هى فوضى

ايوة هى فوضى بمعنى الكلمة
حالة البلد فوضى بمعنى الكلمة
المرور - تصريحات المسؤلين - الحوادث العجيبة اللى مبتحصلش غير فى مصر ولازم أيام العيد - راجع حادثة انقلاب الصندل المحمل بالسولار فى مياه نيل أسوان - والحقيقة مش عارف منين المسؤلين بيجيلهم وش يكدبو علينا وهما عارفين اننا عارفين انهم كدابين
تانى ايام العيد كان عندى فرح فى مصر الجديدة والحقيقة اقدر اقول بالفم المليان لأى كداب زفة فى المرور ::: طظ فيك وفى كدبك بأن البلد كان المرور تمام التمام علشان يا محترم انا اخدت الطريق من عندى لرمسيس فى ساعتين ونص اللى اساسا هو ميزيدش عن نص ساعة فى الأيام العادية وسلملى على تصريحات هية النقل العام بتاعة كل سنة اللى هو هنزود عربيات ونزود مترو والكلام العبيط ده
تنبيه هام : الجيل القادم لمصر هو جيل من السفلة والرعاع والبلطجية والدليل على ذلك حوادث التحرش الجماعى فى حديقة الحيوان وحديقة الأورمان وحديقة الفسطاط طوال أيام العيد الغير سعيد بالمرة وسلملى على وزير الداخلية اللى باعت فى كل جنينة حبة عساكر عبط بشوية خرازانات
عليه العوض

8 comments:

بلال عادل رجب. said...

هى فوضى

Foxology said...

بلال

فوضى ومن النوع غير الخلاّق على فكرة

شكرا لمرورك وتعليقك البسيط

أنا - الريس said...

لو لم أكن مصريا لتمنيت أن أكون من أي حته تانية بس تكون محترمة .

طبعا انا بتفخر بمصريتي لأنها ليست تابعه لاخونا البعدا , ربنا يكرم الجميع ويهدي الجميع

في غياب الأخلاق ، تعيث الضباع ، وتنام الأسود ، والزمن بنا للعصر الحجر يعود .

خواطر شابة said...

موضوع التحرش صراحة لابد له من حل لانه متكرر وبشكل جماعي الامر اصبح ظاهرة لابد من دراستها وايجاد حلول لها لابد من سن قوانين ومن سلطة ردع لحفظ السلم الاجتماعي
دمت بكل الود وعيد سعيد رغم كل المنغصات

Foxology said...

MR.PRESIDENT

يا سيادة الرئيس احسن حاجة هو السطر الأخير فى تعليقك ومفيش احلى من كدة الحقيقة

شكرا لمرورك وتعليقك

Foxology said...

خواطر شابة

القوانين فعلا موجودة ومن سنة تقريبا صدر اول حكم قضائى ضد احد السادة المتحرشون لكن دلوقتى وفى العيد افراد الأمن - لو كانو موجودين اصلا - بيكتفو بأنهم بيتحجزو المتحرشين فى نفس المكان لمدة ساعة كدة وشكرا علشان طبعا خايفين على مستقبل السيد المتحرش اللى عمره ميزيدش عن 20 سنة !!! حاجة تقرف بجد

شكرا لمرورك وتعليقك وعيد سعيد يارب

Kiara said...

بلاش سيرة تحرشات العيد انا بجد علي اخري منها

حسبي الله ونعم الوكيل

ايه الجيل اللي جاي دا

لا بئا عنده احترام ولا اي شئ يااااه فين ايام اما كان لو في بنت بتتعاكس كان كل اللي واقفين بيدافعو عنها

لنا الله

Foxology said...

كيارا

زماااااااان اوووووى كانت الناس قلبها على بعض والكل بيبص لمصلحة غيره قبل مصلحة نفسه لكن دلوقتى ثقافة ( وانا مالى ) هى الثقافة السائدة فى الشارع للأسف

عليه العوض

شكرا لمرورك وتعليقك