أنا واليافطة !

امبارح بالليل .. واحد غريب خبط على بابى .. فتحت لقيت شاب شكله عجيب .. آيس كاب مش قادر يلم شعره المفلفل الكبير اوى كعادة الشباب الغريب اليومين دول .. وتى شيرت أصفر عليه سبونش بوب وشورت جينز !!

هو : مساء الفل ياباشا
انا : مساء النور أى خدمة ؟؟
هو بعد طول تفكير غير منطقى : ممكن اعلق عندك يافطة فى البلكونة ؟؟
انا : يافطة ؟؟ يافطة ايه دى ؟؟
هو : انتخابات .. عمرو موسى
انا بحدة : لا آسف مبحبش الفلول!
هو مندهش : فلول ؟ عمر موسى مش فلول
أنا : لا معلش ده فلول بأة ولو مش عارف ممكن أثبتلك
هو محاولاً تخفيف حدة النقاش : يعنى أمشى؟
أنا : لا يا سيدى انت على راسى بس انا مش هستعمل اى حيطة ف شقتى حتى لو كانت سور البلكونة من برة فى إنى اعلق دعاية انتخابية لأى حد لأن محدش يستاهل
هو : طيب ياباشا شكرا سلامو عليكو

ده اللى حصل امبارح ! ينفع كدة ؟؟؟؟

4 comments:

شمس النهار said...

كويس انهم استأذنوك
في عمارات بيقوموا الصبح يرقوا شفيق وموسي علي جرانهم
:)))
احتلال من اولها ياله اهو شفيق خد الشر وراح

لورنس العرب said...

طيب الحمد لله انه استأذن
انا يا حاج عندي شقه دور أرضي عاملها مكتب ليا
صرفت على الواجهه بتاعتها فلوس كتير عشان يبقى منظرها حلو
العيال عملوا عليها رسومات الالتراس وبوظوها
بعدها رحت مكسرها وعاملها رخام
راحوا لازقين عليها صور ابو اسماعين

Foxology said...

شمس النهار

احتلال من أولها باين عليه كدة فعلا :))

اه يا عينى خد صابونة لوكس محترمة :)))

شكرا لمرورك وتعليقك

Foxology said...

لورنس العرب

يا خبر ابيض !! أنا لو منك ارفع عليه قضية اتلاف ممتلكات خاصة زى ما ناس عملت على فكرة بسبب موضوع البوسترات ده

شكرا لمرورك وتعليقك