خللى عندك .. صـــوت

هذه الأيام العجيبة بحق ظهرت على السطح شعارات وحملات تنادى فى موتى الوطن - المواطنين يعنى - تنادى فيهم بأن ينفضوا غبار السلبية واللامبالاة عن اجسادهم وعن عقولهم قبل اجسادهم وان يتنبهوا لما هو قادم حتى يستطيعوا ان يقرروا بأنفسهم مصيرهم ومصير أبنائهم عن طريق تقرير مصير وطنهم مصر

ظهرت حركات شابة وحملات سلمية تدعو الكل الى المسارعة باستخراج البطاقات الأنتخابية من أقسام الشرطة التابع لها محل السكن وذلك ليكون لحامل البطاقة الحق فى ان يختار من يشاء بدلا من ان يترك حرية الأختيار لمن اعتادوا على الأختيار بدلا عن المواطنين طوال تلك السنوات الفائتة


من ضمن تلك الحملات السلمية الحملة الأشهر على الموقع الأجتماعى الشهير " الفيسبوك" .. حملة ( خللى عندك صوت ) والتى ذاع صيتها مؤخرا على شاشات الفضائيات بالأضافة الى صفحات الأنترنت . الصفحة الرئيسية للحملة تحتوى على معلومات هامة بشأن استخراج البطاقة الأنتخابية وحقوق كل مواطن فى اية انتخابات رسمية تجرى فى البلاد وتدعو الى سرعة استخراج البطاقات الأنتخابية خلال هذا الشهر ليتسنى لحاملها المشاركة فى انتخابات مجلس الشعب هذا العام وكذلك انتخابات الرئاسة العام القادم

اسأل الله ان يكون لنا صوتا والا نكون من كاتمى الشهادة

16 comments:

خواطر شابة said...

الوعي والوعي ثم الوعي هم اساس اي تغيير وبدونهم لاأمل وسيبقى الحال على ماهو عليه
تحياتي لك

tarek momen said...

لن يغير هذه الأوضاع الا حماس الشباب
لان الجيل الأكبرسنا قد تيبس و فقد الأمل في التغيير
لأن الحكومة النتنة عندها احتياطات
يعني لو معاك البطاقة و مش رايح مع جحافل الحزب الوثني تلاقي قدامك طابور طويل اطول من طابور العيش وكل الوقت ما يمر تلاقي الطابور بيطول و مافيش حركة
ولو مصر اصرارا و ربنا كرمك ووصلت للافندي اللي ماسك الكشوفات يبعتك اي لجنة مش مسجل فيها و تقعد تلف و تدور و لو وصلت لأسمك بنفس الأصرار و خدت ورقة الأنتخاب تلاقي واحد تنح غالبا مندوب الحزب بيسألك انت بترشح مين
تناحة اكتر من كده انا ماشفتش
وممكن تروح تلاقي اللجنة مقفولة و الصناديق بتتعبي جوه علي رواقة
الظريف انه في الأنتخابات الئاسية الماضية ذهبت للجنة الموجودة بمدينتي و هناك قابلت احد الزملاء بالشركة و اتضح لي انه مندوب الحزب باللجنة و طبعا لما شافني ادخلني اللجنة و دون انتظار بالطابور احضر لي ورقة انتخاب بالرغم ان اسمي مسجل بالقاهرة و ليس بمدينتي
المهم رشحت نعمان جمعة و بعد ان انتهيت سالني انت رشحت مين فاخبرته فصاح قائلا :ياريتني ما دخلتك
وتركته وهو يعض اصابع الندم

Foxology said...

خواطر شابة

بالضبط ... الوعى هو المفتاح وبالتالى فقدان الوعى هو اساس كل المصائب

شكرا لمرورك وتعليقك

Foxology said...

Tarek Momen

مهو الشباب طاقة كبيرة يا استاذ طارق وعلشان كدة التركيز عليهم تهميش وتفريغ عقول الا من الحاجات التافهة وفقط

موضوع اللجان واللى بيحصل فيها انا شوفته بعينى فى موضوع الأستفتاء على تعديل الدستور وكان وقتها من غير بطاقة انتخابية رحت مع والدى نشوف ايه النظام ومكنش اسمه فى اى كشوف ومع ذلك خد ورقة وعلم عليها وحطها وهو خارج امين الشرطة سأله انت اسمك هنا يا حاج ؟ قاله لا يبنى قاله عموما ولا يهمك احنا عاملين حسابنا

عاااادى

واخرتها ايه ؟؟ دوام الحال من المحال المهم الواحد يعمل اللى عليه

شكرا لمرورك وتعليقك يا استاذ طارق

شمس النهار said...

