متعودة دايماااااا


مش عارف ليه لما بتابع الأخبار والحوادث المهمة اللى بتحصل فى البلد اليومين دول بلاقى نفسى بكرر جملة الفنان عادل امام فى المسرحية الشهيرة ( شاهد مشافش حاجة ) لما كان بيقول عن جارته الرقاصة اللى اتقتلت ... متعودة دايماااااااا



مثلا لما حصلت حادثة هجوم اسماك القروش على السياح فى شرم الشيخ وملقتش تعليق حكومى رسمى بأن اسماك القرش هاجمت السياح علشان مختلة عقليا أو بسبب ماس كهربائى فى البحر فقلت .. متعودة دايماااااااا



ولما الطقس السيئ هجم على مصر بلا رحمة وهدم بيوت وشرد عائلات وقتل ارواح والبيان الرسمى ان كل ده بسبب الأمطار والطقس السيئ مش الاهمال والتسيب فى موضوع ازالة العقارات الآيلة للسقوط أو مراعاة اشتراطات الأمان اللى مخاليق ربنا كلهم بيطبقوها ماعدا مصر قلت .. متعودة دايمااااااااا




الكوميديا بأة كانت فى مهرجان القاهرة السينيمائى الدولى اللى المفروض يحوله اسمه لمهرجان القاهرة السينيمائى المحلى بعد لما كل الجوايز المهمة والكبيرة فازت بيها مصر ومش لجدارة وقوة الأعمال الفنية المصرية ولا لضعف ورداءة الأعمال الفنية العربية والاجنبية اللى كانت فى سباق المهرجان لكن علشان مينفعش يبقى المهرجان مهرجانا والبلد بتاعتنا والجوايز مننا وحد تانى ياخدها فقلت طبعا .. متعودة دايمااااااا




اتكسفت اوى لما لقيت البى بى سى بتقول ان مبارك بيأكد ان انتخابات مجلس الشعب كانت نزيهة والتجاوزات غير مؤثرة فى النتيجة النهائية والمئات بيهتفو ضده وضد التزوير والتقرير كان مصحوب بالصور فقلت .. متعودة دايمااااااااا

تعليق صغير .. ازاى انتخابات نزيهة وفى حكم ببطلان انتخابات 7 دوائر وطعون على نتيجة 270 مرشح من اصل 440 ؟؟؟؟؟؟؟؟؟

كفاية كدة اصلها على رأى المسرحية .. رقاصة وبترقص

البلياتشو



البلياتشو هو الشخص الذى يرتدى سترات مزركشة مبعثرة الألوان المبهجة ذات درجات الاضاءة المرتفعة أو كما يقال بالعامية ( الوان فاقعة) بهدف جذب الانتباه اليه ... ليس ذلك فحسب ولكن يقوم بتلوين وجهه بألوان لافتة للنظر جدا تخفى المعالم الحقيقية للوجه بهدف جذب الانتباه واثارة الضحكات أيضا

البلياتشو انسان كل مهمته فى الحياة تنحصر فى ايصال الضحكات الينا بطرق مختلفة سواء بالحركات الكوميدية أو الحديث المخرف الكوميدى أو غيرهما من الوسائل الشبيهة بالسحر الذى يمارسه الحواة لخطف عقول وتركيز الناس من حولهم والهائهم عن ضرورات الحياة وأهم أشيائها

البلياتشو من صميم عمله أنه يقوم باظهار عكس ما يبطن فهو يضحك ويضحكنا ويوهمنا بأنه اسعد خلق الله بينما هو فى داخله قد يكون مريض نفسى كافر بكل أنواع الضحك .. كافر بمهمته كاره لها

البلياتشو يزور انفعالاته ليضحكنا .. أو ليبكينا .. أو ليدهشنا أيضا .. ينكر الحقيقة لكى نظل سعداء أو مخدرين بفعل الدهشة والانبهار من أفعاله ... البلياتشو يفعل كل ذلك باحتراف شديد

البلياتشو عبقرى .. يوهمنا دائما بأن كل شئ تحت السيطرة المطلقة .. يوهمنا بأن الكون كله سعيد مثلنا .. ينقل الينا عدوى السعادة المزيفة .. ينقل الينا احساسا عميقا بأن هناك مؤامرات وتدخلات خارجية لو اصغينا اليها وانسقنا وراءها لضعنا جميعا فنفضل دائما الا نتجاوز حدود البلياتشو وألا نخرج من تحت عبائته

البلياتشو يريد دائما السيطرة والتحكم .. لا يرضى بأن يكون هناك بلياتشو آخر سواه .. ونحن لم نعد نطيق صبرا على فراقه وان كان فى مرافقته الذل والهوان واستلاب العقل والقلب

البلياتشو تحول من مجرد انسان مهمته الايهام بالسعادة المزيفة الى عدة اشخاص كل منهم بلياتشو من الخارج ووحش كاسر من الداخل ينكر الحقيقة ويزيفها بالرغم من ايمانه الشديد بأنه يكذب ولا يوجد من يصدقه سوى نفسه واصدقائه الآخرون البلياتشو

عزيزى البلياتشو ... اقترب الستار من أن يسدل ... انزعج من فضلك .. حاول أن تخلع ملابسك وتنفض الألوان عن وجهك قبل أن تقع الواقعة

أب للمرة الأولى

احساس غريب وقشعريرة تسرى فى جسدك وانت تحمل طفلك الأول للمرة الأولى
احساس جميل عبارة عن مزيج من الدهشة والفرحة والحنين وانت تلمس جلد طفلك الناعم الجميل للمرة الأولى
احساس لا يوصف بالقلق والترقب لأى عارض يطرأ على طفلك وأنت لم تزل جاهلا بمعاملة الأطفال الرضع
احساس جميل ملئ بالعرفان والمودة لوالدك ووالدتك لأنهم تحملوك كثيرا وعانى كلا منهما فى سبيل راحتك ووصولك الى الدنيا بسلام
احساس حقيقى بالخوف على طفلك .. يذكرك بخوف أبيك عليك منذ نعومة أظفارك .. ويوبخك بهدوء على ضيقك بهذا الخوف الأبوى القديم
الحمد لله الذى رزقنى بولدى ( يوسف ) ووهبنا نعمة منه

بلاها نادية وخد سوسو

الحزب الوطنى - باعتباره مسئولا عن النظام الحاكم فهو الحزب الحاكم ومدير شئون البلاد والعباد - قرر فجأة أن يستعين بالداعية الأسلامي الشهير الأستاذ عمرو خالد كدعاية انتخابية لمرشح الحزب الوطنى عن دائرة الرمل اللواء عبد السلام المحجوب محافظ الاسكندرية الأسبق - وان كان الرجل لا يحتاج الى دعاية فانجازاته مازال السكندريون يتحدثون عنها حتى الآن - وبالرغم من النفى القاطع من الجميع سواء الحزب أو اللواء المحجوب أو حتى عمرو خالد بأن الندوة التى اقامها ليست دعاية للمرشح الا ان الجميع لا يصدق ولن يصدق ولكن بنظرة اكثر موضوعية نجد أن الحزب الوطنى قد استغل الفراغ الدينى لدى الشعب - باغلاق القنوات الدينية بدعوى التعرض للأمن القومى واحياء الفتنة الطائفية الخ - باستقدام الأستاذ عمرو خالد - والذى تم ابعاده منذ ثمانى سنوات بواسطة نفس النظام الحاكم - لكى يرسخ فكرة الدين أفيون الشعوب وبالتالى تحسين صورة الحزب الحاكم وبالتالى المحاولة لتجميل الصورة العامة التى لوثتها مؤخرا تصرفات اعضاء المجمعات الأنتخابية للحزب الوطنى فى اطار الاستعداد لخوض انتخابات مجلس الشعب هذا العام من بلطجة واعتداءات جسدية وصلت لحد القتل العمد وغير العمد وخلافه من فضائح كفيلة بأن تنهى الحياة السياسية لأى شخصية سياسية فى دولة تمتهن السياسة الحقيقية
الفقرة السابقة ذكرتنى بمشهد من المسرحية الكوميدية للراحل فؤاد المهندس عندما أراد أن يزوج احدى بناته لطالبه النجيب وعندما رفض الأخير أن يتزوج نادية أخبره المهندس : بلاها نادية وخد سوسو
لن اتحدث عن التزوير المنتظر والنفاق المتوقع والطبخة الجارى اعدادها على قدم وساق لتظبيط الأمور وتيسيرها لانتخابات الرئاسة العام القادم ... حد يعرف الدكتور البرادعى فين ؟؟

