ثلاثة ايام من العك

ايوة 3 ايام من العك والحاجات اللى تفقع وكانت كالتالى

السبت : صحيفة الأهرام العريقة سابقا العرجاء حاليا هاجمت ايران فى مقالة صغيرة جدا فى الصفحة الرئيسية قالت بالنص (حرية الأعلام على الطريقة الأيرانية ! احمدى نجاد يلغى اصدار جريدة موالية لمنافسه) يا سلام ؟؟؟؟؟؟ مش دى ايران اللى كنتى يا اهرام من مدة عمالة تشيدى بالعلاقات اللى بينا وبينها ؟؟؟ وبعدين كل ده علشان عملو الفيلم المسئ للرئيس الراحل انور السادات ؟؟
صحيح ... اللى اختشو ماتو !!! وبعدين يا اهرام اللى بيته من ازاز ميحدفش الناس بالطوب على الأقل لو الكلام صحيح والرئيس الأيرانى لغى اصدار الصحيفة الموالية لمنافسه اهون بكتير من انه يرمى منافسه فى السجن ولا ايه ؟؟؟؟؟


الأحد : الحكم ببراءة جميع المتهمين فى قضية غرق العبارة الشهيرة ( السلام 98) والحكم على القبطان بستة شهور حبس مع كفالة عشرة آلاف جنيه ... يا نور النبى !!!! بعد طول المدة دى والجلسات دى 1000 بنى آدم يروحو هدر كدة؟؟؟؟ القاضى اوكى ملوش غير الورق اللى قدامه اللى هو تقارير السلامة الفنية للعبارة وتصريح الأبحار والحاجات دى وطبعا الورق سليم ولا مش سليم الراجل القاضى ملوش فى الكلام ده وطبعا ممدوح اسماعيل وابنه الهربانين فى لندن من ساعة الحادثة خدو براءة هما وكل المسؤلين فى الشركة صاحبة العبارة واللى شال الليلة القبطان اللى طلع بالعبارة وهى حالتها زفت واتسبب ف غرقها مع انه اختفى منها لحظة الغرق والراجل يا عينى خد 6 شهور حبس وكفالة عشر تلاف جنيه يعنى عقوبة القتل الخطأ تقريبا لأنى معرفش فى القانون واحكامه ... لا بجد صعب عليا عاوزين نجيبله عيش وحلاوة ... العشر تلاف مش كتير واهو كل واحد غرق من الألف بنى آدم طلع تمنه عشرة جنيه

ابسط يا مواطن منك ليه ليها ... انت تمنك عشرة جنيه بحالهم ... عمار يا مصر


الأثنين : امبارح كان ماتش الأهلى والزمالك فى بطولة كأس السوبر المصرى لموسم 2007-2008 وانتهت المباراة بفوز الأهلى بهدفين مقابل لا شئ ... كل ده جميل ... كنت بتفرج على الماتش على القناة الفضائية علشان صورتها احسن وكدة من القناة التانية ومفيش اعلانات رخمة وسط الماتش ولا وقت بدايته كعادة التلفزيون المصرى ربنا ما يقطعلهم عادة ... الباشا المعلق اللى معرفش هو مين لحد دلوقتى قلب دماغى طول الشوط الأول بعبارات الشكر والمديح لقوات الشرطة والأمن المركزى اللى سهلو عملية دخول المتفرجين لمدرجات الأستاد !!! يا حلاوتك يا جمالك !!!! طب انت وبتدخل من البوابات المخصصة للأعلاميين والصحفيين يعنى من انضف اماكن فى الأستاد يبقى أمن مركزى ايه وشرطة ايه ؟؟؟ ادخل الماتش الجاى من بوابات الدرجة التالتة وانت تعرف يعنى ايه امن مركزى وشرطة ينظمو دخول استاد لما تاخدلك عصاية من مجند امن مركزى ولا رفسة من رجل حصان راكبه واحد من خيالة الشرطة هتعرف ان الله حق ... اللى زاد وغطى انه شكر السيد وزير الداخلية اكتر من مرة على حسن التنظيم وانه اشرف بنفسه على عملية الدخول !!! اه يا مرارتى ... يعنى السيد الوزير ساب كل اللى وراه وقعد بنفسه على باب الأستاد علشان يشرف على عملية الدخول !!! ايه يا جدعان اللى بيحصل فى التلفزيون ده ؟؟ ولا هى حركة مقصودة من المسؤلين على القناة الفضائية المصرية علشان الناس اللى برة تقولك اه الحكومة مظبطة الناس ومريحاهم ووزير الداخلية بنفسه هو اللى بيدخل الناس الأستاد ؟؟؟

