صباح الخير

الحقيقة انا مش عارف ابدأ منين الكلام عن الحالة ( المزرية ) اللى وصلنا فيها بعقولنا وافكارنا بسبب ( قرفى الشديد ) من اللى بيحصل

الناس مغيبة بفعل فاعل والفاعل معروف للجميع ولما الناس تعرفه بتمصمص شفايفها وتقول : هنعمل ايه ؟؟ ربنا ينتقم من الظالم والمفروض ان الظالم هو الفاعل اللى قلنا عليه لكن المفاجأة ان الظالم هما الناس اللى بتمصمص شفايفها

الأسبوع اللى فات كان معركة حامية الوطيس بين الأنبا بيشوى ومحمد سليم العوا بسبب غير مفهوم لحد دلوقتى ومحدش يقول لا السبب معروف وهو التصريحات المتبادلة ... مهو ده اللى الفاعل اللى بيفعل عاوزك تقتنع بيه يا سيدى لكن الحقيقة المرة ( غير الحقيقة المرة بتاعة ميلودى ) ان التصريحات دى اثبتت بالدليل القاطع اللى محدش يقدر ميشوفوش ولو كان أعمى ان فى كراهية متبادلة ملهاش حدود والتطرف موجود على المستوى الاكبر من مجرد مواطنين عاديين ووصل للكبار والقادة والموضوع هيموت علشان البابا ( تفضل مشكورا وبهدوء ) واعتذر علنا فى التلفزيون الرسمى للدولة عن تصريحات خليفته المنتظر ومظنش انه هينولها

وسط العك ده يا سادة يا مواطنين حصلت حاجات كتيرة اوى ومحدش خد باله منها الا اقل القليل ودى حاجات بسيطة منها

اولا : كيلو اللحمة وصل لــ 70 جنيه فى مناطق كتيرة عادية وفى المناطق الشعبية حد اقصى 65 جنيه وطبعا الحزن الوطنى عامل سرادقات بيبعو فيها اللحمة اللى الكيلو منها بـ 38 جنيه بس والله اعلم مصدرها ايه

ثانيا : من 3 ايام رحل عن العالم الاسلامى المفكر الكبير الدكتور محمد فتحى عثمان توفى ف امريكا بعد ما قضى فيها اكتر من 30 سنة بينشر الاسلام ( الصحيح ) وكان بيلقى محاضرات فى جامعات امريكا والعالم واتكرم فى معظم انحاء العالم ماعدا مصر طبعا
ثالثا : النهاردة توفى العالم الجليل الدكتور عبد الصبور شاهين المفكر الاسلامى ومفجر الثورات الفكرية الاسلامية الشهير وطبعا محدش عرف حاجة علشان كنا مشغولين بجنازة والد احمد السقا وجنازة والدة محمد فؤاد

رابعا : وزارة التضامن الاجتماعى بتجهز للخاذوق الكبير اللى هو كوبونات انابيب البوتاجاز وطبعا هيتطبق الكلام ده بعد انتخابات مجلس الشعب واللى محدش يعرفه لحد دلوقتى ان اللى هيصرف انابيب بوتاجاز بالسعر المدعم هما الناس اللى عندهم بطاقات تموين فقط يعنى تقريبا تلت اربع المواطنين هيشترو الأنبوبة بالسعر الرسمى اللى هو 42 جنيه



صباح الخير ... اوعوا تصحوا

15 comments:

MR.PRESIDENT said...

وطنٌ يُباعُ ويُشترى * وتصيحُ فليحيَ الوطنْ

لو كنتَ تبغي خيْرَهُ * لبذلتَ من دمِك الثمنْ

ولقمتَ تضْمِدُ جرحهُ * لو كنتَ من أهلِ الفطنْ

لكِنْ تَوَهَّمْتَ السَّقا * م فأسقمَ الوهْمُ البدنْ

وظننْتَ أنَّكَ قَدْ وَهَن * ت فَدَبَّ في العظم الوهنْ

سيروا فَسُنَّتكُمْ لخْي * ر بلادكُمْ خَيْرُ السُّنَنْ

شدُّوا المودَّة والتآَ * لف والتَّفاؤُلَ في قَرَنْ

لا خوْفَ إنْ قامَ البِنا * ء على الفضيلةِ وارتكنْ

ريْحانُهُ العِلمُ الصَّحي * ح وروُحهُ الخلْقُ الحسنْ

وطَني وإنَّ القَلْبَ يا * وَطني بِحبَّكَ مُرْتَهَنْ

لا يَطمَئِنَّ فَإنْ ظَفِرْ * ت بما يُريدُ لكَ اطمأنْ

نهر الحب said...

