الطفرة الحيوانية والريادة المصرية


امبارح كنت مع جماعة صحابى فى نادى نقابة المهندسين بالزمالك وطبعا مكان فيه اكل وشرب اكيد فيه قطط
اللى لفت نظرى هو الطفرة الحيوانية فى السلسلة الغذائية واللى انفردت بيها مصر واكدت بيها ريادتها
الطفرة دى عبارة عن ان القطط تحولت بقدرة قادر من آكلات لحوم الى آكلات اى حاجة غير اللحوم !!! بعد ما القطط كانت بتاكل فضلات اللحوم والفراخ بقت بتاكل بواقى العيش الفينو وبواقى الفطير اللى بيترمى ليهم فى اى مكان زى نادى النقابة زى منا شوفت كدة.

الموضوع ممكن يكون غريب لكنه ناقوس خطر زى ما بيقول الكبار لأنه كدة يعتبر خلل فى السلسلة الغذائية وتحول بيولوجى خطير لكنه فى الأول والآخر نوع من انواع التغير المتوقع خصوصا مع المجاعات اللى بتطارد القطط والكلاب فى الشارع اللى مبقوش لاقيين حاجة ياكلوها مهو محدش بيرمى الأكل دلوقتى او على الأصح مبقاش حد يرمى الأكل الا اذا كان بايظ وده طبعا السواد الأعظم.

مصر اكدت الريادة بتاعتها فى انها خلت القطط تبطل تاكل لحمة وتاكل عيش حاف او عيش متلحوس اى حاجة .. بيتزا يعنى


21 comments:

الميكروباص said...

طيب ولله كمان بتاكل الشيبسي
والمعيز بتاكل ورق الجرائد والكراسات
ومره شفت معزه أكلت قلم رصاص
أهي عاوزه تعض في أي حاجه وخلاص
المهم انها تملى بطنها
يبدو ان الحاله الاقتصادية أجبرتها على الوصول للحاله دي

Empress appy said...

انا شوفت ده بس ماخدتش بالى تصدق فعلا بس انا مش فاهم التغير البيلوجى ده له علاقه بالتغير الاقتصادى يعنى

Foxology said...

لورنس العرب

فعلا الحالة الأقتصادية اجبرتها على كدة :)

انا كمان ملاحظ ان القطط والكلاب فعلا بجد بياكلو اى حاجة تسد جوع وخلاص مهما كان نوع الحاجة دى

ربنا يستر ومياكلوناش بعد كدة :)

شكرا لمرورك وتعليقك :)

Foxology said...

Appy

لا الحاجات دى لازم ناخد بالنا منها لأنها مؤشر لحاجات تانية مهمة ف حياتنا !
وطبعا ليها علاقة بالأزمة الأقتصادية فبعد ما كانت الناس بترمى بواقى الأكل ايام الرخص والقطط والكلاب ينقو ويختارو من البواقى على مزاجهم .. بقت الناس نظرا لأرتفاع الأسعار مش بترمى الا للشديد القوى نظام الأكل بايظ واللى هياكله هيتسمم وبالتالى القطط والكلاب افتقدو نقطة الأختيار من البواقى اللى بلاقوها وبقو كمان ياكلو اى حاجة تسد جوعهم !

وشكرا لمرورك وتعليقك :)

آه وكفى said...

هيهيهييييييييييييييييق

ولا لو روحت جنينة الحيوانات هتحس وانت بتبص للقطة انك بتبص لفيل
والله القطط حجمها مش طبيعي
كانت زمان القطط بتاكل لحوم بس فكانت مسلوعة وصحتها حلوة دلوقتي القطط بتاكل نشاويات كتييير فبئت عاملة كده

Unknown said...

هو الشعب لاقي اللحمه لما القطط هاتاكلها

الشعب نفسه بقي ياكل اي حاجه و القطط مصريه اصيله بتشاركنا بردو

بوست جميل اوي

حاسوباتيه said...

