دليل الأسرة المتهنية فى بطاقة التموين الأليكترونية

اتفاجأت بافتكاسة جديدة من افتكاسات الحكومة النظيفة الرشيدة العزيزة والأفتكاسة دى عبارة عن بطاقة تموين اليكترونية
لكل مواطن يحمل بطاقة تموين ورقية .. ايوة من اللى بتبقى مبقعة زيت دى عارفينا ؟

وزارة التضامن الأجتماعى وده اللوجو بتاعها على فكرة
اعلنت عن الموضوع ده عن طريق موزعى التموين ... ايوة بقالين التموين .. والأجراءات بسيطة .. لحد دلوقتى بس .. وهى ان كل مواطن صاحب بطاقة هيصور بطاقة الرقم القومى بتاعته + تصوير اول تلات ورقات من بطاقة التموين الحالية ويسلمها للبقال اللى بيصرف منه التموين .. البقال بيقول ان البطاقة الأليكترونية الجديدة هتتسلم للمواطنين اول السنة الجديدة او بالكتير على نص السنة الجديدة برضه .. وماله

سرحت باة فى الموضوع وتخيلت منظر الناس وهى بتصرف التموين بالبطاقة الأليكترونية الجديدة دى

هنروح نلاقى الموظف بدل الدفتر والقلم اللى لازق ف ودنه وكأنه مولود بيه هنلاقى جهاز كومبيوتر بينتيوم 3 على الأقل

وبعدين تدخل على البقال تلاقيه لو معندوش زحمة بيلعب من نفسه دور سوليتير او حتى دور زوما الجديدة


ولما بقى تحب تصرف التموين بتاعك تديله البطاقة يقوم ممشى عليها البار كود .. ايوة البار كود خلاص بأة انتهى عصر الدفتر قولنا
ولما يطلع كله تمام بناء على البار كود بتاع بطاقة التموين بتاعة حضرتك هوب الكومبيوتر اللى البقال قاعد عليه يفتح رفوف المواد التموينية لسيادتك علشان تمد ايدك على رف الزيت تاخد عدد الزجاجات اللى مسمحولك بيه وكذلك مع السكر والرز والشاى وخلافه

لكن بأة علشان الشعب الفهلوى الناصح .. الحكومة الرشيدة النظيفة حطت تعليمات مشددة للكومبيوتر انه يراقب مع البقال حركة ايد سيادتك على الرف المفتوح ليك علشان تاخد نصيبك من التموين يعنى لو فكرة تمد ايك لأكتر من نصيبك هيحصل الآتى

الكومبيوتر هيهنجهتطلع رسائل تحذير بان حاجة غلط حصلت ناحية رفوف المواد التموينية

بالمناسبة الصورة دى مشاركة فعالة من اينو

وبعدها يا ناصح تلاقى الكومبيوتر طفى والرف اللى انت مادد ايدك فيه بتاخد اكتر من حقك قفل على ايدك والبقال قام من مكانه وقفش فيك ربنا يعافيك ومش هقولك بأة فى المواقف اللى زى دى الشعب بيحب يخدم ازاى سواء بايده او برجله

هذا وبالله التوفيق والسلام عليكم ورحمة الله وبركاته

18 comments:

Eno said...

هههههههههههههههه
حتت موضوع

ايه ده يافوكس بجد احلي من الكلام اللي قولناه ساعتها بجد

تسلم ايدك علي اسلوب العرض ده
ههههههههههههههههههه

مش قادره امسك نفسي من الضحك :D

تحياتي لي اكبر مهيساتي في الدنيا

Foxology said...

Eno

هههههههههههههههههههههههههههههه

والله يا اينو الواحد لما بيبقى رايق بيطلع حاجات كدة متعرفيش جت منين .. وانتى طبعا عارفة وعاصرتى :))

نورتينى :)

3omda said...

كويس والله ، طب علي كده ممكن اصحي الصبح اشتري العيش بقي ألاقي الراجل بتاع الفرن قاعد ماسك اللاب توب بتاعه وبيبيع العيش بالفيزا

tarek momen said...

