كمان تاج وأمركم لله


كالعادة .. تدبيسة جميلة من اينو .. تاج يعنى

يلا بينا

اسمك ؟؟
احمد والشهير بـ فوكس

سنك ؟؟
26 سنة الا 4 شهور

اسم مدونتك ؟؟
واضح طبعا .. الكيت كات

مجال دراستك ؟؟
هندسة الحاسبات

صورتك الرمزية فى المدونة بتعبر عن ايه ؟؟
الصورة عبارة عن جملة الكيت كات وهى لقطة من تتر الفيلم المصرى الشهير ( الكيت كات ) وبتعبر عن حبى الشديد للفيلم ده علشان المصداقية اللى فيه والحرفية العالية اللى اتعمل بيها

هل فكرت فى اغلاق مدونتك ؟؟ والسبب ؟؟
اه فكرت ونفذت فعلا وقفلتها فترة قصيرة وكان سبب شخصى جدا وهو محاولة ارضاء انسان عزيز عليا جدااااا

ايه رد فعلك لو حد قل أدبه عليك فى المدونة ؟؟
الحمد لله محصلش لحد دلوقتى ولو حصل اعتقد انى ابسط رد هو التجاهل زى ما قال الأمام الشافعى عن الأحمق والسفيه .. وخير من اجابته السكوت

أسوأ مدونة دخلتها ؟؟
كانت مدونة بتطبق المثل الشعبى الشهير : من برة الله الله ومن جوة يعلم الله ... الظاهر انها مدونة ناس محترمين ومثقفين لكن لما دخلت وقريت اكتشفت انها منبر من منابر اثارة الفتنة الطائفية فى مصر وازدراء الدين الأسلامى بشكل مقرف جدا وطبعا كنسلتها ومبقيتش ادخل تانى لأن ملوش لزمة الكلام مع ناس عقليتها بالشكل ده

هايحصل ايه لأيميلك بعد لما تموت ؟؟
هيموت هو كمان

عطيت الباسوورد لحد قبل كدة ؟؟
لأ

السفر بالنسبة لك ؟؟
تغيير شامل داخلى قبل ما يكون خارجى وتجديد كامل للحالة النفسية

المود بتاعك ايه ؟؟
متقلب بس بحاول دايما انى اكون هادى البال بأنى اعمل اى حاجة تخلينى كدة .. موسيقى حلوة .. كتاب جميل .. او حتى مكالمة مع صديق

بتعمل ايه ف وقت فراغك ؟؟
النوووووووووووووووووووم .. ده فى الفترة الأخيرة الحقيقة
لو مفيش نوم يبقى كتاب عاوز أقرأه

الأكلات المفضلة ؟؟
الكشرى
المشويات
البيتزا

الصفات اللى أخدتها عن والدك ؟؟
الــعــــصـــبـــيـــة .. اكبر واخطر حاجة اخدتها فعلا عن والدى
الفراسة .. يعنى انى اقابل حد أول مرة وهى أول مرة بعرف منها اذا كنت هعرف اتعامل معاه ولا لأ وبيطلع فى الآخر انى كنت صح الحمد لله واحساسى كان مظبوط
الأصرار على انى اخد حقى مهما طال الوقت .. اينو قالت طبعا الكلام ده فى التاج بتاعها
الصفات الشكلية من حيث لون البشرة والشبه .. بس

الصفات اللى اخدتها من والدتك ؟؟
الهدوء فى بعض الأحيان .. طبعا مش متقلب المود بأة ؟
عدم الأهتمام بمن لا يهتم بيا

اكتر ست حاجات بتحبهم ؟؟
ايــنـــو
محمد منير
نادى الزمالك
الصديق الصدوق
القراءة
الكتابة

أكتر ست حاجات بتكرههم ؟؟
الخيانة
الغرور
الأهتمام بالذات على حساب الغير
الكذب
الكلام عليا من ورايا
الظلم

شخصيتك نوعها ايه ؟؟
متقلب شوية بس متوسط الحال

لماذا دخلت عالم التدوين من الأساس ؟؟
علشان اكتب اللى جوايا واعرف انا بتكلم صح ولا غلط وده طبعا يبان من تعليقات الناس اللى بتشوف كلامى

احلى جملة قيلت فى وصف مدونتك ؟؟
مفيش حاجة اتقالت عن مدونتى بس الحقيقة افضل حاجة اتقالت عنى كانت من استاذ طارق صاحب مدونة عابر سبيل لما دايما كان بيلقبنى بلقب : فوكس الحكيم وانا بعتز جدا باللقب ده

