دولــــة الأنـــــا



احنا يا جماعة فى دولة الأنـــا .. ايوة دولة الأنا .. دولة الفرد الواحد .. مش مقتنعين ؟ عندى ادلة كتيرة

اول دليل .. شوفو ايه اللى بيحصل لنا فى الشوارع لما يكون موكب معدى .. اى موكب .. من اكبر موكب فى البلد لحد اصغر موكب اول امبارح كوبرى 15 مايو فضل واقف متعطل لأكتر من نص ساعة فى منطقة معدية النيل الواصلة بين العجوزة والزمالك وده بسبب ان واحد لابس بدلة ومعاه لاسلكى كان موقف الطريق لموكب لا يتعدى سيارتين سود اللون كان معدى .. شوفتو حاجة تفقع اكتر من كدة ؟؟ علشان واحد معدى يبقى مئات يقفو يستنوه .. تبقى دى دولة الأنا ولا لأ ؟

تانى دليل .. لو كنت او كنتى شغال او شغالة فى قطاع عام او حكومة ومش هقول قطاع خاص .. جه يوم قبض المرتب او اى مكافأة ولتكن منحة العيد مثلا اللى الكل بيستناها علشان يشترى اللى هو محتاجه فى دخول العيد .. لما تيجى تسأل هنقبض امتى ؟ يترد عليك بمنتهى البرود .. بعد العيد !! نعم ؟؟؟ ازاى يعنى ؟ يترد عليك بنفس البرود ان الباشا الموظف اللى مسؤل عن اعتماد الشيك اللى هتتصرف بيه الفلوس مضرب عن العمل علشان مخادش حقه فى المكافأة اللى هى اساسا مش ليه من الأصل دى لناس تعبت وشقيت وهو ميعرفش اساسا هما عملو ايه علشان ياخدو المكافأة دى والناس تخبط دماغها فى الحيط وتروح تشحت بأة او تقف جمب اى جامع بيوزع لحمة للفقرا علشان يعرف يعيد مع عيلته .. تبقى دى دولة الأنا ولا لأ ؟

كنا بنقول زمان ومازلنا بنقول وبنضحك على نفسنا قبل ما نضحك على غيرنا بجملة .. احنا دولة مؤسسات .. لا معلش احنا دولة الأنا يا جماعة

12 comments:

Eno said...

صح يافوكس عندك حق
100%
محدش بيدور غير علي نفسه

ربنا يرحمنا

Foxology said...

Eno

بالظبط محدش شايف غير نفسه هو وبس ومش مهم الباقى بأة

ربنا يرحمنا برحمته

نورتى الكيت كات :)

Alkomi said...

لو مش عاجبك يا شيخ حسني في دولة عالناصية اسمها دوة احنا ممكن تعزل و تسكن فيها و في دول في العالم المتقدم اسمها دولة ال انتم

ايه رايك

مفروش ولا ايجار جديد؟

Empress appy said...

ومش جديده خالص الموضوع ده تعالى اتفرج فى المواصلات فى اى حاجه فى الدني هتلاقينا بقينا بنفضل الانا عن الاخر ودى بقت انا تقرف بجد
كل سنه وانت طيب

tarek momen said...

تعديل صغير بعد اذنك
نحن نعيش دولة ال هو
ضمير الغائب يعني
اصل ال انا مطحون جدا
تحياتي و كل سنة وانتم طيبين

AHMED SAMIR said...

وياريتها كمان دولة ال أنا
دي بقت دولة ال (هو)او ال (هي)..مش ال انا خااااالص
تحياتي

Kiara said...

معاك حق

وطول مااحنا كده مش هنتقدم ابداااااااااااا

Foxology said...

محمد الكومى

ياريت العنوان يا عم مجاهد خلينا نرتاح بأة :)

تحياتى وكل سنة وانت طيب

Foxology said...

Appy

عندك حق بقت الأنا فى كل حاجة كل واحد بقى شايف نفسه وبس متفهميش انانية ولا غشاوة ولا ايه بالظبط

تحياتى وكل سنة وانتى طيبة :)

Foxology said...

tarek momen

والله يااستاذ طارق لغويا ممكن تكون صح دولة الـ هو وممكن تكون دولة الأنا بافتراض الأقلية مش السواد الأعظم المطحون

تحياتى وكل سنة وحضرتك طيب :)

Foxology said...

A.Samir

حتى لو كانت كدة فهى فعلا مش انا اللى هو انا وانت لالالا دى دولة الأنا بتعته هو لما بيتكلم عن نفسه :)

تحياتى وكل سنة وانت طيب :)

Foxology said...

مولان

زمان برضه كنا كدة وكنا متقدمين الى حد ما بالرغم من دولة الأنا اللى كانت هى الصفة السائدة وقتها خصوصا بعد الثورة وموضوع مراكز القوى والكلام الكبير ده لكن دلوقتى الموضوع كبر اوى زيادة عن اللزوم

تحياتى وكل سنة وانتى طيبة :)