انا معايا بطاقه انتخابيه من ايام ماكنت في الجامعه
يعني من 77 ولحد النهارده المرشح بتاع الدايره لابيموت ولا بينتخبوا غيره
:)
مع ان كل اللي بقابلهم من ابناء الدايره مش بينتخبوه؟؟؟؟؟؟؟؟؟

وممكن تسأل الحاج طارق مؤمن اخر انتخابات حضرناها سوا حصل ايه
منعت من دخول اللجنه

سلامي

شمس النهار said...

من غير مااقرا الحاج طارق كاتب ايه
لاقيته كاتب اللي كنت بقول لك اسأله عليه

::))

blue-wave said...

ولو انى عارف ومتأكد ان صوتى لا هايقدم ولا هايأخر لكن عملتها وهانتخب اهو احس انى عملت حاجه نفسى فيها ولو مرة

الميكروباص said...

الإحباط هو سبب فشل الدعوه
وانا أحد هؤلاء - لن استخرج بطاقه انتخابيه
لأن ما يريدوا ان يفعلوه سيفعلوه
أقولك على حاجه
في الانتخابات الماضيه كان عندنا اثنان بيتنافسوا
واحد اسمه محمد مرشدي وده مرشح الوطني
والآخر اسمه اكمل قرطام وده صاحب شركة بترول كبيرة اسمها صحارى
كل لجنه داخل قسم المعادي كان فيها مراقبين
وبعد فرز الأصوات نجح أكمل
وانتظر الكل خروج الخ مندوب القسم ليعلن النتيجه
فخرج على الناس وقال لهم الفائز بمقعد الفئات هو محمد مرشدي
قالوا له يا عم ازاي ده الراجل التاني ناجح في مش عارف كام لجنه -أكثر من النصف يعني-
قال لهم زي ما بقول لكم محمد مرشدي هو اللي كسب واللي مش عاجبه يغبط راسه في الحيط او يروح يفرز الأوراق تاني!
وراح الراجل المغلوب رافع قضيه وكسبها
لكن المجلس سيد قراره
اعتمد فوز من فاز وانتهى الأمر
يعني العمليه من الآخر مطبوخه
بس الاثارة اللي فيها انك مش عارف الحكومه حاطه عنيها على مين عشان تنجحه لغاية آخر لحظه لأن زي ما عرفت ان ده من الاسرار الكبرى

صوت من مصر said...

اظن ان بطاقتى اتقطعت

Foxology said...

شمس النهار

يعنى المرشح واخدها وراثة زى العمودية كدة ؟؟؟ :))

تحياتى وشكرا لمرورك وتعليقك

Foxology said...

Blue-Wave

مهو الفكرة انك تعمل اللى عليك وتحرر صوتك من جواك

شكرا لمرورك وتعليقك

Foxology said...

لورنس العرب

مهى بتتطبخ ف بعض الدوائر وفى البعض اآخر بتتطبخ لصالح المعارضة زى عندنا كدة متفهمش ازاى :))

تحياتى وشكرا لمرورك وتعليقك وقول رأيك برضه متسكتش

Foxology said...

صوت من مصر

اعمل بدل فاقد يا كيمو بلاش صوتك يبقى مشروخ

شكرا لمرورك وتعليقك

هناء محمود said...

منكرش إن الموضوع ده محتاج مجهود ومحتج تفكير

Foxology said...

أم بوبة

الأهم ان المجهود والتفكير يجيبو نتيجة

شكرا لمرورك وتعليقك

hoda said...

ahna alli f3lan b2dena n3`ayr bladna .baldna kayna w mosta2blna lazm ykon lena ra2y w klma 3sshan di hayatna alli hn3esh7a w baldna alli hnrabi feha wladna ..
bs lazm ykon fi details 3n azay n3ml albeta2a w alhgat dii can anybody help plz?!!!
rbena m3aki ya msr....