!!!! اتركوا حلمى .. وحاسبوا شاهين


قامت الدنيا ولم تقعد حينما قدم النجم السينيمائى احمد حلمى فيلمه ( آسف على الأزعاج ) الصيف الماضى بدعوى ان فكرة الفيلم (( مسروقة )) من الفيلم الأمريكى الشهير ( عقول جميلة ) بطولة النجم الأسترالى الأصل راسل كرو والذى قدم شخصية عالم الرياضيات الأشهر الحائز على جائزة نوبل فى فترة قديمة بالرغم من اصابته بمرض انفصام الشخصية المعروف .. وقتها احمد حلمى قدم الفيلم بفكرة الشاب المصاب بمرض الأنفصام ولكن الأحداث مغايرة تماما للفيلم الأمريكى فهو ليس عالم رياضيات بل مهندس طيران ولم يكن يرى أشخاص يعتقد انهم من اجهزة أمنية عليا ولكن كان يرى والده الذى كان متعلقا به بشدة قبل وفاته!!! فعلا ناس بتفهم


ومع بداية الموسم السينيمائى لهذا الصيف قامت الدنيا أيضا ولم تقعد عندما قدم أحمد حلمى فيلمه الجديد ( 1000 مبروك ) والذى اتهموه فيه بسرقة فيلم أمريكى آخر بنفس الأحداث ... لا اتذكر اسم الفيلم حقيقة ولكنى أتذكر انى رأيته من قبل وأن الأحداث مختلفة بالرغم من تشابه الفكرة المحورية فى النص الدرامى وهى الشخص الذى تنحصر احداث يوم معين فى حياته بين الصباح والمساء وتتكرر يوميا وكأنه داخل حلقة مغلقة من الأحداث التى تتكرر بشكل يومى وكأنها لعنة أحلت به

أقول لمن اتهموا حلمى بسرقة الفيلمين ... اتركوا حلمى وحاسبوا يوسف شاهين!!!!

نعم الجملة صحيحة ... احمد حلمى وان كانت تهمته الوحيدة انه اقتبس الأفكار الرئيسية لأفلامه الأخيرة .. فان مخرجنا الراحل العبقرى ((نقل وكرر )) أشهر افلامه التى أتحفنا بها فى فنرة السبعينات والثمانينات !!!


الدليل على صحة أقوالى هذه ... الفيلم الشهير لشاهين والذى يحمل عنوان ( حدوتة مصرية ) .. هذا الفيلم السياق العام له وكذلك مشاهد عديدة منه تم اخذها ونقلها ( كما هى ) من الفيلم الأيطالى الشهير ( 8.5) للمخرج العبقرى بحق ( فدريكو فللينى ) والذى تلاحظ وتشاهد وتتأكد انه الأب الروحى ليوسف شاهين بمجرد ان تشاهد هذا الفيلم !!!!

لقد صدمت عندما شاهدت الفيلم الأيطالى فلم أكن اتخيل ان يوسف شاهين ( ضحك علينا ) وأيضا ( أوهمنا ) أنه مخرج عبقرى مبدع وليس مجرد مخرج ( مقتبس ومتأثر ) بمخرجين آخريين الا اذا كان متأكدا ان لا احد يشاهد الأفلام الأيطالية لأنها لم تعرض فى مصر ولن تعرض أيضا !!!!

لمن لا يصدق ... روابط تحميل الفيلم

الرابط الأول
الرابط الثانى

شاهد وقارن ثم اترك حلمى باقتباسه فقط وامتاعه لنا بباقى الأحداث .. ثم اتهم شاهين بأنه ضحك علينا وأكلنا البالوظة

14 comments:

Eno said...

كلامك منطقي جدا يافوكس وانت استعنت باأكبر مثل في مخرجين مصر

لكن لو دققنا التركيز شويه هنلاقي افلام منقوله من افلام اجنبيه كتيره جدا

وبصراحه فيلم حلمي ملوش حل كا تنفيذ وكا فكره وكا ممثل انا فعلا ارشحه لااحسن ممثل لانه لو تلاحظ الفيلم مش فيه ولا حد معروف ولا بطل غيره يعني كل الفيلم قايم عليه هو لوحده
تحياتي علي البوست

THE illusionist said...

صح انا شوفت واحد كان كاتب فى مقال فى الدستور عن كده
بس مكنتش مصدق
بس انا هنزله وارد عليك ان شاء الله

Foxology said...

Eno

بالظبط يا اينو فى افلام كتيرة جدا منقولة وكأننا خلاص فاشلين حتى فى التأليف والفبركة :))

الفيلم جميل جدا وفعلا حلمى كان شايل الفيلم لوحده تماما والفيلم نجح محدش شافه وحس انه مش قوى من الناحية الفنية

شكرا لمرورك وتعليقك ونورتى الكيت كات :)

Foxology said...

