اللهم انى صائم - الجزء الثانى


مفيش فايدة ... عاوزين يفطرو الشعب اللى اساسا جزء كبير منه فاطر ولله الحمد

اخر حاجتين حصلوا ويندرجو تحت باب .. اللهم انى صائم كالتالى

اول حاجة : فضيلة المستشار المحافظ ... ايوة فضيلة المحافظ مش فضيلة المفتى ... قال فى ملتقى الفكر الاسلامى اللى بيتعمل كل رمضان .. قال بالحرف الواحد : انقطاع المياه والكهرباء يزيد من ثواب صيام المواطنين !!!!! محدش يستغرب لان اللى خللى محافظ يبقى موجود فى ملتقى الفكر الاسلامى يعنى ملتقى للعلماء المسلمين مش المحافظين يخليه يقول اللى هو عاوزه على الاصح اللى الحزب عاوز يقوله بس
فضيلة المحافظ مقالناش بيزيد من ثواب الصيام ازاى؟؟؟
هل مثلا بيخللى المواطنين ينشغلوا بالكهربا والمية اللى مش موجودين بدل المسلسلات والبرامج اللى كلها مسخرة وتفاهة وسخافة ؟؟؟ ولا مثلا بيخليهم يستغفروا ربنا علشان ميسبوش للحكومة والسادة المسؤلين ولا ايه بالظبط ؟؟؟؟ الحقيقة مش قادر استوعب الفتوى دى

تانى حاجة : فضيحة سرقة لوحة زهرة الخشخاش للفنان العالمى فان جوخ من متحف الفنان محمد محمود خليل وحرمه بحى الدقى بمحافظة الجيزة فى عز الضهر !!! ايوة فى عز الضهر والفضيحة فضيحتين الحقيقة .. الفضيحة الاولى ان المعاينة اللى قامت بيها النيابة باشراف النائب العام نفسه كشفت عن كوميدية اسلوب الحراسة وتأمين المتحف بالكامل وان عدد كاميرات المراقبة المفروض 34 كاميرا اللى شغال منهم فعلا 3 بس !!!!! وان وزارة الثقافة خصصت من ميزانية الدولة مبلغ 37 مليون جنيه لشراء كاميرات جديدة وده محصلش !!!!!! تانى فضيحة بأة تصريحات الوزارة نفسها بأن الللوحة اتسرقت بالنهار وبعد ساعتين قالوا ان سلطات مطار القاهرة قبضت على اتنين من ايطاليا معاهم اللوحة واللى اتضح بعد كدة انه مش حقيقى ... حاجة تفقع مش كدة ؟؟؟

كفاية كدة بأة لان الحقيقة رمضان السنة دى ماشاء الله كله مفطرات ... ربنا لا تؤاخذنا بما فعل السفهاء منا

17 comments:

tarek momen said...

بالنسبة لفضيلة الأمام المحافظ فهو امتداد طبيعي للافاضل الأمة الوزراء و فضيلة الأمام الأكبر السيد الرئيس
اما موضوع لوحة زهرة الخشخاش فلماذا تستغرب وجود لوحة مسروقة في بلد مسروقة
اللهم اني صائم

Foxology said...

tarek momen

ده التطور الطبيعى للحاجة الماسخة وانت الصادق يا استاذ طارق !!

تعليق حضرتك على زهرة الخشخاش افضل تعليق الحقيقة قريته اليومين اللى فاتو

معلش الاجر والثواب عند الله

شكرا لمرورك وتعليقك ورمضان كريم

خواطر شابة said...

بالنسبة لكلام المحافظ هي وسيلة للتبرير وايجاد متنفس للغضب الشعبي وكأن ما يحصل هو ابتلاء من الله وليس من مسؤولين لايؤدون عملهم كما يجب
بالنسبة للوحة الخشخاش انا ساءني اكثر من فعل السرقة التهاون الموجود سواء في المراقبة او التأمين والحراسة وايضا تضارب الاقوال والتصريحات الذي كان بعد فعل السرقة وذلك باعلان الوزير القبض على السارق تم تراجعه عن ذلك كل هذه امور مسيئة اكثر من فعل السرقة نفسه
دمت بكل الود اخي ورمضان كريم

Foxology said...

خواطر شابة

المشكلة ان المسؤلين بيحاولو يمتصو غضب الشعب باغضابهم !!! السخط العام وصل للذروة ومفيش حد مصدق الحكومة للأسف

زهرة الخشخاش الحقيقة الموضوع يعتبر فضيحة بكل المقاييس للنظام الحاكم فى مصر لأنه مسؤل عن كل صغيرة وكبيرة فى البلد

ربنا لاتؤاخذنا بما فعل السفهاء منا

شكرا لمرورك وتعليقك ورمضان كريم

شمس النهار said...

