بعد البيان اللى قاله الدكتور عصام شرف رئيس الوزراء امبارح بالليل واللى لبى فيه 7 مطالب من مطالب الثوار المعتصمين فى ميدان التحرير من يوم الجمعة 8 يوليو أقدر أقول مع احترامى الكامل للدكتور شرف ولشخصه المحترم والنزيه .. شكلك هتوحشنا يا دكتور شرف
المجلس العسكرى مقدمش حاجة غير عودة منصب وزير الاعلام وللأسف اللى مرشح له أسامة هيكل أحد الأبواق المتعفنة من الزمن الماضى وأحد الحناجر اللى كانت بتهاجم الثورة والأدلة بالهبل للى يدور .. وقال ايه .. رئيس تحرير الوفد .. مش برضه اللى عينه كان السيد البدوى اللى دمر الدستور وكان عامل قناة الحياة مندبة علشان مبارح تنحى ؟
الدكتور عصام شرف .. خطوة انهاء خدمة الضباط المتهمين بقتل الثوار خطوة متأخرة جدااااااااااااااااااااااااااااا وللأسف كانت نقطة سلبية عليك مش ليك .. وللأسف كمان مرة البيان ده خلى عدد الناس اللى بتطالبك بالأستقالة يكبر لأنهم حاسين انك الرجل المناسب فى المكان المناسب بس فى الزمن الغير مناسب نهائيا
ارجع وأقول .. التركة تقيلة .. المشاكل بعدد الرز اللى فى شوال .. ربنا يعينك علينا ويعينا عليك وفى النهاية احب تشوفو الفيديو ده علشان نفتكر ميدان التحرير والثورة الجميلة
4 comments:
ربنا يعينه ويكون قد المسئوليه عشان مش يكون مصيره انه يوحشنا
كلمات الجخ حلوه اووووي
تسلم ايدك
Eno
ربنا يعينه على المطالبات المتصاعدة المطالبة باقالته هو و حكومته
شكرا لمرورك وتعليقك
كلنا خايفين والخوف بقى اكبر من قبل كدة بمراحل
بس منقدرش نجزم ونقول ان دكتور عصام شرف مبقاش واحد مننا
فعلا الوضع مش مفهوم ولا واضح فى ايه بجد
والجيش ليه كان ساكت اليومين اللى فاتوا دول ولسة طالع انهاردة يلقى بيان
وغيره
فى حاجات احنا مش عارفين نفهمها بس اللى واثقة منه ان الجيش طول عمره هيفضل مع الثورة ان شاء الله
ولازم مننساش ابدا انه بعد ربنا بجد اللى حمى مصر
لان كان الامر جايله اصلا بضرب المتظاهرين
ندا منير
محدش فاهم حاجة
ده أبسط تعبير فعلا لحالتنا كلنا والله أعلم باللى بيحصل فى الكواليس وموضوع الجيش حامينا ده واجبه الأول مش فضل ومنّة على الشعب زى ما المجلس العسكرى بيقول ضمنا وصراحة فى الفترة الأخيرة
ربنا يسترها
شكرا لمرورك وتعليقك
Post a Comment