اللى فقعنى اكتر من السيد المذيع ده النهاردة الصبح بأة بسمع نجوم اف ام وبرنامج عيش صباحك المذيع صبح على المصريين وكله تمام وراح مهنى النادى الأهلى وجماهيره بالفوز بتاع امبارح اوكى وماله وهوب اتقلبت النغمة وطلع كل الحب والتعصب للأهلى اللى جواه وفجأة اعلن عن اغنية مخصوص لتهنئة النادى الأهلى ... الأغنية طلعت بتاعة حمادة هلال ( والله وعملوها الرجالة ورفعو راس مصر بلدنا) اللى غناها مخصوص لمنتخب مصر لما فاز بكاس الأمم الأفريقية 2006 اللى اتعملت هنا فى مصر !!! كنت عاوز اتصل بيه اقوله انت عبيط ولا بتستعبط الناس ؟؟؟ دى اغنية اتغنت لمنتخب مصر وكلها عن مصر فجأة بأة النادى الأهلى هو مصر ؟؟ والأغنية اتذاعت تهنئة للنادى الأهلى على اساس انه فاز على زمالك تل ابيب مثلا ولا ايه ؟؟؟؟

انا خلاص استوييييييييييييييييييييييييت

19 comments:

Unknown said...

بالنسبة لجريدة الأهرام دي حاجة معادتش جديدة عليها جريدة وطنية تبع الحكومة يعني هتقول ايه غير كده..معلش مش تبع الحكومة تبع الديل الي حاكمنا الي هو تبع أمريكا..وحكاية العبارة والعشرة جنيه دي كانت متوقعة دي ناس واصلة قوي ولا حد يقدر يمسك عليهم حاجة لا ولبسوها للقبطان لما بيتكشف ورق الحرامي بيلبسها لإبنه..دول هما كبار بلدنا..على قلتك عمار يا مصر..لأا والله ده دمار يا مصر..
أما ماتش الأهلي والزمالك..أنا مليش ف الكورة ولا المعلقين..
كل ودي لكِ

Foxology said...

كاتب مصرى

على رأيك ... دمار يا مصر

شكرا للمرور والتعليق

tarek momen said...

لا تعليق
تحياتي

Unknown said...

لاتعليق

Che_wildwing said...

اهم حاجة يابرنس
ان الناس سابت العك ده كله وراحت برضه تتفرج على الاهلى والزمالك
ده لوكان في حد بيهتم بالعك اللى حصل اصلا
وربنا يخلى أوسنى راعى الرياضة والرياضيين

Foxology said...

Tarek Momen & Enji

فعلا لا تعليق

شكرا للمرور والتعليق :)

Foxology said...

Che_Wilding

مظبوط يا برنس

هو ده اللى احنا فالحين فيه نتنطط ونهيص لما الكورة تدخل جون ولا يتحركلنا جفن لما تحصلنا مصيبة

شكرا للمرور والتعليق :)

Mafrousa said...

لألألألأ انا كده ازعل منك يا فوكس إيه استويت ديه
لازم تقول اتفرست زي اختك مفروسة\اللى فاضلها فرسة و تودع

و أوأكدلك ان الناس اللى كانت متغاظه من الحكم هيه هيه الناس اللى كانت بتتفرج على الماتش و بتهتف
ده احنا شعب لذيذ
سلااااام

tarek momen said...

لك سؤال عندي رجاء المرور للاجابة
تحياتي

Eno said...

يالهووووووووي البلد مش بقي فيها حاجه واحده توحد ربنا وتفتح النفس

ربنا يتولنا برحمته :(

معلش يافوكس ان الله مع الصابرين
وزي مابتقول ياصابر الصبر صبرنا صبر المتصبرين :))

تحياتي

Foxology said...

واحدة مفروسة

على رأيك انا اتفرست وخلاص اترفست من البلد اللذيذة دى

احنا شعب عنده انفصام وربنا عايشين بشخصيتين

ربنا يتولانا برحمته

شكرا للمرور والتعليق :)

Foxology said...

طارق مؤمن

انا جاوبت امبارح يا استاذ طارق فى البوست قبل الأخيرة فى البلوج عند حضرتك :)

Foxology said...

اينو

على رأيك يا صابر الصبر صبرنا صبر المتصبرين

والصبر مفتاح ايه ؟؟ ايوة برافو عليكى .. مفتاح 13 :))


نورتينى :)

شـمو نشـادر said...

يبقى انت اكيد اكيد فى مصر ..

ربنا ع الظالم ..

تحياتى ..

Foxology said...

شمو نشادر

فعلا .. يبقى انت اكيد اكيد فى مصر

شكرا للمرور والتعليق :)

Heba said...

عظيمه يا مصر
ومفروض ميبقوش تلات تيام ده مفروض يبقو 365 يوم

Foxology said...

heba

لا دول 3 ايام بس بقيت السنة بيحصل عك برضه مختلف حبتين

شكرا للمرور والتعليق :)

آه وكفى said...

اهلان يا استاذنا انا لسه مش فريت البوست بصراحة بس كنت جاية اقول لحضرتك لك عندي تاج خده لو حابب ولو مر عليك خلاص متجوبوش كمان لو مش عايز مش مشكلة مافيهاش زعل اطلاقاً

تحياتي

Foxology said...

نورة الخشن

اهلا بيكى نورة .. اوكى هعدى اشوف التاج شكرا مقدما :)