تــــــــــــاج

وصلنى تاج واجب التنفيذ من العزيزة ايــنــو وهو كالتالى
بدأت تدون امتي ودخلت العالم ده ازاي ؟؟
بدأت التدوين من حوالى سنتين وكان ليا مدونة على احد المواقع العربية لكن الحمد لله كانت فاشلة تماما محدش كان بيعجبه اللى بكتبه لأنى كنت بكتب حاجة شبه الخواطر كدة اى حاجة تيجى على بالى وبعدين قفلتها بالضبة والمفتاح ونسيتها تماما
جيت بأة فتحت مدونة الكيت كات فى شهر مارس السنة اللى فاتت وكنت بكتب وبكتب وكان ليا زوار كتير الحقيقة اولهم طبعا اينو اللى دخلت عالم التدوين عن طريقى لكن جت فترة قفلت المدونة وبعد شوية فتحتها تانى واهى قدامكو لكن دخلت العالم ده من حوالى سنتين لما سمعت عن موضوع المدونات عملت بحث وقريت كتير وعلقت كتير الى يومنا هذا
كان انطباعك ايه في البدايه ؟؟
كان عالم جديد بالنسبة لى حاجة كدة فيها مساحة حرية مش متعود عليها مجتمع جديد ليه مقومات جديدة لكن اتعودت عليه بسرعة وخصوصا وانى طول عمرى نفسى اكتب اللى جوايا والناس تقراه وتقولى رأيها ايه
مين اكتر واحد بتهتم بتعليقه علي بوستك الجديد ؟؟
اكيد طبعا زوجتى العزيزة اينو يهمنى اعرف رأيها خصوصا وانى بكتب من غير ما اقول انى هكتب واسيبها تقرا براحتها وتعلق براحتها
ايه اهم حاجه اتعلمتها من عالم التدوين ؟؟
اهم حاجة اتعملتها انى اقول اللى جوايا زى ماهو من غير مونتاج وانى مخافش من كلامى ولا من تعليقى فى مدونة تانية
ايه اكتر حاجه كرهتها ؟؟
اكتر حاجة كرهتها هو الأقنعة اللى ساعات بنلبسها واحنا على الأنترنت ليه مش عارف
حاسس انه التدوين له تأثير ؟؟
اكيد طبعا كفاية ان الواحد بيلاقى مكان يقول فيه اللى هو عاوزه وبيلاقى ناس ترد عليه وتقول رأيها
تهدي التاج ده لمين ؟؟
اهديه للناس اللى بحبهم وبيحبو يزورو الكيت كات اى حد يحب ياخد التاج حلال عليه

20 comments:

Eno said...

ايه الاجابات السرعيه والدقيقه دي يافوكس بشكرك علي قبولك للدعوه
وعلي الكلام الجميل ده اللي في حاجات اول مره اعرفها عنك وش بيغمز

Foxology said...

طبعا طبعا طالما التاج جاى من عندك يا اينو يبقى واجب التنفيذ وبسرعة كمان :)

هى مش كانت حاجات مستخبية يعنى كانت عادى وش بيغمز برضه

نورتينى :)

Alkomi said...

واضح طبعا انك بتكتب من غير ماتقولها حتى بالامارة دايما هي اول واحدة تعلق

هههههههههههههههههههههه


عموما يا شيخ حسني

التدوين ده عامل زي الفيسبا المفروض استخدامها يكون مسافات قصيرة

لو سافرنا بيها الموتور يولع

Alkomi said...

اه صحيح

اسمحلي

اخص عليك يا شيخ حسني

مابتستناش تعليق الشيخ مجاهد

ماكانش العشم

شمس النهار said...

لطيف قوي التاج ده
بعد ازنك عيزاك تبص علي المدونه دي
ay7aga16
وشكرا

Unknown said...

يوم لما شفت تعليقك في مدونتي فرحت جدا انك استجبتي لدعوتس أو عجبك شيء في المدونة وفرحت أكتر عشان هأكتسب قارئ جديد ومعلق على كتاباتي بس مش عارف انقطعت ليه مع اني بأنتظر تعليقاتك باستمرار ممكن أعرف السبب ولو مكانش فيه غير السهو والنسيان يبقى مدونتي مازالت تنتظرك..
كل ودي

Foxology said...

