حاجات تفرح وسط العك اللى عايشين فيه

تـــــحـــــديـــث
بناء على تعليقات السادة الزوار تم الأطلاع على الأنجاز الخاص بالدكتور / مصطفى السيد وتبين انه من افضل علماء الطب المصريين الموجودين بالولايات المتحدة حاليا وهو صاحب اكتشاف دواء جديد لعلاج السرطان بواسطة النانو تكتولوجى وتم منحه ارفع وسام علمى امريكى من قبل الرئيس الأمريكى جورج بوش الأبن كذلك تم تكريمه ببلده الأصلى مصر من قبل رئاسة الوزراء والمركز القومى للبحوث وعدد من المحافل الأخرى المحلية
شرفت مصر يا دكتور مصطفى




بقالنا يومين اهو بنسمع حاجات تفرح عن المصريين بس للأسف حاجات خارجية يعنى حاجات بتحصل برة البلد مش جوة البلد






اول حاجة هى تألق مهاجم منتخب مصر عمرو ذكى المحترف فى صفوف فريق ويجان الأنجليزى .. تألقه المستمر ماشاء الله لاقوة الا بالله مع فريقه الأنجليزى فى واحد من اقوى الدوريات الرياضية على مستوى العالم ومش بس كدة لا ده كمان بأة هداف الدورى الأنجليزى برصيد سبعة اهداف بدون منافس حتى الآن ... حاجة تشرف لما بشوف الجمهور الأنجليزى لابس التى شيرت بتاعه وماسك علم مصر






تانى حاجة هى بطولة العالم للأسكواش المقامة بانجلترا اليومين دول وان مبارة النهائى هتبقى بين اتنين لاعبين مصريين احدهم رامى عاشور بطل العالم للأسكواش لفئة الشباب واللى فاز فى الدور قبل النهائى على بطل العالم اللاعب المصرى المخضرم عمرو شبانة بطل العالم 3 مرات متتالية واهى حاجة تقول ان مصر فيها حاجات كويسة وناس بتعرف تنجح اهى






تالت حاجة هى وصول النادى الأهلى المصرى لنهائى بطولة افريقيا للأندية ابطال الدورى لكرة القدم للموسم الرابع على التوالى وان شاء الله يفوز بالكأس ويوصل كاس العالم للأندية للمرة الثالثة ومن نجاح الى نجاح




كل اللى فات كان نجاح مصرى مبهر لكن للأسف فى مجال واحد بس ... الرياضة ... كان نفسى يبقى مجالات تانية كتيرة زى الزراعة والصناعة والتجارة والسياسة و .. و .. و






عموما احب اقول ان العك وصل منتهاه ... من امبارح والبلد واقفة تماما بسبب اصلاحات كوبرى اكتوبر اللى حبكت تتعمل دلوقتى فى بداية الدراسة وزحام كل يوم اللى بأة مرض مزمن فى جسم العاصمة ... احب اقول للسيد صاحب القرار الخاص بالصيانة فى التوقيت الحالى ... الله يقرفك زى منتا قارف الناس دى كلها ومش عارفة توصل اشغالها ولا دراستها بالمنظر ده






19 comments:

واحدة مفروسة said...

تصدق يا فوكس
انا فعلا ببقا فاخورة جداا اني مصريه لما بشوف التفوق بتاع المصريين بره مصر
و على فكرة التفوق بتاع المصريين فى كل المجالات بس التركيز على المجال الرياضي
لكن كل المجالات حتلاقى اسم او اتنين مصري
حتى فى الحرفيين و العمال اللى بيروحوا برة مصر
حتلاقيهم متفوقين
بس يظهر ان مصر هيه المشكلة
هيه اللى مش مهيئة الجو المناسب لولادها لإظهار المهارات و التفوق

Foxology said...

واحدة مفروسة

((بس يظهر ان مصر هيه المشكلة
هيه اللى مش مهيئة الجو المناسب لولادها لإظهار المهارات و التفوق))

هو ده اللى انا اقصده ونفسى اقوله بس هقوله وبعدين ؟ مفيش فايدة ... يعنى ابسط مثال النهاردة انا بسبب الزحمة والمسئول العبقرى صاحب قرار اجراء صيانة كوبرى اكتوبر فى الوقت ده من السنة وبسبب قلة المواصلات والزحامة الرهيبة صبح وليل بسبب كل ده كنت بفكر اروح بيتنا تانى وانام بالرغم من انى كنت نازل الصبح نشيط جدا وعاوز اطلع شغل كتير لكن روحت ماليش نفس ابص ف ورقة اساسا وركنت كل الشغل لحين ميسرة

نورتى الكيت كات :)

واحدة مفروسة said...