والله هو النظام جميل ويبشر بكل خير و هيساعد علي نشر الثقافة الكمبيوترية علي اساس انك ممكن تستعلم عن حصتك التموينية و ميعاد صرفها عن طريق النت وياسلام لو تشترك في جروب تمويني علي الفيس بوك
بس المهم في الآخر هايبقي فيه زيت وسكر ولا زي النكتة بتاعة زمان
" ايه رايك في النظام"

Foxology said...

3omda

تصدق ممكن يا عمدة ؟؟
وهى دى الحكومة الأليكترونية
العلام حلو يا ولاد
والعلم نورون

نورتنى يا عمدة :)

Foxology said...

Tarek Momen

ههههههههههههههههههههههههههههههههه
والله يا استاذ طارق ضحكتنى خصوصا موضوع جروب الفيس بوك
لو حصل مثلا ان التموين متصرفش فيه رز نلاقى جروب ع الفيس بوك (تضامن مع اخوانك من اجل كيلو الرز )

وهلم جرا

نورتنى :)

مولان said...

هههههههههههههههه والله ضحكتني بجد

بس انا اتوقع اي حاجه

Foxology said...

مولان

مهو الحكومة دايما تتحفنا بشوية افتكاسات كدة تخلى الواحد يألف فيلم كوميدى عليها :))

شكرا لمرورك وتعليقك :)

koukawy said...

الحكومه الاكترونيه اثبتت فشلها مع الموظفين بتوعنا و انا جربتها في الشهر العقاري المفروض انها توفر وقت
بس لأنهم مش بيعرفوا يتعملوا مع الأجهزه فيبيخدوا و قت ضعف المفروض

Foxology said...

koukawy

مش وقت ضايع وبس دى كمان فلوس ضايعة لزوم شراء اجهزة الكومبيوتر ولزوم تدريب الموظفين على استخدام اجهزة الكومبيوتر ولزوم صيانة اجهزة الكومبيوتر ولزوم ولزوم ولزوم وطلعت فى الاخر عملية ملهاش اى لزوم الحقيقة

شكرا لمرورك اول مرة بالكيت كات :)

osama khaled said...

يا اخونا متهزروش فى الجات ديه
انا لسة راجع من عند البقال وقلى معلش يااستاذ مفيش لازيت ولا تموين النهردة اصل الكمبيوتر مهنج



موضوع رائع

شمس النهار said...

وعشان ايه ده كله
همه محتارين يعملوا ايه والا ايه في الناس البسيطه دي
ياله هيروحوا من ربنا فين
حبيت ادخل اسلم عليك واقولك مانسيتكش لا انت والا اينوا هناك بالدعوات
عقبال ماتحجوا انتم الاتنين

daktara said...

يخرب بيت عقلك
ايه الحلاوه دي
موضوع رائع وخفيف الدم جدا اهنيك عليه
بس اوعي مدونتك تقفش عليا لما اكدب
قصدي اكتب اكتر من مساحتي

انظر حولك
د. خالد عزب

Foxology said...

Osama Khaled

ياراجل ؟؟؟
طب والبقال مقالكش هيصطب وندوز جديد امتى ؟؟ لحسن الوندوز يفضل واقع ومتصرفش حتى باكو شاى :))

نورتنى فى اول مرور بمدونتى المتواضعة :)

Foxology said...

شمس النهار

اهو فكرة جديدة من افكار الحكومة الغير ذكية وادينا بيتجرب فينا كالعادة

حمد الله ع السلامة مرة تانية وربنا يتقبل منك دعائك وحج مبرور ونورتينى بجد :)

Foxology said...

dakatra

ربنا يخليك يا دوك ده العشم برضيك :)

نورتنى فى اول زيارة :)

مصطفي زهران said...

ياريت ايها الفيلسوف الكبير تشرف مدونتي الحديثه العهد بعد مخاض عسر خرجت الي النور...الولادة كانت في التوك توك...ههههههههههههههه

Foxology said...

مصطفى زهران

فيلسوف وكبير ؟؟؟ ده انا على كدة نيتشه وانا مش واخد بالى :))

نورتنى فى اول زيارة للكيت كات واوعدك بالزيارة وهجيب معايا مغات للمدونة اللى جت بعد عسر مخاض :))