الريحة طلعت على فكرة

الريحة طلعت على فكرة وبقت مش ولا بد ... مقصدش ريحة الفسيخ والرنجة علشان شم النسيم .. لالالا انا اقصد ريحة المسؤولين من داخل النظام للأسف للأسف الشديد ودى لقطات بسيطة علشان نعرف ايه حكاية الريحة دى
اول شمة : التكتيم والتعتيم على موضوع علاج السيد الدكتور وزير الصحة على نفقة الدولة وهو غير المحتاج ولله الحمد واللهم لا حسد وفيه كلام انه اتعالج هو وزوجته بحوالى 5 مليون جنيه فى امريكا مع انه دايما بيقول : العلاج على نفقة الدولة للغلابة والغير قادرين .. يمكن يا جماعة مش قادر ولا حاجة الله اعلم بعبيده
تانى شمة : مهزلة وفضيحة يوم 6 ابريل لما الامن سحل وضرب واعتقل شباب فى عمر الزهور كل تهمتهم انهم خرجو للشارع فى مسيرة سلمية جدااااا بيطالبو بهدوووء انه يبقى فى تغييير لكن طبعا كالعادة اعتقال وسحل وضرب لكن الجديد بأة هو وجود الشرطة النسائية علشان تتعامل مع الستات والبنات ميحصلش قلق زى اللى حصل قبل كدة من هتك اعراض علنى فى الشارع فاكرين ؟؟؟ والمقلق انه تم الافراج فورا عن المعتقلين والناس فرحت اوى بس انا مفرحتش عارفين ليه ؟؟؟ علشان الافراج جه بعد انتقادين شديدى اللهجة من المتحدث الرسمى باسم وزارة الخارجية الامريكية ومنظمة هيومان رايتس ووتش الدولية على التوالى لما اعلنوا عن قلقهم واستيائهم الشديد من اللى حصل وكمان مطالبتهم للنظام الحاكم
باعطاء مزيد من حرية التعبير للشعب بدون اى قيود او تخويف
تالت شمة : ماتش الزمالك واتحاد الشرطة فى الدورى الممتاز للعك قصدى للكورة .. بجد لا تعليق خصوصا انها كانت مهزلة بمعنى الكلمة ومتفهمش مين الظالم ومين المظلوم ومين الضارب ومين المضروب ومين المستفز ومين الهادى
رابع شمة والأخيرة علشان الريحة عبقت المكان : الاتهام العلنى الرسمى من الحكومة الفيدرالية الامريكية لشركة مرسيدس بنز العالمية باعطاء رشاوى ضخمة لمسؤول حكومى مصرى بهدف تسهيل اعمال الشركة مع الحكومة المصرية مثل العطاءات والمناقصات وخلافه ... حاجة تقرف مش كدة ؟؟؟

الثورة الشعبية فى قرغيزستان عاملة شغل جامد اوى .. واحنا مش معاهم

9 comments:

حلم بيعافر said...

شم ايه ياراجل؟!!
هو حد بقى لاقى حاجة يشمها؟

الميكروباص said...

أحنا مش معاهم وعمرنا ما هانكون معاهم
والسبب ببساطه ان فيه ملايين مستفيدين من الامور اللي انت ذكرتها
وفيه ناس ساكنين معايا في المنطقه ماشيين مع اعضاء مجلس الشعب واصبحوا مليونيرات، واصدقاء عن طريق الرشاوي اصبحوا من الاعيان
يبقى ايه السبب اللي يخلينا معاهم؟

صوت من مصر said...

ممكن نشترك معاهم
لو عندنا دم

Eno said...

مافيش جديد!!
يافوكس هنفضل نتكلم نتكلم ومافيش حد بيتسمع صوته اصلا

انا رائي كفاية سياسة اقولك احكي فيلم افتار افيد :)))

تحياتي

Anonymous said...

فعلا اخطاؤهم صارت واضحة للعيان
ربما لأنهم لم يحسنوا تخبئتها كالعادة
وربما لانهم لم يعودوا خائفين و تبجحوا اكثر
هؤلاء المسئولين

ريم وجيه said...

ولسه ياما هنشم
ومين عارف لحد امتى!

الميكروباص said...

البرنس راح فين؟

Foxology said...

شكرا للتعليقات وبعتذر عن عدم الرد خلال الفترة اللى فاتت

لورنس العرب >>> موجود يا باشمهندس بس ممكن تقول مراقب صامت ومن كتر الحاجات اللى نفسها اكتبها بقيت مش عاوز اكتب :)

شكرا للجميع

سبهللة said...

بكرة ان شاء الله ربنا يفرجها من عنده
صحيح على رأى نوارة
البلد اللى حيلتنا باااااااااظت
الا ان فرج الله قريب بإذن الله
قادر على كل شىء