فوكس
اتفرج على العاشرة مساءا
شوف الدكتور الجميل اللىى اسمه مصطفى
حاجه تفرح
و فى نفس ذات الوقت تشلنا
هههههههههههههه

لورنس العرب said...

ليه يا عم
نسيت الدكتور مصطفى السيد - ولو انه صناعة أمريكاني- بس بردو ده الراجل بتاعنا
وعلىا لرغم من انها حاجات خارجيه لكن بردو ولله مفرحه
حاجه ترفع من الروح المعنويه شويه
ولسه لما ان شاء الله الاهلي ياخد الكاس- هتلائي البلد هايصه
...
أما بالنسبة لموضوع الصيانه بتاع كوبري أكتوبر
طبعا كان من الأفضل العمل في الصيف
خاصة اني حاليا كرهت نفسي بسبب المواصلات
لكن احنا كالعاده بناخد قرارات في اوقات زي الزفت
ولو عملنا العكس هايبقى غريب على ا لمسئولين بتوعنا

Foxology said...

واحدة مفروسة

لتانى مرة ييجى اسم الدكتور مصطفى السيد فى الموضوع .. نبقى نشوف ايه الحكاية

لا عادى انا واخد على العضمة فى الكرشة :))

تحياتى :)

Foxology said...

لورنس العرب

والله ياباشمنهدس انا اتشوقت انى اعرف موضوع الدكتور مصطفى وهدور على اى حاجة عنه نفسى افرح بحاجة تبع البلد

كوبرى اكتوبر ؟؟ لا تعليق بجد لأنها حالة اثبات للغباء المستفحل اللى بنعانى منه كحكومة وكسادة مسؤلين واان مروحتش الشغل النهاردة احتجاجا على البهدلة اللى شوفتها امبارح

نورت الكيت كات :)

كـــيــــــــارا said...

اخيرا في حاجه نقول هييييييييييييييه عليها

يارب يزود الكوب المليان في اعيننا ويقل الكوب الفاضي في اعيننا برده

Foxology said...

كيارا

الحمد لله اخيرا

هو على فكرة مصنع كوبايات مش كوباية واحدة :)

شكرا للمرور والتعليق :)

محمد الكومي said...

و احب ازود فرحتك و اقولك ان ملك الكبدة هينطلق من اول و جديد

3omda said...

اللـه ايه ده؟ دي مصر فيها حاجات تفرح ايه...والله غريبه انا مش مصدق

Foxology said...

محمد الكومى

يارااااجل ... يا سيدى عليك يا عم مجاهد :)

Foxology said...

3omda

لالالا فى حاجات بتفرح بس بتوه وسط الزحمة والعك :)

نورت الكيت كات فى اول زيارة :)

شمس النهار said...

طبعا كلنا فرحانين بالناس دي وعوضونا عن خيبة الامل في بكين
وبعدين انت عايز تفرح علي طول
مش لازم يتعكنن عليك وانت رايح الشغل الصبح عشان توصل مستوي علي الاخر وتنتج كويس
ربنا يرحمنا

Foxology said...

شمس النهار

اه والله دى كانت خيبة ملهاش مثيل

وبالنسبة لموضوع الشغل الصبح .. انا مستوى خلقة من غير مواصلات والله على الأكل على طول :))

نورتى الكيت كات :)

Eno said...

يااااه انا التعليق ال15
او مره ابقي كده يلا الحمد لله اني لحقت تعليق اساسا

كلها فعلا نماذج مشرفه يافوكس وتستاهل الذكر والتقدير :)

Foxology said...

eno

شوفتى بأة عمايلك ؟؟ ينفع كدة ؟؟

اول وآخر مرة .. يا اما انتى عارفة :))

نورتينى ونورتى الكيت كات :)

دعاء مواجهات said...

ههههههههههههههههههههه

عندك حق الله يقرفه

هماكدة ديما ميحبوش يشوفونا بنعمل اشغالنا ف راحة بال

تحياتى ليك يافوكس باشا

بيس

Foxology said...

دعاء مواجهات

هما مبيحبوش يشوفونا اساسا :))

بيس يا دعاء

محمد الكومي said...

كل سنة و انت طيب يا شيخ حسني

بس على كلامك اول عيد ميلاد ده كان يوافق 2 اغسطس

صح ولا انا غلطان