حصيلة يوم الغضب



انا فخور وحزين

فخور باخواتنا اللى نزلو الشارع .. فخور بالآلاف اللى قالو كفاية .. قالو لأ .. قالو بطلنا نخاف وزهقنا من الصوت الواطى

حزين علشان مقدرتش اشارك فعليا لكن نظريا قدرت انقل اخبار عرفتها من مواقع النت المختلفة سواء عربية أو اجنبية

وهلخص اهم احداث يوم الغضب

- آلاف المصريين رجال ونساء وشباب وبنات تجمعو لأول مرة فى حدث هام بخلاف مباراة كرة قدم فى ستاد القاهرة

- آلاف المصريين كرهو الصوت الواطى وقالو .. لأ

- آلاف المصريين بينو غضبهم وسخطهم على الوضع المتردى للدولة والشعب المطحون

- احداث مؤسفة من بعض وليس كل افراد الأمن زى ضرب الرصاص المطاطى بشكل عشوائى امبارح بليل فى ماسبيرو قدام المقر الرئيسى للحزب الوطنى لما الناس حاصرته وحاولت تقتحمه الحزب اللى كان السبب فى اللى البلد فيه دلوقتى

- فى المحافظات التانية مظاهرات صاخبة شارك فيها آلاف انتهت بنصر شعبى زى ما حصل فى المحلة والسويس وسيناء وطبعا اسكندرية الغالية والصعيد القوى

معلومة مهمة جداااا

الحكومة حجبت موقع تويتر واللى عاوز يستخدمه يعمل الخطوات دى

ادخل على موقع

اختار اللغة وبعد كدة هتلاقى مكان تكتب فيه اسم الموقع اللى عاوز تدخله وبس

الحكومة كمان سيطرت على مواقع كتيرة وقفلتها زى الدستور والشروق وغيرها من المواقع المعارضة والنت بطئ جداااا

شباب مصرى رد على الاجراءات دى بعملية قرصنة كبيرة على موقع الحزب الوطنى وقفلوه لوقت طويل

الاعلام المصرى لا حس ولا خبر ومهتم جدا بمظاهرات شوارع لبنان وكان بيذيع مباشر اوقات ما كانت الناس تحت محاصرة مبنى التلفزيون الحكومى .. حاجة تضحك مش كدة ؟


6 comments:

خواطر شابة said...

تعرف امس والله العظيم صدمتي كانت كبيرة في الاعلام دريم الذي كان مغيبا طوال اليوم وكأنه في كوكب تاني وحتى برامج الشو المسائية كلها تطرقت للموضوع بشكل اقل من قيمته الحقيقية واكثر ما اضحكني اسامة سرايا عندما رأيته يتحدث على احدى القنوات انا الغير المصرية لم أتحمل ان اسمعه فما بالك بالمصريين.
امس كان يوم ناجح بكل المقاييس وكان رسالة واضحة وقوية للنظام اكيد وصلته
دمت بخير حال ودامت مصر عزيزة بأهلها

Foxology said...

خواطر شابة

الاعلام المصرى كان بيتكلم عن دولة تانية امبارح خصوصا المذيع الامور جداا تامر بك أمين وضيفه الظريف خيرى رمضان اللى نزلو تهزيق وشتيمة فى قناة الجزيرة علشان كانت بتوصل الصورة الحقيقية للى بيحصل فى الشوارع

الكوميديا كلها كانت فى قنوات الشو زى دريم واون تى فى كانت فعلا بتتكلم عن بلد تانية خالص وطبعا الفضائية المصرية والاولى كانت بتذيع لقاء مع السيد وزير الداخلية اللى كان مبتسم وبيقول كله تمام كله سليم

ربنا ينصر المظلوم ويخزى الظالم

شكرا لمرورك وتعليقك

الميكروباص said...

كانت التغطيه هتكون أكبر من جانب قنوات الاخبار لولا احداث لبنان اللي كان الضوء عليها بشكل مستمر لأنها كانت اكثر سخونه او القنوات كانت منتظره بدايه لحرب أهليه أو انهم يطلعوا من هناك بحاجه جامده
وكمان لأن التجمع بدأ في مصر متأخر، ده بالنسبه لقنوات الاخبار
اما دريم وغيرها فالكلام عليهم يعطي لهم قيمه

بس فيه حاجه حصلت يا باشا
صحيح انا لم أخرج في المظاهره
لكن من خرج للتظاهر كان من أجل مصر
ومن تحدث عن المظاهره خارج مصر قال المصريين عملوا احتجاج
يعني اللي خرج خرج عشان مصر
بقولك ده لن فيه واحد الحقيقه كتب موضوع "عني على وجه الخصوص" لأنه قرأ رد لي على الفيس بوك معجبوش واصفا اللي مخرجش زي حلاتي بأني "رجل تشريحيا" وأن هو القائد العظيم لمجرد ان هو خرج وانا لم أخرج
وده اللي انا كنت منتظره وعامل حسابه
انت ربنا وقفك وقمت بعمل عظيم كلنا اشدنا به
فلا داعي من الهجوم على غيرك وإظهار نفسك بأنك البطل الاوحد ولا شريك لك على الاراضي المصريه
ومفيش حد اخد باله ان الحاله اللي المصريين عليها الآن احنا شاركنا فيها وبقوه لأننا بنكتب على النت من 10 سنين تقريبا
لكن هقولك ايه- احنا عقولنا مش هاتتغير ابدا

Foxology said...

لورنس العرب

مظنش ان فى دولة ( محترمة ) بتفضل انها تتابع اخبار دولة تانية وهى اساسا عندها اللى يكفيها من اخبار لمدة سنة قدام على الاقل :)

البطل المغوار عادى النماذج كتيرة من دى واللى عاوز يعمل حاجة بيخليه ف نفسه فعلا وميقولش على غيره انه وانه وانه وكلامك مظبوط

شكرا لمرورك وتعليقك ويارب العجلة تفضل دايرة

إنسان || Human said...

مش عارف أقولك إيه ,,,أكيد حزين بس الحزن ده طالع منه شعاع أمل
اليوم بدأ هادئ وانتهى عنيفاً ودامياً

Foxology said...

Hu-man

لعل الحزن يكون آخره أمل

شكرا لمرورك وتعليقك