غـــزة كمان وكمان

تحديث
احسن كلام يتقال عن موضوع غزة هــنـــا
غارات جوية مكثفة على قطاع غزة ( المحاصر سابقا .. المحترق حاليا) من قبل القوات الجوية الأسرائيلية منذ صباح امس السبت

الجمعة كان اجتماع السيد رئيس الجمهورية مع السيدة وزيرة الخارجية الأسرائيلية !

السبت السيد الرئيس يأمر بفتح معبر رفح لآستقبال الجرحى الفلسطينيين !

حد فهم حاجة ؟؟



دليل الأسرة المتهنية فى بطاقة التموين الأليكترونية

اتفاجأت بافتكاسة جديدة من افتكاسات الحكومة النظيفة الرشيدة العزيزة والأفتكاسة دى عبارة عن بطاقة تموين اليكترونية
لكل مواطن يحمل بطاقة تموين ورقية .. ايوة من اللى بتبقى مبقعة زيت دى عارفينا ؟

وزارة التضامن الأجتماعى وده اللوجو بتاعها على فكرة
اعلنت عن الموضوع ده عن طريق موزعى التموين ... ايوة بقالين التموين .. والأجراءات بسيطة .. لحد دلوقتى بس .. وهى ان كل مواطن صاحب بطاقة هيصور بطاقة الرقم القومى بتاعته + تصوير اول تلات ورقات من بطاقة التموين الحالية ويسلمها للبقال اللى بيصرف منه التموين .. البقال بيقول ان البطاقة الأليكترونية الجديدة هتتسلم للمواطنين اول السنة الجديدة او بالكتير على نص السنة الجديدة برضه .. وماله

سرحت باة فى الموضوع وتخيلت منظر الناس وهى بتصرف التموين بالبطاقة الأليكترونية الجديدة دى

هنروح نلاقى الموظف بدل الدفتر والقلم اللى لازق ف ودنه وكأنه مولود بيه هنلاقى جهاز كومبيوتر بينتيوم 3 على الأقل

وبعدين تدخل على البقال تلاقيه لو معندوش زحمة بيلعب من نفسه دور سوليتير او حتى دور زوما الجديدة


ولما بقى تحب تصرف التموين بتاعك تديله البطاقة يقوم ممشى عليها البار كود .. ايوة البار كود خلاص بأة انتهى عصر الدفتر قولنا
ولما يطلع كله تمام بناء على البار كود بتاع بطاقة التموين بتاعة حضرتك هوب الكومبيوتر اللى البقال قاعد عليه يفتح رفوف المواد التموينية لسيادتك علشان تمد ايدك على رف الزيت تاخد عدد الزجاجات اللى مسمحولك بيه وكذلك مع السكر والرز والشاى وخلافه

لكن بأة علشان الشعب الفهلوى الناصح .. الحكومة الرشيدة النظيفة حطت تعليمات مشددة للكومبيوتر انه يراقب مع البقال حركة ايد سيادتك على الرف المفتوح ليك علشان تاخد نصيبك من التموين يعنى لو فكرة تمد ايك لأكتر من نصيبك هيحصل الآتى

الكومبيوتر هيهنجهتطلع رسائل تحذير بان حاجة غلط حصلت ناحية رفوف المواد التموينية

بالمناسبة الصورة دى مشاركة فعالة من اينو

وبعدها يا ناصح تلاقى الكومبيوتر طفى والرف اللى انت مادد ايدك فيه بتاخد اكتر من حقك قفل على ايدك والبقال قام من مكانه وقفش فيك ربنا يعافيك ومش هقولك بأة فى المواقف اللى زى دى الشعب بيحب يخدم ازاى سواء بايده او برجله

هذا وبالله التوفيق والسلام عليكم ورحمة الله وبركاته

الكـــلام

كلمتين وبس

الكلمة الأولى

خللى اللى يتكلم يتكلم زى ماهو عاوز .... الـــكــــــلام بـبـــــــــلاش

الكلمة الثانية

كن كالنخيل عن الأحقاد مرتفعا
اذا القى بحجر القى اطيب الثمر

وبس



بوش اتضرب بالجزمة يا جماعة


تحديث

توالت ردود الفعل الرسمية والشعبية داخل العراق على قيام مراسل قناة البغدادية منتظر الزيدي بإلقاء حذاءيه على الرئيس الأمريكي المنتهية ولايته جورج بوش.

فقد خرجت الآلاف من أنصار التيار الصدري في تظاهرات في مدينة الصدر ببغداد ومدينة النجف جنوبي العاصمة العراقية تندد بالرئيس بوش وتطالب بإطلاق سراح الصحفي العراقي.

