اقتلوا شاربى المخدرات يرحمكم الله

طالعنا اليوم امام المسجد الغير اعتيادى .. حيث لكل مسجد عدد اربعة ائمة يتناوبون خطبة الجمعة فيما بينهم طبقا لنظام وزارة الأوقاف .. طالعنا بخطبة مروعة عن حكم شاربى المخدرات وبالأخص البانجو والحشيش واعتبار ذلك النوع من المخدرات خمرا غير سائلة وله كل الحق فى ذلك بالطبع فكل ما يخمر العقل ويذهبه فهو خمر

حتى وصل الأمر بالخطبة من الحديث عن حكم المخدرات فى الشرع ونزولها منزلة الخمر فى التحريم على المسلمين وفجأة تحولت الدفة الى الذين يشربون المخدرات وتوالت الأحكام العجيبة التى لم أسمع بها مطلقا - بالرغم من دراستى للفقه الأسلامى بحكم دراستى الأزهرية الأصل - ومن ضمن الأحكام التى ارغى فيها الشيخ وأزبد ان شارب الخمر لا يتزوج من المسلمين ولا يدفن فى قبورهم ولا يطعمه أحد من أكله ولا ولا ولا ولا مع التدليل على تلك الأحكام بجملة من الأحاديث التى أظن انها ليست صحيحة وغير مشهورة بالمرة وكان من المفترض ان يقول الشيخ : اقتلوا شاربى المخدرات يرحمكم الله !!!!

ايها الشيوخ .. ارحموا من فى الأرض يرحمكم من فى السماء ... اين قوله تعالى : كنتم خيرأمة اخرجت للناس تأمرون بالمعروف وتنهون عن المنكر .. صدق الله العظيم

الله سبحانه وتعالى قدم الأمر بالمعروف حيث اللين والرفق على النهى عن المنكر بأى وسيلة كانت سواء اليد او اللسان او القلب كما اخبر الرسول الكريم صلى الله عليه وسلم ... هل لا يوجد شئ اسمه الدعوة بالأحسان ؟ هل لا يوجد شئ اسمه النصيحة ؟؟؟؟؟

اتعجب بحق من هؤلاء ولا أدرى ماذا يريدون

لنا الله


18 comments:

مواطن مصري said...

و لما نقول يبقى فية رقابة على مشايخ و الي بيقولو الخطب الناس تزعل

Foxology said...

مواطن مصرى

انت عاوز الحق ؟؟

مشايخ المساجد اللى تبع وزارة الأوقاف كلهم عاوزين اعادة تأهيل منهم ناس كتيرة جدا بيتعامل مع الخطبة والدرس الدينى على انه مهام وظيفية من الدرجة الأولى وشكرا على كدة

خير الأمور الوسط دايما لاابقى شيخ من شيوخ الفضائيات ولا ابقى موظف بقول كلمتين وخلاص

شكرا لمرورك وتعليقك :)

لورنس العرب said...

الشباب الصغير من الخطباء بصراحه حاجه تفرح
احنا كان عندنا واحد فضل يقول نفس الخطب لمدة حوالي 5 سنين
يمكن هذا الرجل يجيد التحدث- لكنه قليل العلم
ودي مصيبه

Foxology said...

لورنس العرب

المشكلة ان مفيش تجديد ولو فىتجديد وكان كويس بيبقى منبوذ وغير مرغوب فيه لو تجديد بأة من نوعية صاحبنا ده فعلا بتبقى مصيبة

شكرا لمرورك وتعليقك

حاسوباتيه said...

فعلا ده غريب قوي ربنا يهدي شيوخنا لحسن بقيت بسمع عن حاجات غريبه جدا منهم

Foxology said...

حاسوباتية

ولسه اللى جاى انكت وافظع فى نفس الوقت

شكرا لمرورك وتعليقك :)

Eno said...

ايه اللي جري للشيوخ ؟؟

من كام يوم حكاية شيخ الازهر والكلام اللي قاله للبنت بتاعت النقاب وبعد كده تصريحاته بأني المنقبه متدخلش تتعلم !!

