حاجات كتيرة

كنت ناوى اكتب عن حاجة معينة بخصوص العشر الأواخر من رمضان كل سنة وانتم طيبين لكن لقيت ان الموضوع هيبقى مكرر لكن اللى احب اقوله هو التجربة الشخصية فى الحب الألهى بمعنى انك لما تسجد لله فى قلب الليل وفى سجودك تدعى من قلبك بجد وتحس انك بتدعى لأول مرة ولأول مرة صلاتك ليها طعم تحس ان روحك قربت تلمس السما وعيونك مش شايفة غير الجنة وحاسة بيها ايوة العين بتحس هى تجربة نادرة وغريبة لكن هى احساس قبل اى شئ ... ربنا يتقبل مننا جميعا ويحسن ختامنا
--------
كل الناس صحابى اللى دخلو الجيش تعبانين .. مؤهلات عليا اتجندو وبدل ما يتدرب على سلاح آلى ولا بندقية بورسعيد حتى لا ماسك مقشة ومقطف وبيلم الزبالة واللى احسن منه شوية بيبقى عامل تموين بنزين فى اى محطة بنزين تابعة لجهاز الخدمة الوطنية وللأسف دول مؤهلات عليا يعنى هندسة وطب وعلوم ... عرفتو ليه محدش بيحب يتجند فى الزمن ده ؟
--------
ايه اخبار الدويقة ؟؟؟
--------
هو الدبة اللى قتلت صاحبها من خوفها عليه وحبها ليه .. ياترى هى حست بندم بعد لما مات ؟
--------
احسن حاجة بعملها اليومين دول وبتخلينى فى مود كويس الى حد ما هو فنجان القهوة المظبوطة بن محوج من الغورية مخصوص مع تراك موسيقى صوفية تركية او اغنية لست الكل فيروز
كل سنة وانتوة طيبين بمناسبة العيد ومظنش انى هكتب حاجة عنه النوم افيد فى الوقت ده لأن الناس كلها نفسها تنام محدش بينام كويس من اول رمضان

16 comments:

Eno said...

احساس حلو يافوكس احيانا بحس بيه بسجد وانا بصلي بليل لوحدي والدنيا كلها ساكته مش بسمع صوت غير صوتي مش صوتي من بره لالا صوتي من جوه جوايا بينادي علي ربنا سبحانه وتعالي وبيشكيله اللي حاسس بيه ساعتها بحس بخشوع وبحس انه في ايد بتطب تطب عليه في الوقت ده بلاقي دموعي نزلت في الصلاه لوحدها

كل سنه وانت طيب:)

Foxology said...

eno

اكيد احساس حلو والحلو اللى فيه انه فعلا بيبقى صوتك من جواكى من غير وسيط وروحك تحسى انها بتتعلق بجلال الله وتترجاه فى القرب منه وتلبية احتياجها

ربنا يتقبل مننا ويرزقنا كل حاجة تقربنا لرضاه ولفضله الكريم :)

Alkomi said...

فوكس

كل سنة و انت طيب

حلو الكتابة عن الروحانيات حتى لو مكررة انا شايف كان ممكن تكتب عنها على فكرة

الله يهله مع القهوة المزبوطة

عقبال ما تشربهاش لوحدك

Beram ElMasry said...

سيدتى . سيدى
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم

Foxology said...

محمد الكومى

ربنا يخليك يا عم مجاهد الكلام فى الروحانيات مهمل فعلا كان مكرر بس بيبقى له طعم واحساس مختلف كل مرة

بنشربها نسكافيه .. وش بيغمز

نورتنى وكل سنة وانت طيب :)

Foxology said...

beram elmasry

الف شكر على المرور والتعليق والتهنئة

كل سنة وانت طيب ونورت الكيت كات :)

tarek momen said...

بالنسبة للأحساس اللي بتحسه في صلاة الليل فتعريفه الأحسان اي تعبد الله كانك تراه
زادك الله من هذا الأحساس الجميل ودعاء ان يمن الله علينا بذات الأحساس
موضوع الجيش بقي موضوع مؤلم علي المستوي القومي يعني المفروض يضموا الكليات الحربية الي كليات السياحة و الفنادق من كتر النوادي وقاعات الأفراح اللي بيعملها الجيش
بالنسبة للدبة لأ طبعا انما حست بالفخر لأنها انقذت صاحبها من الذبابة
بالنسبة للقههوة انا مش كييف لكن لامانع لو عزمتني اني اشرب معاك علشان خاطر فيروز قيثارة السماء

Foxology said...

tarek momen

اكيد الدبة حست بالفخر ربنا يكفينا شر عمى القلوب :))


تنورنى يا استاذ طارق ده انا اجيب غدا وعشا مش قهوة بس :)

نورتنى كالعادة :)

شمس النهار said...

كل سنه وانت طيب
كل سؤال من اللي طرحته عايز مدونه لوحده
خاللي البحث فيهم لبعد العيد
عيد سعيد عليك وعلي اينو الجميله

Foxology said...

شمس النهار

هى اسئلة مهمة وكل سؤال عاوزله كلام كتير فعلا

كل سنة وانتى طيبة :)

Unknown said...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

Foxology said...

نهر الحب

كل عام وانتى بخير وعيد سعيد علينا كلنا

هـمـــــــــــسة said...

ماشاء المدونة حلوة جدا
وحلو اوى الكلام فى الروحانيات

واجمل احساس لما تحس الواحد يحس انه بيسجد لربه ويكون معاه بقلب وروحه وكل تفكيره وقتها بيحس بامان وهدوء عمره مابيحسه فى اى وقت تانى

وكل سنة وحضرتك طيب

Anonymous said...

كل سنة وانت طيب
اما عن موضوع النوم انا كنت فاكرة انة الوحيدة اللى مش بعرف اظبط نومى ادارى الناس كلها زيي وانا اللى كنت فاكرة نفسي غريبة

Foxology said...

1/2 Doc

كل سنة وانت طيب / وانتى طيبة

شكرا للمرور والتعليق والكلام فى الروحانيات مهما قلنا مش هنوصل لنهاية فيه لأنه احساس والأحساس مهما كان مكرر لكنه فى كل وقت له طعم مختلف

شكرا مرة تانية للمرور والتعليق لأول مرة بالكيت كات :)

Foxology said...

بنوتة مصرية

كل سنة وانتى طيبة

موضوع النوم ده موضوع شامل وعام خصوصا للناس اللى بتشتغل وبتصحى بدرى فييجى رمضان بيحصل لخبطة جامدة فى مواعيد النوم والصحيان بتأثر لحد العيد وبرضه لو فى دراسة نفس الموضوع مع الطلبة

شكرا للمرو والتعليق :)