اللهم انى صائم - الجزء الأول

مش عارف ليه كل يوم فى نهار رمضان تخبطنى حاجة ف دماغى تخلينى اقول بالفم المليان وانا ماسك أعصابى ... اللهم انى صائم
مثلا مثلا ادى عينة من اللى الحاجات اللى بتكلم عليها

عدد مسلسلات رمضان ( التافهة اللى مليانة مخدرات وخمور ورقص ومسخرة ) وصل لعدد 60 مسلسل
تكلفة انتاج المسلسلات المصرية ( فقط ) وصل لمبلغ 750 مليون جنيه مصرى جنيه ينطح جنيه
رئيس الوزرا بيقول ان انتاج القمح ممكن التوسع فيه رأسيا ومش أفقيا علشان معندناش اراضى تنفع للزراعة !!! فى حين وزارة الزراعة بتقول انه غير ممكن التوسع رأسيا ( يعنى زيادة انتاج الفدان الواحد ) علشان المناخ فى مصر مش مساعد على كدة .. نصدق مين ونكدب مين ؟
كل حاجة اسعارها ولعت مش غليت بس واتحرقت كمان والثورة الجاية هتبقى ثورة الجياع ان شاء الله
اخر فتوى لذيذة بأة ان الحزب الوطنى مش حرام مكروه بس خصوصا فى نهار رمضان ( دى طبعا كانت كاريكاتير فى جريدة الدستور ) ولا عزاء للصائمين

كفاية كدة .. اللهم انى صائم

16 comments:

Eno said...

وسعادتة يهز كتافه ويقول مش عارف
الناس بتقطع في بعضها وهو مش عارف امال مين اللي يعرف احنا ؟؟؟؟ظ
حسبي الله ونعم الوكيل
معلش معلش بكره تروق

تحياتي

الازهرى said...

اللهم انى صائم

كنت اتناقش مع أحد الأصدقاء فى مموضوع زراعة القمح منذ أيام
تعرف المشكلة اننا بنزرع قمح يكفينا ويفيض بس المشكلة انه عالى الجودة وبكده محجوز للتصدير فقط

ولا عزاء للمصريين

Foxology said...

Eno

ايوة مهو الناس دى طول عمرها متعرفش بقيت الناس بتقطع ف نفسها ليه !!

معلش ادينا كلنا مستنيين بكرة لما نشوف

نورتى الكيت كات

Foxology said...

الازهرى

ايوة زى القطن كدة اللى بنصدره ؟؟؟ قصدى اللى كنا بنصدره ؟؟؟

قول يا بااااسط

شكرا لمرورك وتعليقك ورمضان كريم

tarek momen said...

صديقي العزيز
اتذكر ان موضوع القمح اثير في عهد الرئيس السابق السادات عندما قال الشيخ الشعراوي ان الذي لا ياكل من زرع فأسه لا يكون قراره من رأسه في اشارة لتبعيتنا للقرار الأمريكي الذي كان يرسل القمح الينا
ايامها تنادي بعض اعضاء مجلس الشعب الشرفاء( ايام ما كان هناك اعضاء شرفاء) تنادوا بوجوب العمل علي زراعة القمح لنكتفي ذاتيا
كان ايامها رئيس المجلس رجل لا استطيع ان اصفه لانه في ذمة الله كان اسمه رفعت المحجوب قال ردا علي طلب الأعضاء اننا ابدا لن نستطيع ان نكتفي ذاتيا من القمح
صديقي الموضوع مخطط له منذ زمن بعيد و لن ينصلح الحال الا بزوال الطغمة العميلة
اللهم اني صائم

شمس النهار said...

السنه كلها اني صائم

في كل اتجاه اني صائم

الاخلاق الناس في الشارع مع بعض
شوف احنا بنعمل ايه في بعض
يبقا الحكومة تعمل فينا اللي هي عزاه

والتمثليات اللي عماله تعمل للناس غسيل مخ
ومحسسني انهم في وادي والناس في وادي

ربنا يرحمنا ويتوب علينا لنتوب
سلامي

Foxology said...

tarek momen

انا برضه كان عندى احساس قوى ان كل اللى بيحصلنا ده متخطط له من زمان جدا وانا فاكر رفعت المحجوب وفاكر عنه ذكريات مش حلوة الحقيقة

بكررها ... ثورة الجياع قادمة

شكرا لمرورك وتعليقك يا استاذ طارق ورمضان كريم

Foxology said...

