غيبوبة

أفضل وصف لليومين دول ... غيبوبة ... دولة كاملة بشعبها عايشة فى غيبوبة .. فى ناس قصدها ان الدولة دى تعيش فى غيبوبة .. فى شعوب كل أهدافها ان شعب الدولة دى يعيش فى غيبوبة

أول القصيدة كفر زى ما بيتقال .. ده طبعا عن ما يسمى ( الحوار الوطنى ) اللى المفروض انه جلسان نقاش موسعة بتضم كل أصحاب الرأى واتخاذ القرار فى البلد علشان ننور النفق اللى دخلناه ونتفق على خطوات الخروج من النفق المظلم والنهوض بالبلد بعد كبوة 30 سنة فقر وجهل وتخلف ... النتيجة طبعا وكالعادة .. اتفقنا على ألاّ نتفق .. خناقات واعتراضات بالجملة من الكل ضد الكل .. اكيد فى ناس عندها حق فى اعتراضها زى مثلا اعتراض شباب الثورة على وجود أعضاء الحزب المنحل المسؤول عن تخلف شعب كامل وتغييبه لمدة 30 سنة وأكتر .. لكن المشهد العام بيقول ان الناس اللى قالت اننا غير مؤهلين للديموقراطية يبدو ان كان عندهم حق للأسف .. معندناش حاجة اسمها ثقافة الاختلاف وثقافة قبول الرأى الآخر حتى لو كان خطأ وعلى غير هوانا

البطء الشديد فى التعامل مع الفاسدين من رموز النظام السابق واللى كمان زود الطينة بلّة موضوع الافراج عن ماما سوزان والحاج زكريا عزمى بحجة انه عضمة كبيرة وحالته الصحية مش ولا بد يعنى وفى الطريق صفوت الشريف بحجة انه عنده سرطان ( وايه يعنى ماهو نص مصر عندها سرطان ) وغيره وغيره وغيره ... حد فهم حاجة ؟؟؟ باينة اوى زى الشمس مش كدة ولا ايه ؟؟؟ وخلونا نتعجن فى موضوع السولار وشيكابالا اللى بيحرق جمهور الأهلى والحكم اللى شتم جمهور الأهلى وعبدالحفيظ اللى أنقذه من مجزرة بالاستاد وسيبونا بأة من المليارات اللى اتنهبت واللى نهبوها خدولهم كام يوم اجازة فى بورتو طرة وهيخرجو منها مخرجين لنا لسانهم

الجماعات الاسلامية بدأت تشتغل بجد .. عملوا انتخاباتهم وانتخبوا أميرهم وهيأسسوا حزب وجريدة وقناة فضائية وكمان داخلين انتخابات مجلس الشعب اللى قالوا قبل كدة انهم مش هيدخلوها ( بيفكرونى بالناس اياها ) وربنا حليم ستار بأة على اللى بيحصل فى الكواليس اللى أكيد اكبر بكتير من اللى احنا بنخمنه ونتوقعه

اسوأ حاجة حصلت من ساعة الثورة عودة هالة سرحان لمصر بعد الفضائح المتكررة واللى كانت هى بطلتها .. عودة غير حميدة الحقيقة .. عودة مستفزة .. عودة باحتفال كبير فى المطار وكأنها كانت لاجئة سياسية تم تطفيشها من النظام السابق وراجعة بأة كأحد مكتسبات الثورة .. عودة بقناة فضائية جديدة المفروض انها مصرية والمفروض انها تبع الأمير الهبّاش واللى اتقال انها قناة مختصة بالشعب المصرى الثورى اللى لحد دلوقتى كل برامجها عبارة عن ستار أكاديمى وافلام عربى قديمة موضة السبعينيات حيث الهرتلة والاغراء الخ الخ الخ

هنفضل كدة لحد امتى ؟؟؟؟

16 comments:

الميكروباص said...

احنا هانفصضل كده على طول
حتى لو تم انتخاب رئيس جمهوريه -اللي من المفترض ان الشعب كله يمشي ورائه حتى لو كنت معارض له- الناس هاتقف له على الواحده وكل لما يعمل حاجه او تصرف هايشهر به من لم يوافق عليه في الانتخابات
شوف يا سيدي
احنا لسه فاضل علينا كتير جدا جدا جدا

maf2ou3a said...

انت عندك حق كنت بأزعل زمان من اللي بيقولوا أن الشعب المصري غير مؤهل للديموقراطية ..... كنت بأشوف أنة دة أستخفاف بعقلية شعب عظيم .... لكن الناس اللي قالت كدة بدأت أحس أن عندهم حق يمكن من رابع يوم بعد الثورة لما بدأت تتعمل قوائم لمين مع أو ضد و بقت الناس تخاف تقول أنها مع حسني لحسن حد يعتدي عليهم بالضرب
إحنا لا نستحق الديموقراطية علشان إحنا اصلا ما بنسمعش بعض... كل واحد فينا شايف نفسة أحسن و بيفهم عن بقية الحمير اللي واقفة معاه
أنا فعلا بقيت خايفة علي البلد دي
أخيرا الست مرجانة"هالة سرحان" الهانم فاكرة أن الناس ناسية أنها خرجت من مصر بفضيحة نساء مأجورات للعب دور ساقطات علشان هي مش عارفة تجيب ساقطات بجد أو لأن الساقطات اللي بجد لقوا أنهم اشرف من أنهم يطلعوا في برنامجها فأستغلت فقر ستات غلابة و خليتهم يلعبوا دور ساقطات و أفتكرت أنها لما تذيع الحلقة اليتيمة الي عملتها عن الديموقراطية كدة الناس حتنسي هي مشيت لية.
أنا شاكرة لمساحة التعبير التي أعطيتها لي

خواطر شابة said...