THE illusionist

للأسف الموضوع حقيقى وشوف الفيلم وفى انتظار رأيك :)

تحياتى وشكرا لمرورك وتعليقك :)

enjy said...

احمد حلمى دة حبى الكبير والله والفيلمين دول بجد هما الفيلمين الوحيدين اللى دخلتلهم السينما مخصوص بقالى سنتين مبدخلش غير افلام حلمى

Foxology said...

enjy

احمد حلمى ممثل فعلا قدر يثبت انه متمكن وانه ممكن يمثل اى دور بأى شخصية

شكرا لمرورك وتعليقك :)

حاسوباتيه said...

كلامك فعلا صح

بس انا نفسي في حاجه انا مش معترضه اننا ناخد افكار من افلام تانيه بس نفسي الفنانين يعلنوا انهم فعلا واخدنها من افلام تانيه يعني يعلنوا ليه بيكدبوا علينا هما فاكرين احنا بنشوفهم هما بس مافيهاش اي عيب انك تاخد فكره حد وتنفذها بس تقول

وانهارده بناخد افكار بكره نتعلم ونخلق احنا افكار وهكذا

مع العلم ان انا لاشفت اسف على الازعاج او الف مبروك او حدوته مصريه
بس ده رايي

فرفشة الوان said...

عندك حق مخرجين مجرد كلمة واكتر من كدة

مشهورين

Foxology said...

حاسوباتية

كلامك مظبوط جدا وهو انى مش عيب انى اقتبس الفكرة أو اساس الفكرة واكمل انا عليها من تأليفى ومجهودى مع الأعتراف بكدة وده مش عيب فعلا وده اللى عمله محمد دياب مؤلف فيلم 1000 مبروك انه قال فى تصريح صحفى قبل عرض الفيلم انه اقتبس الفكرة الأساسية من الفيلم الأمريكى الشهير وكمل عليها من عنده باقى احداث الفيلم

شوفى الفيلم الأيطالى وشوفى حدوتة مصرية ضرورى علشان تعرفى قصدى :)

تحياتى وشكرا لمرورك وتعليقك :)

Foxology said...

فرفشة ألوان

المشكلة ان المخرجين بيتعاملوا مع الجمهور على انه جمهور ساذج بيتفرج على الأفلام العربى المصرى بس مفيش حاجة اسمها انترنت تقدر تحمل منه احدث الأفلام وأقدمها كمان وتتفرج عليها وتقدر تقارن

لكن مقدرش انكر ان فى مخرجين فعلا مبدعين ومجددين على سبيل المثال محمد خان ويسرى نصر الله

تحياتى وشكرا لمرورك اول مرة بالكيت كات :)

الازهرى said...

بصراحه المشككلة فى الاقتباس
لمشكلة فى شكل الاقتباس
يعنى انا ممكن فكرة تعجبنى
اجيبها وارجع اعيد صياغتها من تانى بحيث تناسبنى وتناسب مشاكلى
انما انى انقل نسخ ولصق
هى دى بقى الكارثة الكبيرة
وهى دى مشكلة افلام كتير عندنا
*************************
بالمناسبة تعرف انى اول مرة اسمع عقول جميلة كانت من اقل من ساعة

Foxology said...

الأزهرى

بالظبط يا مولانا المهم شكل الأقتباس وده اللى حصل مع أحمد حلمى وعلى الأصح مع مؤلفين أخر فيلمين له بمعنى انهم اقتبسو جوهر الفكرة وبعد كدة بنو أحداث الفيلم بناء على ما يناسب الوسط اللى هيتعرض فيه الفيلم :)

تحياتى وشكرا لمرورك وتعليقك وشوف الفيلم بتاع عقول جميلة هيعجبك اوى فى شغل كويس :)

صيدلانيه طالعه نازله said...

مش القضيه انى اقتبس القصه المهم بعد كده انى اقدر اقدمها بوجهه نظرجديده حتى لو تشابهت الاحداث و هو ده اللى حصل فى 1000 مبروك
الفيلم جميل فعلا ضحكنا و بكانا و شغلنا مخنا اللى كان بدأ يصدى من افلام الزغزغه الجاهزه
ايا كانت الاراء يبقى فيلم احمد حلمى فى نظرى هو سيد افلام هذا العام مع الاعتذار لكل من اجتهد

Foxology said...

صيدلانية طالعة نازلة

صح كلامك يا دوكتور وفعلا مش المهم الأقتباس المهم انى اقتبس وبعد كدة اطور واحدث بناء على أفكارى أنا

احمد حلمى مستمر فى طريقه الصح ويارب يفضل كدة

شكرا لمرورك وتعليقك :)