عيد سعيد ان شاء الله

كل عام وانتم بخير وعيد اضحى سعيد علينا وعليكم يارب

هدنة بأة لحد يوم الجمعة اللى جاية ان شاء الله

الكل بأة يحاول يسترخى ويستجم ويعمل هدنة ولو مؤقتة

سلام مؤقت

علامات استفهام

تستيقظ من نومك مبكرا كالعادة فلا يدهشك أصوات الصغار المتوجهين الى مدارسهم ولكن تظهر علامات التعجب فوق رأسك تماما حول امكانية حصول هؤلاء الصغار على وطن يحترم أبنائه ، تصلى فرضك وتفطر وترتدى ملابسك تأهبا للخروج من البيت متجها الى عملك فلا يدهشك كم الزحام الرهيب على محطات الأتوبيس وسيارات النقل الجماعى أو حتى الخاص ولكن علامات الاستفهام تظهر مباشرة أمامك اذ كيف يمكن لذلك الشعب أن يصمت عن حقه الأصيل فى مواصلات مريحة وسهلة تنقله فقط لمقار عمله وأشغاله اليومية بفرض أن الشعب عندما يعمل فأن الوطن يعيش
عندما تصل لعملك وتشرع فيه لا تندهش من العملاء الآتين من كوكب بلوتو الذى خرج ولم يعد عن مجرتنا الحبيبة ولكن تدور علامات الاستفهام بقسوة داخل رأسك هذه المرة سائلة عن السبب الحقيقى وراء استعباد البشر لبعضهم البعض تحت ذريعة العمل ومصالح العمل فكل عميل عندما يطلب عملا ويشاء حظك العاثر أن يكون العميل قد سدد جزءا من الأموال المستحقة نظير العمل الذى تؤديه له ، فانه يشعر وكأنه قد اشتراك أنت شخصيا بشحمك ولحمك وصرت عبدا له وكأننا فى دولة المماليك البحرية
بانتهاء اليوم وعودتك للمنزل لا تندهش أيضا من كيفية مرور اليوم بهذه العصبية وهذه الصعاب ولكن تدور علامات الاستفهام مرة أخرى فوق وداخل رأسك هذه المرة سائلة : هل سنظل هكذا ؟؟؟

موال البـيات و النـوم

موال البيت والنوم رواية عظيمة لكاتب عظيم وهو الأستاذ خيرى شلبى الحائز على جائزة الدولة التقديرية فى الآداب بسبب هذه الرواية الضخمة

الأستاذ خيرى شلبى انا بعتبره كاتب من طراز خاص متخصص فى سرد حكايا المهمشين اللى بنقابلهم كتير جدااا فى حياتنا كل يوم مرة على الأقل لكن بعبقريته بيقدر يحكى لنا رواية ضخمة عن واحد من المهمشين دول نكتشف انهم لهم عوالم موازية تماما لعالمنا يمكن عوالم اضخم واعمق من عوالمنا كمان

رواية موال البيات والنوم رواية عبقرية بيقدر يصور فيها استاذ خيرى شلبى الأماكن والشخصيات كأنك شايفها بالظبط قدامك ومش بس كدة لا يخليك تحس احاسيس الأشخاص كمان خصوصا بطل الرواية اللى كل مأساته فى الحياة انه مشرد فى الأرض فى القاهرة الساهرة معندوش مكان يبات فيه ولا ينام فيه وكل مشكلته فى الحياة انه يلاقى مكان ينام فيه بعد ما اتحفظ شكله فى بوفيه محطة القاهرة ( رمسيس ) واماكن تانية كتيرة بيوت اصحاب ولوكاندات وغيرهم لغاية ما تكتشف فى الآخر انه كان مجرد حلم طويل جدااااا بيفتكر فيه البطل معاناته زمان قبل ما يتجوز ويستقر

الرواية بتدور احداثها فى القاهرة فى فترة الستينيات ايام الثورة الثقافية والأدبية لما كانت على اشدها وبترصد بشكل دقيق جداا الوسط الفنى والأدبى فى الفترة دى كان شكله ايه ومين ابطاله ( اسماء مستعارة طبعا ولمجرد الاشارة مش اكتر ) لكنها اوصاف تستحق التأمل فعلا

رواية كبيرة وضخمة قرأتها فى اكتر من شهرين بسبب شهر رمضان ومشاغل العمل لكن استمتعت بيها جداااا

بـسـرعـة

البوست النهاردة هتكون حدث وتعليق على الحدث وبسرعة

اول حاجة : البلطجة والاحداث المؤسفة اللى بتحصل فى المجمعات الانتخابية للحزب الوطنى واللى الهدف الرئيسى منها انتخابات داخلية لاختيار مرشحين الحزب الوطنى عن كل دائرة انتخابية

التعليق : اذا كانت انتخابات الحزب الحاكم الداخلية لاختيار المرشحين اللى طبعا هيكسبوا فى انتخابات مجلس الشعب بالمنظر ده يبقى الاعضاء عاملين ازاى وحال الحزب ايه وبالتالى اظن اننا عرفنا دلوقتى وانكشف حال البلد تحت رعاية الحزب الحاكم والعجيب انهم مش خجلانين من نفسهم ولا اى حاجة وعادى جدا

تانى حاجة : وزير التعليم احمد زكى بدر استقبل العالم المصرى الدكتور فاروق الباز وبحثوا مع بعض كيفية تطوير مناهج العلوم المختلفة فى سنوات التعليم من الابتدائى حتى الثانوى

التعليق : خطوة متأخرة جدااااااااااااااااااااااااااااااااااا لكن الحقيقة هى نقطة فى صالح الوزير بس من باب اولى اصلاح حالة المدارس اللى الطلبة ف كل فصل 140 طالب زى كدة ما حصل ف صفط اللبن الاسبوع اللى فات وطالبة راحت البيت تجيب كرسى تقعد عليه لأن ملهاش مكان فى الفصل تقعد فيه

تالت حاجة : موضوع خروج الاهلى من بطولة افريقيا وثقافة القطيع اللى هو التعصب الاعمى ورفض اى تفسير منطقى للخروج من البطولة لدرجة ان محمد فضل طلع علينا بيقول انه سال الحكم انت اخدت رشوة ؟ وقال ايه الحكم قاله اه اخدت رشوة

التعليق : كلام محمد فضل دليل قاطع على ان مفيش دماغ بتفكر والمحزن ان الناس صدقته !!! والمشكلة مش فى الحكم اللى بوظ الماتش المشكلة ان الاهلى نفسه هو اللى فيه مشكلة والدليل ان فريق البطولات الجامد مقدرش يحط جون فى 88 دقيقة بعد ما دخل فيه جون الفريق التونسى !!! الفريق الجامد صعد من دور المجموعات فى نفس البطولة بالعافية !! الفريق تعبان جدا وكل الاهلاوية عارفين كدة ومقتنعين بكدة ومع ذلك بيكابرو وعاوزين يحملو الحكم مسؤلية الخروج .. فى حالة تخاذل وتهاون وانفلات كمان داخل صفوف الفريق والدليل حوارات عماد متعب واعتراضات اللعيبة على الحكام واخرها الخناقة مع حكم مباراة شبيبة القبائل فى الجزائر وعدم اتخاذ اى قرار لردع المخطئين

رابع حاجة وكفاية كدة : تامر حسنى هياخد 80 مليون جنيه علشان يمثل مسلسل فى رمضان اللى جاى

التعليق : ربنا لا تؤاخذنا بما فعل السفهاء منا


الدال على الخير كفاعله : هام وعاجل

بسم الله الرحمن الرحيم
التدوينة دى يا جماعة منقولة من مدونة ( كوكب آبى ) والدال على الخير كفاعله
احيانا ينتاب المرء منا حالة من العجز عن التفكير او الشعور بالتقصير تجاه الاخرين
واحيانا اخرى تتقاذفنا امواج الحياة وتجذبنا بعيدا عن شاطىء الحياة ولكن عندما يريد الله لنا خيرا يرسل من ياخذ بايدينا او من يدلنا الى فعل الخير اومساعدة شخص ما وتلك نعمة من الله نحمده ونقدسه عليها فالشكر للاخ الكريم صاحب مدونة طهر فؤادك على دعوته الكريمة لمساعدة شخص مريض يحتاج منا المساعدة والى نص الرسالة فاكر جمعية الامل (فرع سوهاج ) اللى كانت عاملة معرض ملابس لمساعدة مرضى السرطان يارب تكون افتكرتها... المهم جت ليهم حالة بس صعبة شوية ومحتاجة كلنا نتكاتف مع بعض ونساعدها وهكتبلك تفاصيل الحالة ويارب تنشرها ونحاول نساعدها كلنا باللى نقدر علية ان شاء الله وهى على لسان الحالة طبعا ربنا يشفيها ويعافينا جميعا اللهم امين والمسلمين

بتقول :-اسمه بخيت محمود أحمد والذى يعمل بالهيئة العامة للتأمينات الاجتماعية بســوهاجوبيقول :-حيث انني مريض بمرض ( السرطان فى الكلى ) وتم اجراء عملية لاستئصال الورم على نفقتي الخاصة بتاريخ 26/11/2009 ثم تم دخولى الى معهد اورام اسيوط بتاريخ 5/12/2009 واوصى الطبيب المعالج بضرورة الاستمرار فى العلاج بدواء (sutent) وذلك لمدة 18 شهرا حتى يتم الشفاء وتبلغ قيمة علبة الدواء 23 الف جنيها ونظرا لارتفاع سعر الدواء عن قدرتي المالية فقد وافقت شركة فايزر للادوية على تخفيض 50% من قيمة الدواء وحيث ان الدواء بعد تخفيض 50% تبلغ قيمته 11.500 الف جنيها .ونظرا لظروفى المالية الصعبة حيث انني اعول اسرة فأرجو من سيادتكم التكرم بالموافقة على مساعدتي لشراء هذا الدواء بصفة مستمرة أو مساهمة اهل الخير ويعتبرهذا الدواء الوحيد فى علاجي الذى تحسنت عليه صحتي حيث اننى فى حاجة الى 6 جرعات حتى اتماثل للشفاء .وجعلكم الله عونا للمحتاجين ت/0115428158العنوان/سوهاج- شارع ابو الحسن البصري خلف شارع 15

