لو بطلنا نحلم

منير قالها زمان .. لو بطلنا نحلم .. نموووت

من السهل ان الواحد يحقق أى حلم هو بيحلمه مهما كان حجمه .. سهل التحقيق طالما الواحد مؤمن بالحلم ده ومصمم انه يحققه

المتعة الحقيقية فى اننا نحقق حلمنا ونعيش كل تفاصيل الحلم لحظة بلحظة ومنديش الوقت أى فرصة انه يعدى من غير ما نستمتع بيه جوة الحلم بتاعنا

يمكن يكون كلامى غريب شوية
ومن غير مناسبة .. لكن ده احساسى من امبارح الصبح على فكرة



وهدية منى ليكم الصورة دى اللى لقطتها بنفسى امبارح بليل فى المترو واللى بتعبر عن عادة أصيلة فى الشعب المصرى وهى متابعة ما يجرى باهتمام بالغ خصوصا على صفحات جرائد الغير .. الشرطى ادى مثال للكلام ده وعبر بلسان حاله ان الشعب فى خدمة الشرطة فى كل حاجة حتى فى توفير الجرايد والمجلات ببلاش وكنت متوقع الراجل اللى معاه المجلة انه يرد على الشرطى : ابقى هات معاك كتابك لو سمحت .. مهرجان القراءة للجميع 2009


كمان تاج وأمركم لله


كالعادة .. تدبيسة جميلة من اينو .. تاج يعنى

يلا بينا

اسمك ؟؟
احمد والشهير بـ فوكس

سنك ؟؟
26 سنة الا 4 شهور

اسم مدونتك ؟؟
واضح طبعا .. الكيت كات

مجال دراستك ؟؟
هندسة الحاسبات

صورتك الرمزية فى المدونة بتعبر عن ايه ؟؟
الصورة عبارة عن جملة الكيت كات وهى لقطة من تتر الفيلم المصرى الشهير ( الكيت كات ) وبتعبر عن حبى الشديد للفيلم ده علشان المصداقية اللى فيه والحرفية العالية اللى اتعمل بيها

هل فكرت فى اغلاق مدونتك ؟؟ والسبب ؟؟
اه فكرت ونفذت فعلا وقفلتها فترة قصيرة وكان سبب شخصى جدا وهو محاولة ارضاء انسان عزيز عليا جدااااا

ايه رد فعلك لو حد قل أدبه عليك فى المدونة ؟؟
الحمد لله محصلش لحد دلوقتى ولو حصل اعتقد انى ابسط رد هو التجاهل زى ما قال الأمام الشافعى عن الأحمق والسفيه .. وخير من اجابته السكوت

أسوأ مدونة دخلتها ؟؟
كانت مدونة بتطبق المثل الشعبى الشهير : من برة الله الله ومن جوة يعلم الله ... الظاهر انها مدونة ناس محترمين ومثقفين لكن لما دخلت وقريت اكتشفت انها منبر من منابر اثارة الفتنة الطائفية فى مصر وازدراء الدين الأسلامى بشكل مقرف جدا وطبعا كنسلتها ومبقيتش ادخل تانى لأن ملوش لزمة الكلام مع ناس عقليتها بالشكل ده

هايحصل ايه لأيميلك بعد لما تموت ؟؟
هيموت هو كمان

عطيت الباسوورد لحد قبل كدة ؟؟
لأ

السفر بالنسبة لك ؟؟
تغيير شامل داخلى قبل ما يكون خارجى وتجديد كامل للحالة النفسية

المود بتاعك ايه ؟؟
متقلب بس بحاول دايما انى اكون هادى البال بأنى اعمل اى حاجة تخلينى كدة .. موسيقى حلوة .. كتاب جميل .. او حتى مكالمة مع صديق

بتعمل ايه ف وقت فراغك ؟؟
النوووووووووووووووووووم .. ده فى الفترة الأخيرة الحقيقة
لو مفيش نوم يبقى كتاب عاوز أقرأه

الأكلات المفضلة ؟؟
الكشرى
المشويات
البيتزا

الصفات اللى أخدتها عن والدك ؟؟
الــعــــصـــبـــيـــة .. اكبر واخطر حاجة اخدتها فعلا عن والدى
الفراسة .. يعنى انى اقابل حد أول مرة وهى أول مرة بعرف منها اذا كنت هعرف اتعامل معاه ولا لأ وبيطلع فى الآخر انى كنت صح الحمد لله واحساسى كان مظبوط
الأصرار على انى اخد حقى مهما طال الوقت .. اينو قالت طبعا الكلام ده فى التاج بتاعها
الصفات الشكلية من حيث لون البشرة والشبه .. بس

الصفات اللى اخدتها من والدتك ؟؟
الهدوء فى بعض الأحيان .. طبعا مش متقلب المود بأة ؟
عدم الأهتمام بمن لا يهتم بيا

