تـــــــــــااااااج

وصلنى تاج من زوجتى العزيزة ( ايــنــو) ولازم الحل طبعا فى التو واللحظة .. الحكومة يا جماعة مقدرش اكسل ولا اهمل

ماذا يمثل لك الكتاب ؟

الباب السحرى للخروج من حالة لحالة تانية خالص سواء من حزن لفرح او حتى العكس ده غير انه الحل السحرى لتمنية الوعى والأدراك ووزيادة القدرة الذهنية على التعامل الصح مع اى موقف او اى شخص


اول كتاب قريته ؟ واخر كتاب ؟

اول كتاب فاكره اوى كان قصة اطفال والدى اشتراها ليا وكانت اسمها ( الأخ الطماع) وكانت فيها دروس اخلاقية كدة للأطفال تعلمهم الخصال الكويسة وتحذرهم من الطباع السيئة زى الطمع والبخل وغيره

اخر كتاب كان كتاب ( الفاطمية .. دولة التفاريح والتباريح) للمؤرخ المصرى الجميل الأستاذ جمال بدوى


اذكر ثلاث كتب أو قصص أثروا في حياتك وتحتفظ بهم ؟

1 - رباعيات صلاح جاهين
2- القصر المسحور .. طه حسين وتوفيق الحكيم
3- مسرحية أهل الكهف لتوفيق الحكيم


في أي المجالات تحب أن تقرأ ولماذا ؟
بحب القراءة بصفة عامة وفى المجالات اللى اقدر افهمها يعنى مش محتاجة تخصص علشان افهمها وبحب فروع الأدب والقصص القصيرة والروايات والشعر بصفة خاصة لأنى بحس انه عالم واقعى مش مجرد كلام فى كتاب وخلاص وبحس انى عايش كل قصة بأحداثها ويمكن كمان اكون البطل وانا مش واخد بالى

هل عندك مكتبة وكم عدد الكتب بها في تقديرك ؟

ايوة عندى مكتبة صغيرة جدا ومحتفظ فيها بحوالى 20 او 25 كتاب مختلفين فى المجالات


اذكر اسم كاتب تتمنى أن تحتوي مكتبتك كتاب له ؟
الدكتور جلال امين المفكر الكبير والعالم الأجتماعى والأقتصادى المشهور


ماهو الكتاب الذي يرافقك في السفر ( غير المصحف )؟
والله مفيش لأنى مش بسافر :))


ماهي الجريدة أو المجلة التي تتابعها وما هي أهم الأعمدة فيها؟
الحمد لله اعتزلت قراءة الصحف والمجلات من فترة طويلة

ماهو أفضل كتاب أهدي لك ؟ وأي الكتب تهديه ولمن ؟
أفضل الكتب اللى اهديت لى كان كتاب فى اساليب التربية فى الأسلام من واحد معرفوش !! كنا بندرس مع بعض كورس برمجة وكنت شرحتله جزء مهم مكنش هو حضره وفوجئت تانى يوم بأنه جايب لى الكتاب هدية علشان اتعاونت معاه وكانت حاجة جميلة جدا وانا بعتز بالكتاب ده اوى

احب اهدى الكتب الجميلة الى العزيزة اينو خصوصا فى مجال الشعر لأنها بتفضله هو والقصص القصيرة


إذا كنت بمعرض للكتب كيف تتعرف على الكتاب الجيد ؟
اتعرف عليه من جزئين : دار النشر والمؤلف وطبعا دار النشر بيبقى عليها عامل كبير لأن دور النشر المشهورة والمحترمة بتنشر الحاجات اللى تستاهل انها تتنشر للكتاب المحترمين اللى ليهم شعبية


ما هو المكان المفضل لك للقراءة ؟ وهل لك طقوس خاصة وقت القراءة؟
المكان المفضل للقراءة هو غرفتى الصغيرة اللى بتحتوينى جدا ومستحملانى الحقيقة .. الطقوس عادية موسيقى هادية مع اضاءة جيدة وبس


الرواية – القصة القصيرة – الدين – السياسة – العلوم –
الشعرمن الأحب لك في كتاب تلك الفروع ؟

الرواية والقصة القصيرة والشعر كمان


كمان انصحنا بخمس كتب ترى فيها إفادة عظيمة؟
كتب الدكتور جلال امين عموما وخصوصا : ماذا حدث للمصريين - عصر الجماهير الغفيرة - مصر والمصريين فى عهد مبارك
السلسلة دى هتعرفنا البلد كانت ايه وبقت ايه كأنك بتتفرج على البلد من الطيارة على مر العصور

