من يوم الأربعاء الماضى 21 يناير 2009 م ويقام معرض القاهرة الدولى للكتاب الدورة رقم 41 وضيف شرف المملكة المتحدة
المعرض السنة دى والحق يقال شيك جدا وواضح الموضوع ده من الديكورات والتنظيم والدعاية وحتى الخدمات اللى بتتقدم للزوار من اول التذكرة الشيك صاحبة التصميم المحترم اللى بيليق بحدث ثقافى هام بالحجم ده .. للناس اللى متعرفش ان معرض القاهرة الدولى للكتاب هو ثانى اهم معرض دولى للكتاب على مستوى العالم بعد معرض فرانكفورت الدولى ... نرجع للتنظيم والخدمات اللى بتتقدم للزوار وبعد موضوع التذكرة موضوع الخرائط التوضيحية للمعرض فيها كل حاجة من قاعات العرض لقاعات البيع لأماكن العبادة لدورات المياة لأماكن الطعام كمان اللى السنة دى تعتبر محترمة بحكم استئجار مطاعم شهيرة لأماكن الطعام دى وتقديم الوجبات الساخنة طول اليوم للزوار
الحضور العالمى كثيف وكفاية ان ضيف شرف المعرض هى المملكة المتحدة واحنا عارفين يعنى ايه المملكة المتحدة .. ثقافة .. باع طويل فى فنون الأدب والفن
الحضور الوطنى كثيف برضه وبالرغم من ان لسه فى امتحانات لكن الزحام كبير كعادة معرض الكتاب ... حاجة تفرح ان الناس لسه بتشترى كتب وتقرأ
فى البوستات الجاية هحاول اجيب صور من جوة المعرض ونتكلم عن قاعات العرض والندوات الفنية والثقافية
وده رابط لموقع المعرض على الأنترنت
http://www.cairoibf.org/
22 comments:
شوقتني ليه جدا يا فوكس ان شاء الله الاسبوع الجاي بالكتير هروحه :)
تحياتي لموضوعك الجميل
دمت بخير :)
Eno
هو فعلا يشوق ان الواحد يروحه اكتر من مرة
شكرا لمرورك وتعليقك يا اينو
دومتى بالزيتون :))
تحياتى :)
حدث ثقافى هام هذا المعرض
يعرض فيه ما لذ وطاب من غذاء العقل
تحياتى
نفسي فعلا ازوره وكلامك خلاني نفسي اكتر يارب اقدر ازوره
ولله انا كنت ضيف دائم للمعرض وكل سنه كنت بروحه، لكن زهئت من آخر دورتين لأن تقريبا النظام كان منعدم، لكني قررت اروح السنه دي عشان ازور مكتبة الدكتور محمد عماره، ولله انت حمستني الى الذهاب هناك
fashkol
اكيد طبعا حدث هام والسنة دى حاسس انه مختلف وافضل من السنين اللى فاتت
شكرا لمرورك اول مرة بالكيت كات :)
حاسوباتية
حاولى تزوريه مش هتخسرى بالعكس هتستفيدى كتير اوى على الأقل فى مجال تخصصك :)
شكرا لمرورك وتعليقك :)
لورنس العرب
لالالالا روح وعلى ضمانتى :)
لو ناوى بلغنى ونتقابل هناك انا بحكم شغلى متواجد هناك على الأقل 3 ايام فى الأسبوع
شكرا لمرورك وتعليقك :)
والله هحاول اجى
لكنى مفلسة جدا اليومين دول
لكن والله هحاول اجى ان شاء الله
نهر الحب
الناس كلها مفلسة بجد والدليل على كدة ان اكتر كتب بتتباع على كتب سور الأزبكية وكتب مكتبة الأسرة لرخص تمنها وقيمتها :)
شكرا لمرورك وتعليقك :)
عااااااااااااااااا
كان نفسي اروح المعرض يا فوكس
عاااااااااااااا
المعرض عاوز لف و مشي كتير
و اختك اليومين دول حالتها صعبة
يالله حشوفة فى الصور و خلاص
تحياتي
واحدة مفروسة
معلش تتعوض بس حاولى
شكرا لمرورك وتعليقك :)
معرض الكتاب عيد فكرى سنوى, يفتخر به كل مصرى, وللأسف الشديد لن اتمكن من الذهاب اليه هذا العام, لأنى على الحديدة
تحياتى لكل من ذهب الى المعرض
والله بوست محفز أن الواحد ييجي بعد ما بقيت مليش نفس بسبب اللي كان بيحصل الأعوام الماضية
أهم شئ أن يكون في حفاظ علي روح المعرض من حيث حرية العرض وحرية الفكر داخل المعرض وميكونش الموضوع ديكورات ومظاهر فقط
تقبل تحياتي
ياه ..تصدق أنا كنت ناسي خالص موضوع المعرض ده.الحمد الله انك فكرتني قبل ما ينتهي.
حازم سويلم
كلنا على الحديدة :))
تحياتى وشكرا لمرورك وتعليقك اول مرة فى الكيت كات :)
القلم السكندرى
والله هو من ناحية التنظيم والنظام حاجة كويسة اوى لكن موضوع حرية التعبير والرأى دى انا مجربتهاش خصوصا وانى محرضتش اى ندوات ثقافية او مناقشات ادبية
تحياتى وشكرا لمرورك وتعليقك :)
3omda
ودى حاجة تتنسى يا عمدة ؟
الحق بأة وانزل وشوف الحاجات الحلوة :)
تحياتى وشكرا لمرورك وتعليقك :)
انا مرحتش مش عارفه ليه لغايه دلوقتى بس لازم اروح
Appy
حاولى تروحى هتكسبى كتير سواء كتب او ندوات وخلافه
شكرا لمرورك وتعليقك :)
انشاء الله انا نازله القاهره بكره و ادعيلى الحق اروح و يارب يمدوه شويه علشان الاجازه
ان شاء الله هتلحقى تروحى المعرض واجازة سعيدة ورحلة موفقة ان شاء الله
شكرا لمرورك وتعليقك :)
Post a Comment