بين اوباما ومستشفى العباسية تقع مصر

كانت مصر قديما تقع فى منطقة وسط من قلب العالم حيث يحدها من الشمال القارة الأوروبية ومن الجنوب القارة الأفريقية الكبيرة برأس الرجاء الصالح ثم محيط كبير ثم قطب جنوبى ومن الشرق آسيا ومن الغرب المغرب العربى ثم المحيط ثم الأمريكتين

اما الآن فمصر تقع بين الرئيس الأمريكى ومستشفى العباسية للأمراض النفسية


الرئيس الأمريكى يقوم بزيارة لمصر غدا الخميس الموافق 4 يونيو 2009 لمدة 17 ساعة تقريبا يقوم فيها بزيارة جامعة القاهرة العريقة التى احتفلت العام الماضى بالمئوية الأولى لها وكذلك يلقى من تحت قبتها الشهيرة خطابا للعالمين العربى والأسلامى يتحدث فيه عن السلام وأمانى العالم فى الأستقرار والتنمية الخ الخ مما اعتدناه من اى مسؤول عربى أو اجنبى يقوم بزيارة البلاد

الغريب فى الأمر حالة النشاط الفكرى والبدنى الغريبة التى اجتاحت البلاد بعد الأعلان عن موعد زيارة الرئيس الأمريكى للقاهرة وكأننا فجأة اكتشفنا اننا امة لدينا مخزون فكرى ومادى كبير جدا فأقيمت نافورة ضخمة فى ميدان السلطان حسن حيث سيقوم الرئيس الأمريكى بزيارة مسجد السلطان حسن وتلك النافورة التى تم تشييدها بالكامل وتشغيلها فى غضون 24 ساعة فقط اكبر اثبات على اننا لدينا امكانيات ويمكننا فعل اى شئ .. لو جالنا مزاجنا .. كذلك حالة النشاط الفكرى الكبيرة المتمثلة فى الأقلام التى كتبت والأفواه التى تكلمت بين مؤيد ومعارض وكذلك حالة الأندهاش من المواطنين العاديين تجاه الزيارة وأثرها فى حال البلاد عموما الذى لن يسمن ولن يغنى من جوع حتى ان بعض المواطنين لا يعرفون ان الرئيس الأمريكى سيقوم بزيارة القاهرة من الأساس ... لماذا دائما تقوم الدنيا ولاتقعد لمثل هذه الأشياء التى ليست بأهمية الحصول على مرتب يكفى كل ايام الشهر لموظف عادى أو بأهمية الركوب فى مواصلة نظيفة ليست مزدحمة للوصول الى مكان العمل صباحا والعودة للمنزل مساءا أو بأهمية الحصول على رغيف خبز نظيف خالى من التراب والقطع المعدنية واعواد الكبريت الخشبية ؟

مستشفى الأمراض النفسية والعصبية بمنطقة العباسية بالقاهرة اخيرا يستطيع المرضى الدخول والعلاج ثم الخروج بعد اعادة التأهيل والتكيف والتعامل مع الناس العاديين فى الشارع وذلك بعد التعديلات القانونية التى طالتها ايادى التغيير بعد مرور 60 عام على اقرارها اول مرة ... 60 عام مرت بالتمام والكمال لكى يستطيع المرضى النفسيين العودة الى حياتهم الطبيعية ... عجبى عليكى يا ام العجايب


18 comments:

Empress appy said...

العباسيه من اسوء الاماكن اللى ممكن يبقى فيها علاج ولا معامله ادميه اصلا انا اشتغلت فيها سنه تلات ايام فى الاسبوع مش عاوزه اقولك على اللى بيحص
بجانب النافورة
شارى الدقى اترصف او الشارع المواججه للجامعه فى خلالخ 12 ساعه بتكلفه 15 الف
انا عاوزه ابعت له ينوبه ثواب ويزور العشوائيات

ساعد نسرين الايمن said...

وياتري وهو داخل مصر هيدخل برجله اليمين ولا الشمال ؟
وكمان هيطبقوا عليه فحص انفلونزا الخنازير ولا لا ؟

Eno said...

ينور يااخويا ويأنس

عاوزين نعمل معاه واجب ياسي فوكس

يعني نجيب صندوق حاجه صقه ونقف نفرقه قدام الطايره وهي نازله حلاوة وصوله كده يعني :)))

بالنسبه لمستشفي العباسيه عملت خير لاني الايام الجايه مش مبشره واكيد في ناس كتير هتزوهم بعد القرار ده

تحياتي :)

Foxology said...

Eno

تصدقى فكرة يا اينو ؟؟؟ :))))))))

مستشفى العباسية لازم تتوسع علشان اللى برة يعرف يلاقى مكان فيها :))))

تحياتى ونورتى الكيت كات :)

Foxology said...

Appy

معقولة كل ده فى العباسية ؟؟ امال البى بى سى بتضحك علينا ولا ايه ؟؟؟؟

يلا ما علينا ايه اللى عدل يعنى ؟

ايوة فعلا المناطق الىل حوالين الجامعة وفى الأماكن اللى هيعدى عليها اثناء زيارته التاريخية المهلبية دى اعملت واتظبطتت وبأة على سنجة عشرة زى ما بيقولو ياريته يطلب زيارة كل شبر ف مصر يمكن البلد تروق وتنضف شوية

شكرا لمرورك وتعليقك

Foxology said...

