بـسـرعـة

البوست النهاردة هتكون حدث وتعليق على الحدث وبسرعة

اول حاجة : البلطجة والاحداث المؤسفة اللى بتحصل فى المجمعات الانتخابية للحزب الوطنى واللى الهدف الرئيسى منها انتخابات داخلية لاختيار مرشحين الحزب الوطنى عن كل دائرة انتخابية

التعليق : اذا كانت انتخابات الحزب الحاكم الداخلية لاختيار المرشحين اللى طبعا هيكسبوا فى انتخابات مجلس الشعب بالمنظر ده يبقى الاعضاء عاملين ازاى وحال الحزب ايه وبالتالى اظن اننا عرفنا دلوقتى وانكشف حال البلد تحت رعاية الحزب الحاكم والعجيب انهم مش خجلانين من نفسهم ولا اى حاجة وعادى جدا

تانى حاجة : وزير التعليم احمد زكى بدر استقبل العالم المصرى الدكتور فاروق الباز وبحثوا مع بعض كيفية تطوير مناهج العلوم المختلفة فى سنوات التعليم من الابتدائى حتى الثانوى

التعليق : خطوة متأخرة جدااااااااااااااااااااااااااااااااااا لكن الحقيقة هى نقطة فى صالح الوزير بس من باب اولى اصلاح حالة المدارس اللى الطلبة ف كل فصل 140 طالب زى كدة ما حصل ف صفط اللبن الاسبوع اللى فات وطالبة راحت البيت تجيب كرسى تقعد عليه لأن ملهاش مكان فى الفصل تقعد فيه

تالت حاجة : موضوع خروج الاهلى من بطولة افريقيا وثقافة القطيع اللى هو التعصب الاعمى ورفض اى تفسير منطقى للخروج من البطولة لدرجة ان محمد فضل طلع علينا بيقول انه سال الحكم انت اخدت رشوة ؟ وقال ايه الحكم قاله اه اخدت رشوة

التعليق : كلام محمد فضل دليل قاطع على ان مفيش دماغ بتفكر والمحزن ان الناس صدقته !!! والمشكلة مش فى الحكم اللى بوظ الماتش المشكلة ان الاهلى نفسه هو اللى فيه مشكلة والدليل ان فريق البطولات الجامد مقدرش يحط جون فى 88 دقيقة بعد ما دخل فيه جون الفريق التونسى !!! الفريق الجامد صعد من دور المجموعات فى نفس البطولة بالعافية !! الفريق تعبان جدا وكل الاهلاوية عارفين كدة ومقتنعين بكدة ومع ذلك بيكابرو وعاوزين يحملو الحكم مسؤلية الخروج .. فى حالة تخاذل وتهاون وانفلات كمان داخل صفوف الفريق والدليل حوارات عماد متعب واعتراضات اللعيبة على الحكام واخرها الخناقة مع حكم مباراة شبيبة القبائل فى الجزائر وعدم اتخاذ اى قرار لردع المخطئين

رابع حاجة وكفاية كدة : تامر حسنى هياخد 80 مليون جنيه علشان يمثل مسلسل فى رمضان اللى جاى

التعليق : ربنا لا تؤاخذنا بما فعل السفهاء منا


18 comments:

قلــ"بـــلال"ــــــب فارس said...

يالله اخبار وتعليقات زى العسل
واحلى تعليق بتاع الحزب الوطنى
ولا بتاعت تامر حسنى
هههههههههههه
80 مليون
80 مليون دول ممكن يااكلوا محافظة بحالها

صيدلانيه طالعه نازله said...

و يتارى وزير التعليم بعد اجتماعه ما فاروق الباز حيعمل حاجه
ولاااااااااااااااا حاجه
كله كلام فى الهوا
الوزير عايز يلمع نفسه على قفا الدكتور فاروق مش اكتر

بالنسبه لمجمع الانتخابات الداخليه فما هو الا صوره مصغره لما سيحدث فى الفتره القادمه معاك كده لغايه اخر نوفمبر و عليك خير
و نشوف بقى كام واحد حيتقتل و لا يتخطف و لا تحصله فضيحه

بالنسبه للاهلى فحدث و لا حرج
الفريق فعلا حالته مزريه جدا و محتاج احلال لكل اللى فيه و تجديد كااااامل

اما تامر حسنى بقى فاحب اقول
رزق الهبل عالمجانين

سلام

شمس النهار said...