الى هنا انتهت الرسالة من صاحب الرسالة وبدا دورنا فى مساعدته كل بقدر استطاعته فمن يريد النشر او التنويه عن الحالة فى مدونته او على موقع الفيس بؤك فشكرا له وجزاءكم الله خيرا

ومن يريد التبرع فيمكنه ارسال حوالة بريدية باسم السيدة / ماجدة بخيت محمد ابراهيم وهى زوجة المريض على مكتب بريد سوهاج الفرعى بالحميات ورقم التليفون المذكور بعاليه يخص الحالة ايضا .
او من يرغب بارسال حوالة بنكية اوالتبرع نقدا فانا مستعد لاستقبالها وارسالها الى الحالة باليد ،ولاى استفسار يمكنكم الاتصال برقم المريض بعاليه او الاتصال على رقم 0101345140
.

برجاء الاهتمام بالنشر ودعوة الاقارب والاصدقاء من خارج التدوين للمشاركة بقدر المستطاع .

دخلنا عصر التعبيرية


طبعا موضوع فبركة الأهرام لصورة قادة مفاوضات السلام بواشنطن الفترة اللى فاتت كانت حديث وكالات الأنباء العالمية وكانت فضيحة بجلاجل كمان خصوصا ان السيد المحترم أسامة سرايا فسر الفبركة بأنها " تعبيرية " والحقيقة انا بقوله بلاش مداراة يا استاذ سرايا كلنا عارفين انها متفبركة ومعمولة بالأمارة ببنرنامج مشهور جداااا اسمه " الفوتوشوب " واللى عمل الفبركة للأسف مش ذكى وكشف نفسه بنفسه بعد ما غير فى اهم معالم الصورة الأصلية

بما اننا دخلنا عصر " التعبيرية " اسمحولى اقدم لكم اخر انتاج تعبيرى واحد عمله على جروب ف الفيس بوك بيتهكم فيه وبيسخر من مدرسة الأهرام " للصور التعبيرية " والصور كالآتى


الصورة الأصلية - نهاية اجتماعات القمة العربية فى مدينة سرت الليبية الأسبوع الماضى




الصورة التعبيرية - لو طبعا الأهرام عملتها - كانت هتكون كدة

مهو من وجهة نظر الأهرام مينفعش حد يحط ايده على كتف الريس - يادى العيبة - مينفعش خالص يا جماعة

لما حصل موضوع فبركة الصورة مكنتش مندهش مهو بعد ما الدكتور مصطفى محمود الله يرحمه بطل يكتب فى الأهرام ومكنش بمزاجه زى ما اتوقف العلم والايمان برضه مش بمزاجه وبعد ما نجم الجير تمورة بأة من كتاب الأهرام محدش يستغرب يا جماعة

ايه فى أمل


ايه فى امل

البوم السيدة فيروز ... الحقيقة مش هقدر اقول مقدمة لأن المطربة هى فيروز .. صوت السماء بالنسبة لى .. صوت هدوء النهر وقوة البحر وصفاء الذهن فى كوكتيل عجيب غريب لما بسمع صوتها بحس انى انا .. فعلا دى حقيقة برجع لنفسى اوى لما بسمعها كأنى سامع نفسى من جوة نفسى

ايه فى امل كان رسالة واضحة اوى للى بيفهم وللى بيحب فيروز .. ناس تفسر العنوان بأنه تحدى من فيروز وعشاقها للناس اللى حاولت تكتم صوتها اللى زى ماهو متغيرش ولا اتأثر بسنين عمرها الطويلة ربنا ينعم عليها بالصحة والعافية ، وناس تانية هتفسره انه تحدى لكل ظالم وكمان شعاع امل لكل يائس انه لسه فى امل طالما فينا نفس

السيدة فيروز ... لما غنيتى حسيت فعلا يعنى ايه غنا بعد ما كنت قربت انساه من العك اللى بنسمعه اليومين دول باستثناء قلة قليلة جداااااااااا لدرجة انى عن نفسى بطلت اسمع اغانى واكتفيت بالموسيقى الراقية وبس

تحياتى ليكى يا عظيمة

سيدى القاضى

بسم الله الرحمن الرحيم

سيدى القاضى .. تحية طيبة وبعد

ابدأ حديثى وخطابى معك بآية من القرءان الكريم تلك الآية تعرفها أنت جيدا فأنت تراها يوميا معلقة فوق رأسك تماما فى قاعة المحكمة وفوق منصة القضاة ... قال تعالى (( واذا حكمتم بين الناس أن تحكموا بالعدل )) صدق الله العظيم . سيدى القاضى لماذا لم تطبق هذه الآيه فى أحكامك الأخيرة ؟ أرى نظرات الدهشة والاستنكار معا فى وجهك ولكن صدقنى انا مواطن عادى فى هذه القرية الظالم أهلها ولا ملجأ لى الا الله أولا ثم أحكامك العادلة ثانيا

سيدى القاضى .. عندما تابعت أحكامك مؤخرا فى القضايا الهامة لاحظت ذلك بالفعل .. ولنبدأ مثلا بحادثة العبارة الشهيرة التى راح ضحيتها ألف نفس بشرية لا حول لها ولا قوة ... قامت الدنيا وقتها وظننت انها لن تقعد ولكن كالعادة التسويف والمماطلة حتى ننسى وكعادتنا دائما فكل شئ فى مصر ينسى بعد حين ...انتهت القضية تماما بحبس القبطان المسؤل عن الكارثة لمدة صغيرة جدا انتهت تقريبا اثناء اجراءات المحاكمة ... والمسؤل الأكبر هرب الى بلاد الضباب تحت ذريعة العلاج بالخارج وصدقناه كما صدقته أنت بأنه سافر للعلاج وسيعود للمثول أمام القضاء المصرى النزيه العادل وانه مستعد تماما لأى حكم يصدر بحقه .. طبعا لم يتحقق أى شئ مما سبق وكأن ازهاق ارواح ألف نفس بشرية من اهل مصر شئ عادى جدا ويحدث يوميا ولا يستحق كل هذه الثرثرة

بعدها بقليل فوجئنا بكارثة حريق مسرح بنى سويف الذى راح ضحيته الكثير من خير العقول المثقفة المصرية شبابا وشيوخا ولم يحدث أى شئ باستثناء بعض الأحكام الهزيلة بالحبس والغرامة لصغار المسؤلين بينما الرأس الأكبر والراعى الرئيسى مازال يرسم لوحاته العجيبة ويتفنن فى معاداة الثقافة التى من المفترض أن يكون هو وزيرها

وماذا عن قضية أكياس الدم الفاسدة ؟؟؟ ألهذا الحد نفوسنا وأرواحنا رخيصة ؟؟؟ المستورد يحصل على حكم بالبراءة بالرغم من اعترافه ؟؟؟ عجبت حقا لما حدث ولكن زالت دهشتى عندما علمت أن الحكم بقرار سيادى اتضح فيما بعد وفقط خلال الأيام الحالية عندما رشحه الحزب الحاكم ليكون منافسا لأحد رجال الأعمال الهاربين سابقا والذى رشحه حزب معارض آخر فى نفس الدائرة الانتخابية فى انتخابات مجلس الشعب لهذا العام

لن أخجل مطلقا عندما اعلن استيائى الشديد منك عندما اصدرت حكمك التاريخى باعدام رجل الأعمال الذى حرض على قتل الفنانة المغمورة ثم فجأة عدلت عن حكمك العادل لأن النفس بالنفس الى حكم مخفف فقط خمسة عشر سنة وياللعجب هيئة الدفاع من فطاحل القانون فى قريتى الظالمة أعلنوا رسميا أنهم سيطعنون فى ذلك الحكم المخفف بالرغم من اعتراف المتهم الرئيسى والمتهم الذى قام بالتحريض وبالرغم من كل شئ

سيدى القاضى صدقنى انا ارى فيك هامة كبيرة كبر الجبل ووقفت معك مؤيدا فى مشكلتك السابقة مع النظام الحاكم فى قريتى الظالمة ولكن اسمح لى ان ابدى اعتراضى على ما تفعله فهذا لا يرضى به انسان عاقل علم ان هناك ظلما وهناك قاض يحكم حكما عادلا على الظالم ... اذكرك مرة أخرى بالآية الكريمة المعلقة فوق رأسك (( واذا حكمتم بين الناس أن تحكموا بالعدل )) وأيضا بحديث رسولنا الكريم صلى الله عليه وسلم ( انما أهلك الأمم من قبلكم انهم كانوا اذا سرق فيهم الشريف تركوه واذا سرق فيهم الضعيف أقاموا عليه الحد ) ومن الواضح أننا هالكون لا محالة

