موال البـيات و النـوم

موال البيت والنوم رواية عظيمة لكاتب عظيم وهو الأستاذ خيرى شلبى الحائز على جائزة الدولة التقديرية فى الآداب بسبب هذه الرواية الضخمة

الأستاذ خيرى شلبى انا بعتبره كاتب من طراز خاص متخصص فى سرد حكايا المهمشين اللى بنقابلهم كتير جدااا فى حياتنا كل يوم مرة على الأقل لكن بعبقريته بيقدر يحكى لنا رواية ضخمة عن واحد من المهمشين دول نكتشف انهم لهم عوالم موازية تماما لعالمنا يمكن عوالم اضخم واعمق من عوالمنا كمان

رواية موال البيات والنوم رواية عبقرية بيقدر يصور فيها استاذ خيرى شلبى الأماكن والشخصيات كأنك شايفها بالظبط قدامك ومش بس كدة لا يخليك تحس احاسيس الأشخاص كمان خصوصا بطل الرواية اللى كل مأساته فى الحياة انه مشرد فى الأرض فى القاهرة الساهرة معندوش مكان يبات فيه ولا ينام فيه وكل مشكلته فى الحياة انه يلاقى مكان ينام فيه بعد ما اتحفظ شكله فى بوفيه محطة القاهرة ( رمسيس ) واماكن تانية كتيرة بيوت اصحاب ولوكاندات وغيرهم لغاية ما تكتشف فى الآخر انه كان مجرد حلم طويل جدااااا بيفتكر فيه البطل معاناته زمان قبل ما يتجوز ويستقر

الرواية بتدور احداثها فى القاهرة فى فترة الستينيات ايام الثورة الثقافية والأدبية لما كانت على اشدها وبترصد بشكل دقيق جداا الوسط الفنى والأدبى فى الفترة دى كان شكله ايه ومين ابطاله ( اسماء مستعارة طبعا ولمجرد الاشارة مش اكتر ) لكنها اوصاف تستحق التأمل فعلا

رواية كبيرة وضخمة قرأتها فى اكتر من شهرين بسبب شهر رمضان ومشاغل العمل لكن استمتعت بيها جداااا

6 comments:

خواطر شابة said...

ياريتك كنت حطيت لينك لها لنطلع عليها عموما سأحاول ان اجدها على النت هي او اي من اعماله الاخرى فقد شوقتني للقراءة لهذا الكاتب
دمت بكل الود

صيدلانيه طالعه نازله said...

انا من مريدين خيرى شلبى
قريتله نسف الادمغه و وكاله عطيه و صحراء المماليك و زهرا الخشخاش و صالح هيصه
بس الروايه دى حتى مش عندى
اخر حاجه جبتها اسطاسيه
هو كاتب رائع بيصور الحياه بدقه شديده
خصوصا المهمشين و بالادق اكتر محبى البانجو و الحشيش
هههههههههههههههههههههه
انا بعد نسف الادمغه قلت لاصحابى ممكن اديكم كورسات فى شرب البانجو

بس هو فعلا من الكتاب الرائعيييييين

Foxology said...

خواطر شابة

للأسف انا قراتها ككتاب ورقى ولو لقيت اى كتاب لخيرى شلبى هكتب اللينكات

شكرا لمرورك وتعليقك

Foxology said...

صيدلانية طالعة نازلة

وانا كذلك من مريديه

خيرى شلبى كاتب عبقرى بمعنى الكلمة بيقدر يوصل الاحساس نفسه مابالك بالشخصيات ؟؟؟

انا قرأت له نسف الأدمغة - وكالة عطية - صالح هيصة وكانت دى اول حاجة اقراها له - منامات عم احمد السماك صحراء المماليك بس مكملتهاش

شكرا لمرورك وتعليقك

شمس النهار said...

بنبسط لما حد يقرا حاجه وتعجبه ويحب يشاركنا فيها

ماقريتش كتير لخيري شلبي بس اللي قريته له خلاني اقول انه من احسن كتاب جيله

:)

Foxology said...

شمس النهار

خيرى شلبى كاتب جميل جدا الحقيقة اكتر ناس قريت لها كان هو وعم ابراهيم أصلان

شكرا لمرورك وتعليقك ونورتى الكيت كات