السلام عليكم ورحمة الله وبركاتة
كيف حالك اخى الفاضل
احنا نايمين بمزاجنا على فكرة هذا ما صنعناه بأيدينا وما قدرناه لانفسنا

فى كل ما قلت سواء من الاحتقان الطائفى

او من غلو الاسعار انت بتتكلم عن اللحمة طيب ما البسلة ب20 جم والطماطم ب10

او من وفاة العالمين الجليلين

وغيرهم الكثير من الامور والاشياء التى تعودنا السكوت عليها لصالح لقمة العيش اللى الناس مش لاقياها

والحياة الكريمة التى لا نعرف عنها شئ

اخى نحن ضحينا بكل شئ فى مقابل لاشئ
بوست يحرق الدم

نهر الحب said...

اقولك حاجة كمان من ضمن الطرائف لالهائنا عن الانتخابات ومحاولة تنويم الشعب اكتر ما هو شبوهات مقتل جمال عبد الناصر والقصة المزعومة على هيكل وكله كلام فى كلام الراجل لم يقل ذلك بس المشكلة ان الوقت محديش سأل مين قتل السادات ولا الشبهات تدور حول من ؟؟
كل ما يحاولوا يلهونا ينيلو الدنيا من حولينا

سورى على الاطاله لكن كله نوم فى نوم

Foxology said...

MR.PRESIDENT

سيدى الرئيس قلت فأوجزت

شكرا لمرورك وتعليقك

Foxology said...

نهر الحب

عليكم السلام ورحمة الله وبركاته

اهلا بيكى الحمد لله بخير

كلها عبارة عن جرعات من البنج طويل الأجل او قصيره حسب حالة البلد !!

المشكلة ان الناس خلاص ادمنت البنج ده ومش عاوزة حاجة غيره !!

ولو حد حاول يفهم حد تانى حقيقة اللى بيحصل يقوله يا عم خليها على الله هنعمل ايه يعنى ؟؟ الشعب مات والوطن اتصلب

شكرا لمرورك وتعليقك

خواطر شابة said...

قاسية جدا عبارة صباح الخير أوعو تصحوا لان معناها مخيف جدا
ربي يصلح الاحوال

Foxology said...

خواطر شابة

الخوف موجود ومن زمان لكن زادت حدته اليومين دول ومع ذلك الكل مترقب ومتربص ومحدش عاوز يبدأ وده الغريب

عادى

شكرا لمرورك وتعليقك

لورنس العرب said...

طبعا لازم ننشغل بوالده محمد فؤاد -رحمها الله- عارف ليه؟
عشان لما محمد فؤاد يغني اغنيه عن الام نفضل نقول طول عمرنا انه غى الاغنيه دي بعد ما امه ماتت
لكن الاسامي اللي انت ذكرتها لا اهميه لها عندنا

فلاشه اربعه جيجا said...

و الله انا ما عندى غير..ربنا يتولانا برحمته...اهم حاجة بس لازم نشتم فى بعضينا لما الاهلى يخسر...
و نقتل فى بعضينا لما واحد يغير دينه..

Foxology said...

لورنس العرب

طبعا طبعا يا باشمهندس علشان احنا بنطبق سياسة ادينى ف الهايف

عليه العوض فى الأدمغة

شكرا لمرورك وتعليقك

Foxology said...

فلاشة 4 جيجا

مهو ده اهم حاجة فى حياة اى مصرى لكن غير كدة يبقى ربنا يتولانا برحمته :)

شكرا لمرورك وتعليقك

Eno said...

هو انت ناقص فقعه كفاية عليك الهرتلة اللي انت عايش فيها ربنا يتولنا
اقصد ربنا يرضا عننا لاني من الوضح انه غضب منه علينا
الله لاتؤخذنا بما فعل السفهاء منا ياأرحم الارحمين

تحياتي

tarek momen said...

الصدبق فوكس الحكيم
ان مع العسر يسرا .ان مع العسر يسرا
صدق الله العظيم
تحياتي

Foxology said...

Eno

مهو الواحد مش ناقص يا اينو بس اهو بيتكلم ويقول اللى جواه على الأقل ميبقاش متغاظ وساكت :)

شكرا لمرورك وتعليقك

Foxology said...

tarek momen

استاذ طارق صدق الله العظيم اتمنى والله اليسر ييجى ونفوق شوية

شكرا لمرورك وتعليقك