أخيرا سيدى القاضى .. كنت مؤيدا وبقوة لاشرافك أنت وزملاؤك القضاة على اية انتخابات تشريعية أو رئاسية تحدث فى بلادى ولكن مما سبق وهو نقطة فى بحر اعتذر اليك وأعلن انى اتخلى عن هذا المطلب فأنا لم أعد أثق فى أحكامك

وخير الختام السلام

صباح الخير

الحقيقة انا مش عارف ابدأ منين الكلام عن الحالة ( المزرية ) اللى وصلنا فيها بعقولنا وافكارنا بسبب ( قرفى الشديد ) من اللى بيحصل

الناس مغيبة بفعل فاعل والفاعل معروف للجميع ولما الناس تعرفه بتمصمص شفايفها وتقول : هنعمل ايه ؟؟ ربنا ينتقم من الظالم والمفروض ان الظالم هو الفاعل اللى قلنا عليه لكن المفاجأة ان الظالم هما الناس اللى بتمصمص شفايفها

الأسبوع اللى فات كان معركة حامية الوطيس بين الأنبا بيشوى ومحمد سليم العوا بسبب غير مفهوم لحد دلوقتى ومحدش يقول لا السبب معروف وهو التصريحات المتبادلة ... مهو ده اللى الفاعل اللى بيفعل عاوزك تقتنع بيه يا سيدى لكن الحقيقة المرة ( غير الحقيقة المرة بتاعة ميلودى ) ان التصريحات دى اثبتت بالدليل القاطع اللى محدش يقدر ميشوفوش ولو كان أعمى ان فى كراهية متبادلة ملهاش حدود والتطرف موجود على المستوى الاكبر من مجرد مواطنين عاديين ووصل للكبار والقادة والموضوع هيموت علشان البابا ( تفضل مشكورا وبهدوء ) واعتذر علنا فى التلفزيون الرسمى للدولة عن تصريحات خليفته المنتظر ومظنش انه هينولها

وسط العك ده يا سادة يا مواطنين حصلت حاجات كتيرة اوى ومحدش خد باله منها الا اقل القليل ودى حاجات بسيطة منها

اولا : كيلو اللحمة وصل لــ 70 جنيه فى مناطق كتيرة عادية وفى المناطق الشعبية حد اقصى 65 جنيه وطبعا الحزن الوطنى عامل سرادقات بيبعو فيها اللحمة اللى الكيلو منها بـ 38 جنيه بس والله اعلم مصدرها ايه

ثانيا : من 3 ايام رحل عن العالم الاسلامى المفكر الكبير الدكتور محمد فتحى عثمان توفى ف امريكا بعد ما قضى فيها اكتر من 30 سنة بينشر الاسلام ( الصحيح ) وكان بيلقى محاضرات فى جامعات امريكا والعالم واتكرم فى معظم انحاء العالم ماعدا مصر طبعا
ثالثا : النهاردة توفى العالم الجليل الدكتور عبد الصبور شاهين المفكر الاسلامى ومفجر الثورات الفكرية الاسلامية الشهير وطبعا محدش عرف حاجة علشان كنا مشغولين بجنازة والد احمد السقا وجنازة والدة محمد فؤاد

رابعا : وزارة التضامن الاجتماعى بتجهز للخاذوق الكبير اللى هو كوبونات انابيب البوتاجاز وطبعا هيتطبق الكلام ده بعد انتخابات مجلس الشعب واللى محدش يعرفه لحد دلوقتى ان اللى هيصرف انابيب بوتاجاز بالسعر المدعم هما الناس اللى عندهم بطاقات تموين فقط يعنى تقريبا تلت اربع المواطنين هيشترو الأنبوبة بالسعر الرسمى اللى هو 42 جنيه



صباح الخير ... اوعوا تصحوا

واجب عزاء

انا لله وانا اليه راجعون

توفيت الى رحمة الله تعالى والدة الأستاذة : سحر غريب الكاتبة وصاحبة مدونة حماتى ملاك والعزاء غدا ان شاء الله السبت الموافق 18 سبتمبر بمسجد آل رشدان بمدينة نصر أمام بوابة مقصورة ستاد القاهرة

الخبر منقول من مدونة صيدلانية طالعة نازلة

يـوم مـشـمـس


اهدى وزوجتى تلك الورود الى زهرتنا الهادئة التى استمتعنا بمجالستها للمرة الأولى ... شمس النهار ... او شمس المدونات كما احب ان اطلق عليها لأنها شمس بحق فعندما تجلس اليها تشعر بالدفأ الأسرى المصرى الجميل .. كرم الضيافة الممزوج بالاحتفال الجميل بالضيف .. هدوء الصوت الموحى بالطمأنينة اليك .. وصفات اخرى عديدة لا يتسع المجال لذكرها فهى تحتاج الى صفحات عدة يكفى أن اقول ان الوقت مر مرور الرياح فى الصيف لا يشعر بها احد اذ تنبهنا فجأة اننا قد وصلنا الى مرحلة منتصف الليل دون كلل او ملل من حديث بل على العكس استمتاع كامل بكل موضوع تحدثنا فيه وكل رأى استمعنا اليه

شمس النهار ... اتقدم وزوجتى اليكى بكل احترام وتقدير ومحبة ... شفاكى الله وعافاكى من كل سوء والى لقاء قريب ان شاء الله

هى فوضى

ايوة هى فوضى بمعنى الكلمة
حالة البلد فوضى بمعنى الكلمة
المرور - تصريحات المسؤلين - الحوادث العجيبة اللى مبتحصلش غير فى مصر ولازم أيام العيد - راجع حادثة انقلاب الصندل المحمل بالسولار فى مياه نيل أسوان - والحقيقة مش عارف منين المسؤلين بيجيلهم وش يكدبو علينا وهما عارفين اننا عارفين انهم كدابين
تانى ايام العيد كان عندى فرح فى مصر الجديدة والحقيقة اقدر اقول بالفم المليان لأى كداب زفة فى المرور ::: طظ فيك وفى كدبك بأن البلد كان المرور تمام التمام علشان يا محترم انا اخدت الطريق من عندى لرمسيس فى ساعتين ونص اللى اساسا هو ميزيدش عن نص ساعة فى الأيام العادية وسلملى على تصريحات هية النقل العام بتاعة كل سنة اللى هو هنزود عربيات ونزود مترو والكلام العبيط ده
تنبيه هام : الجيل القادم لمصر هو جيل من السفلة والرعاع والبلطجية والدليل على ذلك حوادث التحرش الجماعى فى حديقة الحيوان وحديقة الأورمان وحديقة الفسطاط طوال أيام العيد الغير سعيد بالمرة وسلملى على وزير الداخلية اللى باعت فى كل جنينة حبة عساكر عبط بشوية خرازانات
عليه العوض

كل عام وأنتم بخير

كل عام وكل مصرنا وعالمنا العربى والاسلامى بخير

تقبل الله منا ومنكم الصيام والقيام وقراة القرءان وجعل الله عيدنا سرورا وكفانا شر السفه والسفهاء من اقوامنا

اللهم انى صائم - الجزء الثانى


مفيش فايدة ... عاوزين يفطرو الشعب اللى اساسا جزء كبير منه فاطر ولله الحمد

اخر حاجتين حصلوا ويندرجو تحت باب .. اللهم انى صائم كالتالى

اول حاجة : فضيلة المستشار المحافظ ... ايوة فضيلة المحافظ مش فضيلة المفتى ... قال فى ملتقى الفكر الاسلامى اللى بيتعمل كل رمضان .. قال بالحرف الواحد : انقطاع المياه والكهرباء يزيد من ثواب صيام المواطنين !!!!! محدش يستغرب لان اللى خللى محافظ يبقى موجود فى ملتقى الفكر الاسلامى يعنى ملتقى للعلماء المسلمين مش المحافظين يخليه يقول اللى هو عاوزه على الاصح اللى الحزب عاوز يقوله بس
فضيلة المحافظ مقالناش بيزيد من ثواب الصيام ازاى؟؟؟
هل مثلا بيخللى المواطنين ينشغلوا بالكهربا والمية اللى مش موجودين بدل المسلسلات والبرامج اللى كلها مسخرة وتفاهة وسخافة ؟؟؟ ولا مثلا بيخليهم يستغفروا ربنا علشان ميسبوش للحكومة والسادة المسؤلين ولا ايه بالظبط ؟؟؟؟ الحقيقة مش قادر استوعب الفتوى دى

