ااااه يا بلد

قلب الوطن مجروح لا يحتمل اكتر

الجملة دى فى اغنية قديمة لمحمد منير افتكرتها لما قريت خبرين النهاردة الصبح عن البلد الخبرين فيهم مرارة وسخرية الحقيقة مش متعود عليها سواء من نص الخبرين او من نصوص التعليقات على الخبرين

الخبر الأول : احتمالية حصول حفيدة الرئيس مبارك على الجنسية البريطانية خصوصا بعد ولادتها فى بريطانيا وكذلك والدها السيد جمال مبارك يحمل اقامة دائمة فى انجلترا ... الدنيا مقامتش زى ما قامت لما المطربة المشهورة اعلنت انها هتولد فى امريكا علشان بنتها تاخد الجنسية الامريكية وكأن المطربة المشهورة كانت خاينة ولا حاجة لكن هنا وستوب متوديناش ف داهية يا عم الحاج لكن سؤال مهم معلش ... هو السيد جمال مبارك لو اترشح للرئاسة هينفع ؟؟؟ على حد علمى ان طالما معاه جنسية غير المصرية واحد الوالدين غير مصرى وكمان مأداش الخدمة العسكرية مينفعش ولا ايه ؟؟؟

الخبر التانى : العالم المصرى الدكتور محمود غنيم واللى اكتشف علاج خطير لعلاج السرطان باستخدام مادة بسيطة جدااااا وهى الخميرة المنزلية ونجحت كل التجارب على الفئران وجارى تجربتها على الكلاب الأقرب فسيولوجيا الى الانسان ... الدكتور محمود غنيم مش لاقى حد يمول مشروعه علشان يخرج للنور ويقدر يعالج كمية المرضى المصابين بالسرطان على مستوى العالم وخصوصا مصر !!! التعليقات كانت فيها حزن كبير لكن كانت فى افكار ايجابية عجبتنى جدا منها اننا نعمل اكتتاب شعبى او نعمل حملة تبرعات واهى اكيد افيد من مستشفى 57357 اللى اتبنت بالكامل واتجهزت بالجهود الذاتية وحملات الشحاتة على القنوات الفضائية ولا ايه ؟؟؟

مستنى تعليقاتكم

12 comments:

AHMED SAMIR said...

وحتى لو ماكانش ينفع
هيخلوه ينفع ا باشا
هو احنا لينا بركة الا فريدة و ابو فريدة

Eno said...

بالنسبة لموضوع حفيدة لريس المتوقع من اي حد انه يعمل عبيط عنه دي حفيدة الريس والناس هتقول ده عوض ربنا ه في الحفيد اللي راح كويس انه الموضوع في بريطانيا

مش علي كوكب المريخ ولا اتولدت علي القمر

بالنسبة للدكتور بأه والعلاج ربنا يقويه ويعينه علي اللي بيعمله واقف
بينادي وسط شعب بيجي في الهايفا ويتصدر
انا عن نفسي مستعدة لاي مساهمة او تبرع عشان حاجه اكتشاف زي ده هيخفف عن ناس كتير ألمهم

تحياتي يافوكس :)

الميكروباص said...

1- فريده صاحبة بلد ولا تحتاج إلى الجنسيه البريطانيه، فهي أفضل من أهل انجلترا كلهم، لأنها تملك بلد باكملها
2- الناس بتسترزق من الاكل اللي بيجيب سرطان والمبيدات اللي بتجيب سرطان ومن كل حاجه بتجيب سرطان
وانت عاوز حد يمول الدكتور عشان يعالج السرطان؟
طيب والناس دي تكسب ازاي يا حاج؟

Foxology said...

احمد سمير

حق احنا لينا بركة الا فريدة وابوفريدة ؟؟؟

شكرا لمرورك وتعليقك

Foxology said...

اينو

اولا : ده اكيد وعلى رأى المثل : اعمل عبيط تعيش مرتاااااح

ثانيا : لو شركة واحدة بس من بتوع الزيروتسعمية قررت انها تعمل مسابقة وفلوس المسابقة دى تروح للتمويل ممكن ينفع بس محدش عاوز يعمل مصلحة للكل

شكرا لمرورك وتعليقك وتحياتى ليكى

Foxology said...

لورنس العرب

تعالى نعمل برنامج نسميه قلم جاف :))))

تحياتى يا باشمهندس

حلم بيعافر said...

اولا البنت اسمها فريدة مبارك
يعنى اى حاجة تنفع معاها ومع ابوها
ثانيا على راى عمرو اديب
زويييييييييل معرفش يشتغل فى مصر

Foxology said...

حلم بيعافر

بالظبط كأنه جواز سفر ديبلوماسىكدة

ولا اى حد محترم هيعرف يشتغل ف مصر

شكرا لمرورك وتعليقك

الميكروباص said...

تعالى يا سيدي انا معنديش مانع

Foxology said...

لورنس العرب

خلاص لو كدة نعمل ونبلور الفكرة والبث عن طريق الأنترنت مفيش اسهل منه :)

تحياتى

Haytham Alsayes said...

السلام عليكم

اولا الموضوع بتاع جمال وفريدة خليه علي جنب عشان لو اتكلمت في الموضوع دة احتمال نخش السجن جماعة بالصلاة علي النبي


ام ثانيا ودة شايفه الاهم حلو موضوع الكتتاب وياريت نشوف طريقة ليه وان ان شاء الله مستعد لنشر الموضوع والتنسيق معاك او مع اي حد ونشوف الطريقة اللي نشهر بيها الموضوع والمساهمة فيه بدل الحكومة اللي مانتاخا فيها ومش عاوزة تشتغل نشتغل احنا وربنا معانا

Foxology said...

هيثم السايس

اولا : عندك حق بالصلاة ع النبى :))

ثانيا : وانا كمان مستعد نبدأ فورا والطرق كتيرة سواء عن طريق مجموعات ع الفيس بوك أو دعوات ع المدونات او اى حاجة واقترح بداية اننا نعمل يوم ننشر فيه كلنا نفس الموضوع وهو حملة للمساهمة فى تمويل مشروع علاج السرطان

الف شكر على تشجعيك وتعليقك :)