أهمية التعليقات بالنسبة لك ؟؟
ترمومتر لمدى تقبل الناس لكلامى اللى جاى من شخصيتى يعنى مقياس لتقبل الناس ليا ولشخصيتى

أحلى بوست كتبته مع ذكر السبب ؟؟
كان بوست عن زوجتى الغالية ايــنــو وده اللينك بتاعه ... أســـف
السبب : انه كان اعتذار واجب وعلنى كمان عن غلطة غلطتها فى حق زوجتى

أفضل مدونة قرأتها ؟؟
الحقيقة هما كتير والريدر مليان ماشاء الله لكن دبعا مفيش شك ان مدونة زوجتى رقة الأحساس
هى الأفضل لأنها اسم على مسمى واتعلمت منها كتير جدا على فكرة وده والله مش نفاق ولا مجاملة الحمد لله

الشغل بالنسبة لك ؟؟
مكسب معنوى باثبات النجاح الشخصى فى مجال التخصص الدراسى
مكسب مادى نابع من المكسب المعنوى .. مهو محدش بيشتغل لله وللوطن برضه :D
تعلم كيفية التعامل مع انماط مختلفة من البشر

أهمية الأنترنت بالنسبة لك ؟؟
هو محور شغلى على فكرة وبياخد الجزء الأكبر من تفاصيل شغلى غير انه شباك كبير على الدنيا

تمرر التاج ده لمين ؟؟؟
طبعا كان نفسى ادبس اينو لكن سبقتنى فهبقى مضطر انى ادبس ناس تانيين

محمود شخابيط
محمد كمال صوت من مصر
استاذ طارق عابر سبيل
واحدة مفروسة
صيدلانية طالعة نازلة
انجى ابراهيم هات م الآخر
حسام صاحب العالم الأفتراضى
البامشهندس معتز صاحب التوك توك
استاذة سحر وحماتها الملاك

وطبعا اللى نفسه فى التاج يتفضل


25 comments:

Eno said...

معلش بأه ياسي فوكس لو مش كنت ادبسك انت ادبس مين ؟؟

كنت متوقعه الاجابات الجميله دي ولاني عارفه معظم الحاجات عنك بس بكون فرحانه لما تجاوب تاج وتعرف الناس بيك اكتر :)

وبعدينانت بتتعلم مني ؟؟ ده انا معاك عامله زي الطفله اللي بتلقط وتتعلم كل حاجه انت بتعملها وتعملها زيك يعني انت معلمي في الحياه :)

تحياتي :)

enjy said...

انت زملكاوى؟؟؟؟ ياللهوووووووووووووول...على فكرة ارفع راسك عادى بتحصل فى الدنيا كتير

انا بهرج على فكرة والله

انت شخصية فعلا حلوة اوى وكلامك بجد بيجيب من الاخر وانا فخورة انى بقرا كلامك دة

ربنا يخليك انت واينو لبعض امين ومتشكرين على التدبيسة

سلام

Foxology said...

Eno

ياستى ولا يهمك تاج يفوت ولاحد يموت :))

ربنا يخليكى والله على الكلام الكبير اوى ده معلم حتة واحدة ؟؟ ده انا غلباااااااااان

تحياتى ونورتى الكيت كات :)

Foxology said...

enjy

اه زملكاوى وأفتخر :))

شكرا على كلامك الجميل يا انجى :)

ربنا يتقبل منك واى خدمة على التدبيسة .. قصدى التاج

شكرا لمرورك وتعليقك :)

EMMY BABY said...

ههههههههههههههههههههههه اينو ادبست ومن بعد انت ادبست انا بعد كدة اضمن ادبسكم انتم الاتنين بانى ادبس واحد فيكم


بجد والله ربنا يخليكم لبعض جداااااااااااااااا وبرزقكم بالذرية الصالحة

ماشاء الله اجاباتك جميلة وتدل على الرزانة واللاتزان

عجبتنى جملتك فى انك اتعلمت من اينو حاجات وده يدل انك شخص فعلا متزن

الفراسة حلوة اووووووى على فكرة وبتوفر على الواحد حاجات كتير اوى

البيتزا هيييييييه يعنى معزومين النهاردة على بيتزا

:p

تحياتى

ايمى

شمس النهار said...

الله
انت مقضيها تيجان زي
عارف التيجان دي علي قد مامتعبه في الاجابه بس بتقربنا وبتعرفنا ببعض جدا
ربنا يكرمك
اول مره اعرف انك مهندس كمبيوتر
بنتي وجوزها كده برضه
ربنا يكرمك انت واينو الحبوبه
ويبعد عنكم الشر

Hossam said...