ودلوقتي الشيوخ اللي عاوزين يعملو ربطايه علي اي فئه ويقعدو يأمرو ينهو عليهم ده رب العباد رحيم بيهم ايه في ايه ؟؟
تحياتي يافوكس:)

Foxology said...

Eno

الشيوخ جاتلهم شوطة تقريبا !!!

شيخ الأزهر الموضوع كبر واتحرف على فكرة والراجل قالو انه قال وعاد وزاد وهو ولا فتح بقه بحاجة اصلا !! هتكلم فى موضوع منفصل ان شاء الله عن الموقف ده

محدش عاد فاهم ايه اللى بيحصل وايه المطلوب بس انا مش مطمن ومش مرتاح وربنا يستر

نورتى الكيت كات :)

الازهرى said...

لالالالالالا
الجامع عندكم مشايخه غلابه والله صبرك بس كام يوم أفوق وهأحكى حاجات ان شوفتها فى المساجد
هتخليك تبوس على ايد صاحبك ده

تحياتى دوما

Foxology said...

الأزهرى

ههههههههههههههههههههههههه

بجد افتكرت توفيق الدقن فى فيلم مراتى مدير عام لما كان بيقول : ده انا اعرف حاجات تشيب .. تشششششيب :)))))

والله بجد يا ازهرى الواحد مش عارف ايه اللى بيحصل ده والواضح انها حاجة عامة مش مكان معين وبس

تحياتى وشكرا لمرورك وتعليقك :)

صوت من مصر said...

لنا الله

Foxology said...

صوت من مصر

لنا الله يا كيمو وربنا يرحمنا برحمته

شكرا لمرورك وتعليقك :)

محمود محمد حسن said...

ادبح يا باشا

:))

Foxology said...

محمود محمد حسن

انا ولا هو ؟؟

شكرا لمرورك وتعليقك يا فنان :)

tarek momen said...

اولا انا ميسوط انك طلعت زميل دراسة حيث اني انا كمان خريج الأزهر الشريف
ثانيا انا مش قلق من موضوع تدني مستوي الخطباء في المساجد لانها سمة عامة في البلد وبص لاي لقاء مع شيخ الأزهر تعرف لماذا اصبح اسلوب الخطبة متدنيا فكرا و اسلوبا
ولذلك انتشرت ظاهرة النوم بين المصليين اثناء الخطبة و لا يوقظهم الا نداء اقامة الصلاة ولكن هذا لا يمنع انه هناك بعض الخطباء رحمهم الله من هذه الآفة ويتحثون باسلوب جيد و في مواضيع تهم المسلمين
اكثر الله من امثالهم وهدي الباقين
تحياني

Foxology said...

Tarek Momen

يشرفنى استاذ طارق انى اكون زميل أزهرى فى الدراسة طبعا :)

لغة الحوار المتدنية للأسف زى ما حضرتك قلت انها سبب رئيسى فى حالة الخطباء والخطب لكن بنسمع عن تطوير الخطاب الدينى وتعديله لمواكبة العصر ولكنه كلام ف كلام للأسف مفيش اى جديد ولا تعديل ولا مواكبة حتى

ربنا يكرم الناس اللى بتحاول انها تجتهد وتقدم الأفضل

تحياتى ونورت الكيت كات :)

dr.lecter said...

لا كده نافع ولا كده نافع

بص 40 بالمائه من المشايخ اللي بيطلعوا علي المنبر مش تبع لا اوقاف ولا ازهر ولا اي حاجه

ممكن تلاقيه سواق تاكسي ولا صاحب محل فاكهه ولا واحد بيتفرج حبه علي قناه الناس وحبه علي قناه الرحمه ويقولك انا كده تمام اروح اخطب بقي في الناس

والنتيجه مافيش خطاب ديني سليم

Foxology said...

dr.lecter

وحصلت فعلا عندنا ان ملقوش خطيب قامو جابو اول واحد اتبرع وكان سواق مكروباص ولك ان تتخيل مستوى الخطبة !!!

عليه العوض فى كل حاجة

شكرا لمرورك بالكيت كات