هههههههههههه انت ممكن كمان تلاقي ان في طفره في البشر نفسهم شويه وتبقى كل الناس في مصر نباتيين بالغصب كده اصلنا شعب رشيق

صيدلانيه طالعه نازله said...

يبدو ان القطط عجبتها الاغنيه بتاعه عشان نعلا و نعلا و نعلا لازم نطاطى نطاطى نطاطى
القطط عندنا فى اسيوط متطوره اكتر بتاكل البسكوت و الايس كريم السايح تطور بقى
ياعم فوكس اذا كان البنىادم دلوقتى بياكل من صفايح الزباله مستغرب من تواضع القطط

Foxology said...

آه وكفى

فعلا القطط السمينة دى نتيجة اكل النشويات الكتيرة اللى عبارة عن عيش وبيتزا وبواقى تانية كتيرة

شكرا لمرورك وتعليقك :)

Foxology said...

Emy

الشعب فعلا مش لاقى اللحمة بعد ما بقى الكيلو بخمسين أو اربعين جنيه فى المتوسط!

يلا ماعلينا هااااانت

شكرا لمرورك وتعليقك :)

Foxology said...

حاسوباتية

مهو الناس بدأت تبقى نباتيين فعلا الا اللى قادر يشترى لحمة او فراخ ده يعتبر غنى اللهم لا حسد :)

شكرا لمرورك وتعليقك :)

Foxology said...

صيدلانية طالعة نازلة

على كدة اسيوط بلد غنية والقطط بتاعتها قطط مرفهة :))

شكرا لمرورك وتعليقك وحمد الله ع السلامة :)

Unknown said...

اه تصدق القطط فعلا بتاكل اى حاجة دلوقتى.......طول عمرنا مبدعين وعندنا الجديد دايما

Foxology said...

enjy

ايوة طبعا طول عمرنا فى الريادة والمقدمة

شكرا لمرورك وتعليقك :)

nudy said...

ده مش بس قطط الشارع ده حتي القطط المتربيه في البيت بقت بتاكل طبيخ احيانا نظرا لندرة اللحمة واختصاص اهل البيت بها وحدهم دون القطة

Foxology said...

nudy

ايوة مهو مينفعش انا ماكلش لحمة والقطة اللى متربية عندى تاكلها بدالى

شكرا لمرورك وتعليقك :)

Alkomi said...

عادي يا شيخ حسني هي يعني جت عالقطط اذ كان البني ادمين انخفض مستواهم الغذائي و اذا ماكانش سليم النظر اللي زيي يساعد عاجز النظر اللي زيك يبقى قول على الدنيا السلام يا شيخ عبيد

حاسب حاسب يا راجل قدامك قطة

مش كدة ولا ايه يا شيخ عبيد
حاسب يا راجل

Foxology said...

محمد الكومى

والله يا عم مجاهد عندك حق
وبعدين الولا يوسف كبر ولازمه مصاريف

سامحنى يا عم مجاهد :))

نورت الكيت كات يا كومى ووحشنى تعليقاتك :)

Mafrousa said...

هههههههههه
فوكس و الله انت بتاخد بالك من حاجات
غريبة
يعنى انت شفت القطة بنت القطة فين؟؟
مش فى مصر؟؟
طيب تحمد ربنا و تبوس ايديها وش و قفا
انها لقت العيش الحاف بدل ما تقف فى طوابير
هههههههههههههه
بكرة حنلاقى الناس بتتخانق مع القطط على الفتفوتة
حاجه توجع القلب
حسبنا الله و نعم الوكيل يا فوكس و الله

شمس النهار said...

انت مش عارف ان المصريين همه اللي دهنوا الهوا دوكو
هيستعصي عليهم يربوا القطط علي العيش
ماهي كمان القطط طماعه
تاكل هي لحمه طب والبني ادم المصري ياكل ايه

Foxology said...

شمس النهار

صحيح مفيش حاجة تقف قدام المصرى حتى فى تربية القطط على انها تغير سلوكها الغذائى :))

تحياتى :)