اخر كتابين ...
عزازيل
اى قصة او رواية لخيرى شلبى



رجاء ارسل التاج على الأقل لنرسخ مبدأ تبادل السلطة

كل الناس اللى فى الريدر على اليمين ومنهم على سبيل المثال لا الحصر

محمود محمد حسن .. شخابيط
انجى .. المهم هات م الآخر
عمدة
من غير عنوان
شمس النهار
محمد صبحى .. امبراطور القراءة والكتب صديقى العزيز
محمد كمال .. صوت من مصر
الأزهرى
آبى صاحبة الخراف الملونة
البامشهندس معتز صاحب التوك توك والأتوبيس والميكروباص كمان

وكل الناس اللى موجودة فى الريدر بأة

وبس




16 comments:

Eno said...

كنت مستنيه اجاباتك جدا
لاني عارفه مدي عشقك للقراءه :)

مرسي جدا علي الاهداء :)

تحياتي :)

Foxology said...

Eno

القراءة فعلا دى معشوقتى الخاصة :)

شكرا ليكى على التاج بجد

نورتى الكيت كات :)

Hossam said...

بجد عجبنى اوى التاج وبشكر زوجتك اللى واضح انها شخصية متفتحة.
بس فى تعليق على سوال في أي المجالات تحب أن تقرأ ولماذا ؟ لان القارئ لازم يقرا فى شتى المواضيع حتى التى لا يفهمها عشان يفهمها.التاج بجد روعة
تحياتى لك صديقى العزيز
سلام

VÖltaa said...

جميل جدا التاج ده
ومن اجاباتك شكلك موس قراية ياريس

تسلم ايدك
وعقبال تيجان كتير ان شاء الله

Kiara said...

اجاباتك جميله

دمت بود انت واينو

تحياتي

Unknown said...

ايه دة؟؟؟

دة انت مثقف اوى ماشاء الله يعنى...مهو انك تقرا لجلال امين دة معناه انك جامد جدا

شكرا عالتاج على فكرة ولو ان الفضايح هتظهر جامد

شمس النهار said...

مش عارفه انا علقت ومش عارفه التعليق راح فين
بس اعيده تاني
ولو لاقيت الاولاني خلاص ماتنشرش التان ده
اجاباتك صادقه تنم عن شخصيه محبه للثقافه الجاده
وهديه مقبوله ان شاء الله
بس عندي تاجين وده التالت هعملهم ورا بعض
شكرا لك

Foxology said...

Hossam

شكرا ليك يا حسام على المجاملة الجميلة دى ليا ولزوجتى

بالنسبة لمواضيع القراءة اللى بحبها دى انا قلت على فروع الأدب لأنى بلاقى نفسى فيها وبقرأ احيانا فى فروع تانية لو حسيت انى اقدر افهمها واتعامل معاها :)

شكرا لمرورك وتعليقك :)

Foxology said...

Mo7ammed

شكرا يا محمد ربنا يخليك ومش موس ولا حاجة عادى والله اللى بيقع تحت ايدى مش برحمه :))))

نورتنى فى اول زيارة وشكرا على المرور والتعليق: )

Foxology said...

كيارا

شكرا يا كيارا على تعليقك الجميل ونورتى الكيت كات :)

Foxology said...

enjy

مثقف مرة واحدة ؟؟؟ :))) عادى والله

الدكتور جلال امين ده راجل عبقرى بجد ولما قريتله حسيت انى اول مرة اقرا كتب وانى كنت قبل كدة بقرأ ميكى ولا بطوط :)))

شكرا لمرورك وتعليقك ومعلش التاج علينا حق :)

Foxology said...

شمس النهار

الف شكر على التعليق الجميل ده وشكرا على المجاملة الجميلة دى

نورتى الكيت كات يا شمس البلوجرز :)

صيدلانيه طالعه نازله said...

ردك على التاج بيدل على عقليه متفتحه
و مثقفه و اتفق معك على
جلال امين و عزازيل و الرائع خيرى شلبى

Foxology said...

صيدلانية طالعة نازلة

اشكرك بجد على المجاملة الجميلة دى ومبسوط انى فى نسا متفقة معايا فى رأيى فى بعض الكتاب المعاصرين المتميزين

شكرا لمرورك وتعليقك :)

Empress appy said...

طيب واللى معندوش طوله بال للكتب ولا وقت كمان يجاوب البتاع ده ازاى

طيب يا اينو يعنى انتى تزنقيه وهو يخبطنا فى دماغنا
ربنا يسامحكوا

Foxology said...

Appy

معلش تاج يفوت ولا حد يموت

شكرا لمرورك وتعليقك :)