رمضان كريم

كل عام وأنتم بخير .. تقبل الله صيامنا وصيامكم وقيامنا وقيامكم .. رمضان كريم

شيوخ المسخرة

باﻷمس أعلنت الجماعة الإسلامية أنها ستفض اعتصام التحرير ولو بالقوة لأن الإعتصام يحدث فيه ما يغضب الله من تناول الخمور والمخدرات وممارسة الجنس ... ثم أعلنت جماعة الإخوان المسلمون أن الإعتصام لا فائدة منه وأنه يعطل مصالح البلاد العليا وأن الثورة قد تحققت مطالبها ولا داعى من التصعيد

أرد عليهم وأقول ... يا شيوخ المسخرة .. هل رأيتم بأعينكم تناول المخدرات والخمور وممارسة الجنس ؟؟ ولماذا لم تقوموا بإبلاغ الشرطة والشرطة العسكرية ؟؟ ولماذا لم تقوموا بإبلاغ المسؤولين عن تأمين الميدان من لجان شعبية وخلافه ؟؟ وهل فض إعتصام التحرير يشمل فض المظاهرات الموجودة أمام السفارة الأمريكية المطالبة بإطلاق سراح الشيخ عمر عبدالرحمن ؟؟؟ وأين هى مطالب الثورة التى تحققت ؟؟

- هل تم إصدار حكم قضائى واحد على أحد رؤوس الفساد ؟؟
- هل تم إعدام من قاموا بقتل المتظاهرين ؟؟
- هل عادت الشرطة إلى رشدها وتعاملت بإحترام مع المواطنين ؟؟
- هل تمت محاكمة من تدعون أنهم قاموا بتعذيبكم ونزع كرامتكم وآدميتكم فى المعتقلات والسجون ؟؟
- هل رايتم أسرة من أسر الشهداء قد تحصلت على حقها المشروع ؟؟
- هل رأيتم بأم أعينكم مصابا واحدا قد شفى بعد علاجه على نفقة الدولة ؟؟
- هل رأيتم أية أموال منهوبة قد عادت ودخلت خزينة الدولة ؟؟

موقفكم مشبوه .. علامة استفهام كبيرة كبر الشمس والقمر مجتمعين تشكك فى تعاونكم مع العسكر .. لا تنسوا ما حدث من العسكر عام 1954

حسبنا الله ونعم الوكيل

نفس الصباع

امبارح المجلس العسكرى طلع بيان .. هدد فيه وتوعد وأرغى قائله وأزبد .. وسبحان الله نفس الصباع .. فى آخر البيان سمعنا صوت حد بيقول : هايل ... وهناك تكهنات بأنه صوت مبارك مهو مفيش حاجة بعيد عن شرم الشيخ ولا ايه ؟؟

من ضمن التعليقات الطريفة اللى طلعت على البيان .. توقعات بأن البيان الجديد للمجلس العسكرى هيكون التخلى عن ادارة البلاد لصالح الرئيس السابق محمد حسنى مبارك والله الموفق والمستعان

شكلك هتوحشنا يا شرف

بعد البيان اللى قاله الدكتور عصام شرف رئيس الوزراء امبارح بالليل واللى لبى فيه 7 مطالب من مطالب الثوار المعتصمين فى ميدان التحرير من يوم الجمعة 8 يوليو أقدر أقول مع احترامى الكامل للدكتور شرف ولشخصه المحترم والنزيه .. شكلك هتوحشنا يا دكتور شرف

المجلس العسكرى مقدمش حاجة غير عودة منصب وزير الاعلام وللأسف اللى مرشح له أسامة هيكل أحد الأبواق المتعفنة من الزمن الماضى وأحد الحناجر اللى كانت بتهاجم الثورة والأدلة بالهبل للى يدور .. وقال ايه .. رئيس تحرير الوفد .. مش برضه اللى عينه كان السيد البدوى اللى دمر الدستور وكان عامل قناة الحياة مندبة علشان مبارح تنحى ؟