ساعد نسرين الأيمن

اختلف العلماء فى الموضوع ده واعتقد انه هينط برجليه الأتنين :))

سؤال وجيه بتاع الفحص ده :)))

شكرا لمرورك اول مرة بالكيت كات :)

شمس النهار said...

هو ده الانسان المصري
لما يبقا عايز حاجه او يعمل حاجه
مهما كانت صعبه بيعملها بقوة جباره
واول ماتخلص وتستنفذ الغرض منها خلاص
هتلاقي بعد الزياره الميمونه دي
كل شئ هطوله يد الاهمال تاني

Foxology said...

شمس النهار

اكيد يا شمس البلوجرز ده اللى هيحصل وشئ الكل متوقعه

بتبقى حالة كدة وبتعدى

شكرا لمرورك وتعليقك ونورتى الكيت كات :)

الازهرى said...

يعنى فكرك اروح وانا مطمن
؟
ايوه ما انا من زمان كانوا بيقولوا لى العباسية هى بيتى الاساسى
يبقى انا بقى اروح وايح دماغى


تعرف انى مستنى الخطاب بتاعه ده فعلا
من يوم الانتخابات وهو معاه علامات استفهام كتير وربنا يستر

Foxology said...

الأزهرى

توكل على الله وكلنا ورائك :)))


انا مش مستنى لأنه مش هيقول جديد :)

تحياتى ونورت الكيت كات :)

الميكروباص said...

احنا اخدنا اجازه من الشغل
وأكتوبر كلها اخدت اجازه لأن المتجه إلى اكتوبر لازم يعدي على الجيزه وميدان الرمايه
فقفلوا ميدان الرمايه وميدان الجيزه والطرق المؤديه إليه من اول زهراء مصر القديمه
وتقريبا اني اليوم اجازه هي دي الحسنه الوحيده من زيار الراجل ده للبلد

Foxology said...

لورنس العرب

نفس النظام مدينة نصر وضواحيها كلها اجازة علشان الموكب اللى هيعدى من طرق مصر الجديدة واول مدينة نصر حتى قصر القبة

هى مش حسنة هى دليل على خيبتنا واننا مش هنعرف نحمى الضيف لو كان فى مواطنين فى الشارع

تحياتى وشكرا لمرورك وتعليقك :)

Unknown said...

حاسة بحسرة شديدة من زيارة اوباما....بجد حسرة مبررة فعلا بس لو قعدت اقولك انا متحسرة ليه يبقى هقعد اتكلم اسبوع..عموما انت اكيد فاهم وحاسس يعنى

مستشفى العباسية والمعمورة عندنا واى مستشفى صحة نفسية حكومية تابعة لوزارة الصحة فى مصر قمة السخف واللامبالاة بالانسانية..انا اول يوم تدريب ليا فى المعمورة والله اقسم كنت هموت من القهر على البشر اللى ربنا حرمهم من نعمة العقل واحنا حرمناهم من نعمة الادمية..وحرمنا نفسنا كمان

صوت من مصر said...

اوباما طلع شخصيه محترمه عكس بوش يا بيس ولا ايه

Foxology said...

enjy

الحسرة على الأستعدادات اللى تمت ولا المداهنة والنفاق ولا الأمكانيات البشرية والمادية الموجودة لكن مش للبلد ولا انتظار مالا يأتى من مجرد شخص عادى آخر وليس قديس او نبى مرسل ولا حتى مهدى منتظر ؟؟؟؟ الحسرة كبيرة اكيد وكلها بتصب فى خيبتنا

المستشفيات عموما فى مصر حتى القطاع الخاص كله قرف واهمال وقمة الأهمال والتسيب واللامبالاة بالآدمية والأنسانية ودى حاجة مش جديدة على بلد اللى بيقتل فيها الف نفس بياخد براءة

تحياتى وربنا يجعل اللى جاى احسن

Foxology said...

صوت من مصر

الظاهر منه انه شخصية محترمة سياسية محنكة بتكسب صداقات اكتر ما بتكسب عداوات لكن السؤال المهم هو هل هيفضل كدة على طول ؟ وهل الظروف هتبقى معاه فى احلامه وامنياته ؟؟ اشك الحقيقة


تحياتى

3omda said...

طيب يا تري ايه رأيك يا فوكس في الكلام ده بعد كلمه النهارده..يا تري الكلمه اللي استمرت حوالي خمسين دقيقه كانت تستاهل اللي اتعمل؟؟؟؟؟؟؟؟؟؟؟؟؟؟؟؟؟؟؟؟

Foxology said...

3omda

رأيى انه بيحاول يحسن العلاقات علشان المصالح الأمريكية تمشى زى زمان بدل التوتر اللى هيا فيه ده

والخمسين دقيقة دول مستاهلوش كل الترتيبات وكل اللى حصل ده بجد

نورتنى يا عمدة :)