شمس النهار

ااااه المسلسلات دى كوم تانى خالص يعنى 750 مليون جنيه لو متعملش بيهم مسلسلات كان ممكن نزرع بيهم قمح ولا رز بدل ما الناس هتاكل بعضها كدة بس طبعا ادينى فى الهايف ده شعار الحكومة والاعلام

شكرا لمرورك وتعليقك ونورتى الكيت كات

Mafrousa said...

يا فوووووووووكس
كل اللى انت قلته ده حاجات تفرس يا صديقى
:D
اولا مسلسلات رمضان، و الحمد لله انى مش تابعت حاجة فيها
اولا لانها كتيييييييييييييييييييير جدااااا
ثانيالانها زي ما انت بتقول مش مراعين الشهر الكريم خاااالص ، العرى، و الرقص، و الالفاظ الخارجة، و الشتايم
حاجة تفرس بجد
ده حتى المسلسل بتاع عاوزة اتجوز
مببالغين فيه جداااااا بوظو اللى غادة كاتباه
اوووووووووووووووووووووووووووووووووووووووفر
فرسنى الصراحة
المهم رمضان كريم انت و اينو

Foxology said...

واحدة مفروسة

دى حاجات تنقط وتفرس وتجيب الشلل الرباعى كمان

ربنا يرحمنا برحمته ويقوينا على الناس المتخصة فى افساد صيام المسلمين

شكرا لمرورك وتعليقك ورمضان كريم

اقصوصه said...

رمضان كريم :)

Foxology said...

اقصوصة

الله اكرم

شكرا لمرورك وتعليقك

جلال كمال الجربانى said...

السلام عليكم
حاجات كتير بتحصل تخلى الواحد يقول
اللهم أنى صائم
وعلى فكره من أنتجوا هذا الكم من المسلسلات خدوا مقلب لأن نسبه المشاهده ضعيفه جداً والأعلانات لن يكون لها مردود جيد
والقمح ممكن الأكتفاء الذاتى منه اذا صدقت النيه وكان هناك وزير أسمه الليثى قال وتعهد بذلك ولكنه لم يكمل العام فى الوزاره
وثوره جياع ربنا يستر ويبعدها عننا

وكل عام وأنت بخير

Foxology said...

واحد من العمال

موضوع المسلسلات انا حاسس ان فعلا المنتجين خدو فيه مقلب العمر معاهم التلفزون طبعا خصوصا زى ما قلت ان الاقبال ضعيف جداااا مقارنة بالاعوام الماضية وهو شئ منطقى ان كثرة المعروض مع انخفاض الجودةيؤدى لضعف الاقبال والارباح كمان عموما القمح خلاص ربنا كرمنا وحققنا الانجاز التاريخى وهنستورد كالعادة القمح من فرنسا وامريكا ماما امريكا اقصد

كل سنة وانت طيب ورمضان كريم

شكرا لمرورك وتعليقك

سَارةٌ said...

اللهم اني صائمه :D

نفسي حد يربط العلاقه بين رمضان وانفجار الماسوره التلفزيونيه

!!

غير المسلسلات بقى .. البرامج .. وتلاقي المذيعه كل حلقه تذكرك بإسم البرنامج .. عشان تتأكد بس إن الذاكره لسه تمام .!!


ربنا يكفينا شر التلفزيون ومسلسلاته وبرامجه وإعلاناته !!

Foxology said...

حباية بنادول

مهو نفس السؤال اللى بنسأله من عشرات السنين ولا حياة لمن تنادى !!!

حاجة فعلا مقرفة جدااا وبدل ما يشجعو الناس على القرب من ربنا علشان يخفف عنهم بلاوى الدنيا لالالا دول بيبعدوهم اكتر واكتر بالنهار برامج اكل وبليل مسلسلات وبرامج تافهة

ربنا يرحمنا

شكرا لمرورك وتعليقك