تانى حاجة : فضيحة سرقة لوحة زهرة الخشخاش للفنان العالمى فان جوخ من متحف الفنان محمد محمود خليل وحرمه بحى الدقى بمحافظة الجيزة فى عز الضهر !!! ايوة فى عز الضهر والفضيحة فضيحتين الحقيقة .. الفضيحة الاولى ان المعاينة اللى قامت بيها النيابة باشراف النائب العام نفسه كشفت عن كوميدية اسلوب الحراسة وتأمين المتحف بالكامل وان عدد كاميرات المراقبة المفروض 34 كاميرا اللى شغال منهم فعلا 3 بس !!!!! وان وزارة الثقافة خصصت من ميزانية الدولة مبلغ 37 مليون جنيه لشراء كاميرات جديدة وده محصلش !!!!!! تانى فضيحة بأة تصريحات الوزارة نفسها بأن الللوحة اتسرقت بالنهار وبعد ساعتين قالوا ان سلطات مطار القاهرة قبضت على اتنين من ايطاليا معاهم اللوحة واللى اتضح بعد كدة انه مش حقيقى ... حاجة تفقع مش كدة ؟؟؟

كفاية كدة بأة لان الحقيقة رمضان السنة دى ماشاء الله كله مفطرات ... ربنا لا تؤاخذنا بما فعل السفهاء منا

اللهم انى صائم - الجزء الأول

مش عارف ليه كل يوم فى نهار رمضان تخبطنى حاجة ف دماغى تخلينى اقول بالفم المليان وانا ماسك أعصابى ... اللهم انى صائم
مثلا مثلا ادى عينة من اللى الحاجات اللى بتكلم عليها

عدد مسلسلات رمضان ( التافهة اللى مليانة مخدرات وخمور ورقص ومسخرة ) وصل لعدد 60 مسلسل
تكلفة انتاج المسلسلات المصرية ( فقط ) وصل لمبلغ 750 مليون جنيه مصرى جنيه ينطح جنيه
رئيس الوزرا بيقول ان انتاج القمح ممكن التوسع فيه رأسيا ومش أفقيا علشان معندناش اراضى تنفع للزراعة !!! فى حين وزارة الزراعة بتقول انه غير ممكن التوسع رأسيا ( يعنى زيادة انتاج الفدان الواحد ) علشان المناخ فى مصر مش مساعد على كدة .. نصدق مين ونكدب مين ؟
كل حاجة اسعارها ولعت مش غليت بس واتحرقت كمان والثورة الجاية هتبقى ثورة الجياع ان شاء الله
اخر فتوى لذيذة بأة ان الحزب الوطنى مش حرام مكروه بس خصوصا فى نهار رمضان ( دى طبعا كانت كاريكاتير فى جريدة الدستور ) ولا عزاء للصائمين

كفاية كدة .. اللهم انى صائم

رمـضـان كـريـم

كل عام وأنتم جميعا بخير وصحة وسعادة بمناسبة حلول شهر رمضان المعظم اعاده الله علينا بالأمن واليمن والبركات والطمأنينة فينا وفى أهلنا وأوطاننا

اللهم تقبل منا الصيام والقرءان والقيام وسائر الأعمال وارزقنا عملا صالحا يقربنا الى وجهك الكريم ويقربنا الى عرشك العظيم ليظلنا بظلك الحليم يوم لا ظل الا ظلك يا غفور يا رحيم

ثقافة القطيع

الأسبوع الماضى انطلقت حملة شعواء من قناة الرحمة الفضائية الاسلامية ضد كاتب مغمور يدعى ( أنيس الدغيدى ) والحملة هاجمته بضراوة وشراسة غير معهودة بسبب واحد فقط ... عنوان روايته الجديدة !!! العنوان يحمل جملة ( محاكمة النبى محمد صلى الله عليه وسلم ) .. العنوان لأول وهلة هو استفزاز صريح لمشاعر المسلمين الغيورين على النبى محمد صلى الله عليه وسلم وعلى آل البيت بصفة عامة ولكن حينما قام الشيوخ الأشاوس بالحملة ضد الكاتب على شاشة القناة وعلى صفحات اليوم السابع لم يذكروا اى شئ عن محتوى ومضمون الرواية ولكنهم تعلقوا بالعنوان ورصدوا قائمة الأتهامات بالكفر والزندقة للكاتب وتبعهم بالطبع وللأسف السادة المتأسلمون مشاهدى القناة الذين يعتنقون مبدأ ثقافة القطيع التى تنادى بأن نسمع ما يقوله الشيخ فلان وحده ووحده فقط ولا نعمل العقل ابدا فلقد قال الشيخ فلان كذا ومن المؤكد انه صحيح مائة بالمائة ولا جدال !!! وصفحات اليوم السابع ممتلئة عن آخرها بهذه الآراء الصادرة عن السادة المتأسلمون مشاهدى القناة

الكاتب بدوره قام برفع دعوى قضائية وبلاغ للنائب العام متهما القناة وشيوخها بتكفيره والتشهير به والسب والقذف العلنى مفندا بلاغه بأنهم لم يقرأوا الرواية ولم يعرفوا مضمونها من الأساس لأن الرواية مازالت تحت الطبع !!!! ثم فجأة خرجت علينا قناة الرحمة بالشيخ الجليل مطلق حملة التشهير ضد الدغيدى ليعلن ان الحملة انما صدرت بدافع الغيرة على رسول الله صلى الله عليه وسلم وعلى آل بيته وأن الرواية فيها من الخير ما فيها لأنها تدافع عن النبى صلى الله عليه وسلم من خلال بطلها المحامى المسلم الذى يسافر الى الدنمارك فى ذروة احداث الرسوم المسيئة للنبى صلى الله عليه وسلم الشهيرة وقام برفع دعوى قضائية ضد الصحيفة التى نشرت تلك الرسوم وكانت القضية معروفة بنفس عنوان الرواية ( محاكمة النبى محمد صلى الله عليه وسلم ) وان الكاتب قد قال خيرا ... الخ

وبالطبع السادة المتأسلمون مشاهدى القناة قاموا بالرد الفورى متمثلا فى مدح الكاتب والرواية وفضيلة الشيخ الذى اتعرف بالحق وانه كان مندفعا فى حملته الشعواء راجين المولى عز وجل ان يديم عليه نعمة الدفاع عن الاسلام !!!

هذه الأحداث تنم على شئ خطير جدا ... ثقافة القطيع تنخر فى عصب هذه الأمة للأسف ... وكم من المتابعين لهذه القنوات قاموا بالدعاية السيئة للأسلام ؟؟؟ وكم من مرة تحدث فتنة طائفية أبطالها يتضح انهم من مشاهدى هذه القناة ؟؟؟؟ المنهاج العام قال الله وقال الرسول ولكن المتابعين للمنهاج لا اعتقد انهم يفقهون ما قاله الله وقاله الرسول

فيلم السيد لا أحد

شاهدت من أيام قليلة فيلم (Mr.Nobody)
الفيلم عبارة عن خيال طفل ولد فيه مدينة بأكملها بأشخاص طبيعيين جدا ولكن الأحداث متداخلة بشكل مذهل يجعلك كل دقيقة تدرك ان هناك شيئا غامضا لا تفهمه وعندما تهم بترك الفيلم لأنك لا تفهم المعنى تفاجأ بمشهد يشرح لك كل ما غاب عن ذهنك فجأة وكأن المخرج يطل عليك من الفيلم ويقول لك .. انتظر ما غاب عن ذهنك تفسيره كذا وكذا

الفيلم عبقرى الفكرة .. المونتاج .. التصوير .. الإخراج ... يبدو لك كقصة خيال علمى ولكنها تحتوى على دلالات ورموز كثيرة جداااا تشعر بالسعادة والدهشة عندما تفك طلاسمها وحدك

ادعو الجميع الى مشاهدة الفيلم لأنه يستحق المشاهدة وقبل ان تغمرنا اعلانات أفلام العيد التافهة الساقطة الملوثة بدماء لحوم جزارين الدقى كما تعودنا وكما بدأت بعض الفضائيات فى التنويه عنها

كبار بدأنا .. كبار لم نستمر


يحتفل التلفزيون المصرى هذه الأيام بمرور 50 عام على بدء البث لأول مرة عام 1960 ومن مظاهر الاحتفال الفقير اطلاق قناة تلفزيونية اسمها ( التلفزيون العربى ) ومهمتها هى اعادة بث اجزاء من التراث التلفزيونى المصرى منذ بداية البث عام 1960 باذاعة برامج ومسلسلات وخلافه

الى هنا والموضوع عادى جدا ليس به اى اخطاء بل على العكس فكرة اطلاق تلك القناة كانت جيدة الى حد ما ولكنها للأسف الشديد كما يقول الكاتب سليم عزوز فى القدس العربى ... انها كشفت مدى انحطاط المستوى العام للتلفزيون المصرى بعد مرور 50 عام على انشائه خاصة ان هذه القناة تقوم باذاعة مسلسلات وبرامج كانت تفتقر بشدة الى الامكانيات المتاحة حاليا المتقدمة منها وغير المتقدمة وبالرغم من ذلك فانها تبدو وكأنها ذات قيمة فنية واعلامية قيمة للغاية خاصة اذا كانت المذيعات اللاتى يقدمن البرامج من عينة سلوى حجازى أو ليلى رستم أو همت مصطفى وكان الضيوف من أمثال موسيقار الأجيال محمد عبدالوهاب أو الدكتور طه حسين أو فاتن حمامة او غيرهم من الكثير والكثير . هذه القناة للأسف كشفت المستوى الحالى للأعلام المصرى متثملا فى الجهاز الأعلامى الرسمى للدولة وكيف أنه بدأ كبيرا بالفعل ولكنه لم يستمر كبيرا كما يدعون

قـريـة ظـالمـة

قرأت مؤخرا رواية عظيمة لأديب عظيم وكبير لا أظن أن كثيرا من قراء الروايات وفن الأدب يعلمون عنه شيئا خصوصا فى دولة لا تمجد الا الأرجل التى ترقص على النغمات أو تراقص الكرات فى الملاعب . الرواية اسمها هكذا ( قـريـة ظـالمـة ) لمؤلفها الطبيب والأديب والمفكر الراحل الدكتور محمد كامل حسين

الدكتور محمد كامل حسين كما نشر فى صدر الرواية الصادرة عن الهيئة المصرية العامة للكتاب فى طبعتها الثانية الصادرة عام 2006 ، هو أديب مصرى وطبيب وعالم ومفكر وفيلسوف جمع بين دقة العلماء وتميز الأدباء وهو أول مدير لجامعة ( ابراهيم باشا - جامعة عين شمس حاليا ) وعضو مجمع اللغة العربية عام 1952 ميلادية وعضو المجلس الأعلى للجامعات وكذلك مجلس جامعة الأزهر الشريف .

