ادينى فى الهايف


طبعا كلنا عارفين الجملة الشهيرة ... ادينى فى الهايف وانا احبك يا افننس ... الجملة الشهيرة اللى قالها الفنان محمود عبد العزيز او مزاجنجى فى الفيلم الأشهر فى تاريخ السينما المصرية .. الكيف .. للقاص والروائى المتميز .. محمود أبو زيد

الجملة دى انا لاحظت انها تعبير حقيقى لماضينا وواقعنا كمان وهقول شوية ادلة

ليلة النكسة .. التلفزيون اذاع مسرحية مدرسة المشاغبين تقريبا وفى ناس بتقول لالا ده اذاع فيلم .. شنبو فى المصيدة حيث السيناريو الملئ بالأفيهات الفاضية الهايفة مثل الرنجة فى السرنجة والعملية فى النملية الخ

فى عز ازمة غزة خرجت علينا القنوات المتخصصة وغير المتخصصة بكمية افلام هايفة مستمرة حتى الآن فى حملة شبه منظمة وشبه متفق عليها مثل افلام السبعينات التافهة وافلام التسعينات التجارية وغيرها وغيرها

المثال الأول كان يعتبر من ماضينا .. المثال التانى يعتبر حاضرنا وواقعنا .. الهيافة هى الحل .. هو ده شعار الشعب دلوقتى .. وتعالو نبص للشباب واللى عاملينه فى نفسهم .. من مطرب الجير على رأى موجة كوميدى للجروبات على الفيس بوك اللى بتطالب بعودة القرد بتاع موبينيل من جمهورية شموبنوجو ولا معرفش اسمها ايه للأغانى الشعبية التافهة اللى بنسمعها ليل ونهار فى المحلات والمكروباصات وعلى مستوى الجمهورية مش منطقة معينة بيئة

ادينى فى الهايف ... الجملة التى اصبحت دستور الشعب


26 comments:

Appy said...

لا مش كله حرام عليك يعنى جابوا فيلم السادات
وبعدين بيروحوا عن الشعب مش عاوزينه يضايق
اما اغانى الميكروباز مش عاوزه اقولك مدي الاعياء اللى بيجيلى منها المشكله فيها لما يكون عندك طفل فى البيت وهما بيذيعوا الاغانى دي
والله بخاف على ابن اختى وقولت لمامته اوعي الولد يسمع ده
هو من هواه المسلسلات زي جدته وبيتقمس الشخصيات ههههههه

Eno said...

زي ماقولت بالظبط
هي حمله ومنظمه

اقوي تسميه للحمله دي من وجهة نظري
حملة الاستيكه :))

نظرا للي بيحولو يعلوه للناس غسيل مخ مع محو لااي ثقافات تفيد :)

ربنا يسترها :)

Foxology said...

Eno

فعلا حملة الأسيتكة هو الأسم الحقيقى :))

ربنا يسترها ومننزلش اكتر من كدة

شكرا لمرورك ونورتى الكيت كات :)

Foxology said...

Appy

جابو فيلم السادات اكيد علشان يقولو ان مصر طول عمرها صاحبة الريادة وهى ام الدنيا ومتجوزة عرفى من ابو الدنيا والكلام اياه ده :)

اغانى الميكروباص بجد بقت بتجيبلى حالة انهيار عصبى مؤقت خصوصا لو الطريق زحمة بأة وببقى فى صراع نفسى مع المبادئ وذوقى فى المزيكا ومع الأغانى دى

الجيل اللى طالع بجد هيشوف العجب وربنا يسترها عليه

شكرا لمرورك وتعليقك :)

لورنس العرب said...

آخر اغنيه سمعتها من يومين كانت بتقول:

هابطل الكيلو باترا ، واشرب إل أم
وهاروح الباطنيه أجيب برشام وأشم

خدي بالك من الواد انا نازل يا سعاد



احنا عندنا استعداد للهيافه
يمكن لأنها عامله زي المخدرات
بتخلي الواحد ينسى اللي هو فيه
الناس نم صعوبة الظروف نفسها تعيش مسطوله على طول


ربنا يسترها

عقل مهوي said...