اكتر ست حاجات بتحبهم ؟؟
ايــنـــو
محمد منير
نادى الزمالك
الصديق الصدوق
القراءة
الكتابة

أكتر ست حاجات بتكرههم ؟؟
الخيانة
الغرور
الأهتمام بالذات على حساب الغير
الكذب
الكلام عليا من ورايا
الظلم

شخصيتك نوعها ايه ؟؟
متقلب شوية بس متوسط الحال

لماذا دخلت عالم التدوين من الأساس ؟؟
علشان اكتب اللى جوايا واعرف انا بتكلم صح ولا غلط وده طبعا يبان من تعليقات الناس اللى بتشوف كلامى

احلى جملة قيلت فى وصف مدونتك ؟؟
مفيش حاجة اتقالت عن مدونتى بس الحقيقة افضل حاجة اتقالت عنى كانت من استاذ طارق صاحب مدونة عابر سبيل لما دايما كان بيلقبنى بلقب : فوكس الحكيم وانا بعتز جدا باللقب ده

أهمية التعليقات بالنسبة لك ؟؟
ترمومتر لمدى تقبل الناس لكلامى اللى جاى من شخصيتى يعنى مقياس لتقبل الناس ليا ولشخصيتى

أحلى بوست كتبته مع ذكر السبب ؟؟
كان بوست عن زوجتى الغالية ايــنــو وده اللينك بتاعه ... أســـف
السبب : انه كان اعتذار واجب وعلنى كمان عن غلطة غلطتها فى حق زوجتى

أفضل مدونة قرأتها ؟؟
الحقيقة هما كتير والريدر مليان ماشاء الله لكن دبعا مفيش شك ان مدونة زوجتى رقة الأحساس
هى الأفضل لأنها اسم على مسمى واتعلمت منها كتير جدا على فكرة وده والله مش نفاق ولا مجاملة الحمد لله

الشغل بالنسبة لك ؟؟
مكسب معنوى باثبات النجاح الشخصى فى مجال التخصص الدراسى
مكسب مادى نابع من المكسب المعنوى .. مهو محدش بيشتغل لله وللوطن برضه :D
تعلم كيفية التعامل مع انماط مختلفة من البشر

أهمية الأنترنت بالنسبة لك ؟؟
هو محور شغلى على فكرة وبياخد الجزء الأكبر من تفاصيل شغلى غير انه شباك كبير على الدنيا

تمرر التاج ده لمين ؟؟؟
طبعا كان نفسى ادبس اينو لكن سبقتنى فهبقى مضطر انى ادبس ناس تانيين

محمود شخابيط
محمد كمال صوت من مصر
استاذ طارق عابر سبيل
واحدة مفروسة
صيدلانية طالعة نازلة
انجى ابراهيم هات م الآخر
حسام صاحب العالم الأفتراضى
البامشهندس معتز صاحب التوك توك
استاذة سحر وحماتها الملاك

وطبعا اللى نفسه فى التاج يتفضل


تـــــــــــااااااج

وصلنى تاج من زوجتى العزيزة ( ايــنــو) ولازم الحل طبعا فى التو واللحظة .. الحكومة يا جماعة مقدرش اكسل ولا اهمل

ماذا يمثل لك الكتاب ؟

الباب السحرى للخروج من حالة لحالة تانية خالص سواء من حزن لفرح او حتى العكس ده غير انه الحل السحرى لتمنية الوعى والأدراك ووزيادة القدرة الذهنية على التعامل الصح مع اى موقف او اى شخص


اول كتاب قريته ؟ واخر كتاب ؟

اول كتاب فاكره اوى كان قصة اطفال والدى اشتراها ليا وكانت اسمها ( الأخ الطماع) وكانت فيها دروس اخلاقية كدة للأطفال تعلمهم الخصال الكويسة وتحذرهم من الطباع السيئة زى الطمع والبخل وغيره

اخر كتاب كان كتاب ( الفاطمية .. دولة التفاريح والتباريح) للمؤرخ المصرى الجميل الأستاذ جمال بدوى


اذكر ثلاث كتب أو قصص أثروا في حياتك وتحتفظ بهم ؟

1 - رباعيات صلاح جاهين
2- القصر المسحور .. طه حسين وتوفيق الحكيم
3- مسرحية أهل الكهف لتوفيق الحكيم


في أي المجالات تحب أن تقرأ ولماذا ؟
بحب القراءة بصفة عامة وفى المجالات اللى اقدر افهمها يعنى مش محتاجة تخصص علشان افهمها وبحب فروع الأدب والقصص القصيرة والروايات والشعر بصفة خاصة لأنى بحس انه عالم واقعى مش مجرد كلام فى كتاب وخلاص وبحس انى عايش كل قصة بأحداثها ويمكن كمان اكون البطل وانا مش واخد بالى