:))
واضح ان اللهم اني صائم هتبا مليون جزء
:)
طيب يعني يافوكس كل من هب ودب عمال يفتي جت علي المحافظ يعني
ده حتي بتاع الحكومة

وبعدين انت مش كل النور مايتقطع بتفضل تستغفر ربنا وتحوقل

ولما بيرجع بتقول الله اكبر الحمد لله
والميه لمابتتقطع
يابتسلي صيامك انك بتملي ميه من حته تانيه
او بتتيمم وده احياء لرخصة من رخص الدين
:))
الا لو انا فهمت غلط وفضيلته عنده تفسير اخر

اما اللوحة
حدث ولا حرج بجد انا حزينة علي حاجات كتير اوي في البلد دي
عارف يعني ايه شعب عريق زي المصريين اللي بدعوا الفنون كلها
يوصل لمرحلة مايعرفش معني لوحة زي دي
شعب لايري اي شئ جميل في حياته
القبح بقا في كل مكان وكل شارع
والزبالة اللي بقت في شوارعنا العتيقه خير دليل
الحمد لله اني شوفت البوست ده بعد الفطاااار

تحياتي

Che_wildwing said...

برضه أحب أفتيكم
إن اختفاء زهرة الخشخاش كله ثواب وحسنات للصائمين
وكل عام وانتم بخير

Foxology said...

شمس النهار

هتبقى مليون اكيد طول محنا ليل نهار بنتخبط فوق دماغنا بالاخبار الجميلة دى :))

سيادة المحافظ الحقيقة ابدع وعدى كل الخطوط من زمان كفاية انه المحافظ الوحيد اللى عمره ما اتشال بسبب مشكلة او حتى بسبب حركة ترقيات وتنقلات ونفسى اعرف ايه السبب مع ان محافظة القليوبية مليانة بلاوى فى عهده ابسطها فضيحة التيفود فى البرادعة ومؤخرا افلاس شركات وورش كتيرة بسبب قطع الكهربا عن الاماكن دى وتعطيل الشغل فيها

اللوحة وموضوع السرقة فضح النظام كله على بعضه ومحدش يقولنا بأة الشرطة درع الحماية والامان والبتنجان والكلام الفاضى ده مهو المتحف طلع لا متأمن ولا نيلة واهو واحد من اشهر المتاحف فى العالم المفروض الظاهر ان الداخلية عندها حاجات تانية اهم علشان تأمنها وتحميها

الحمد لله ان حضرتك قريتى البوست بعد الفطار انا بكتبه قبل الفطار وبرد كمان على التعليقات قبل الفطار تخيلى بأة الثواب :))

شكرا لمرورك وتعليقك

Foxology said...

Che_wildwing

وهما برضه بيصوموا ؟؟؟ ;)

شكرا لمرورك وتعليقك ورمضان كريم

Foxology said...

Che_wildwing

وهما برضه بيصوموا ؟؟؟ ;)

شكرا لمرورك وتعليقك ورمضان كريم

شمس النهار said...

:))))


الحمد لله ان حضرتك قريتى البوست بعد الفطار انا بكتبه قبل الفطار وبرد كمان على التعليقات قبل الفطار تخيلى بأة الثواب
:))

طيب سيادت المحافظ اخد خبر بالكلام ده
علشان يزيده علي فتواه العصماء
ان كمان فتواة مع الكهربا والميه
خلتك تاخد ثواب تاني

:)))

Foxology said...

شمس النهار

مظنش انه خد خبر ولو خد خبر اكيد اكيد هيقولك تداول اخبار الدولة على البلوج تزيد من ثواب الصائمين الكاظمين للغيظ من السادة المسؤلين :)))

رمضان كريم جداااا

AHMED SAMIR said...

طول ما الحكومة دي بتحكمنا مش نافع لنا صيام

Kiara said...

وهي جت علي عمو المحافظ

ماكله بقي بيفتي

ربنا يرحمنا

صوت من مصر said...

كان ليا حق فى كلامى ولا ايه ياريسنا

Foxology said...

AHMED SAMIR

مش نافع أى حاجة والله نظام اللى هو رضينا بالمر والمر مش راضى بينا

شكرا لمرورك وتعليقك

Foxology said...

كيارا

على رأيك مهو احنا فى مولد الفتوى والفتة

شكرا لمرورك وتعليقك

Foxology said...

صوت من مصر

والله يا كيمو شكلك بتفهم وتقرا المستقبل كمان وعموما فى مكان فاضى جمبى على طيارة جزر القمر جاى ؟؟

شكرا لمروركو تعليقك