Heyyyyyyyy My freind Ahmed
وحشتنى جدا جدا ايه اخبارك؟
مش قادر اقولك التاج بجد جميل اوى واسئلتة مميزة عن اى تاج
وبصراحة مكنتش اتخيل ان فى حد هيبعتلى تاج بجد متشكر جدا وانشالله هحط التاج فى القريب العاجل
تحياتى صديقى
سلام

Foxology said...

Emmy Baby

ايوة هو ده السر واحد فينا يتدبس يبقى التانى اتدبس على طووول من غير كلام :))

متشكر جدااا على الكلام الجميل فى حقى وحق اينو وربنا يتقبل منك :)

البيتزا على حساب اينو :))))))

شكرا لمرورك وتعليقك :)

Foxology said...

شمس النهار

اه والله يا شموسة الواحد حاسس انه بيمتحن فى موسم الأمتحانات اللى ماشى فى البلد اليومين دول :))

التاجات فعلا مفيدة ف ان الواحد يقدر يحد تصور كامل للشخصية اللى بيزور المدونة بتاعتها ويعرف اسلوبه ايه وشخصيته ايه :)

هو انا مهندس كومبيوتر والحكومة هى اللى بتقول كدة :))

الكومبيوتر ده انا بعتبره اهم حاجة فى الدنيا على فكرة :)

ربنا يكرمك والله ويتقبل منك :)

شكرا لمرورك وتعليقك :)

Foxology said...

Hossam

ازيك انت يا حسام واخبارك ايه ؟
انا الحمد لله كويس :)

ربنا يخليك يا حسام والف شكر على الكلام الجميل ده :)

اوكى هستنى اجاباتك بأة :)

شكرا لمرورك وتعليقك :)

3omda said...

ياه يا فوكس،طلعت زملكاوي"ياخساره"
علي العموم،اجاباتك تعبر عن شخصية كاتب البوستات الهايله دي..ويا سيدي ربنا يهنيك بـ اينو ويرزقكم بمدونين صغيرين..

Foxology said...

3omda

اه والله زملكاوى :))

شكرا يا عمدة على الدعوة الجميلة دى وشكرا لمرورك وتعليقك الجميل :)

صيدلانيه طالعه نازله said...

طبعا بشكرك على التدبيسه التحفه دى و انشاء الله التاج ده و تلاته تانيين حارد عليهم بعد كأس القارات انشاء الله
ربنا يكملها على خير و نهزم امريكا و لو فى الكوره

Foxology said...

صيدلانية طالعة نازلة

العفو يا دوكتور ووقت الأجابة مفتوح المهم يكون فى اجابة

ان شاء الله هنهزم امريكا 1-صفر :)

تحياتى وشكرا لمرورك وتعليقك :)

Foxology said...

محمود محمد حسن

مش عارف تعليقك راح فين لكن عموما الكلام على كأس القارات هيبقى ف وقته مش دلوقتى خالص دلوقتى كل الناس بتتكلم والكلام اكتر من الهم ع القلب

شكرا لمرورك وتعليقك ومستنى اجاباتك

لورنس العرب said...

تعرف انا اكتر حاجه استغرب لها هي سنك
لم اتوقع ابدا ان عندك 26 سنه وانك متزوج كمان
افتكرتك عازب مش عرف ليه
وكمان كنت فاكر ان عندك فوق ال 35 مش عارف ليه!!!

Foxology said...

لورنس العرب

والله ياباشمهندس مش اول واحد يقول كدة :))

مش عارف يعنى دى حاجة حلوة ولا ايه ؟؟؟

المهم متهربش من التاجات وجاوب :)

نورت الكيت كات

على باب الله said...

عجبتني إجاباتك على التاج , و عجبني أننا بنشترك في النوم و الكيت كات و الزمالك

---

Foxology said...

على باب الله

الحمد لله ان التاج عجبك .. ايه رأيك تجاوب عليه ؟؟

شكرا لمرورك وتعليقك :)

من غير عنـــوان said...

شكرا على التعريف الجميل بالشباب الجميل

Foxology said...

من غير عنوان

شكرا لحضرتك ونورت الكيت كات :)

نهر الحب said...

حلو التعريف دا بك
وان شاء الله متقفيلش المدونة تانى ابدا
وتنورنا دائما بالتواجد بيننا

Foxology said...

نهر الحب

اشكرك على التعليق الجميل ده وشكرا لمرورك وتعليقك :)

Hossam said...

صديقى الجميل احمد
انا رديت على التاج واتمنى انه يعجبك واتمنى انك تعلق علية
تحياتى صديقى

Foxology said...

حسام

شكرا يا حسام على ردك على التاج وهروح اشوفه واسيب تعليق طبعا :)

شكرا لمرورك وتعليقك