حريقة

تـحـديــث


الصورة دى اتنشرت فى الأهرام النهاردة الصبح والحقيقة انا شايف انها صورة كوميدية جداااااااااا تعبر عن الواقع بشكل ملفت للنظر

السيد رئيس الجمهورية يتابع باهتمام (لاحظ حركة تشبيك الأصابع المشهور بها السيد الرئيس عند الأستماع لشئ هام من احد المسؤلين) والأهتمام البالغ الواضح من السيد الرئيس

السيد حبيب العادلى وزير الداخلية ونظرة بعيدة تماما عن الموضع الذى ينظر اليه السيد الرئيس وشبح ابتسامة مجهولة النوع واضحة على وجه السيد الوزير

السيد صفوت الشريف رئيس مجلس الشورى وشرح مكثف للسيد الرئيس وعدم نسيان المنصب القدبم ( وزير الأعلام طبعا) ومحاولة الأستعانة بالأيدى لأيصال المعنى

السيد احمد فتحى سرور رئيس مجلس الشعب ونظرة بعيدة تماما عن الموضع الذى ينظر اليه السيد الرئيس عكس اتجاه نظرة السيد وزير الداخلية وتجهم واضح على الوجه بدون سبب

السيد احمد نظيف رئيس الوزراء بعيدا عن الموكب بقليل ونظرة بقرف الى الموضع الذى ينظر اليه السيد الرئيس دون ابداء اسباب

السيد فاروق حسنى وزير الثقافة (ايه دخله فى الموضوع معرفش) واقف فى الخلفية بيبص على حتى تانية خالص وواضح عليه التأثر

السيد الضخم الجثة ( اعتقد انه من الحرس الشخصى للرئيس) ونظرة متجمهة للكاميرا بدون اسباب ايضا

تفتكرو فيه علاقة بين الصورة وبين الأشخاص اللى فيها وحالة البلد ؟؟؟؟




عن حريق مجلس الشورى اتكلم


زى ما اتعودت ويمكن لاحظتو كدة انى مبتكلمش عن اى حاجة تحصل فى البلد غير لما الهوجة تعدى علشان اقدر الم كل الخيوط واقدر افكر كويس فى اللى حصل ونتايجه ايه وابدأ بعدها اقولكم رأيى واعرف رأيكم


حريق مجلس الشورى زى ما عرفنا انه اكل الدور التالت بالكامل وانهار الدور بالكامل فعلا وانا كنت معدى من هناك امبارح بليل وشوفت حجم الكارثة .. ايوة يا جماعة كارثة .. لما مبنى أثرى زى ده معليهوش اى تأمين من اى نوع ويتعمل فيه صيانة يعنى مواد كيماوية يعنى مواد سريعة الأشتعال والنار تمسك فيه من العصر لحد تانى يوم يبقى كارثة


بيقولو ان الدور ده فيه لجان معرفش ايه وايه وكلها اوراق عادية وكدة طيب لما الأوراق اتحرقت والمكاتب ولعت امال صيانة ايه اللى شغالة ؟؟؟ اللى اعرفه ان لما بيكون فى صيانة المكاتب والأوراق بتتنقل مكان تانى ولا ايه ؟؟؟؟؟؟ مش شايفين ان الموضوع فيه طرمخة ؟؟؟


وبعدين بفرض الشبهة الجنائية يبقى اكيد الحريقة دى الغرض منها التخلص من اوراق مهمة فى تاريخ البلد اوراق تمس البلد وشعبه ولا ايه ؟؟؟ وبغرض الشبهة السياسية يبقى الحريقة دى الغرض منها كالعادة صرف نظرنا عن مصيبة اكبر حصلت او هتحصل ولا ايه ؟؟؟؟