الدكتور عصام شرف .. خطوة انهاء خدمة الضباط المتهمين بقتل الثوار خطوة متأخرة جدااااااااااااااااااااااااااااا وللأسف كانت نقطة سلبية عليك مش ليك .. وللأسف كمان مرة البيان ده خلى عدد الناس اللى بتطالبك بالأستقالة يكبر لأنهم حاسين انك الرجل المناسب فى المكان المناسب بس فى الزمن الغير مناسب نهائيا

ارجع وأقول .. التركة تقيلة .. المشاكل بعدد الرز اللى فى شوال .. ربنا يعينك علينا ويعينا عليك وفى النهاية احب تشوفو الفيديو ده علشان نفتكر ميدان التحرير والثورة الجميلة



تدوينة سافلة


تـــحـــذيــــــــــر : التدوينة دى سافلة بمعنى الكلمة ومضطر اطلع الكلام اللى جوايا هنا بدل ما اطلعه فى حاجة تانية

هو لا مؤاخذة القضاء النزيه ( اللى بيفكرنى بنزيهة بتاعة الانتخابات اياها) هو لا مؤاخذة عاوز مننا ايه ؟؟؟ نولع ف نفسنا يعنى ؟؟؟ حد يقدر يفهمنى ازاى الظباط ولاد الحرام اللى قتلوا أهالينا بدم بارد فى أحداث الثورة ازاى ياخدوا اخلاء سبيل ؟؟ هما بروح امهم على دماغ اللى جايبينهم ريشة ؟؟ ممنوع يتحبسو ؟؟ يحبسو ميتين اللى جابونا بتهمة ومن غير تهمة وهما لأ ؟؟؟؟

مش الظباط دول منهم مدير امن البحيرة ابن الكلب الوسخ اللى قال انهم اسيادنا لسه ؟؟؟ واللى اتشال بسبب الفيديو الفضيحة بتاعه بعد الموضوع ده بحوالى أسبوع ؟؟؟

مش الظباط دول اللى ف أحداث التحرير الأخيرة سيبوا علينا البلطجية وكلاب فرق الكارتيه ودى صورة واحد منهم المفروض انه محترم وابن ناس بس الظاهر انه فا لكلية علموه انه يعمل كدة مع ولاد بلده


مش لاقى تعليق على الصورة يكفى انه نقيب على مايبدو من عدد النجوم اللى على كتف الباشا ولما بيكون نقيب وبيعمل كدة امال لما يبقى مدير أمن هيعمل ايه ؟؟ اكيد هيقول زى ما قال مدير امن البحيرة السابق

القضاء والقضاة اللى (زى الفل) اللى ادو براءة لكل المتهمين بالفساد واهدار المال العام ايه ظروفهم ؟؟ عاوزين ثورة هما كمان ولا ايه ؟؟؟؟؟

مش فاهم ازاى انا واحد زى أنس الفقى كان متهم بكل التهم دى ويطلع براءة ؟ واحد زى بطرس غالى الله يحرق اللى جابوه يطلع براءة ؟؟ واحد زى ده ضيع مليارات من فلوس معاشات وعادى جدا ولا كأنه عمل اى حاجة

الأيام اللى جاية هتبقى أسود من زمن مبارك وهنشوف ومش بعيد يخرج العادلى براءة مهو اللى تحته خدو براءة .. ومش بعيد حسنى ذات نفسه ياخد براءة واحنا اللى نلبس الخوازيق وهيلبسونا طرح .... 8 يوليو هيبقى يوم صعب واتمنى ان المجلس العسكرى ينفى عن نفسه الشكوك دى بأة ويعمل حاجة للبلد قبل ما الناس تولع ف نفسها ويبقى انتحار جماعى على الهواء مباشرة والعالم كلها تشوفه مهو مش فاضل حاجة نعبر بيها عن غضبنا غير كدة