محمد الكومى

هههههههههههههههههههههههههههه

مش كدة ؟؟ باين طبعا :))

بستنى كل التعليقات والله يا عم مجاهد بس انت فاهم بأة دى الحكومة برضه :))

نورتنى يا عم مجاهد :)

Foxology said...

شمس النهار

حاضر هبص على المدونة وشكرا للمرور والتعليق :)

Foxology said...

كاتب مصرى

انا بتابع والله يمكن مش بسيب تعليق ودى عادة فيا انى كتير ادخل المدونة واتابع لكن مسيبش تعليق خصوصا لو ان كلامى هو نفس كلام الناس اللى عقلت قبلى يعنى مش هقول جديد

تحياتى ونورت الكيت كات وكل سنة وانت طيب :)

Anonymous said...

اللى فى نفسي
ان ربنا يخليلك اينو يارب ويسعدكم
تحياتى لكم

شمس النهار said...

امبسط انك دخلت مدونة البنوته الصغيره
بس اتصدمت من ردك
انا كنت عيزاك ترد علي مشكلتها لآني وجدتك انسان رزين في ردودك والبنت دي محتاجه ان احنا نقف جنبها ونصحح مفاهمهاللحياه
البنت دي ممكن تضيع
او اقل تقدير تتحول الي انسان بلا مشاعر حقيقيه
لازم تتوجه

shirry said...

حلو الكلام دا ومنطقي كدة ومترتب
علي فكرة انا برضو كنت كدة واحلي حاجة في التدوين انه بيمكنك من انك نتفس عن اللي جواك بشكل محترم برضو ومشاركات من ناس يمكن مفيش بينكم اي حاحجة مشتركة غير التدوين

بالتوفيق

Foxology said...

بنوتة مصرية

شكرا ليكى بجد ونورتى الكيت كات :)

Foxology said...

شمس النهار

انا تعمدت ان ردى يكون مختلف ويكون فيه جزء عقلانى شوية بمعنى انى قصدت انها تشوف قد ما خسرت هى كسبت ايه ؟؟؟ مفيش حد بيخسر كل حاجة ومفيش حد بيكسب كل حاجة مش كدة ؟ :)

يمكن ردى كان غير متوقع فى حاجة زى دى لكن برضه انا مش شايف كل حاجة علشان احكم واوجه كل اللى قدرت اقوله قلته بمنتهى الأمانة :)

تحياتى :)

Foxology said...

shirry

شكرا لمرورك والتعليق وفعلا التدوين لازم يكون بأمانة وان الواحد يقول اللى جواع زى ما هو كدة :)

شكرا للمرور مرة تانية :)

شمس النهار said...

انا اسفه علي العتاب
بس انا فعلا خايفه عليها
لان ده سن خطر
وسن تشكيل المشاعر
ماتتصورش انا كنت خايفه عليها ازاي ومن الكلام اللي هي كتباه
بنت في سن الزهور يكون هي دي فكرتها عن الحب مشوهه كده
هجر وزل ومرمته علي حد قولها
بس انا بشكرك علي اهتمامك

Foxology said...

شمس النهار

مفيش داعى للأسف انا مقدر شعورك ناحيتها وعندك حق فى كلامك لكن ساعات لازم الواحد يبقى كلامه ناشف شوية ميبقاش كل كلامه مواساة وخلاص :)

نورتى الكيت كات وسعيد بآرائك :)

كـــيــــــــارا said...

اجات جميييييييييييله جدا

احلي حاجه انك سيبت التاج مفتوح اي حد عاوزه ياخده

Foxology said...

كيارا

شكرا لتعليقك :)

التاج سبته مفتوح لأى حد علشان حرية الأختيار الواحد يختار اللى هو عاوزه لأن الأختيار نعمة وقد ماهو نعمة يعتبر مسؤلية كبيرة :)

Beram ElMasry said...

ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف المسار