عـن الحـــرّ

امبارح كانت درجة الحرارة ( فى الضل ) حوالى 42 درجة مئوية والناس مكنتش طايقة نفسها وانا من ضمنهم طبعا ... ركبت المترو وانا رايح مشوار بعد الشغل وكانت الفاجعة ان المترو مفيهوش مراوح حتى الشفاطات اللى كانت زمان تكييف برضه مش شغالة وانت بأة وشطارتك لحقت حاجة تهوى بيها لحقت ملحقتش استحمل بأة وربنا معاك

الحر بتاع امبارح فكرنى بحديث للنبى صلى الله عليه وسلم لما كان بيقول لأصحابه رضوان الله عليهم اجمعين ... تبردوا من الحر فانه من فيح جهنم

اذا كانت الحرارة بالشكل ده تعتبر جزء صغير من صهد جهنم امال جهنم نفسها عاملة ازاى ؟؟؟ ربنا يعافينا

12 comments:

AHMED SAMIR said...

بس ربنا هيبقى اكيد ارحم من المسئولين المهملين اللي مش على بالهم تصليح مراوح مترو الانفاق للناس الغلابة
حسبي الله و نعم الوكيل

Foxology said...

AHMED SAMIR

ده انا متأكد منه لان ربنا رحيم بعباده حتى الظالمين

شكرا لمرورك وتعليقك

خواطر شابة said...

انا لما شفت منى الشاذلي بتكلم عن الحرارة في برنامج العاشرة مساء استغربت ان في ماتش الاهلي والاتحاد الليبي الملعب كان مليان على اخره فمتصدقش انه الناس دي كانت قاعدة في درجة الحرارة دي ولو من غير الماتش وقولت له تعال معي لاي عمل فيه خير يقولك انت مجنون عايز تخرجني فالحر ده
تحياتي

Foxology said...

خواطر شابة

لا فعلا درجة الحرارة سجلت ارتفاع غير مسبوق اليوم ده وفى خبراء ارصاد جوية بيحذروا من تكرار نوبة الحرارة المرتفعة دى فى خلال الصيف .. ربنا يسترها

اكيد طبعا محدش هيقول يلا نعمل خير فى الحرارة دى مهو الحاجات اللى مش مهمة احنا عباقرة فيها ومخلصين جداااا كمان

شكرا لمرورك وتعليقك

Eno said...

ربنا يعافينا يافوكس من الحر والاهمال

تحياتي

Foxology said...

Eno

اللهم آمين علشان لما اجتمعوا كانو حاجة صعبة جدا الحقيقة

نورتى الكيت كات

الميكروباص said...

الحمد لله الجو بقاله يومين زي الفل

Foxology said...

لورنس العرب

اه الحمد لله الجو كويس جداا بس الخوف انه يكون الهدوء الذى يسبق العاصفة لأن خبراء الأرصاد الجوية ( مع انى مش بصدقهم ) بيأكدو ان حالات ارتفاع الحرارة هتتكرر تانى بسبب الغبار البركانى المتصاعد من بركان آيسلندا وتنقله من مكان لآخر داخل الغلاف الجوى

شكرا لمرورك وتعليقك يا هندسة

اقصوصه said...

انا اكره الصضيف بسبب الحر الشديد

فعلا الله يرزقنا حسن العاقبه يا رب

Foxology said...

أقصوصة

اهى كلها ايام ربنا :)

ربنا يسلمنا من شر الحر فى الدنيا والآخرة

شكرا لمرورك وتعليقك

Asmaa mahaba said...

شوفت هى دى حريه الراى والاختيار

Foxology said...

سومة

بصراحة مش فاهم قصدك بالظبط بس اذا كان قصدك هو انى اقول انى المترو كان علبة سردين فى الحر ده يعتبر حرية رأى فهو ﻻ دى اسمها نقد لسلبية من سلبيات الحكومة :)

شكرا لمرورك وتعليقك