شعب سهل التعلم

احنا شعب سهل انه يلقط ويتعلم اى حاجة من اى حد على فكرة والدليل على كلامى اننا زى حكومتنا بالظبط اللى هو بتقولنا حاجة واحنا بنصدقها وبتطلع غلط ومبنتعلمش انه غلط بس بنتعلم اننا نصدقها تانى وتالت ومليون كمان ... زى النهاردة كدة وانا رايح الشغل الصبح واحد محترم الهيئة فى العقد الرابع من عمره تقريبا بيسألنى على شارع احمد توفيق مع العلم ان المنطقة اللى انا فيها مفيش شارع بالاسم ده .. المهم قبل ما يكمل كلامه قلتله هقولك انا هتقولى ايه ...
السلام عليكم الأول .. لو سمحت فين شارع احمد توفيق ؟ اصلى من بورسعيد مش من هنا وجاى لواحد معرفة علشان بقضى مصلحة فى القاهرة ومعلش انا اسف لو بحرجك معايا انا مش عارف اوصله وعاوز ارجع بورسعيد بس فلوسى خلصت ممكن تدلنى على موقف عبود من هنا اروحله ازاى ؟؟ وممكن معلش انا اسف حق التوصيل بس لحد عبود حتى لو جنيه واحد اكون متشكر ليك جدااا

لما قلت الكلام ده الراجل فجأة تنح وبلم وقالى : بورسعيد ؟ احمد توفيق ؟ بيعمل نفسه مندهش من كلامى ولما لقانى بصيتله نظرة فيها تحدى اللى هو لو طولت فى دور المندهش هفضحك فى المكان قالى سلامو عليكم ولف ومشى

الراجل ده انا قابلته ف نفس المكان من شهر تقريبا وحافظ اللى قاله صم وعلشان كدة سمعتهوله اول لما شوفته وقبل ما يتكلم اصلا ... مش بقولكم احنا شعب بيتعلم بسرعة واى حاجة خصوصا لو من حكومتنا ؟؟؟

الحكومة ماشية معانا بمبدأ مهم للغاية ... كل شئ فى مصر ينسى بعد حين .. نعمل مع الشعب اى حاجة وبكرة ينسوا احنا عملنا ايه ونعمل تانى وهلم جرا

تحياتى لمجلس الشعب على تمديد قانون الطوارئ وبكدة اى حد معتقل ممكن يختار انه يكون تاجر مخدرات .. او ارهابى

8 comments:

أنا - الريس said...

هههه .. تحياتي ليك انت يا عم سيبك ..
بس انا امنية حياتي في الوقت ده .. ان اشوف وش الراجل .. كان عامل ايه .

الحكومة مشيا معانا بمدأ العصاية والعصاية بدل الجزرة والعصاية ..

بس مسير الشمس تطلع

Eno said...

ههههههههههههههههه
والله بافو عليك بجد العينات دي من الناس كترت اوووووي ونبقي فعلا مش بنعرف نتعلم لو ادناهم الفرصة لممارسة نصبهم:)
تحياتي
وربنا يصبرك

Foxology said...

Eno

العينات دى بقت ماركة مسجلة وتلاقى فى كل منطقة العينة بتاعتها المناسبة يعنى النهاردة كان فى المهندسين والراجل لابس كويس جدااا علشان الواحد ميظنش انه متسول مثلا أو حاجة وهكذا فى باقى المناطق

لو ادناهم الفرصة هنفضل طول عمرنا كدة .. اعطاء مانملك لمن لا يستحق

نورتى الكيت كات :)

Foxology said...

MR.PRESIDENT

الراجل وشه جاب الوان وبقى مش عارف يتصرف بس اهو الواحد ياما بيقابل فى شوارع المحروسة :)

العصاية والعصاية ده الموديل الجديد لقانون الطوارئ مهو لو اتطبق على حد يبقى يقرر بنفسه بأة هو ارهابى ولا تاجر مخدرات ؟؟ ;)

شكرا لمرورك وتعليقك يا سيادة الرئيس :)

Mafrousa said...

اولا ازيك يا فوكس و ازي اينو؟؟؟
يارب تكونوا بخير
و البانبينو اللى ان شاء الله جاي بخير برضه

مش عارفة اقولك ايه على حكاية اننا سهل نتعلم

انا شايفة الموضوع من زاوية تانية تفرس الصراحة
يعنى من كتر ما الحكومة و العالم بيستخفوا بعقولنا و بيستغبونا
الناس ديه بتعمل كده

انا بقا قابلت منهم فى شارع و لفيت و رجعت بعد ساعة لنفس الشارع سمعت نفس الاسطوانة
و لما اتفرست و عملت زيك
هههههههههههههههه
قالتلى لأ انا اختها
شوفت عمرك كده
ولازم اصدقها طبعا
حاجة تفرس
وناس تفرس
و حكومة تفرس
و عالم يفرس اصلا اصلا

سيبك من ده و النبي
و قولى اينو اخبارها ايه؟؟؟
هاتلها كل اللى هيه عاوزاه
يالله سلام و خد بالك منها
تحياتي ليكم و ربنا يحميكم و يتمم لاينو على خير يارب

Foxology said...

واحدة مفروسة

ازيك يا مفروسة انا تمام الحمد لله واينو بخير الحمد لله والبانبينو اهو مستنيين لما نشوف :)

بصراحة الموقف بتاعك يفرس الحقيقة بس اهو زى ما قولتى الكل بيشتغل الكل وبيستعبطه ومحدش بيعمل نفسه واخد باله

يلا ربنا يصبرنا

شكرا لمرورك وتعليقك :)

خواطر شابة said...

صراحة مفهمتش علاقة شعب سهل التعلم باللي اتقال
للان الشعب السريع التعلم سيكون تعلمه في ماهو ايجابي اما اللي مبيتعلمش انه الغلط غلط مهما اتكرر قدامه فصعب ان يتقدم او ان تنصلح احواله
الخلاف في الرأي لايفسد للود قضية انا اناقشك فقط فلا تأخذ كلامي على محمل أخر من فضلك

Foxology said...

خواطر شابة

اولا احييكى على رأيك

ثانيا كان قصدى اننا فعلا شعب سهل التعلم لكن ((((لكن))) نتعلم كل مهو سئ وليس بايجابى او نافع والكلام اللى قلته عن الموقف اللى حصل بينى وبين الرجل الغريب هو اشبه بموقفنا مع الحكومة فهى تكذب علينا وتعاملنا بمبدأ (كل شئ ينسى بعد حين ) واحنا كمان بقينا زيها وبنتعامل مع بعض بنفس الاسلوب

تحياتى ليكى على مشاركتك :)