مترو مصر الجديدة .. أزمة امانة


Align Center
العنوان غريب انا عارف .. بس لما تقرو ه
تعرفو قصدى


النهاردة ركبت مترو مصر الجديدة من اشارة روكسى لحد ميدان رمسيس ... مترو مصر الجديدة زى ما معظمنا عارف انه وسيلة المواصلات الأقدم للربط بين وسط المدينة ومنطقة مصر الجديدة ومدينة نصر
المترو كان مفخرة بمعنى الكلمة من ناحية النظافة والنظام والحاجات الحلوة دى لكن طبعا دلوقتى شكرا كل عام وانتم بخير ... ابواب مبتقفلش ولو قفلت تلاقيها من غير ازاز ... شبابيك مفتوحة ليل ونهار صيف وشتا لا بتفتح ولا بتقفل ... ده غير بأة النظافة اللى مش موجودة اساسا وكله كوم بأة وأعطاله كوم تانى ... ممكن تبقى متعلق بين المحطات قاعد فى المترو اللى عطل بيك ومستنى فرج ربنا بأة سواء اتصلح او مترو تانى جاى من ورا بيزق المترو العطلان لأقرب محطة

من كام سنة قريت فى الأهرام ان المهندس فلان الفلانى المسؤل عن مترو مصر الجديدة قال انه بيتم تطويره وهيرجع زى زمان ... قول للزمان ارجع يا زمان .. طب فين يا باشمهندس ؟؟؟ المشاكل هى هى مفيش تغيير .. ولا يمكن التطوير هو دهان المحطات والكراسى ؟؟؟ يمكن برضه

اكتر حاجة لفتت نظرى ان المترو ده يا جماعة ماشاء الله على طول زحمة .. لأنه بيوصل مسافات بعيدة بسرعة -مقارنة بالميكروباص والأتوبيس- مع رخص تمن التذكرة اللى مبتزيدش عن ربع جنيه او نص جنيه فى نوادر الخطوط
لكن المهم ... مع الزحمة دى والفلوس اللى داخلة دى .. المترو بيكسب ؟؟؟؟ الأجابة ... لا وألف لأ ... علشان يا سادة يا محترمين المترو بيبقى عربيتين بس وكل واحدة فيها كمسرى واحد وساعات كمان يبقى العربيتين فيهم كمسرى واحد بس !!! يعنى فرصة هايلة للركوب بالمجان !!!

العربية الواحدة فيها 3 ابواب ... لو كل باب وقف عنده كمسرى هنبقى ضربنا عصفورين بحجر واحد ... عملنا فرص عمل لناس قاعدة ع القهوة ... محدش هيركب المترو مجانا ومحدش هيبقى فى ازمة ضمير وأمانة انه يدفع تمن التذكرة الرخيص ده حتى لو الكمسرى مقالش .. تذاكر ... وبالتالى المترو هيدخل فلوس ويطور نفسه ويجدد شبابه من غير منحة الحكومة

بس مين يقول ومين يعمل ومين قبل ده يفهم ؟؟؟



16 comments:

Eno said...

هههههههههههههه

المترو البطه انا بحب اركبه اوي يافوكس لما اكون فاضيه وياسلام باه لو الخط بتاع المطار

تبقي علي الطبطاب لانه غالبا مافيش حد في العربيه غيري :D


افكار حلوه اللي قولتها
بس علي رئيك
بس مين يقول ومين يعمل ومين قبل ده يفهم ؟؟؟

Foxology said...

Eno

المترو البطة ؟ على رأيك بيجرى زى البطة تحسى انك هتدلقى برة المترو :))

الأفكار كتيرة بس مين اللى ينفذ ؟؟

شكرا لمرورك وتعليقك :)

EmY said...

مين يهمه التطوير

المترو مهم جدآ و محتاج اهتمام و بمجهود بسيط هايرجع زي الاول بس مين مهتم اصلا و مين يفكر

تحياتي

tarek momen said...

مترو مصر الجديدة كان زمان شركة وبعدين انضم لهيئة النقل العام واصابته لعنة النقل العام من سرقات و اختلاسات وفساد اداري وحاليا يمكن ان تسميه ترمواي مصر الجديدة
ثم ان مصر الجديدة نفسها قدمت و وبقت مصر اللي مش جديدة علشان فيه حي تاني اسمه مصر القديمة
تحياتي

~*§¦§ Appy §¦§*~ said...

زمان لما مكنش عندي بطوط بتاعتى كنت بركبه لما اكون فاضيه المصيبه الاكبر بقى بجد انه لما يعطل فى مفارق يا دى النهار الدنيا بتقف كلها رايح جاي شمال يمين
بجد انا شايفه انه حاجه كويسه بس لو فعلا طوروا فيه شويه
بس بصراحه هو رايق فى بعض الخطوط وكنت بحب اقعد مع نفسي
ما تقدم افكارك للسيد فلان ده يمكن يستجيب

محمود محمد حسن said...

فكرني بالتورماي الزرقا عندنا ،
بس احنا الإسكندرانية بنعشق الترماي الزرقا بقى ما اقولكش يعني

Foxology said...