اللى فقعنى الحقيقة تصريحات السادة الوزراء .. اللى يقولك ان اللى حصل ده يعلمنا اننا نأمن على المبانى الأثرية الحكومية وغير الحكومية بالتعاون مع الهيئة القابضة للتأمين علشان ميحصلش حاجة زى دى واللى يقولك الحمد لله عرش الملك فاروق بخير واللى يقولك يا خسارة المبنى الأثرى التاريخى لكن طبعا سيادة الرئيس اصدر التعليمات الفورية باعادة بناء المبنى على نفقة الدولة .. يا حلولى .. يعنى بتاع 100 مليون على الأقل من جيب الحكومة اللى اساسا جيبها مخروم يعنى يا سادة توقعو ضرايب جديدة وتبرع اخى المواطن ولو بجنيه لأعادة بناء مجلس الشورى


من الآخر .. المبنى راح بتاريخه وأثريته والأوراق المهمة فى تاريخ البلد راحت والكل نايم فى البتنجان المعسل بعسل اسود علشان البشوات مش واخدين بالهم ان مبانى زى دى لازم يكون عليها تأمين


واوعى تنسى اخى المواطن تتبرع ولو بجنيه علشان نبنى المبنى من جديد

22 comments:

tarek momen said...

يوجد اصطلاح عسكري اسمه الأرض المحروقة
اظن ان معناه انه اذا فرض علي الجنود ان ينسحبوا من ارض فيجب الا يتركوا عليها اي شئ يستفيد منه الأعداء فيقوموا بتدمير و احراق المنشات و المزروعات وكل ما لا يمكن اخذه اثناء الأنسحاب
المهم يبدوا ان الحكومة بدات في اتباع اسلوب الأرض المحروقة و هذا يبشر بقرب انسحابها ان شاء الله

Foxology said...

tarek momen

الحكومة تنسحب على فين يا استاذ طارق ؟؟؟ دول ورانا ورانا تحت وفوق زى اللزقة الأنجليزى كدة بعيد عنك

نورتتنى :)

شمس النهار said...

الصوره مش محتاجه تعليق خالص بس فاروق حسني مغموم لآنه الوحيد في الصوره دي اللي عارف فداحت الجرم اللي حصل وشكله واقف قرفان منهم وبالنسبه للتأمين التأمين هيصلح مش هيرجع وتفرق كتير الآولي ان كان يعلج المبني ضد الحريق

Foxology said...

شمس النهار

فعلا الصورة تتحدث عن نفسها :))

يمكن فاروق حسنى حاسس بالجرم بس الله اعلم بحاله بأة انا عن نفسى مبحبوش الحقيقة

شكرا للمرور والتعليق :)

شمس النهار said...

مش مهم انك تحبه بس الرجل ده عمل حاجات كتير من موقعه كان في اثار كتير اسلاميه الناس مستوليه عليها ده غير المتبهدله اصلا ودي تعتبر ثروه كبيره هو اعاد ترميم هذه الاثار يعني حط ايده في شق التعبان للآن كان في ناس عامله الاثار دي مخازن وورش واوكار انا شفت الآثار دي قبل وبعدالترميم فرق كبير وده لآنه عارف قيمتها كويس هو بقه كويس وحش لنفسه المهم ان اخيرا جه وزير يهتم بالكنوز دي وينتشلها من الوحل وده لآنه اول فنان يمسك الوزاره دي وايام ماكان طالب في الفنون اكيد كان زعلان عليها واول ماجتله الفرصه صلحها انا مش بدافع عنه بس انا كل ما بشوف اثر اتصلح بفرح قوي

Foxology said...

شمس النهار

وجهة نظر لا املك الا احترامها :)

انا موافق على موضوع الآثار ده لكن انا قصدت ان لله فى لله كدة مفيش راحة بينى وبينه :)

شكرا للمرور والتعليق :)

شمس النهار said...

هو فعلا شكله مش مريح
بس احنا مش هنسبه وماتنساش ان القيادات بيتحسبوا بالانجازات اللي عملوها فقط

Foxology said...

شمس النهار

متفق معاكى تماما فى ان اى مسؤل بيتحاسب ويتقيم حسب اعماله وانجازاته

شكرا للمداخلات الجميلة دى :)

Eno said...

عاااااااااااااادي

اهو ربنا بيخلص زمب العباره والكام قطر والكام طايره والكام اتوبيس والكام ميكروباص اللي ولعو في الفتره اللي فاتت

انا عن نفسي مش هتبرع :))

Foxology said...

eno

على رأيك ... عاااااااااادى :)

ولا انا كمان هتبرع انا عندى حاجات اهم اصرف فيها الفلوس (وش بيغمز) واخدة بالك ؟؟

نورتى الكيت كات :)

لورنس العرب said...

