مجرد أسئلة

أسئلة بتلف وتدور فى دماغى اليومين دول وخصوصا من يوم الجمعة بعد أنباء عن احتشاد الآلاف من السلفيين فى مسيرة من مسجد النور بعد ما استولوا على المنبر ومنعوا خطيب الأوقاف للمرة السابعة ( أيوة السابعة ) من انه يقوم بمهام عمله ويلقى خطبة الجمعة بحجة ان الشيخ حافظ سلامة معاه حكم محكمة بالتمكين من ادارة المسجد وبالتبعية المنبر وخطبة الجمعة والامامة ... المسيرة انطلقت حتى الكاتدرائية بالعباسية وكان طبعا هناك تواجد أمنى مكثف من الشرطة والجيش تحسبا لأى تصعيد مهو الحالة الأمنية مش ناقصة الحقيقة

من ضمن الأسئلة اللى نفسى أسألها للسلفيين أيا كان المتحدث الرسمى عنهم أو أيا كانت الجماعة الاسلامية المكلفة بالتوجيه ... هو اشمعنى بالذات موضوع كاميليا شحاتة معلق معاكم ؟؟؟ اشمعنى محدش فينا سمع لكم حس ولا صوت لما سيد بلال رحمه الله مات من كتر التعذيب واهو كان واحد منكم ؟؟؟؟

سؤال كمان ... هو لا مؤاخذة يعنى اسلام كاميليا شحاتة هيحرر القدس ويرجع كرامة المسلمين وينصر المسلمين المستضعفين فى مشارق الأرض ومغاربها من كمبوديا وكشمير لحد ليبيا وجبل طارق ؟؟؟؟

وكمان سؤال .. هتعملوا ايه بأة بعد لما أصدرت الكنيسة بيان رسمى بأنها متعرفش فين مكان كاميليا شحاتة واللى عاوزها يطلب من النيابة انها تستدعيها من محل اقامتها ؟؟؟؟؟

السؤال الأخطر ... هتعملوا ايه لو حكمت المحكمة لصالحكم وفرضت على البابا انه يظهر كاميليا شحاتة وفعلا ظهرت وقالت انا مسيحية ؟؟؟؟

أيها السلفيون ... أليس هناك قاعدة فقهية شهيرة تقول : درء المفاسد مقدم على جلب المصالح ؟؟ بمعنى ازالة أسباب الفساد أفضل كثيرا من فعل الصالحات ؟؟؟؟ أليس من الأولى أن تنزلوا الى الشوارع والحارات والأزقة وتنصحوا الناس ( بالرفق والحسنى ) أن يكفوا عن شرب المخدرات ؟؟ أن يكفوا عن سب الدين ؟؟ أن يكفوا عن الشهوات ؟؟ أن يتقى كل رب أسرة ربه فى نساء بيته وملابسهن ؟؟؟؟؟؟

مجرد أسئلة من شخص مسلم يعمل عقله محاولا أن يصيب

8 comments:

الازهرى said...

القاعدة الشرعية تنفعمن يعلم الشريعة ويعمل العقل
وهؤلاء ليسوا من أيهما هم يتبعون فقط
من كانوا ينادون بأن الخروج على الحاكم حرام ومنعوهم من المشاركة ومن قالوا بغزوة الصناديق

حمى الله مصر من فتنتهم

أنا - الريس said...

أسئلة تستحق الإجابة
لكن متلموهومش برضوا
انا شايف إن الموضوع يمشي قانوني
وصاحب الحق يرجع له .
واللي ما يرضاش بالحق ياخد علي دماغه أيا كان

مع احترامي للسلفين والمسيحين

صوت من مصر said...

عارف الغريب حاجه كده محيرانى ...... انى مش بكرههم على قد ماهما بيكرهونى فيهم
افرض ان كميليا طلعت مسيحية فعلا ... هيقتلوها .. مش فاهمين ان ربنا خلق الناس ديانات والناس تختار الصح
مش فاهمين اى حاجه غير العند .....
هايل

Foxology said...

الازهرى

انا الحقيقة عندى شك كبير ان الآلة الاعلامية الضخمة اللى أصحابها نادوا بعدم الخروج على الحاكم الظالم وقالوا بغزوة الصناديق الخ الخ ان الناس دى هى اللى ورا اللى بيحصل فعلا وطبعا ثقافة القطيع هى الصوت الأعلى فى الموضوع ده

ربنا يكفينا شر الفتن

شكرا لمرورك وتعليقك

Foxology said...

MR.PRESIDENT

لازم يمشى قانونى مهو قبل الثورة حاجة وبعد الثورة حاجة والقانون اللى يحبس رئيس يابق قادر انه يظهر الحق ولا ايه ؟؟

بس تفتكر لو الحكم كان فى صالح السلفيين وظهرت كاميليا وقالت انها مسيحية هيسكتوا ؟؟؟

شكرا لمرورك وتعليقك

Foxology said...

صوت من مصر

بالظبط فى ناس كدة اسلوبها يخليك تكرههم كلهم على بعضهم حتى لو كان فيهم حد كويس وبيفهم وفرضك اللى قلته فرض محتمل جدااا ومستنى رد فعلهم لو ده حصل هيبان وقتها الناس دى بتفهم ولا كالعادة قطيع ماشى ورا حنجرة من الحناجر اياها

شكرا لمرورك وتعليقك

الميكروباص said...

السياسه المتبعه في مصر حاليا هي سياسة الصوت العالي
ومن يعلو صوته هو اللي يكسب
ولو علي صوت أي طرف على حساب قضيه جماهيريه شغلت الرأي العام ستكون له الغلبه في المستقبل
وعلى هذا الاساس يتم التعامل مع الامور
ولهذا السبب ان شاء الله هانروح في داهيه

Foxology said...

لورنس العرب

المهم يا باشمهندس ان أصحاب القرار فى مصر ميتأثروش بالصوت العالى ده واللى انا شايفه لحد دلوقتى انه ابتدا يكون فى حزم شوية فى بعض المطالب ذات الصوت العالى زى مثلا مشكلة قنا

ربنا يثبت الناس اللى فوق ويثبت عقولنا نحن معشر الناس اللى تحت

شكرا لمرورك وتعليقك