انتخابات المجمعات الانتخابيه بتاعت الحزب الوطني عرفت الناس مش اكتر مين اللي بيعمل بلطجه في الانتخابات
انقلب السحر علي الساحر
اما وزير التربيه والتعليم ملاحظه ان الرجل ماشي خطوه خطوه وخطوات مظبوطه وماننساش انه ماكملش سنه حتي
ومن بعد ما اصحاب الكتب الخارجيه شهروا بيه وبهدلوا الدنيا ورفعوا قضايا واعدوا يقولوا مظلومين ده مفتري اهو دفعوا حق الدولة وبقا كله تمام
مش دي اموال كانت ضايعه
والنهارده اقال مسؤلت الكتب الدراسيه بالوزارة
بس يارب يسيبوه في حاله
اما المدارس المتهالكه الزحمة دي مش هتيجي في يوم وليله دي لازم الحكومه مع رجال الاعمال مع المدارس الخاصه
ياريت يفرضوا علي المدارس الخاصه تصلح بعض من مدارس الحكومه
اما الكوره فاماليش فيها انت عارف
بس هي دي بلدنا الاهلي بقا عامل زي الحزب الوطني مكابره وخلاص
:)

tarek momen said...

الصديق فوكس الحكيم التلات اخبار الأولي.. ماشي الحال مش مستغرب
بس الخبر الأخير اللي شعرت بعد قراءته بامتعاض و قرف شديد الي حد الرغبة في القئ
ليس بسبب المبلغ فده برضه عادي في زمن السفه ولكن لان الشهر الفضيل بدء يرتبط بالأسفاف التليفزيوني الذي يتزايد عاما بعد عام لدرجة ان الواحد بيفكر يصوم شهر شعبان بدلا عنه
منهم لله هايكفرونا!!!!! تحياتي

Foxology said...

بلال

تخيل فعلا ان 80 مليون دى ممكن تعمل كام حاجة !! حاجات كتيرة جدااااا

عادى بأة مهو احنا بقينا فى آخر الزمان

شكرا لمرورك وتعليقك

Foxology said...

صيدلانية

الله اعلم طبعا اجتماعهم نتيجته كانت ايه لكن مظنش ان الدكتور الباز هيضيع وقته فى اجتماع لمجرد الكلام وده رأيى الشخصى طبعا

المجمعات الانتخابية بجد فضحت الحزب الحاكم فى صورة تصرفات أعضائه واهو كله ماكيت للبلد واللى ماسكينها


فريق الأهلى فعلا بيفكرنى بالحزب الوطنى :))

والله تمورة فعلا بأة شئ مستفز جدااا كفاية انه معملش اى حاجة كويسة ف حياته !!! ومع ذلك جوايز وتكريمات وفلوس وشهرة كلنا عارفين مين اللى وراها ومصلحتهم ايه

شكرا لمرورك وتعليقك

Foxology said...

شمس النهار

الناس عرفت واتأكدت وشافت بأم أعينها كمان بس السؤال بأة الناس البسيطة الفقراء لما ييجى حد يقوله هتاخد 50 جنيه وتنتخب فلان بتاع الحزب الوطنى هيقول لأ انا هانتخب فلان لأنه شريف ومحترم ؟؟؟؟ سياسة التجويع أتت بثمارها بعد 30 سنة من بداية تنفيذها


وزير التعليم فى الموضوع ده انا حاسس انه عاوز يعمل حاجة ايجابية فعلا ويخللى البلد تستفيد من خبرات العالم الكبير الدكتور الباز بس يارب يارب نعمل حاجة بأة ونستفيد من الناس دى يعنى مثلا الدكتور الباز اقترح ان الحكومة تعمل محور طولى يربط الاسكندرية بأسوان فى قلب الصحراء الغربية وبالطبع له تفريعات توصل جميع المحافظات اللى على ضفاف النيل بالمحور ده علشان طريق الصعيد اللى كله كوارث وبالطبع الاقتراح كالعادة هيترمى فى اقرب سلة مهملات

الكل مقتنع ان الاهلى زى الحزب الوطنى :))))

شكرا لمرورك وتعليقك

Foxology said...

tarek momen

والله يا استاذ طارق الحال من بعضه فعلا بقت حاجة سخيفة جدااااا خصوصا ان المصاريف على الحاجات دى بتوصل لحد المليار جنيه والعائد مفيش !!!

