الشعب المتحرش

احنا شعب متحرش بطبعه ... متدين بطبعه سابقاً اللى كانت مقولة مشهورة أوى اليومين اللى فاتوا لكن طبعاً وتبعاً لتغير الظروف بقت : متحرش بطبعه

كلنا بنتحرش ببعض وفى ناس بتتحرش بنفسها أساساً .. مش شرط يكون التحرش جنسي علشان يبقى اسمه تحرش .. مثلاُ الطفل الصغير اللى لسه مطلعش من البيضة تلاقيه ماشي فى الشارع بيتحرش بطفل تاني زيه علشان يتخانق معاه ويضربه ويطبق عليه اللى شافه قبلها بليلة فى قناة المصارع أو تايم سبورت اللى شغالين 24 ساعة مصارعة. ممكن كمان تلاقى حد فى ميكروباص بيتحرش بالسواق (أو العكس فى الغالب) علشان برضه يفش غله فيه ويطبق عليه خناقة عجبته فى فيلم (إبراهيم الأبيض) أو أحدث إبداعات السينما السبكية - المصرية سابقاً - فيلم (عبده موتة) وغيرها من الأفلام العبقرية اللى بتجيب رغبة فى القئ دى.

لكن اللى بيتحرش بنفسه ده تلاقيه دماغه بتاكله .. عاوز يفرغ شحنة غضبه أو همه أو ضيقه فى أى حد أو أى حاجة .. اللى زمان كان اسمه (بيخانق دبان وشه) فتلاقيه مثلاً بيتلكك لمراته وعياله أو لواحد ماشي فى الشارع وهو واقف فى البلكونة على بعد 3 أدوار .. الخ

دى كانت نماذج بسيطة جداً من التحرش اللى أصبح طبع أساسي للشعب المصري .. اتغيرنا آه لكن للأسوأ للأسف .. العيال اللى بتنزل فى العيد وزحمته علشان تقل أدبها قبل ما تحاسبوهم وتضربوهم وتدهنوا وشهم هباب وتزفوهم .. اسألوهم الأول : اتعلمتوا
التحرش فين ؟؟؟؟؟؟

  1. فيلم هابط
  2. اغنية شعبية مسفة
  3. فتوي مشبوهة من شيخ فضائيات بيقول سن التزويج 9 سنوات وهو سن مناسب جداً
  4. وسائل أخري

طوبي لك أيها الشعب المتحرش .. أيها الشعب المزدوج

4 comments:

شمس النهار said...

ضحكتني علي الاطفال اللي بتتحرش ببعض عايزة تضرب بعض
:)

وتفتكر مين اللي هيحاسب الناس اللي بتفسد الذوق العام

كل سنه وانت طيب

Foxology said...

شمس النهار

شمس النهار .. نورتي الكيت كات .. الأطفال فعلاً أصبحوا كدة والبركة فى قنوات المصارعة وافلام الكارتون اللى مليانة عنف وكائنات فضائية .. أما الناس اللى بتفسد الذوق العام اللى يحاسبهم ربنا لأننا لسنا بعدول علشان نحكم على بعض

شكراً لمرورك وتعليقك

لورنس العرب said...

ازيك يا استاذ
ياريت ما تغيب عنا وتكتب كل يوم

Foxology said...

لورنس العرب

ازيك يا باشمهندس نورتنى والله وأكيد نفسى اكتب وابقى موجود لكن احياناً الصمت بيكون أفضل :)

شكراً لمرورك وتعليقك