هزة ارضية .. عقبال الهزة النفسية

النهاردة الساعة 6 ونص صباحا صحيت من النوم فجأة على اهتزاز السرير فقلت انى مهيس شوية من التعب وبحلم وبيتهيقلى ... لما الوضع ده طول قمت قعدت لقيت كل حاجة بترقص من حواليا .. عرفت انه زلزال مش حلم
بقالى كتير مش حسيت بهزات ارضية .. الهزة كانت خفيفة لكن قعدت كتير تقريبا نص دقيقة وده لوحده كفيل بأنه يخللى الواحد يقلق ويبقى مش مرتاح خصوصا وان العصافير والكلاب والقطط فى الشارع كان عندها حالة هياج عصبى غريبة وليه لأ مهو دول اللى ربنا اداهم خاصية الحاسة السادسة تخليهم يحسو بالحاجة قبل ما تحصل زى الزلازل كدة
كل اللى ف طلع ف بالى الدعاء عند المصائب .... اللهم حوالينا لا علينا يا رحيم .... دعيت لحد لما الزلزال خلص
فكرت بعدها ... الهزة دى مش احنا من جوانا كنا اولى بيها ؟؟ نفوق شوية من اللامبالاة اللى بنحس بيها ناحية بعضنا ... نفوق من الطمع والأستغلال ... نفوق من قلة الذوق وعدم الأحساس باللى حوالينا .. نفوق من السلبيات اللى غرقانين فيها لحد ودانا ... نفوق نفوق نفوق لقيت نفسى مش قادر افتكر اكتر من كدة ولو افتكرت هيجيلى احباط من حالنا واحنا لسه الصبح
اصبحنا واصبح الملك لله والحمد لله

10 comments:

Mafrousa said...

و الله عند حق يا فوكس
ياريت الهزه ديه تكون جوانا و تفوقنا
تخلينا نشوف الصح من الغلط
ربنا يحفظك و يحفظنا جميعا من الهزات الداخليه و الخارجيه القوية

Unknown said...

اول تعليق دة وللا انت عامل مودريشن؟
اكيد الهزات دى ربنا عملها عشان تهزنا من جوة يعنى مثلا كل واحد فينا يفكر لو كان مات فى الزلزال دة ممكن دة يفوقه شوية ويعمل له هزة جوانية بس تقول لمين يا ابنى انت لما تقول الكلام دة بتبقى كانك بتقيم الاذان فى مالطة بالظبط

Anonymous said...

هههههههههههههههههههههه

طب اقولك انا كمان حسيت بيه

المشكلة بئى ان محدش حس بيه غيري وانا اصلا عندي التهاب في وداني وبدوخ وبقع من طولي منها فافتكرتلك ان ده بسبب وداني وقولت لأ يانهار اسود انا لازم اكشف وخلاص هعيط وقعدت كده من السـاعة 6 لحد الساعة 10 لما روحت الكوري وقالولي كان في فعلاً زلزال

Foxology said...

واحدة مفروسة

يارب تكون جوانا بجد عشان نلحق نفسنا قبل الطوفان

ربنا يخليكى وميرسى على الدعوات الجميلة دى :)

نورتى الكيت كات :)

Foxology said...

Enji

لا مش اول تعليق :)

ايوة عامل مودريشين لزوم الأمن والحاجات دى :))

المفروض فعلا الهزات دى تهزنا من جوة علشان نفوق شوية

شكرا للمرور والتعليق :)

Foxology said...

نورة الخشن

فى ناس كتيرة حست وناس اكتر محستش بيه على فكرة لأنه كان وقت بداية النوم لكتير من المصريين اللى بيعشقو السهر فى الصيف والنوم وش الصبح :)

ممكن سؤال ؟؟

ايه الكورى ده ؟؟؟ معلش اصلى وقفت قدامها ومش فاهم معناها ولا عارف هل هى اختصار لجملة ولا ايه :)

نورتى الكيت كات :)

دعاء مواجهات said...

بجد واللهى لو كل واحد دور وبحث كويس

هيلاااقى انة محتاج الهزة دى اوى

وياسلااام لما نعملها احنا ومانستناهاش تيجى من براانا

تحياتى لكلمااتك

سلاااااااام

Foxology said...

دعاء مواجهات

اولا : حمد الله ع السلامة وتقبل الله ويارب متكونيش نسيتى الأمانة

ثانيا : ياريت فعلا اننا نعمل الهزة دى وتبقى من جوانا مش من برة

شكرا للمرور والتعليق :)

الميكروباص said...

ولله يا أخي انا ما حسيت بالموضوع ده لأني كنت في المواصلات اللي بتتهز توماتيكي
....
أما بالنسبة للهزه اللي انت تقصدها علينا
فأحب أقولك اننا مش بنفوق إلا لما تحصل كارثه من الحجم الكبير
عشان كده انا اعتقد أن آخر تغيير حصل لنا كمصريين كان بعد حرب 67

Foxology said...

لورنس العرب

فعلا دى كانت اخر مرة حسنا بتغيير لما اتهزينا جامد ساعتها شوفنا حاجات كتيرة مكناش شايفينها او خايفين نشوفها

نورتنى :)