اليوم المصرى للبراءة

النهاردة اليوم الرسمى للبراءة من اى قضية مدنية او جنائية او اى حاجة



الحدث الاول : الشو الاعلامى الكبير المسمى بقضية هشام طلعت مصطفى المتهم بالتحريض على قتل الفنانة المغمورة سوزان تميم والحديث المتواصل عن زواج السلطة بالمال ... النهاردة الصبح كانت جلسة النطق بالحكم بقبول الطعن المقدم من هيئة الدفاع ضد حكم محكمة الجنايات باعدام هشام ومحسن السكرى واعادة المحاكمة مرة اخرة امام دائرة قضائية اخرى ... افراح اهل المتهمين واحزان اهل الضحية مع غضب اعضاء هيئة الدفاع بسبب تصرفات المحامى فريد الديب اللى حضر لقاعة المحكمة من الساعة 6 الصبح علشان يقعد فى الصف الأول ويبقى فى وش كاميرات التصوير والبث الفضائى وغيره من مظاهر الشو الاعلامى مع ثقة اعضاء هيئة الدفاع المطلقة فى القضاء المصرى انه هيحكم بالبراءة فى النهاية سواء تم اقرار قانون الغاء عقوبة الاعدام أو لا ... مهو عقوبة الاعدام جارى البحث عن الغائها من قانون العقوبات المصرى اليومين دول والكلام كتير فى مجلس الشعب اللى رفع الحصانة عن هانى سرور لما اتحكم عليه من الجنايات ولسه النقض مقالش حكمه النهائى بينما هشام طلعت مصطفى بطل الشو الاعلامى مجلس الشورى مجاش ناحيته بعد ما اتقبض عليه واتحكم عليه بالاعدام كمان


الحدث الثانى : الحكم ببراءة جميع المتهمين فى قضية تلوث مياه الشرب بمحافظة القليوبية بقرية البرادعة واصابة اهلها بالتيفود بل وتغريم الاهالى اصحاب الدعوى بخمسين جنيه مصرى اتعاب محاماة .... لا تعليق لكن سؤال برئ جدا :: هو ليه المستشار عدلى حسين محافظ القليوبية عمره ما اتغير فى الخمسميت حركة تنقلات او تعيين محافظين جدد بالرغم من المشاكل اللى بتعوم فيها المحافظة واخرها اصابة سكان قرية بالتيفود بسبب مياه الشرب الملوثة ؟؟؟؟؟

كدة كفاية النهاردة


11 comments:

الازهرى said...

انا مش متابع حكاية هشام مصطفى والناس دى

انما موضوع عدلى حسين فهو راجل حقيقي كويس وله انجازات كويسة فى المحافظة
وصدقنى أنا أعرف إنه الأقل أخطاءا وسط الباقيين بفرق كبيييييييييييير

تحياتى دوما

الازهرى said...

أخى العزيز

أبارك لك على الزفاف الميمون وكلى خجل من التأخير ولكنها ظروف الحياة التى جعلتنى أستغرق فى الكثير من العمل ولم اعرف إلا وأنا أبحث فيما فاتنى فى مدونتك

ألف مليون مبروك وأدعوا اله تعالى أن يبارك لكما ويبارك عليكما ويجمع بينكما فى خير
وأن يرزقكما الذرية الصالحة
وان يكون كل منكما عونا للآخر على طاعة الله

Eno said...

شئ كان متوقع ولا كنت فاكر الاعدام هينتصر

هههههههههههه

كله بيتنسي وكله بيعدي عادي خالص زي شكة الدبوس (وش بيغمز بس مفروس )
:)

تحياتي

Mafrousa said...

بص يا فوكس
الخبر الاولاني مش أثر فيا
لأنى حاسة من الأول ان الموضوع ده حيخلص على ولا حاجة
و هشام طلعت مصطفى حيطلع منها
اما بقا الموضوع التاني
هو اللى فرسنى بجد و بحق و حقيق
و حسبي الله و نعم الوكيل

Foxology said...

Eno

انا كمان كنت متوقع بس فعلا لو طلع منها براءةيبقو لعبوها صح المرة دى :)))

شكرا لمرورك وتعليقك

Foxology said...

الأزهرى

موضوع هشام طلعت مصطفى ناس كتيرة مش مهتمة فعلا بس انا مهتم لمجرد معرفة الناس اللى ماسكين بقو بيتصرفو ازاى فى مواقف زى دى

موضوع عدلى حسين اعتقد انه مش هييجى حاجة جمبعبد السلام المحجوب اللى فعلا عمل طفرة بمعنى الكلمة فى الاسكندرية وبالرغم من انجازاته الا انه طار ومفضلش ف مكانه وده اللى كنت اقصده

الله يبارك فيك يا ازهرى وعقبالك ياااااارب :)

شكرا لمرورك وتعليقك

Foxology said...

واحدة مفروسة

هو فعلا الموضوع التانى حاجة تفرس لأنه بجد بيدوس على اللى باقى من المواطن الغلبان

شكرا لمرورك وتعليقك

الميكروباص said...

واحد ملياردير
يتعدم ازاي؟
بيقولوا ان فريد الديب اخد 40 مليون جنيه في الدفاع عنه!!!

Foxology said...

لورنس العرب

منا قلت كدة من الاول ان واحد زى ده مينفعش يروح كدة فطيس حتى لو كانو مش عاوزينه ده بافتراض لعبة توازن القوى والمصالح والذى منه

شكرا لمرورك وتعليقك يا هندسة

سلمى said...

السلام عليكم
الصراحه من كتر النكد والمشاكل ووو اللى بيقدمه التلفزيون كرهته وكرهت اسمع الاخبار بس ارجع واقول لنفسى مينفعش من لم يهتم بامر المسلمين فليس منهم
ربنا يتوب علينا من الحكومه واللى زيها
تحياتى

Foxology said...

سلمى

وعليكم السلام

مهو الواحد فعلا بطل يتابع الاخبار منعا للغثيان ومرحلة ما بعد الغثيان كمان

ربنا يرحمنا برحمته

شكرا لمرورك وتعليقك