لما نشوف

امبارح كان يوم تنصيب السيد باراك حسين اوباما كرئيس للولايات المتحدة الأمريكية خلفا لأغبى وأبغض رئيس امريكى من وجهة نظرى الشخصية الغير مأسوف على كرامته المهدرة بواسطة الحذاء العراقى الشهير .. جورج بوش الأبن

اوباما اقسم الولاء وأقسم اليمين بصفته رئيس الولايات المتحدة الأمريكية رقم 44 وبصفته اول رئيس امريكى اسود

وبعد كدة ودع الرئيس الأمريكى السابق اللى ركب الناقة .. قصدى الهليكوبتر وطار على تكساس موطنه الأصلى

واخر حاجة عملها انه وجه خطاب لأمريكا بأن الفترة الحالية فترة صعبة نظرا للظروف الأقتصادية المهببة اللى بتعيشها امريكا وزيادة اعداد البطالة ووعد بتخطى الأزمة بمجهود الكل والصبر والأمل .. كلام جميل

وبالنسبة للعالم الخارجى قال امريكا هتسيب العراق لشعبه وكفاية كدة .. ايوة بعد ما خربت طبعا بس الراجل ملوش ذنب ... وقال بالنسبة للعالم الأسلامى هنفتح صفحة جديدة مبنية على الأحترام المتبادل والحوار والمودة .. كويس لما نشوف

اول قرار خده اوباما وبصراحة عجبنى ... تعليق الأجراءات القضائية لمدة 4 شهور فى معتقل جوانتانامو احد العلامات السوداء فى تاريخ امريكا ... الراجل كان قال انه هيقفله لما يبقى رئيس .. دلوقتى علق الأجراءات يعنى توقف مؤقت .. لما نشوف

30 comments:

Eno said...

والله يافوكس انا اتعشم خير
ربنا يستر بأه

تحياتي ليك :)

Unknown said...

مش عارفة ليييييييييييييييه حاسة بالاهانة

Foxology said...

Eno

يا مسهل .. لحد دلوقتى الأمور ماشية كويس لما نشوف الأيام الجاية هتجيب ايه :)

شكرا لمرورك وتعليقك :)

Foxology said...

Enjy

وايه الأهانة ف كدة ؟؟

شكرا لمرورك وتعليقك :)

3omda said...

Fox,
First:- I hope he will be better than Bush
Second:-
Thank u for you lasting support,you always have the first comments in my blog really thank u.

Mafrousa said...

و الله يا فوكس انا اتمنى خير يارب
احنا مش عاوزين من ابن حسين حاجة غير انه يكون عادل بس


و سبحان الله بتجري فى عروقة دماء الافارقة المسلمين
يارب الجينات تنقح عليه و على ضميرة

بس عارف انا قلقانة من الصهاينة ولاد ال......الصهاينة
لانه لو مش مشي على هواهم حيطخوه يا ولداه زي كندي
و مراتة حتترمل بدري

Foxology said...

3omda

First : We all hopw so ..

Second : Thanks alot 3omda .. your posts are good and really should be read :)

Thanks :)

Unknown said...

اعتقد مهما كان سيء هايكون افضل من بوش لانه مالوش اي مثيل في الغباء و الاجرام
اعتقد ان خلاص قرار اغلاق جوانتنامو صدر من شويه

يارب الجاي يكون احسن

Unknown said...

والله انا مش مستبشرة لانهم كلهم لهم سيستم واحد ماشيين عليه ابيض او اسود او حتى برتقالى
ربنا يستر

Foxology said...

واحدة مفروسة

وهى دى المعادلة الصعبة
انه يبقى على الحياد

الأيام جاية وهنشوف ايه اللى هيحصل :)

شكرا لمرورك وتعليقك :)

Foxology said...

EmY

بوش ضرب الأرقام القياسية فى الأجرام والغباوة .. يارب يكون الجاى احسن

شكرا لمرورك وتعليقك :)

Foxology said...

نهر الحب

هو سيسيتم واحد بس اكيد فى طفرة بتحصل كل فترة ولا ايه ؟

شكرا لمرورك وتعليقك :)

tarek momen said...