عم أحمد .. مساء الخير .. انت بتقول ان اديني في الهايف وانا احبك يا افننس .. تعبير حقيقي لماضينا وواقعنا .. واستدليت علي كلامك ده بمثالين تلاته اربعه

انا موافق معاك تماما .. بس معلش .. التعميم ما اتفقش معاك فيه .. الجمله اللي قلتها بتوضح انك بتتكلم عن ماضينا وواقعنا بلغه التعميم .. وفعلا "كلنا: بنحب افننس ومصدرين الهايفه .. بس مش كلنا مصدرينهل اربعه وعشرين ساعه .. يمكن يتكون الهيافه والافيهات العبيطه حاجه كلنا بنستخدمها .. بس ماحنا مش عايشينها دايما ماهش دستورنا

وانا هقولك علي دليل واحد بس

اقرا البوست بتاعك انت اللي كتبته المره اللي فاتت
:)

Foxology said...

لورنس العرب

ده غير اغنية >> استغفر الله العظيم اللى كلها مزيكا رقص وهرتلة يا باشمهندس

عارف اكتر حاجة غاظتنى امبارح ؟؟ حلقة الفنان كاظم الساهر فى البيت بيتك لما محمود سعد قاله ايه رأيك فى اللى بيحصل فى الساحة الغنائية دلوقتى مع سطحية الأغانى والكلمات والأسفاف كاظم رد رد غريب جدا !! قاله يا استاذ محمود الناس تعبانة ومرهقة ومهمومة من الأخبار ومن اللى حاصل بالدنيا ومفيش مانع يفكو شوية ويتسلو شوية !!!

وده تأكيد لكلامك انها زى المخدرات :)

شكرا لمرورك وتعليقك :)

Foxology said...

عقل مهوى

مهو للأسف بعد ما بقت الأغلبية العظمى كدة وبعد ما بقت الفئة القليلة رفيعة الذوق هى الأقلية .. عاملين كدة زى القلة المندسة :))

منكرش انى بحاول مكونش هايف وتافه وابقى راكب الموجة ودى محاولة لأنى اعمل اللى عليا واقاوم الهيافة :)

نورتنى فى اول مرور :)

enjy said...

عادى يعنى واحنا بنستمتع بالموضوع دة اصلا...........احد اشكال الهروب

شمس النهار said...

فعلا ابوزيد كان قاري تريخ صح
بس يوم النكسه ماكانتش مدرسة المشاغبين اتعملت اصلا
واحب اضيف ان في ممثليين في المسرحيه دي شاركو في حرب 73
اما الهيافه اللي منتشره وسببها ارجوا من الجميع يقروا تاريخ العرب المسلميين في الاندلس
وسلم لي علي الاعلام الموجههههههههههههه

daktara said...

اديني في اللذيذ يا هايف

ملاحظة حلوة


شكلها باظط
انظر حولك
د. خالد عزب

daktara said...

Your comment has been saved and will be visible after blog owner approval.
اغبي جمله ممكن اشوفها بعد كتابة تعليق



شكلها باظط
انظر حولك
د. خالد عزب

EmY said...

الهيافه اصبحت سمه مميزه للشعب العربي كلو

الحكومه الرشيه عايزه الشعب يعمل دمااااغ

Foxology said...

enjy

لا مظنش ان فى حد بيستمتع بالهيافة حتى لو كان من هواة الهيافة

شكرا لمرورك وتعليقك :)

Foxology said...

شمس النهار

ابوزيد كان فعلا قاى تاريخ صح اوووى

جميلة اوووى لفتة الأندلس :)

نورتى الكيت كات :)

Foxology said...

Daktara

مصطلح جديد .. ادينى فى اللذيذ يا هايف او العكس .. ادينى فى الهايف يا لذيذ يارايق سفن اب :)

بالنسبة للجملة الغبية اللى تقصدها فأنا متعمد لأن لازم يكون فلترة خصوصا مع انتشار وسيلة الدعاية والأعلان عن منتديات وافكار عجيبة وكأنه باب الأعلانات المبوبة فى اهرام الجمعة ده غير الأراء التحفة اللى بتكون بعيدة تماما عن موضوع البوست وبضطر امسحها وانا مشمئز

شكرا لمرورك وتعليقك :)

نهر الحب said...

