حقن البنج الميرى

اتعودنا على حقن البنج الميرى اللى بنتحقن بيها كل لما تحصل مصيبة ولا كارثة علشان مناخدش بالنا من اللى بيحصل وطبعا معظمنا عارف الموضوع ده وبأة بيشيل ايده أو دماغه على الأصح قبل ما تدب الحقنة فيهم
فضيحة الدويقة .. مش بحب اسميها كارثة لأنها فضيحة وجرسة كمان قدام العالم كشفت فسادنا وخيبتنا وجهلنا وعجزنا عن اى حاجة ... وقتها طلعت حقنة البنج المعتادة اللى هى ماتش الأهلى والزمالك وبقت حدوتة على كل لسان مين اللى هيفوز ؟ انا وكتير من الناس العاقلة اللى بطلت تسيب دماغها لحقن البنج الميرى دى توقعت التعادل وكنت متأكد منه كمان علشان الناس تتلهى وتقولك شوف الأهلى كان سايب الماتش ازاى ومش عاوز يكسب ولا شوف الزمالك الخايب اللى مقدرش يستغل الفرصة ويكسب الأهلى ولو لمرة واحدة ... احنا اللى خايبين مش الزمالك بس على فكرة
كمية المسلسلات التلفزيونية والأذاعية طول شهر رمضان ... دى بعتبرها مستودع بنج بحاله مش حقنة واحدة بس حاجة كدة بتخلى الواحد مش عارف راسه من رجليه ... مفيش وقت حتى تنام علشان لو نمت هيفوتك المسلسل الفلانى او المسلسل العلانى او البرنامج اللى معرفش ايه ولو نمت وحملت الحلقة من على النت تانى يوم هتقعد برضه تتفرج عليها وتسيب شغلك او دراستك ده بفرض ان فيه دراسة فى ايام رمضان من الأساس ومش قصدى السنة دى انا بتكلم عموما وبكدة تبقى قضيت رمضان كله فى الفرجة على الناس وسايب الشياطين تتفرج على خيبتك وانت بتضيع فرصة سنوية للرحمة والمغفرة
اتفرج كمان وكمان وسيبك من الحاجة اللى غليت مرة واتنين من اول شهر رمضان من اول السلع الغذائية لمواد التنظيف والصابون للملابس للأجهزة الكهربائية وسلملى على حديد عز اللى بيعمل مسابقة اللى يفوز بيها يكسب شقة والله اعلم مكانها فين بس اعتقد انها على حدودنا مع السودان او ليبيا واحتمال تكون لسه بتتبنى اصلا
اه يابلد السكن فيكى بمسابقة

12 comments:

Alkomi said...

بص بقى

انت جيت عالجرح

المسلسلات دي عبارة عن شلل عرض مستمر

انا كتبت عن الموضوع ده قبل كدة في مدونة ملك الكبدة باسم ده فن ولا ايه

حاجة تفقع المرارة و الله

Foxology said...

محمد الكومى

هى فعلا جروح يا عم مجاهد وعشان كدة بناخد حقن بنج ميرى مركزة كمان علشان منحسش بحاجة

نورتنى يا عم مجاهد ورمضان كريم :)

Unknown said...

تصدق المرارة مبقتش مستحملة اى مسلسلات ولا اى برامج ولا اى مسابقات.. كفاية المسلسل اللى احنا عايشينه عرض مستمر من غير فواصل هى ناقصة

Foxology said...

enjy

والله المرارة فعلا خلاص استوت وبقت قد الكورة الكافر

يلا الحمد لله وعليه العوض بأة

شكرا للمرور والتعليق

Eno said...

عندك حق يافوكس والله هي بجد فضيحه وعشان يلموها قال احنا عملنا في اعتبرنا نجهز معدات لمثل تلك الكوارث وعملنا في اعتبرنا اننا نخلي الاماكن العشوئيه وعملنا في اعتبرنا نطلع الخبرا الجولوجين بتعنا عشان نشوف مين عليه الدور في الجبل

وهما مش بيعملو في اعتبرهم غير لما تحصل فضيحه علي رئيك لازم نفوق علي كابوس لكن قبل كده نايمين في بيررر :(
حسبي الله ونعم الوكيل

بالنسبه للمسلسلات صدقت لما قولت عليها بنج بس الحمد لله انا قدرت احمي نفسي من شره
ربنا يعافينا كلنا يااااااااارب

تحياتي :)

Foxology said...

eno

انا كمان حطيت فى اعتبارى انى لو لم اكن مصريا كان يبقى قشطة جدا :))

الحمد لله انا كمان خفيت من البنج بتاع المسلسلات وبقيت اتحكم فى اللى انا عاوز اشوفه واتفرج عليه بعد رمضان علشان رمضان للعبادة وبس :)

نورتى الكيت كات :)

Unknown said...

للاسف جروح الناس فى مصر كتيرة
ومش لها دواء ولا مسكن ولا حتى حقن البينج الميرى
اما عن المسلسلات
فانا مش متابعة
تحياتى

شمس النهار said...

عرف ايه المشكله
ان اغلب الناس عارفين الكلام ده
ومافيش فايده كأنهم بياخدوا البنج وهمه عارفين
يعني بمزاجهم
اهو بيتخدروا وبيهربوا من الواقع مش عايزين يحسوا
والايتفاعلوا مع المشاكل
احساس بالياس فظيع
بيدوا الحكومه دراعهم عشان تحقنهم بالبنج بسرعه قبل مايفوقوا

Foxology said...

نهر الحب

الجروح فعلا كترت وزى ما قال منير... قلب الوطن مجروح لا يحتمل اكتر

شكرا للمرور والتعليق :)

Foxology said...

شمس النهار

هى دى الكارثة ان الناس عارفة ان الحاجات دى بنج علشان يتخدرو وبرضه راضيين موافقين حاجة عجيبة والله

شكرا للمرور والتعليق :)

بنت بني النجار said...

دي مش حقن بنج
دي سموم بطيئة
و هتيجي في يوم تدمر الي مش واخد باله
خد بالك بقى يا عالم...

موضوع جامد جدا

Foxology said...

حبيبة بنت بنى النجار

هى فعلا مدمرة لحد كبير وخطير لكن اللى ياخد باله يبقى بطل

نورتى الكيت كات :)