طول ما احنا قاعدين مستنيين و نقول لما نشوف عمره ما هايعاملنا باحترام
سيبك طبعا من الرسميات
اذا لم نستطيع كشعب و امة ان نفرض احترامنا عليهم فلن يحترمنا احد

Foxology said...

Tarek Momen

والله يا استاذ طارق عندك حق .. طول محنا مستنيين ومش فارضين عليهم يعاملونا باحترام يبقى عمرهم ما هيحترمونا ..انا قصدت بكلمة لما نشوف .. اننا نشوف احنا هنعمل ايه معاه وهو بالمقابل هيعمل ايه معانا وياترى هنحس مرة اننا لينا قيمة فى عهده ولا لأ ؟؟

مداخلاتك ممتعة والله يا استاذ طارق :)

تحياتى وشكرا لمرورك الكريم وتعليقك الجميل :)

Unknown said...

مش فاهمة ردك هزار وللا بجد؟؟؟
انت فعلا مش عارف ايه الاهانة وللا انت بتسخر؟؟؟

محمود محمد حسن said...

ما حك جلدك مثل ظفرك

اوباما امل الأمريكان وحلمهم في التغيير ، على السادة العرب البحث عن حلم آخر

دعاء مواجهات said...

زى ما انت قولت كدة بالظببط

لما نشووف

فينك مختفى لية؟؟

Foxology said...

enjy

لا انا بتكلم بجد وفعلا مش فاهم ايه الأهانة اللى تقصديها ؟؟

تحياتى :)

Foxology said...

محمود محمد حسن

وليه منصلحش نفسنا ونتعاون مع الراجل ؟

تحياتى ووحشتنى تعليقاتك وبوستاتك :)

Foxology said...

دعاء مواجهات

نفسى نتعاون معاه ويحترمنا ونحترمه بس الأول نحترم بعض :)

انا موجود وبنزل بوستات لكن على فترات :)

شكرا لمرورك :)

Unknown said...

الاهانة اللى اقصدها يا فوكس ان احنا المفروض منستناش نشوفه هيعمل ايه معانا....عيب اوى اوى يبقى مصيرنا فى ايد حد تانى مش مننا...قمة الاهانة لما نبقى زى العبيد عايزين نعرف اسيادنا الجدد هيعملوا فينا ايه....متفقة مع تعليق محمود محمد حسن جدا

Foxology said...

enjy

فهمت قصدك وده انا كنت اقصده فعلا اننا نشوف هنعمل ايه احنا وهو هيعمل ايه من باب الفعل ورد الفعل

شكرا على تعليقاتك :)

أحلى حياة said...

السلام عليكم ورحمة الله وبركاته

بالنسبة لموضوع اوباما
انا عارفه طبعا ان الاداره الامريكيه دلوقتي اصبحت تقريبا القوه العظمى في العالم اللي بتتحكم في مجريات الامور بشكل كبير
شئنا ام ابينا دي حقيقه لا يمكن تجاهلها او اخفائها
لكن رد جدة اوباما على اللي سالها بعد تنصيبه عن توقعتها او امنيتها لما سيقدمه للقاره الافريقيه يخلينا نعيد النظر شويه في الكلام السالف ذكره دا
كان ردها كالتالي، فيما معناه يعني:
ان اوباما دا دلوقتي رئيس امريكا، الشعب الامريكي انتخبه واختاره عشان يحكمه ويعمل على تحقيق مصالحه وعمل ما هو في صالح الشعب دا
ننتظر احنا، والكلام على لسان جدة اوباما، منه ليه حيعمل لنا ايه ولا حيعمل لنا اصلا ولا لا
دا كان بالتقريب كده كلامها بالمعنى يعني
وفعلا احنا ليه مستنيين نشوف حيعمل ايه بقى ولا حيعمل اصلا ولا لا
ليه مانعملش احنا لنفسنا
ليه مانستعنش بالله ونعمل على نصرة نفسنا
ليه مانتحدش مع العرب اللي زينا ونبقى قوة اكبر من اي قوة مستحيل بإذن الله حد يقدر يقف قدامها او يكسرها ويهزمها
ليه ماننهضش بنفسنا من غير ماننتظر معونة فلان ولا مساعدة علان
ليه وليه وليه

وأخيرا
سؤال بس معلش أثار فضولي ولو أنه بعيد عن موضوع البوست

مين عم مجاهد دا؟؟؟

Foxology said...