من مؤلفاته الفكرية ( الوادى المقدس ) ومن مؤلفاته الإبداعية قصة ( قوم لا يتطهرون ) وأيضا الراوية المتحدث عنها هنا .. ( قرية ظالمة ) التى نال بسببها جائزة الدولة التقديرية فى فرع الأدب لعام 1957 ميلادية وهو الوحيد الذى جمع بين جوائز الدولة فى العلوم والأدب .

قرية ظالمة تعد من علامات السرد فى الأدب العربى فى النصف الثانى من القرن العشرين طبعت لأول مرة عام 1954 ميلادية وتناولتها وقتها أقلام كبار الكتّاب فى مصر فكتب عنها عميد الأدب العربى الدكتور طه حسين والدكتورة سهير القلماوى والأديب محمد عبدالحليم عبدالله وآخرون ، كما تناولها نقاد عالميون وترجمت الى إحدى عشرة لغة عالمية وظلت نموذجا دالا للإبداع والفكر العربى

القرية الظالمة التى يقصدها الدكتور كامل هى ( أورشليم ) المكان الذى تدور فيه أحداث الرواية بينما زمنها فلا يتعدى اليوم الواحد وهو يوم الجمعة المصيرى فى تاريخ البشرية ذلك اليوم الذى صلب فيه السيد المسيح عليه السلام فيصف الدكتور كامل حال كل من الرومان وبنى إسرائيل والحواريين الذين قرروا جميعا صلب المسيح .. بنو إسرائيل بخوفهم المبالغ فى الخوف على ديانتهم اليهودية وادعائهم بأنه ساحر وكاذب ومبتدع يريد هدم الديانة المسيحية ، الحواريين الذين آثروا الاستسلام لأمر الصلب وعدم المقاتلة دفاعا عن نبيهم بحجة دينهم الذى يقضى بالمحبة المطلقة ورغبتهم فى نشر الدين الجديد على أيديهم بعد نبيهم ، والرومان الذين يقضون لأجل بنى إسرائيل ما يضمن لهم الحفاظ على امبراطورية الرومان فى أورشليم وغيرها .

وتنتهى الرواية بانتهاء اليوم الذى تظلم فيه الدنيا لمدة ثلاث ساعات عند رفع السيد المسيح عليه السلام الى السماء ليصير يوما شهيرا غيّر وجه البشرية ومنحها دينا جديدا . والرواية تتميز برصانة الأسلوب وقوة الألفاظ والمعانى المستخدمة خاصة فى الحوارات القائمة بين أبطال الرواية وكأنها مجادلة بين فلاسفة ومفكرين كبار جدا تجعلك وانت تقرأ تشعر بنشوة التفكير والمنطق والفلسفة الواضحة فى الحوارات والأحداث كانك تقرأ لأول مرة فى حياتك شيئا مكتوبا باللغة العربية !

ان رواية ( قرية ظالمة ) هى أفضل عمل روائى قرأته حتى الآن من حيث قوة الأسلوب والمعانى والسرد .. تحية للأديب الراحل

كتب وموسيقى وبعض الاكتئاب والحنق

فى فترة الهدنة التى قررت مسبقا القيام بها لم أشغل نفسى كثيرا بما يحدث خارج حدود جسدى بخلاف العمل طبعا ومتطلباته التى لا تنتهى متحملا سخافات لا حصر لها من العملاء ومن غيرهم بالاضافة الى الزحام المرورى الرهيب الذى تعانى منه القاهرة منذ بداية فصل الصيف والأجازات مما خلق لدى شعورا ببعض الأكتئاب المغلف والمحلى ببعض الحنق على الأوضاع المزرية للشارع المصرى من حيث المرور وتعامل الناس مع بعضهم البعض فى الطرقات والشوارع

لكن الأجمل فى الهدنة هو الوجبات الدسمات من الثقافة الرفيعة المتمثلة فى الاستماع الى المقطوعات الموسيقية الراقية لموتسارت والموسيقار الجميل يانى وغيرهم من الأوروبيين والعرب على رأسهم المفضل لدى الموسيقار الكبير عمر خيرت والذى دائما ما يبهرنى فى كل مقطوعة استمع اليها من تأليفه وأدائه . تلك الوجبات الدسمة كانت تتخللها بعض القرءات المختلفة للكتاب الكبار من أمثال الروائى الكبير خيرى شلبى والذى أعشق اسلوب كتابته السهل الجميل المعبر بقوة عن طبقات مهمشة تعيش بيننا ونراها كل يوم لكن لا نتصور ان لها عوالمها الخاصة جدا مثلما يمثلها لنا شلبى .

قرأت مؤخرا كتاب عظيم لكاتب أعظم .. رواية ( قرية ظالمة ) للكاتب والأديب والطبيب الدكتور محمد كامل حسين أول مدير لجامعة عين شمس فى الخمسينيات والوحيد الذى حاز جائزة الدولة فى فرعين مختلفين .. فى العلوم مرة وفى الآداب مرة وسوف اتحدث فى موضوع منفصل عن هذه الرواية وهذا الكاتب الكبير

كانت هذه هى أهم ملامح الهدنة التى ابتعدت بها عن احداث الشارع السياسية والاقتصادية والكروية وكل ما يجلب الهم والغم عسى أن استعيد بعض النشاط الذهنى على الأقل

تحياتى لكم جميعا

عدنا بفضل الله

عدت بفضل الله الى عالم التدوين مرة أخرى

كل الشكر والتقدير لمن سأل عنى فى غيابى ومن لم يسأل

سأكتب قريبا جدا عن الهدنة وآثارها

تحياتى

هـــدنــة



أعتقد اننا جميعا بحاجة ماسة الى هدنة - ولو قصيرة - نستريح فيها من الأعباء اليومية التى أثقلت كواهلنا ومن قبلها عقولنا

ولذلك فقد قررت أن آخذ هدنة - عقلية - مؤقتة ابتعد فيها عن التفكير فى الحال - المزرى - الذى وصلنا اليه على جميع المستويات فلن أتابع نشرات ومواقع الأخبار ولن أشاهد الا ماهو بعيد تماما عن السياسة وأوجاع الوطن والناس ولن أقرأ الا ما قد يريح خيالى المتعب من كل ما يرهقه

هدنة مؤقتة وعندما أعود سأحكى ماذا فعلت وماذا طرأ من تغيير

الفوضى العارمة والفضيحة المنتظرة

طبعا الأيام دى الفوضى كتيرة اوى اوى من اول موضوع التشويش على بث قنوات الجزيرة لكأس العالم واتهامها للنايل سات بتعمد التشويش وفجأة تعاون الاتنين علشان يكشفو اللى ورا التشويش

لحد طبعا موضوع شهيد الوطن شهيد الاسكندرية الشاب المصرى ( الصالح ) خالد محمد سعيد والاحتجاجات الكبيرة اللى موجودة فى القاهرة و الاسكندرية وقرار النائب العام باعادة تشريح الجثة واعادة فتح التحقيقات واللى انكشفت فيها (عورة) وزارة خطيرة وسيادية

لحد الجديد بأة وهو فضيحة جديدة من طراز فضيحة (شركة مرسيدس) لكن المرة دى شركة المانية متخصصة فى الحديد والصلب دفعت رشاوى لمسؤول حكومى كبير لتسهيل عملها مع هيئة مصرية كبيرة

والمصيبة الكبيرة او الفضيحة المنتظرة وهو ان عدد مهول من السفن الحربية الأمريكية والاسرائيلية عبرت فجر الجمعة من قناة السويس قادمة من البحر المتوسط وذاهبة للخليج العربى فى مشهد متكرر يفكرنا باستعدادات الحرب على العراق المسكين لكن المرة دى الاستعداد لايران وناس تقولك النظام المصرى بيورط نفسه اكتر واكتر وبيشوه صورته قدام العالم العربى قبل العالمى وناس تقولك قناة السويس مكان دولى ملوش سيادة من حد ومصر لو منعت هتتضرب وحاجات تانية كتيرة وفتاوى ولا فتاوى الفضائيات