هل عندك مكتبة وكم عدد الكتب بها في تقديرك ؟

ايوة عندى مكتبة صغيرة جدا ومحتفظ فيها بحوالى 20 او 25 كتاب مختلفين فى المجالات


اذكر اسم كاتب تتمنى أن تحتوي مكتبتك كتاب له ؟
الدكتور جلال امين المفكر الكبير والعالم الأجتماعى والأقتصادى المشهور


ماهو الكتاب الذي يرافقك في السفر ( غير المصحف )؟
والله مفيش لأنى مش بسافر :))


ماهي الجريدة أو المجلة التي تتابعها وما هي أهم الأعمدة فيها؟
الحمد لله اعتزلت قراءة الصحف والمجلات من فترة طويلة

ماهو أفضل كتاب أهدي لك ؟ وأي الكتب تهديه ولمن ؟
أفضل الكتب اللى اهديت لى كان كتاب فى اساليب التربية فى الأسلام من واحد معرفوش !! كنا بندرس مع بعض كورس برمجة وكنت شرحتله جزء مهم مكنش هو حضره وفوجئت تانى يوم بأنه جايب لى الكتاب هدية علشان اتعاونت معاه وكانت حاجة جميلة جدا وانا بعتز بالكتاب ده اوى

احب اهدى الكتب الجميلة الى العزيزة اينو خصوصا فى مجال الشعر لأنها بتفضله هو والقصص القصيرة


إذا كنت بمعرض للكتب كيف تتعرف على الكتاب الجيد ؟
اتعرف عليه من جزئين : دار النشر والمؤلف وطبعا دار النشر بيبقى عليها عامل كبير لأن دور النشر المشهورة والمحترمة بتنشر الحاجات اللى تستاهل انها تتنشر للكتاب المحترمين اللى ليهم شعبية


ما هو المكان المفضل لك للقراءة ؟ وهل لك طقوس خاصة وقت القراءة؟
المكان المفضل للقراءة هو غرفتى الصغيرة اللى بتحتوينى جدا ومستحملانى الحقيقة .. الطقوس عادية موسيقى هادية مع اضاءة جيدة وبس


الرواية – القصة القصيرة – الدين – السياسة – العلوم –
الشعرمن الأحب لك في كتاب تلك الفروع ؟

الرواية والقصة القصيرة والشعر كمان


كمان انصحنا بخمس كتب ترى فيها إفادة عظيمة؟
كتب الدكتور جلال امين عموما وخصوصا : ماذا حدث للمصريين - عصر الجماهير الغفيرة - مصر والمصريين فى عهد مبارك
السلسلة دى هتعرفنا البلد كانت ايه وبقت ايه كأنك بتتفرج على البلد من الطيارة على مر العصور

اخر كتابين ...
عزازيل
اى قصة او رواية لخيرى شلبى



رجاء ارسل التاج على الأقل لنرسخ مبدأ تبادل السلطة

كل الناس اللى فى الريدر على اليمين ومنهم على سبيل المثال لا الحصر

محمود محمد حسن .. شخابيط
انجى .. المهم هات م الآخر
عمدة
من غير عنوان
شمس النهار
محمد صبحى .. امبراطور القراءة والكتب صديقى العزيز
محمد كمال .. صوت من مصر
الأزهرى
آبى صاحبة الخراف الملونة
البامشهندس معتز صاحب التوك توك والأتوبيس والميكروباص كمان

وكل الناس اللى موجودة فى الريدر بأة

وبس




من هزيمة لأخرى .. يا مصر لا تحزنى

امبارح لعبنا مع منتخب الجزائر مباراة هامة جدا فى مشوار التصفيات المؤهلة لكأس العالم 2010 واللى هتتلعب فى جنوب افريقيا

منتخب مصر نازل بكل قوته بطل افريقيا مرتين ورا بعض باة محدش قده .. شحن معنوى كبير ولا كأننا هنحارب

وهوب .. 3 اهداف ورا بعض فى مرمى وحش افريقيا الكابتن عصام الحضرى احسن حارس مرمى ف افريقيا اللى كأنه اول مرة يشوف كورة امبارح

السبب الرئيسى فى الهزيمة مكنش رعونة ابوتريكة واستعراضه لمهاراته الشخصية بالرغم انها نفس المهارات اللى جابت الجون المصرى اليتيم .. ولا كان نرفزة وعصبية عمرو زكى ولا حتى اهتزاز مستوى الحضرى