السلام عليكم
بعد النكسة ظهر كمية كبيرة من عينة افلام شنبوفى المصية وهى افلام الالهاء وقتل الفكر فى الشعب وحتى الاحساس
واشتغل على دا بقى
وطبعا شعار محمود ابو زيد وناطقة محمود عبد العزيز ادينى فى الهايف
ودا نفسة شعار النعامة حين تضع رأسها فى التراب

Foxology said...

نهر الحب

بالظبط ده اللى انا اقصده .. بعد النكسة كان كل هم الأعلام انه يلهى الناس بأى تفاهة ممكنة وغير ممكنة

شكرا لمرورك وتعليقك:)

3omda said...

لا دي مش سياسه قنوات متخصصه .دي سياسه شعب جاهل شعب مايعرفش قيمة الوقت.عارف ايه اكتر حاجه ضايقتني في العدوان علي غزه ؟مش الاطفال اللي بيمتوا ولا الشيوخ اللي بيغتالوا لان كل دول شهداء في الجنه ان شاء الله لكن اللي تعبني نفسياً طريقة قتلهم الاسلحه المتطوره اللي ماجتش الا نتيجه العلم’العلم اللي احنا للاسف مانعرفش عنه حاجه الا من رحم ربي هو ده اللي خلنا خانعين مستسلمين ومش فاضين غير ميلودي و روتنا.

Foxology said...

3omda

كلامك صح يا عمدة والله .. مهو الجهل اللى الشعب فيه جاى من انه بقى متركبله عمة كبيرة واصلة لحد مناخيره .. سياسة التهييف والتغييب القديمة

يلا ماعلينا

شكرا لمرورك وتعليقك :)

أحلى حياة said...

السلام عليكم ورحمة الله وبركاته

(Y)(Y)
معاك وأؤيدك بشكل تام ومطلق
بس أحب أضيف جملة واحدة: ...
إلا من رحم ربي ...! ه
(لأنني من مناهضي التعميم في أي شيء) ه

تحياتي

Foxology said...

احلى حياة

التعميم فعلا يعتبر غلط لأن فى ناس كويسة

شكرا لمرورك وتعليقك :)

محمود محمد حسن said...

مسرحية مدرسة المشاغبين ما كانتش في النكسة ، كانت في احداث يناير 77

صبح صبح يا عم الحاج

Foxology said...

محمود محمد حسن

يبقى كان شنبو فى المصيدة اكيد

وادينى فى الهايف

تحياتى :)

الشنكوتي الكبير said...

هو انت متعرفش
يا نهار ابيض
هو انت متعلمش
يا خبر ابيض
معقول
لا مش معقول
ازاي
محدش قالك
ولا انت كنت مسافر ولا اايه
في مسرحيه لمحمد صبحي مبيعرضوهاش كتير قديمه هي كانت بتتكلم عن الشعب لما النظام زهق من الثورات والتظاهرات والحركات السياسيه حبت تشغل الشعب فأخترعت النوادي الرياضيه وزرعت بذرة العداء الفزيع بين المشجعين
وكان الهدف ان يكون فيه حاجه ينفث الشعب فيها فكرة الثوره والأنتماء وكده يعني وفي نفس الوقت محدش يلوم الحكومه على اي حاجه في الموضوع
يعني ده اتغلب او غلب مش مشكلة الحكومه
وكانوا جايبين الأب اللي كان بيتظاهر علشان حزبه ورأيه السياسي
بقى يعمل مظاهره علشان فريقه وناديه
وطبعا مش هاقولك قد ايه الفكره دي نجحت وطلعت من اقوى النظريات الناجحه المطبقه فعليا في بلدنا

قال ويقولك بلدنا مفيهاش تنظيم وماشيه عشوائي
عيب يا ابني
ده نظام جامد قوي

سلااااااااااااااااااااااام
اخوك ايهاب

Foxology said...

الشنكوتى الكبير

تعليق كبير ومفيد :))

فعلا ده نظام كبير اوى وهو التفريغ التام لأى مضمون هام

شكرا لمرورك وتعليقك :)