ده عبارة عن شو اعلامي ليبين أن السيد الرئيس مهتم بالأمر جيدا
والنتيجة أن ولله الحمد عندنا محمد فريد خميس تبرع بمبلغ 10 مليون جنيه من أجل اعادة بناء المجلس
هذا في الوقت اللي بيعطي فيه مدير المصبغه في شركته 700 جنيهة بعد شغل 4 سنين
لكنا لملفت للنظر في الموضوع هو أن الناس فرحانه جدا فيهم
وقالوا ياريت كان يبقى مجلس الشعب والاعضاء جواه

Foxology said...

لورنس العرب

حدوتة محمد فريد خميس زى بالظبط اللى بينقط العمدة فى جواز ابنه او بنته ولا ايه ؟؟؟؟؟؟ الحدق يفهم طبعا

الناس فعلا فرحانة يا باشمهندس وكان نفسها الحريق يبقى اكبر من كدة وياخد فى طريقه اكتر من مجلس الشورى لكن ارادة ربنا فوق اى شئ

نورت الكيت كات :)

محمد الكومي said...

خسارة اعضاء المجلس ماكانوش موجودين

Foxology said...

محمد الكومى

فعلا خسارة بس عادى مكنتش هتفرق كتير الوجود زى العدم فى الحالات دى ولا ايه يا عم مجاهد ؟؟؟

نورت الكيت كات :)

appy said...

ههههههههههههههههه لا تعليق الصورة مسخره بس انت على فكره ظلمت اونكل عدلى يا راجل ده كان بيأمن الموكب انت مش واخد بالك

Foxology said...

appy

ههههههههههههههههههههههههههه

حلو موضوع تأمين الموكب ده مخدتش بالى الحقيقة

شكرا للمرور والتعليق لأول مرة فى الكيت كات :)

شمس النهار said...

كل سنه وانت طيب
انت فين مش باين لعله خير
رمضان كريم

Abu Shahin said...

هى حاجة تفقع فعلا
والحريق ده وضخ قد ايه الحكومة فاشلة حتى فى السيطرة على حريق واللى اكيد اول ماابتدى كان متر ف متر ماكانش بالفظاعة اللى كانت عليه بعد ما النار اكلت المبنى كله

لا والدور والباقى على رجل الاطفاء اللى فقد ومالقوش جثته يا عينى الا بعد حوالى اسبوع

حاجة تفقع فعلا

دعاء مواجهات said...

ازيك ياعمنا

داخل انت شمال اوى كدة لية

دا الناس مصدومة ياعينى

م الى جرى لواحد من اهم املاكهم

والدهشة فى عيونهم وبراءة الاطفال

المتشردين عليهم ايضا

وبعدين انت مسمعتش عن الجديد بقى

بيقولك رجال الاعمال اتكاتفول وقرروا يعيدوا بناؤة على نفقتهم الخاصة

اللى هى نفقة الشعب يعنى

منورنى ديما

كل سنة وانت طيب


بيس

Foxology said...

شمس النهار

وانتى طيبة المانع هقوله فى البوست اللى جاى ان شاء الله :)

شكرا للمرور :)

Foxology said...

ابو شاهين

والله عندك حق الحريق ده كان الفشل بعينه مش فاهم انا الحكومة مش حاسة انها فاشلة لحد دلوقتى ولا ايه ؟؟

للفقيد الرحمة ولأهله الصبر

شكرا للمرور اول مرة والتعليق :)

Foxology said...

دعاء مواجهات

نفس الكلام قولته لواحد صاحبى لما قال موضوع رجال الأعمال ده وقلت كمان انه مش بس من فلوسنا لا ده زى النقوط كدة للحكومة وكله تساهيل بتساهيل والنهاردة عندك بكرة عندى ولا ايه ؟؟؟؟؟

شكرا للمرور والتعليق وكل رمضان وكلنا بخير :)