دى هزيمة امة بحالها يا سادة عارفين ليه ؟؟

لو حد تابع التحليل الفنى اللى قبل المباراة على قناة النيل للرياضة اللى كان فيه الكابتن الكبير على أبوجريشة نجم الأسماعيلى ومصر السابق ومعاه النابغة العبقرى الفلتة الكابتن مجدى مقشة .. قصدى مجدى عبد الغنى اللى كان حاضر بصفته عضو مجلس ادارة اتحاد الكورة ف بلدنا واللى كان طول الوقت عمال ينفخ فى المنتخب وينفخ ف اللعيبة ووصل بيه السخف انه يقلل من قدرة المنتخب الجزائرى اللى كل اللعيبة فيه محترفين فى اقوى الأندية الأوروربية ماعدا حارس المرمى المحلى ومن قمة البلاهة انه قال بالحرف : فرصتنا كبيرة ف الفوز لأن منتخب الجزائر كله محترفين وكل لما يزيد عدد اللعيبة المحترفين فى الفريق ده معناه انه فريق غير متامسك وسهل هزيمته !!!! بالذمة ده كلام يدخل مخ عيل فى تالتة ابتدائى ؟؟؟

عرفتو سبب الهزيمة ايه ؟؟؟ اذا كان ده كلام عضو مجلس ادارة الأتحاد اللى بيدعم وبيرعى المنتخب يعنى ده كلام المسؤولين اللى دايما بيقولو كله تمام واحنا جامدين اوى بالصلاة ع النبى الخ الخ الخ يبقى طبيعى جدا اننها ننهزم ومن طوب الأرض وده على كل المستويات مش الكورة بس على فكرة واظن الأدلة كتيرة اوى

كفاية نفخة كدابة بأة واستخفاف بعقول الناس شكلكو بأة وحش اوى


بين اوباما ومستشفى العباسية تقع مصر

كانت مصر قديما تقع فى منطقة وسط من قلب العالم حيث يحدها من الشمال القارة الأوروبية ومن الجنوب القارة الأفريقية الكبيرة برأس الرجاء الصالح ثم محيط كبير ثم قطب جنوبى ومن الشرق آسيا ومن الغرب المغرب العربى ثم المحيط ثم الأمريكتين

اما الآن فمصر تقع بين الرئيس الأمريكى ومستشفى العباسية للأمراض النفسية


الرئيس الأمريكى يقوم بزيارة لمصر غدا الخميس الموافق 4 يونيو 2009 لمدة 17 ساعة تقريبا يقوم فيها بزيارة جامعة القاهرة العريقة التى احتفلت العام الماضى بالمئوية الأولى لها وكذلك يلقى من تحت قبتها الشهيرة خطابا للعالمين العربى والأسلامى يتحدث فيه عن السلام وأمانى العالم فى الأستقرار والتنمية الخ الخ مما اعتدناه من اى مسؤول عربى أو اجنبى يقوم بزيارة البلاد

الغريب فى الأمر حالة النشاط الفكرى والبدنى الغريبة التى اجتاحت البلاد بعد الأعلان عن موعد زيارة الرئيس الأمريكى للقاهرة وكأننا فجأة اكتشفنا اننا امة لدينا مخزون فكرى ومادى كبير جدا فأقيمت نافورة ضخمة فى ميدان السلطان حسن حيث سيقوم الرئيس الأمريكى بزيارة مسجد السلطان حسن وتلك النافورة التى تم تشييدها بالكامل وتشغيلها فى غضون 24 ساعة فقط اكبر اثبات على اننا لدينا امكانيات ويمكننا فعل اى شئ .. لو جالنا مزاجنا .. كذلك حالة النشاط الفكرى الكبيرة المتمثلة فى الأقلام التى كتبت والأفواه التى تكلمت بين مؤيد ومعارض وكذلك حالة الأندهاش من المواطنين العاديين تجاه الزيارة وأثرها فى حال البلاد عموما الذى لن يسمن ولن يغنى من جوع حتى ان بعض المواطنين لا يعرفون ان الرئيس الأمريكى سيقوم بزيارة القاهرة من الأساس ... لماذا دائما تقوم الدنيا ولاتقعد لمثل هذه الأشياء التى ليست بأهمية الحصول على مرتب يكفى كل ايام الشهر لموظف عادى أو بأهمية الركوب فى مواصلة نظيفة ليست مزدحمة للوصول الى مكان العمل صباحا والعودة للمنزل مساءا أو بأهمية الحصول على رغيف خبز نظيف خالى من التراب والقطع المعدنية واعواد الكبريت الخشبية ؟

مستشفى الأمراض النفسية والعصبية بمنطقة العباسية بالقاهرة اخيرا يستطيع المرضى الدخول والعلاج ثم الخروج بعد اعادة التأهيل والتكيف والتعامل مع الناس العاديين فى الشارع وذلك بعد التعديلات القانونية التى طالتها ايادى التغيير بعد مرور 60 عام على اقرارها اول مرة ... 60 عام مرت بالتمام والكمال لكى يستطيع المرضى النفسيين العودة الى حياتهم الطبيعية ... عجبى عليكى يا ام العجايب