سيبكم من كل ده ... شباب اسكندرية رجالة بجد

كان زمااااان


كان فى زماااان حاجة اسمها مواطن شريف آمن
كان فى زمان حاجة اسمها نخوة وشهامة
كان فى زمااان افراد أمن مفيش ف ايديهم قانون غابة
كان فى زمااااان ... وطن

آخر اشاعة

الاشاعة دى لسه سامعها طازة امبارح بليل ان السيد علاء مبارك هيدعم ترشيح اخوه جمال مبارك فى الانتخابات الرئاسية القادمة بشراء الأصوات الانتخابية مقابل مبلغ وقدره ( عشرة آلاف جنيه مصرى فقط لا غير ) يستلمهم المواطن الذى يقوم بالترشيح على أن يقوم بسداد المبلغ على هيئة أقساط شهرية قيمة كل قسط ( خمسين جنيه فقط) وطبعا بهذه الطريقة لا يكون شراء للأصوات وانما هو قرض حسن ودى اكيد هتبقى الفتوى القادمة للشيخ الطيب شيخ الأزهر وبكرة تشوفو

ايه رأيكم طال عمركم ؟؟؟؟

كلنا متواطئون .. كلنا مجرمون

بعد اللى حصل مع اسطول الحرية اعتقد ان الصورة بانت اوى

اسرائيل : الغباء واضح جدااا بس المرة دى مغلف بالبجاحة
مصر : موقف شبه بطولى محبك السيناريو مسبقا بفتح معبر رفح لاجل غير مسمى
امريكا : مفيش جديد ... اوباما زى ما قلت انه مجرد اداة وزى اللى سبقوه
تركيا : اعتقد انها فرصتها علشان تبقى قائد الشرق الاوسط الجديد
ايران : تخصيصها لميزانية ضخمة لمساعدة فلسطين فرصة برضه لاثبات قوتها وثقلها السياسى فى المنطقة
الكويت : التصويت فى مجلس النواب على الانسحاب من المبادرة العربية للسلام حسسنى انى لازم احترم الناس دى
مصر تانى : واضح جدا اننا بقينا ملطشة بجد المرة دى

فى النهاية احب اقول : ربنا لا تؤاخذنا بما فعل السفهاء منا


حنين


ساقتنى قدماى نحو بيت جدتى القديم ... حيث الشارع الوافراﻷشجار الكثيفة على الجانبين ... هنا المسجد القديم الذى اعتدنا - انا واوﻻد اخوالى وخاﻻتى - أن نصلى فيه والذى كان رائعا بالنسبة ﻷطفال فى عمرنا حيث يقوم الأمام بتوزيع الحلوى على الاطفال الذى ﻻ يثيرون اية جلبة أو - شقاوة - أثناء الصلاة ... بعد المسجد بخطوات كان قديما يوجد هنا مطعم فول وفلافل الشهير بمطعم - زغلول - صاحبه والذى اعتدنا رؤيته يعمل على اوانى الفول والفلافل بالزى التقليدى للجيش المطعم ببقع الزيت وبقايا عجينة الفلافل والزى دائما يرتديه ولا يقوم بتبديله أبدا حتى أنك لتشك انه قد ولد به من سنين

بجوار المطعم كان يوجد بائع الحلوى - العم أبو طارق - الذى كان شديد اللهجة غليظ الوجه و اللسان حتى مع الاطفال الذين فى عمرنا والذى عرفته فيما بعد أن تلك الشدة والغلظة انما اكتسبها من طبيعة عمله بالجيش فترة طويلة جدا

قمت بالعبور للضفة الاخرى من الطريق فاذا انا امام - العم كرم - الحاتى أو - الكبابجى - ذلك الرجل الطيب بشوش الوجه أبيض الجلباب دائما كأنه يجلس به فى بيته ليس فى محل يعج بقطع اللحم وزيوت الشواء والطبخ ... العم كرم يقع محله اسفل الشرفة الصغيرة فى شقة جدتى .. كم من الليالى قضيناها صغارا فى الشرفة نتأمل الزبائن الذين يعج بهم المحل .. وكم من المرات قمنا بشراء الارغفة الطازجة عن طريق - سبت الشارع - الذى تستخدمه جدتى لشراء ما تريد من البائعين المارين بالشارع دون الطلوع او النزول

بجوار باب البيت هناك بائع الفاكهة - العم صابر - المكان كما هو بنفس الديكورات و الالوان ولكن مع اختلاف عميق ... العم صابر لا يجلس امام بضاعته وانما زوجته هى التى تجلس لأنه ببساطة رحل عن دنيانا من سنين

دخلت باب البيت .. كان بابا من الحديد المشغول بحرفية الصناع المهرة القدامى .. استبدل حديثا بواحد جديد آخر يخلو من اية فنون وان كان براقا زاهى الطلعة ... صعدت السلم وعلى السلم اختفت الرسوم القديمة التى كانت تصور رحلة الحج التى قام بها احد الجيران منذ سنين كثيرة جدا وكانت من بين الرسوم رسم رائع بالغ الدقة والجمال يصور امرأة كبيرة فى السن تجلس على سجادة الصلاة ويديها مرفوعتان بالدعاء الى الله كنا صغارا مقتنعين لدرجة الترديد العلنى بأن ذلك الرسم هو لجدتنا الطيبة بينما كانت تضحك جدا عندما تسمعنا تقول ذلك وتردد بأن الله كريم ولن يحرمها من زيارة بيته الحرام

وصلت الى باب الشقة .. كما هو لم يتغير فيه شئ .. باب من قطعتين وجرس قديم له نفس النغمة المميزة .. لم تكن جدتى بالداخل ولم تكن تجلس على سجادة الصلاة كما كنا نراها على الحائط المرافق للسلم وانما كانت هناك فراغات كثيرة واناس يبتسمون ويتكلمون وانا مع الاولاد نمرح هنا وهناك وجدتى تقف فى المطبخ مبتسمة لانها تصنع لنا الحلوى التى نحبها

محاولة للصفاء الذهنى

الكل بيدور على الراحة النفسية مش البدنية ولكن هيهااااات محدش بيوصل للحالة دى الا نادرا

قررت انى اقضى اجازتى الاسبوعية من الشغل والبهدلة طول الاسبوع فى حاجتين

القراءة و الموسيقى فقط وفقط لا غير

اقرأ الان رواية ( نسف الادمغة ) للكاتب الكبير (( خيرى شلبى )) وهو كاتب مهم من الكتاب المصريين المخضرمين ولمعلومات اكتر زوروا الصفحة دى

الموسيقى بأة انا الحقيقة عندى كمية هائلة من الملفات الموسيقية المختلفة لكن انا بسمع اليومين دول البوم موسيقى نادر لمجموعة من المقطوعات الموسيقية اللى بتمزج بين الكلاسيكيات العالمية والموسيقى الصوفية فى نفس النغمات والالحان والادوات الموسيقية كمان


تحياتى ونلتقى بعد الفاصل


شعب سهل التعلم

احنا شعب سهل انه يلقط ويتعلم اى حاجة من اى حد على فكرة والدليل على كلامى اننا زى حكومتنا بالظبط اللى هو بتقولنا حاجة واحنا بنصدقها وبتطلع غلط ومبنتعلمش انه غلط بس بنتعلم اننا نصدقها تانى وتالت ومليون كمان ... زى النهاردة كدة وانا رايح الشغل الصبح واحد محترم الهيئة فى العقد الرابع من عمره تقريبا بيسألنى على شارع احمد توفيق مع العلم ان المنطقة اللى انا فيها مفيش شارع بالاسم ده .. المهم قبل ما يكمل كلامه قلتله هقولك انا هتقولى ايه ...
السلام عليكم الأول .. لو سمحت فين شارع احمد توفيق ؟ اصلى من بورسعيد مش من هنا وجاى لواحد معرفة علشان بقضى مصلحة فى القاهرة ومعلش انا اسف لو بحرجك معايا انا مش عارف اوصله وعاوز ارجع بورسعيد بس فلوسى خلصت ممكن تدلنى على موقف عبود من هنا اروحله ازاى ؟؟ وممكن معلش انا اسف حق التوصيل بس لحد عبود حتى لو جنيه واحد اكون متشكر ليك جدااا

لما قلت الكلام ده الراجل فجأة تنح وبلم وقالى : بورسعيد ؟ احمد توفيق ؟ بيعمل نفسه مندهش من كلامى ولما لقانى بصيتله نظرة فيها تحدى اللى هو لو طولت فى دور المندهش هفضحك فى المكان قالى سلامو عليكم ولف ومشى

الراجل ده انا قابلته ف نفس المكان من شهر تقريبا وحافظ اللى قاله صم وعلشان كدة سمعتهوله اول لما شوفته وقبل ما يتكلم اصلا ... مش بقولكم احنا شعب بيتعلم بسرعة واى حاجة خصوصا لو من حكومتنا ؟؟؟

