ورفعنا راسنا تانى قدام العالم كله .. المهم انتى تعيشى

سيبك من الاعلام الحكومى المضلل المغيب لعقول شعبك الطيب اللى بيصدق كل حاجة بتتقال .. خليكى معانا واحنا والله مش هنسيبك الا لما نرجعلك كل حقوقك .. لحد لما ترضى عننا زى ما قال الكينج منير فى الاغنية دى اللى بالصدفة كان مسجلها من مدة طويلة قبل 25 يناير وكان نفسه تبقى لمصر وبقت فعلا لمصر


بحبك وهفضل احبك حتى لو قالو عننا بتوع اجندات وكشاكيل وكراريس كمان ولا عزاء للمتسلقين


بدون عنوان

الثورة حققت اهدافها وتقريبا محدش خد باله من الناس اللى عمالة تصعد مطالبها ومن المعارضة اللى ركبت الثورة وعاوزة تعمل فيها ابطال

اولا القضاء على فكرة التوريث
ثانيا انتهاء حكم مبارك الأب
ثالثا التخلص من رموز الفساد المتمثلة فى بعض وزراء تمت اقالتهم
رابعا والأهم كسر حاجز الخوف بالرغم من وجود قانون الطوارئ
خامسا تعديلات دستورية مطلوبة منذ ست سنوات
سادسا تعيين نائب للرئيس لأول مرة منذ عام 81

اللى حصل من تخريب مش هتكلم عليه .. اللى حصل من تأييد بعد الخطاب التاريخى لمبارك اللى لقى العالم بيتخلى عنه واولهم اوباما ودولته مش هتكلم عنه

اللى حصل فى ميدان التحرير لما البلطجية اللى اجرهم الحزب الوثنى لضرب وطرد المتظاهرين مش هتكلم عليه لأنهم احقر من اننا نتكلم عليهم

هقول حاجة واحدة بس ... احنا كسبنا كتير وخسرنا كتير برضه بس الأهم كسبنا احترامنا لنفسنا .. الرحمة للشهداء والشفاء للجرحى واللعنة على نظام يستعين بالبلطجية للتعبير عن رأيه بينما الشعب المحكوم يستعين بصوته فقط

اللعنة على اعلام حكومى ادمن تضليل الشعب وادمن الشعب ( الغالبية للأسف) ذلك التضليل المنظم ولا اندهاش من بقاء وزير الاعلام فى منصبه

المدونة مغلقة لحين اشعار آخر حتى تشرق الشمس واستعيد توازنى الفكرى والذهنى والنفسى من جديد

مكتئب حتى اشعار آخر