واهو كله ماشى بثقافة ادينى فى الهايف

شكرا لمرورك وتعليقك

AHMED SAMIR said...

يعني كله ضرب ضرب مفيش شتيمة؟؟
الأخبار تفتح النفس كلها على الصبح
بس للأسف هو دة واقعنا و لازم نرضى بيه
تحياتي

الازهرى said...

تعرب بما إنى عضو بارز فى الحزب اللى مش عارف مقره فين أساسا حتى هذه اللحظة ليلة الإنتخابات لقيت اكتر من واحد بيتصل بيا وبيقول الانتخابات بكره إن شاء الله وحضرتك تيجى تنتخب فلان وفلان اتفقنا وطبعا أقول بإذن الله وكان الله بالسر عليم

أما بخصوص الوزير فالخطوة كويسة وتطوير المنظومة التعليمية جزء منه تطوير المدارس مش المقررات والمناهج وبس
أما الأهلى فدا موضوع ولا أعرف فيه أى حاجة

Foxology said...

AHMED SAMIR

هههههههههههههههههههه

هنعمل ايه بس يا دكتور مهو مفيش اخبار صينى :)))

شكرا لمرورك وتعليقك

Foxology said...

الازهرى

انت عضو فى الحزب ده ؟؟؟؟؟ اوبااااا كدة هتخلينا نعيد نظر فيك :))))

الوزير بيتحرك بس المشكلة انه بيتحرك فى جميع الاتجاهات فى نفس الوقت يمكن علشان عارف انه مش قاعد كتير فبيحاول يعمل كل حاجة ممكنة

احسن حاجة ان ملكش فى الكورة دى وجع دماغ يا راجل :)

شكرا لمرورك وتعليقك

لورنس العرب said...

أولا: بالنسبه للحزب الوطني، انا انتظر بفارغ الصبر اعرف مين اللي هايترشح عشان انا نفسي يطيحوا بالاثنين اللي في الدائره عندنا هم والبلطجيه اللي توحشوا بعد ما مشيوا معاهم، وهنا انا بكلمك عن توحش البلطجيه أما الاعضاء أنفسهم فلك أن تتخيل

ثانيا: التعليم مش نافع ولا 100 سنه على ما هايتغير

ثالثا: لاعب كرة القدم لا يجيد ثقافة التصريحات لأنه غالبا خريج معهد تعاون او لا يكمل دراسه، ولكن انا عارف ان الاهلي كان وحش، ولكن ده مش مبرر ان الحكم يظلمه،لأن فيه مباريات بتفضل 90 دقيقه وبتخلص تعادل بدون اهداف وكانت المباراه دي ممكن تخرج كده، لكن احنا اتغلبنا واللي كان كان

وأخيرابالنسبه لتامر بيه حسني
مش بعلق عليه لأني مش عاوز اغلط

صوت من مصر said...

لما روحت للدكتور قالى كلمة فيها بعض من العلاج
متقراش اى اخبار وكانك مش من هنا
عشان القولون عندك عصبى وهتموت منه كل ما تقرى الاخبار وتتنرفز

Foxology said...

لورنس العرب

الحزب الوطنى بالبلطجية بتوعه دول اثبت فعلا اننا دولة بوليسية مهما انكر المنكرون المتنكرون

التعليم كالنظام عامة بحاجة لتدمير شامل ثم اعادة بناء

الاهلى وحش وحش وحش حتى لو كسب كل بطولات الدنيا وايا كان الظلم فده نتاج طبيعى للى كان بيحصل

تامر بك حسنى لا تعليق فعلا

شكرا لمرورك وتعليقك

Foxology said...

صوت من مصر

والله يا كيمو الحال من بعضه بس مش عارف اتعالج من موضوع الأخبار ده حاجة كدة ادمان زى تشجيع الزمالك :))

شكرا لمرورك وتعليقك

محمد الجرايحى said...

صور صادقة لواقع محزن ومخزى

Foxology said...

محمد الجرايحى

للأسف صور من الواقع وياريتها من الخيال كنا نقول خيال مؤلف

شكرا لمرورك وتعليقك