EmY

محدش يهمه التطوير .. ولو كان هامه يبقى اكتر جزئية هتهمه هى : هينوبه من الحب جانب ولا لأ ؟؟؟

عليه العوض فى الفلوس اللى بتترمى فى الأرض دى

شكرا لمرورك وتعليقك

Foxology said...

Tarek Momen

انا فعلا اعرف انه كان زمان شركة اجنبية يا استاذ طارق واتدهور حاله وبقى زى ماهو دلوقتى

الطريف ان زى ما حضرتك بتقول ان ناس كتيرة دلوقتى بتقول عليه الترمواى مبقاش مترو ولا توك توك حتى

نفسى حاجة زى دى مهمة يهتمو بيها شوية حرام تضيع بالشكل ده

شكرا لمرورك وتعليقك :)

Foxology said...

Appy

هو فعلا اداة جميلة جدا للروقان :)

مشكلته انه بيعطل كتير ودى نتيجة قلة الصيانة او انتهاء العمر الأفتراضى للمعدات نفسها بس مين ينفذ ومين يعمل ؟؟

انا فكرت فعلا انى ابعت شوية افكار بخصوص الموضوع ده للباشمهندس المسؤل بس مش عارف اروح فين واعمل ايه ؟؟ وازاى اتحمل اى سخرية ممكن تصدر من دماغ فاضية ممكن اقابلها فى طريقى للسيد المسؤل ؟

شكرا لمرورك وتعليقك

Foxology said...

محمود محمد حسن

اه يا محمود انا بحب الترام بتاع اسكندرية اوى الأزرق والأصفر ولمابكون ف اسكندرية لازم اركبه وفرق كبير اوى بين ترام اسكندرية وترام مصر الجديدة فرق سما وأرض

شكرا لمرورك وتعليقك :)

شمس النهار said...

انت بتعرض المشكله وكمان بتجد الحل
انت اكيد هيتقبض عليك

لورنس العرب said...

تعرف اني بحب اركبه فعلا
بيحسسني اني في ايام أنور وجدي ونجيب الريحاني
مع انك لو مشيت جنبه بالعجله هاتسبقه
بس ده التراث - هانعمل ايه
والشيء الغريب انهم لم يحاولوا تطويره
يمكن بعد فتره يخلوه سياحي وتكون التذكره ب 10 جنيه

Foxology said...

شمس النهار

ايه ده ؟ هيتقبض عليا ؟ يالطيف اللطف ياااارب :))

طيب اتجوز الأول وبعدين يتقبض عليا حرام كدة ادخل دنيا الأول :))

شكرا لمرورك وتعليقك الجميل :)

Foxology said...

لورنس العرب

والله ياباشمهندس فعلا الواحد لما بيركبه بيحس بالروقان بتاع أيام زمان

يطوروه ويجددوه ويرفعو تمن التذكرة وماله بس تبقى معقولة بجنيه حتى مش بعشرة :)

نورتنى وشكرا لمرورك وتعليقك :)

أحلى حياة said...

السلام عليكم ورحمة الله وبركاته

اؤيدك في حاجات واختلف معاك في حاجات
معاك في انه طبعا مابقاش زي زمان زي ما بتقول (ولو اني ماوعاش عليه زمان دا كان عامل ازاي انا من ساعة ما عرفته وهو كده) من حيث النظافة والاهتمام بيه ومظهره الكويس ... الخ
واختلف معاك في حتة سرعته وانه بيوصل لمسافات بسرعه
اعتقد حصل لبس بينه وبين مترو الانفاق
:D
لان مترو مصر الجديده (الزقزوقه، زي ما عرفت مؤخرا انه بيطلق عليه الاسم العجيب دا) من ابطا ما يكون بجد ودي حقيقه ملموسه خلتني اضعه على قائمة الممنوعات (الوسائل الممنوع ركوبها تماما بالنسبه لي) زي الميكروباص كده بالضبط منعا للنقطه والفرفره والشلل الرعاش وارتفاع ضغط الدم وغيرها من امراض ممكن تصيبك من جراء ركوبهم

يلا
ربنا يخليلنا سي تي ايهات ميدان الحجاز والمطار النظيفه
:D:D
والاتوبيسات والميني باصات الخضراء النظيفه بردو (ايوه فعلا دي حقيقه الصراحه بتاعة منطقتي نظيفه بجد مقارنة بغيرها بتاعة باقي المناطق التانيه كلها، حتى سبحان الله ممكن تحس الفرق في الركاب نفسهم :D)
:D

تحياتي :)

Foxology said...

احلى حياة

وعليكم السلام ورحمة الله وبركاته

هو سريع من ناحية انه بيوفر وقت خصوصا لو كان الواحد مثلا رايح من ميدان رمسيس لمصر الجديدة تخيلى كمية الأشارات اللى هتقابليها فى الطريق ؟؟

فى مناطق فعلا فيها المواصلات نضيفة جدا ودى تبع المنطقة انا معاكى فى دى

شكرا لمرورك وتعليقك :)