ثورة الشك

ثورة الشك مش أغنية كوكب الشرق الراحلة أم كلثوم .. ده الاسم الجديد اللى قررت أسميه لثورة 25 يناير وعندى أسبابى اللى ممكن تتفقوا معايا فيها واللى برضه باينة انها منطقية ولو بعضها مش كلها

أولا : حد عرف الشهداء خدوا حقهم ولا لأ ؟؟
ثانيا : حد عرف المصابين اللى متبهدلين بين المستشفيات مش عارفين يتعالجوا خدوا حقهم ولا لأ ؟؟
ثالثا : حد من رؤوس النظام الفاسد السابق اتحكم عليه بأى حكم حتى لو تنضيف حمامات السجن ؟؟
رابعا : حد يصدق ان الضباط اللى ضربوا المتظاهرين بالنار ياخدوا اخلاء سبيل ومن المحكمة ؟؟
خامسا : حد يصدق ان (قاضى محترم ) يأجل قضية محاكمة الضباط اللى ضربوا المتظاهرين فى الاسكندرية باللفظ (تؤجل القضية لليوم الثالث من الأسبوع الثالث من شهر أكتوبر القادم) مكسل حتى يحدد يوم للمحاكمة ؟؟
سادسا : حد برضه يصدق ان فى نفس جلسة المحاكمة وبعد النطق بالحكم يتم الاعتداء على أهالى الشهداء ومحامين أهالى الشهداء بألفاظ خارجة وعبارات واشارات جنسية بذيئة (الفيديو منشور ع اليوتيوب للى عاوز يتفرج) وكل ده جوة قاعة المحكمة ؟؟
سابعا : حديعرف مصير مبارك ايه بعد المحاولات الخايبة المستفزة من المحامى بتاعه اللى اسمه الديب ده واللى بيحاول يمهد اعلان خبر وفاته كحل نهائى لاغلاق المكلمة المفتوحة حوالين ثروته وجرايمه ؟؟
ثامنا : حد يعرف أخبار ماما سوزان ايه ؟؟ الفلوس اللى بيقولوا اتنازلت عنها راحت فين ؟؟ والحق المدنى سقط كدة ومفيش محاكمة ولا تحقيق خلاص ؟؟؟
تاسعا : حد يعرف اى حاجة عن طرة وسكان طرة ؟؟؟ مع العلم ان مفيش حظر نشر لأخبار المحاكمات والقضايا المتعلقة بيهم
عاشرا ودى الكبيرة بأة : حد يقدر ينتقد المجلس العسكرى ؟؟ حد يقدر يقول انه حصل تعذيب وتجاوزات ؟؟ هتقولولى دول ملايكة م السما ؟ هقولكم منظمة حقوق الانسان الدولية ومنظمة العفو الدولية طلبوا فتح تحقيق فى شكاوى تعذيب واجراء اختبارات عذرية للناشطات اللى اتقبض عليهم فى احداث ابريل ومارس اللى فاتوا ؟؟؟

اقدر اقول انها ثورة الشك مش ثورة التغيير .. بقينا بنشك ف كل حاجة .. النظام القديم بنفس الأساليب لسه موجودين والدليل : الناس المغفلة اللى ملهية فى ماتش الأهلى والزمالك ومين اللى هيمسك المنتخب

11 comments:

خواطر شابة said...

تعرف اوقات تنتابني رغبة في ان ادخل في سبات طويل استيقظ بعده لاجد الامور استقرت الى ما ستؤول اليه اصبحت اعاني ضغطا عصبيا من كل ما يدور حولي في كل البلدان العربية وفي بلدي ايضا
احيانا اتفائل واحيانا تصيبني نوبات تشاؤم لكني احاول جاهدة ان لا استسلم لها لانه عندي يقين ان الله لن يضيع دماء الشهداء هدرا
دمت بكل الود وان شاء الله يكون القادم أحلى وأنقى وأصفى ويزول الشك لتسطع مكانه شمس العدل والحرية والديموقراطية الحقة

Foxology said...

خواطر شابة

كلنا كدة تقريبا .. بنحاول نتفائل ونغض البصر عن كل ما يدعو للتشاؤم خاصة ما يصدر من السفهاء ومدعو الوطنية وماهم الا اذيال النظام السابق

ربنا يهدينا للى فيه الخير

شكرا لمرورك وتعليقك

دعاء مواجهات said...

الشك احساس طبيعى جوانا كلنا ناحية اى حاجه مش مطمنين لها ويمكن كان اهم اسباب قيام الثورة

الثورة دون شك هدفها التغيير اما كل ما يحدث من هرطقات فحتما سينتهى ولكن للاسف بشكل جبرى

سننتظر ونرى ..

Foxology said...

دعاء مواجهات

أخشى من طول الانتظار فكل شئ فى مصر ينسى بعد حين !! أتمنى كذب توقعى

شكرا لمرورك وتعليقك

Foxology said...
This comment has been removed by the author.
maf2ou3a said...

3anadak 7a2 bas tas7e7 el awda3 ba2a me7tag sawra tanya hal masr testa7mel thawra tanya ????

شمس النهار said...

لفت نظري جداااااااا موضوع اعلان وفاته!!!!!!
وبصراحة اندهشت من العبارة
هل تقصد انه مستنينه يموت ولا هعلنوا وفاته كده وكده
وبااااااقي الملاحيظ موفقاك جدا
وخصوصا موضوع المجلس العسكري

Foxology said...

maf2ou3a

المشكلة اننا مش مستحملين ثورة تانية لكن الوضع عامل زى اللى رقصوا على السلم بالظبط

شكرا لمرورك وتعليقك

Foxology said...

شمس النهار

فى كل الأحوال هيموت لكن هما هيعلنوا الوفاة سواء كانت حقيقة أو كدة كدة حسب الظروف وده اللى انا متأكد منه خصوصا بعد الدعوات الكتيرة للرجوع للميدان يوم 8 يوليو

شكرا لمرورك وتعليقك

كريمة سندي said...

الله المستعان .. لكن أنا عندي تفاؤل إن كل الحاجات دي مؤقته

تحياتي

Foxology said...

كريمة سندي

الخوف ان المؤقت يبقى شئ عادى ودائم

شكرا لمرورك وتعليقك