احلى حياة

عليكم السلام ورحمة الله وبركاته

بالظبط كلامك صح وكلام جدة اوباما صح .. ولو لاحظتى التعليقات اللى قبل تعليقك هتلاقينى فعلا بأيد كلام الناس اللى شرفونى وعلقو وقالو احنا نبدأ بنفسنا وبعدين نشوف هو هيتعامل معانا ازاى ؟ هيبقى فى تعاون ايجابى ولا لأ

الفكرة فعلا >>> ابدأ بنفسك :)

ده كان أولا

ثانيا : سؤال مشروع بخصوص عم مجاهد :)

عم مجاهد هو الراجل العجوز بائع الفول فى فيلم الكيت كات اللى انا عملت المدونة بنفس اسم الفيلم ... عم مجاهد فى النص الأصلى لقصة الفيلم كان يعتبر رمز للحاجات الحلوة القديمة بتاعة بلدنا واللى الجيل الجديد بيتخلى عنها بسهولة غريبة ... الموضوع ده ظهر فى المشهد اللى كان بين الفنان محمود عبد العزيز (الشيخ حسنى ) وعم مجاهد .. الفنان الجميل (احمد سامى عبد الله .. (عم مجاهد ) لما الشيخ حسنى سأله انت زعلان منى ليه يا عم مجاهد ؟ مش بتكلمنى ليه ؟ قاله عم مجاهد .. بعت البيت يا شيخ حسنى ؟؟ بعت البيت اللى بنيته انا وابوك الله يرحمه طوبة طوبة ؟

وفى مشهد تانى لما مات عم مجاهد .. ماتت حاجات حلوة فى حياة الشيخ حسنى وفى مشهد العزاء .. قال الجملة الشهيرة .. اييييه الله يرحمك يا عم مجاهد :)

بس :)

شكرا لمرورك الأول وتعليقك

أحلى حياة said...

السلام عليكم ورحمة الله وبركاته

اهااااااااااا
اه فهمت
ودا فعلا بيت القصيد
وعلى كده يبقى
اييييييه واييييييييييييه واييييييييييييييييييييييه الله يرحمك ياعم مجاهد، ألف رحمة ونور تنزل عليك وربنا يصبرنا ويعينا ويقوينا ويقدرنا على فراقك
:(
:'(:'(

Foxology said...

احلى حياة

عليكم السلام ورحمة الله وبركاته

فعلا الله يرحمه ويرحم أيامه

شكرا لمرورك وتعليقك :)

Empress appy said...

قرر القفل بتاعه فى خلال سنه انما ايه السبب مش عارف تعرفش انت

Foxology said...

Appy

والله خبر النهاردة بفلوس بكرة يبقى ببلاش

اكيد فى سبب قوى ولو بتقولى كدة على سبيل الجد يبقى لالالا انتى مش متابعة ولا ايه ؟؟

شكرا لمرورك وتعليقك :)

alzaher said...

ملاحظتين
اولا اوباما سيسحب القوات المقاتلة من العراق فقط ولكنه سيبقى اكثر من 14 قاعدة عسكرية امريكية هناك
ثانيا: اوباما قال انه سيغلق معتقل جوانتانامو خلال عام لكن المعتقلين في اغلب الاحوال سيسلمون لبلادخم الاصلية مما يعرضهم من جديد لخظر التعذيب كما تؤكد منظمات حقوق الانسان

Foxology said...

alzaher

اولا : وجود القواعد العسكرية ده امر مفروغ منه واكيد

ثانيا : لو المتهمين رجعو بلادهم الأصلية اكيد ارحم من وجودهم فى المعتقل الرهيب ده وفى الغالب ناس كتيرة منهم بريئة زى ما كلنا عارفين يعنى الضرر اقل اكيد

شكرا لمرورك اول مرة وتعليقك :)