ففي مدينة الصدر أحرق المتظاهرون العلم الأمريكي وأشادوا بتصرف الزيدي و في النجف ألقى بعض المتظاهرين بأحذيتهم في اتجاه دورية أمريكية وقال شهود عيان إن الجنود الأمريكيين لم يردوا على ذلك


الصورة من وكالة الأنباء الفرنسية وبتوضح بوش والمالكى وهما بيتضربو بالجزمة

ده الى كان المفروض يتعمل من سنين على فكرة

صحفى عراقى جدع عملها اخيرا واحتفل بزيارة بوش الأخيرة للعراق على طريقته الخاصة

الصورة مضحكة .. ومبكية فى نفس الوقت .. المالكى هو اللى بيفدى بوش .. لكن ليه لأ مش ولى نعمته ؟

اتحاد المحامين العرب كون جبهة من 100 محامى من بلاد عربية مختلفة للدفاع عن الصحفى العراقى الجدع منتصر الزيدى امام اى محاكمة من اى نوع

يا منتصر انت عملت اللى مقدرش كذا مليون عربى يعمله ... انا عن نفسى بحييك وانا خجلان من نفسى

الخبر بالتفصيل
هـنــا


رسالة

اول سطر

الى .... مكان النقط مش محتاج توضيح

الموضوع

من حقنا نخاف ونقلق لكن طالما احنا مع بعض يبقى نخاف ليه ؟
ايوة بخاف علينا لكن خوف طبيعى .. خوف اننا ننسى نفسنا فى قلب الخوف ده ويبقى تركيزنا فى اتجاه واحد عكس محنا عاوزين
لو كل الناس عملت كدة كان زمان الدنيا ماتت من زمان
كل حاجة تيجى بالعقل والتفكير وطالما صوتنا من دماغنا احنا يبقى خلاص
مفيش حاجة هتحصل اكتر من كدة دى حلاوة روح على فكرة
لو الأبواب كلها اتقفلت .. باب ربنا عمره ما اتقفل حتى ف وش الكفرة

اخر سطر

هنفتكر الأيام دى ونقعد نضحك عليها وعلى خوفنا من حاجات ملهاش لزمة

كل عيد وانتم بخير

كل عام وانتم بخير وعيد سعيد علينا جميعا وصوم مقبول ان شاء الله ... اجازة بأة لحد الجمعة الجاية ان شاء الله اشوفكم على خير

هل هى دية ؟ ام ثمنا للسكوت ؟؟؟؟

خبر غريب استفزنى كمصرى متابع للأخبار

برجاء قراءة الخبر جيدا ثم التعليق

دولــــة الأنـــــا



احنا يا جماعة فى دولة الأنـــا .. ايوة دولة الأنا .. دولة الفرد الواحد .. مش مقتنعين ؟ عندى ادلة كتيرة

اول دليل .. شوفو ايه اللى بيحصل لنا فى الشوارع لما يكون موكب معدى .. اى موكب .. من اكبر موكب فى البلد لحد اصغر موكب اول امبارح كوبرى 15 مايو فضل واقف متعطل لأكتر من نص ساعة فى منطقة معدية النيل الواصلة بين العجوزة والزمالك وده بسبب ان واحد لابس بدلة ومعاه لاسلكى كان موقف الطريق لموكب لا يتعدى سيارتين سود اللون كان معدى .. شوفتو حاجة تفقع اكتر من كدة ؟؟ علشان واحد معدى يبقى مئات يقفو يستنوه .. تبقى دى دولة الأنا ولا لأ ؟

تانى دليل .. لو كنت او كنتى شغال او شغالة فى قطاع عام او حكومة ومش هقول قطاع خاص .. جه يوم قبض المرتب او اى مكافأة ولتكن منحة العيد مثلا اللى الكل بيستناها علشان يشترى اللى هو محتاجه فى دخول العيد .. لما تيجى تسأل هنقبض امتى ؟ يترد عليك بمنتهى البرود .. بعد العيد !! نعم ؟؟؟ ازاى يعنى ؟ يترد عليك بنفس البرود ان الباشا الموظف اللى مسؤل عن اعتماد الشيك اللى هتتصرف بيه الفلوس مضرب عن العمل علشان مخادش حقه فى المكافأة اللى هى اساسا مش ليه من الأصل دى لناس تعبت وشقيت وهو ميعرفش اساسا هما عملو ايه علشان ياخدو المكافأة دى والناس تخبط دماغها فى الحيط وتروح تشحت بأة او تقف جمب اى جامع بيوزع لحمة للفقرا علشان يعرف يعيد مع عيلته .. تبقى دى دولة الأنا ولا لأ ؟

كنا بنقول زمان ومازلنا بنقول وبنضحك على نفسنا قبل ما نضحك على غيرنا بجملة .. احنا دولة مؤسسات .. لا معلش احنا دولة الأنا يا جماعة