تعرف والله العظيم انا اعاني من ضغط الدم بسبب ما يحدث في كل من تونس ومصر وبسبب ما يحدث في ليبيا واليمن وسوريا الغيبوبة أصبحت هي ما احتاجه كي احتفظ بقلبي سليم ومعافى
انتظر بترقب يوم 27 ماي واتمنى ان ينجح في تصحيح مسار الثورة او على الاقل يوضح من جديد قوة الشارع وتمسكه بمطالبه لكل من عمي عن ذلك
دمت بكل الود وان شاء الله بكره احلى أكيد

Foxology said...

لورنس العرب

قلت : احنا هنفضل كدة على طول ومعاك الحق بصراحة مهو النظام السابق والسابق عليه كمان أنشأوا جيلين كاملين (60 سنة ) معندهومش أى وعى سياسى أو حتى حقوق ديموقراطية !!

انا خايف فعلا من اننا نفضل كدة .. كام ألف ميعجبهومش اى حاجة حتى لو كانت ايجابية يبقى نروح الميدان ونقعد نطبل ونعدد على الثورة

تحياتى وشكرا لمرورك وتعليقك

Foxology said...

maf2ou3a

مهو الناس دى مقالتش الكلام من فراغ .. هما عارفين هما بيقولو ايه لأنهم السبب فى ان الشعب يبقى كدة وبالتالى هما أدرى بالشعب كويس اوى

الست هالة سرحان كانت فاهمة اننا نسينا ومع ذلك الحق مش عليها الحق على اللى عاملها مهرجانات واحتفالات وقناة مخصوص وعلى اللى طبلها وهيطبلها بعد كدة

عليه العوض وربنا يسترها

شكرا لمرورك وتعليقك ودائما الآراء مرحب بيها هنا حتى لو كانت ضد افكارى طالما بنطالب بالديموقراطية يبقى نطبقها على نفسنا الأول :)

Foxology said...

خواطر شابة

كلنا كدة ... الأستاذ محمد حسنين هيكل قال بعد الثورة بحوالى أسبوعين ان باب الثورة اتكسر ولما انكسر ووضح اللى وراه بقينا واقفين متكتفين مش مصدقين اللى احنا شايفينه من ظلمات وفساد الخ الخ

يوم 27 مايو هيبقى يوم صعب على الكل وخصوصا الجيش لأنه كدة فى مواجهة مباشرة مع الشعب اللى من الأول وهو بيتحامى فى الجيش

شكرا لمرورك وتعليقك وربنا يسترها

maf2ou3a said...

Foxlogy

شكرا علي ردك و ماعتقدش أننا أفكارنا مختلفة ؟؟؟؟ يمكن؟؟؟؟

Foxology said...

maf2ou3a

العفو على ايه ؟؟ اكيد افكارنا متفقين فيها على الأقل مش عاجبنا العك اللى بيحصل

شكرا لمرورك وردك :)

شمس النهار said...

كل يوم بسأل نفسي نفس السؤال كل ماحاجة تحرق دمي
الاول اقول معقول مافيش فايدة يعني ولا ايه
بس تصدق برضوا عندي امل

صوت من مصر said...

بس يا سيدى وركبت التاكسى من دوله خليجيه وجت على مصر
دى هاله سرحان
القناة انا شفتها وسبيت 100 مله
الفكره كلها
اننا لسه بنعانى من 30 سنه جهل

Foxology said...

شمس النهار

مهو لو قلنا مفيش فايدة يبقى خفافيش الظلام انتصروا علينا ولو سبنا نفسنا للأمل أخاف نصحى على يوم زى يوم النكسة كدة الواحد محتار حتى فى احساسه

شكرا لمرورك وتعليقك وربنا يستر

Foxology said...

صوت من مصر

اكيد كلنا كدة مش لوحدك ... انسانة مستفزة بس الحق مش عليها الحق على الله بيطبلها ويعملها كل الهيلمان ده

شكرا لمرورك وتعليقك يا كيمو

Emtiaz Zourob said...

قلوبنا معكم .. ربنا يعدي هالايام على خير ان شاء الله ،
كل بداية صعبة ، لكن عندي امل بأن الغد أفضل ان شاء الله ..

دمت بخير وتقبل خالص تحيتي وتقديري ..
سعيدة لمروري هنا ..

Foxology said...

وجع البنفسج

طبعا كل شئ بيكون صعب فى بدايته والأمل موجود بالرغم من كل القلق والشكوك والخوف اللى مالينا

شكرا لأول مرور بالمدونة وشكرا لتعليقك

شمس النهار said...

معلش ياابو يوسف ماعرفش المدونة حصل لها ايه في تعليقات مااتنشرتش وتعليقات الاسم لناس تانية
ورديت تاني عليك هناك عندي

وصحيح مابتنشرش ليه بوستات

Foxology said...

شمس النهار

ساعات البلوج بيفوت كدة معلش حصلت معايا كتير :)

والله انا التدوين قليل اليومين دول لظروف عائلية صعبة شوية ودعواتك بأة :)

شكرا لمرورك وتعليقك