الحكومة ماشية معانا بمبدأ مهم للغاية ... كل شئ فى مصر ينسى بعد حين .. نعمل مع الشعب اى حاجة وبكرة ينسوا احنا عملنا ايه ونعمل تانى وهلم جرا

تحياتى لمجلس الشعب على تمديد قانون الطوارئ وبكدة اى حد معتقل ممكن يختار انه يكون تاجر مخدرات .. او ارهابى

عـن الحـــرّ

امبارح كانت درجة الحرارة ( فى الضل ) حوالى 42 درجة مئوية والناس مكنتش طايقة نفسها وانا من ضمنهم طبعا ... ركبت المترو وانا رايح مشوار بعد الشغل وكانت الفاجعة ان المترو مفيهوش مراوح حتى الشفاطات اللى كانت زمان تكييف برضه مش شغالة وانت بأة وشطارتك لحقت حاجة تهوى بيها لحقت ملحقتش استحمل بأة وربنا معاك

الحر بتاع امبارح فكرنى بحديث للنبى صلى الله عليه وسلم لما كان بيقول لأصحابه رضوان الله عليهم اجمعين ... تبردوا من الحر فانه من فيح جهنم

اذا كانت الحرارة بالشكل ده تعتبر جزء صغير من صهد جهنم امال جهنم نفسها عاملة ازاى ؟؟؟ ربنا يعافينا

اعمل عبيط تعيش مرتااااح

هو ده العنوان الصحيح والعلاج الوحيد لمنع الطرشقة والفقع للمرارة مش بتاعة الريس مهو اتشالت .. مرارتنا احنا خصوصا بعد العناوين البراقة المنتشية الجهنمية اللى زينت الصفحات الاولى من جرايد الخميس وطبعا الجرايد المهلبية .. قصدى الحكومية اللى قالت وغنت واتغزلت فى عصر الديموقراطية اللى بنعيشه ووسعت منها اوى لما قالت انه العصر الوحيد اللى المواطن بيقول رأيه بمنتهى الحرية من غير اى قيود او تضييق عليه ... طبعا بيتكلموا عن دولة شيمبنجو وﻻ معرفش اسمها ايه بتاعة القرد اللى بيتكلم بتاع موبينيل وبالتبعية بيتكلموا عن المواطنين بتوع دولة شيمبنجو برضه

كله كوم بأة وجرايد الجمعة كوم تانى اللى كان كل وظيفتها انها تبين وتوضح الصورة الكاملة للسيد الرئيس بحجم البوستر وهو بيحى العمال فى عيدهم قبل ما يلقى الخطاب اللى كان مليان غمز ولمز وتلميحات للناس الوحشين العملاء الخونة اللى بيطالبوا بالتغيير مهم مش وش نعمة بعيد عنكو لا وكمان الرئيس كان بيحذر من الناس دى لانهم مش عارفين حاجة وفى فرق كبير بين التغيير المدروس والتغيير اللى مش مدروس اللى ممكن يودى مصر لانتكاسة ... ده على اساس اننا فى مقدمة الدول كلها مش فى اخرها ... واكتر جزء ضحكنى بأة ...مهو انا بحب اتصفح الجرايد دى علشان اضحك ... الجزء اللى اكد فيه السيد الرئيس انه اكثر قوة وعزم من الماضى .. مش عارف ليه افتكرت وقتها فيلم (فجر الاسلام) لما كان الممثل بيمثل ان الالهة شلت ايده وهو بيكسر التمثال بتاعها وفجأة ضحك وقال

انــــهــــا ســـلــــيـــمـــة

او ممكن اللمبى فى فيلم اللى بالى بالك لما قال للمساجين

اوعو تفتكروا ان الحادثة اثرت فيا ... انا اللى اثرت فيها

اضحكوا اضحكوا ده الضحك بيطول العمر يمكن ربنا يمد ف عمرنا ونشوف جديد


الريحة طلعت على فكرة

الريحة طلعت على فكرة وبقت مش ولا بد ... مقصدش ريحة الفسيخ والرنجة علشان شم النسيم .. لالالا انا اقصد ريحة المسؤولين من داخل النظام للأسف للأسف الشديد ودى لقطات بسيطة علشان نعرف ايه حكاية الريحة دى
اول شمة : التكتيم والتعتيم على موضوع علاج السيد الدكتور وزير الصحة على نفقة الدولة وهو غير المحتاج ولله الحمد واللهم لا حسد وفيه كلام انه اتعالج هو وزوجته بحوالى 5 مليون جنيه فى امريكا مع انه دايما بيقول : العلاج على نفقة الدولة للغلابة والغير قادرين .. يمكن يا جماعة مش قادر ولا حاجة الله اعلم بعبيده
تانى شمة : مهزلة وفضيحة يوم 6 ابريل لما الامن سحل وضرب واعتقل شباب فى عمر الزهور كل تهمتهم انهم خرجو للشارع فى مسيرة سلمية جدااااا بيطالبو بهدوووء انه يبقى فى تغييير لكن طبعا كالعادة اعتقال وسحل وضرب لكن الجديد بأة هو وجود الشرطة النسائية علشان تتعامل مع الستات والبنات ميحصلش قلق زى اللى حصل قبل كدة من هتك اعراض علنى فى الشارع فاكرين ؟؟؟ والمقلق انه تم الافراج فورا عن المعتقلين والناس فرحت اوى بس انا مفرحتش عارفين ليه ؟؟؟ علشان الافراج جه بعد انتقادين شديدى اللهجة من المتحدث الرسمى باسم وزارة الخارجية الامريكية ومنظمة هيومان رايتس ووتش الدولية على التوالى لما اعلنوا عن قلقهم واستيائهم الشديد من اللى حصل وكمان مطالبتهم للنظام الحاكم
باعطاء مزيد من حرية التعبير للشعب بدون اى قيود او تخويف
تالت شمة : ماتش الزمالك واتحاد الشرطة فى الدورى الممتاز للعك قصدى للكورة .. بجد لا تعليق خصوصا انها كانت مهزلة بمعنى الكلمة ومتفهمش مين الظالم ومين المظلوم ومين الضارب ومين المضروب ومين المستفز ومين الهادى
رابع شمة والأخيرة علشان الريحة عبقت المكان : الاتهام العلنى الرسمى من الحكومة الفيدرالية الامريكية لشركة مرسيدس بنز العالمية باعطاء رشاوى ضخمة لمسؤول حكومى مصرى بهدف تسهيل اعمال الشركة مع الحكومة المصرية مثل العطاءات والمناقصات وخلافه ... حاجة تقرف مش كدة ؟؟؟

الثورة الشعبية فى قرغيزستان عاملة شغل جامد اوى .. واحنا مش معاهم

عن الأفراح الشوارعية نتكلم الآن

لفت نظرة مؤخرا انتشار ظاهرة ( الدى جى ) وهى عبارة عن اشخاص يقومون باحياء اى احتفال يقام فى الشارع سواء كان زفاف او حتى سبوع مولود او اى شئ من هذا القبيل عن طريق توصيل عدة سماعات ضخمة ببعضها البعض وينطلق منها اغانى متعددة المذاهب والأذواق ولكن السمة الغالبة هى الطابع الشعبى ( المتدنى ) ويكفى اننا الآن نعيش أيام الأغنية ليست الشبابية ولا حتى الشعبية .. بل الأغنية الهيروينية او الحشيشية او المتعلقة بالحرام عموما

لاحظت مؤخرا ان كل الاغانى التى يتم تشغيلها او الغالبية العظمى تتحدث عن شخص قام بشرب المخدرات ثم يصف طوال الاغنية التغيرات التى حدثت له من هلاوس سمعية وبصرية وخلافه !! الأدهى من ذلك ان تلك الاغانى تقدم بصورة الموعظة والعبرة وعندما اسمعها اتذكر على الفور عنوان الفيلم العربى ( الشيطان يعظ ) ولا ادرى لماذا

العجيب عندما قمت بالتحرى عن مصدر تلك الاغنيات وجدت انها لمطربين شعبيين مشهورين فى الوسط الفنى الشعبى وكذلك فوجئت بأن المسؤل عن تشغيل الاغانى والدى جى ليس له علاقة بالاغانى التى يتم تشغيلها بل صاحب الاحتفال او من يقوم بالاتفاق على احياء الدى جى للاحتفال هو من يقوم باختيار الاغانى التى يتم تشغيلها !!! اذن نحن نتحدث عن انحطاط عام فى اذواق الناس ولا عجب ان يكون الشارع المصرى بؤرة كبيرة لتلك الاغانى ولما لا وهو عبارة عن سيجارة حشيش كبيرة ؟؟؟ كم شاب يتعاطى المخدرات ؟؟ كم فتاة تتعاطى المخدرات ؟؟ كم فيلم تم عرضه فى السنوات الاخيرة يتحدث عن استفحال المخدرات فى الشارع المصرى وكأنه هو الطبيعى والعادى جدا ؟؟؟ كم اغنية تحدثت عن المعنى العام لحالة التخدير المصاحبة لتعاطى اى نوع من انوع المخدرات ؟؟

وبدأ الانهيار